27. ୨୭. ନେଗି ଶମିରୋଣ ଗଡ଼୍ତି ଲୋକୁଦି କାତାନି
ଅର୍ନେଣ୍ତ୍, ଅରେନ୍ ମାପ୍ରୁଦି ନିୟମ୍ ଶାସ୍ତ୍ରଦିଙ୍ଗ୍ ନେସ୍ତିକାନ୍ ଯିଶୁଦି ଡାଗ୍ରୁ ୱାତାନ୍। ଯିଶୁ ସେଇୱାଜା ସିକିୟା ସିଜିନାନ୍ ଇଜି ୱିଜେରିଙ୍ଗ୍ ତର୍ପ୍ନି ୱାନ୍ଦିଙ୍ଗ୍ ୱାଣ୍ତ୍ରୁ ମାନ୍ସୁକିଜିମାର୍ହାନ୍। ଇୟାୱାନ୍ଦିଙ୍ଗ୍ ୱାଣ୍ତ୍ରୁ ୱେନ୍ବାତାନ୍, “ ଏ ଗୁରୁ ୱିଜ୍ଇଜିଉ ପୁଟ୍ନିୱାନ୍ଦିଙ୍ଗ୍ ନାନୁ ଇନିକା କିନା?” ଯିଶୁ ଉତର୍ ସିତାନ୍, “ମାପରୁ ନିୟମ୍ଦୁ ଇନିକା ରାସାତାମାନାତ୍?”
ଆୟା ନିୟମ୍ ଶାସ୍ତ୍ରଦିଙ୍ଗ୍ ନେସ୍ତିକାନ୍ ଉତର୍ ସିତାନ୍, ମାପ୍ରୁଦି ନିୟମ୍ ୱେହ୍ନାତ୍ ଜେ “ନିନୁ ପ୍ରବୁ ନିଜେ ମାପ୍ରୁଦିଙ୍ଗ୍, ୱିଜୁ ମାନ୍ସୁ ମାରି ୱିଜୁ ଜିଉ ମାରି ୱିଜୁ ଶାକ୍ତିସିଜି ଜିଉନୋଦୁ। ମାରି ମିରୁ ଡାଗ୍ରୁହି ଲୋକାଙ୍ଗ୍ ନିଜେଦିଙ୍ଗ୍ ଜିଉନୋତିୱାଜା ଜିଉନୋଦୁ। ଯିଶୁ ଉତର୍ ସିତାନ୍ “ନିନୁ ନିକାମେ ନେ ୱେର୍ତି ମାନି! ଆହୁଇଙ୍ଗାଁ ନିନୁ ଇୟାୱାଜା କିନି ଏସେଙ୍ଗ୍ୱିଜ୍ଇଜିଉ ପାଏଆନି।”
ମାରି ୱାଣ୍ତ୍ରୁ ନିୟମ୍ ଶାସ୍ତ୍ରଦିଙ୍ଗ୍ ନେସ୍ତିକାନ୍ ଲୋକାଙ୍ଗ୍ ତର୍ପ୍ତେଙ୍ଗ୍ ମାନ୍ସୁକିଜି ମାର୍ହାନ୍ ଜେ ୱାନି ଜିନି ଜିଉ ସାରି ନେଗେଣ୍ତ ମାର୍ହାତ୍। ଆୟାୱାନ୍ଦିଙ୍ଗ୍ ୱାଣ୍ତ୍ରୁ ଯିଶୁଦିଙ୍ଗ୍ ୱେନ୍ବାତାନ୍, “ନେଗେଣ୍ଡ୍ ମାନାତ, ମାରି ନାଡାଗ୍ରୁହି ଲୋକୁ ଏୟେର୍?"
ଯିଶୁ ନିୟମ୍ ଶାସ୍ତ୍ରଦିଙ୍ଗ୍ ନେସ୍ତିୱାନିଙ୍ଗ୍ ଉଣ୍ତ୍ରେ କାତାନି ୱେହ୍ସି ଉତର୍ ସିତାନ୍। “ଅରେନ୍ ଯିହୁଦି ଲୋକୁ ମାର୍ହାନ୍ ୱାଣ୍ତ୍ରୁ ଉଣ୍ତ୍ରେସାରି ସିଜି ଯିରୁଶାଲାମ୍ଦାନ୍ ଯିରିହୋଦୁ ସନ୍ସିମାର୍ହାନ୍।
“ମାରି ଏସୋ ଡାକୁର୍ ୱାନିଙ୍ଗ୍ ସୁଡ଼୍ତାର୍ ମାରି ୱାନି ମୁସ୍କୁ ଡାକ୍ତେଙ୍ଗ୍ ଆସ୍ତାର୍। ୱାନିଡାଗ୍ରୁ ମାନି ୱିଜୁ ସାମାନ୍କୁ ୱାରୁ ଅତାର୍ ମାରି ୱାନିଙ୍ଗ୍ ସାନି ୱାଜା ମାଡ୍ ଡ଼େଇତାର୍। ଦାନିୱେନ୍କା ୱାରୁ ସର୍ହାର୍।”
“ଇୟାୱେନ୍କା, ଅରେନ୍ ଯିହୁଦି ଯାଜକ ଆୟା ସାରି ସିଜି ସନ୍ସି ମାର୍ହାନ୍। ଆୟା ଯାଜକ ଆୟା ଲୋକୁଦିଙ୍ଗ୍ କାଣ୍ତିଆକାବ୍ରା ଆଜି ସାରିଦୁ ଆର୍ତିମାହିକା ସୁଡ଼୍ତାନ୍। ଏସ୍ତିୱାଲେ ୱାଣ୍ତ୍ରୁ ୱାନିଙ୍ଗ୍ ସୁଡ଼୍ତାନ୍ ୱାଣ୍ତ୍ରୁ ଆଇ ସାରି ସିଜି ଆୟାପାଡ଼୍କାହାନ୍ ସର୍ହାନ୍। ୱାଣ୍ତ୍ରୁ ଆୟା ଲୋକୁଦିଙ୍ଗ୍ ସୁଡ଼୍ଏଣ୍ତାୱାଜା ଆଜି ସର୍ହାନ୍।”
“ଦାନିୱେନ୍କା ଏସୋ ୱେଡ଼ାସଇ ୱେନ୍କା, ଆୟା ସାରି ସିଜି ଅରେନ୍ ଲେବୀ ୱାତାନ୍।(ଲେବୀୟର୍ ଆଜିନାର୍ ଉଣ୍ତ୍ରେ ଯିହୁଦିରି ଉଣ୍ତ୍ରେ ଜାତି ଏୟେର୍ଗି ଯାଜକ୍ରିଙ୍ଗ୍ ମନ୍ଦିରଦୁ ସାହାଯ୍ୟ କିଜିମାର୍ହାନ୍।) ଆୟା ଲେବୀ ବା ଆଇ ସାରି ସିଜି ସହାନ୍। ୱାଣ୍ତ୍ରୁ ବା ଆୟା ଲୋକୁଦିଙ୍ଗ୍ ସୁଡ଼୍ଜି ସୁଡ଼୍ଇୱାଜା ଆଜି ସର୍ହାନ୍।”
“ମାରି ଆଇ ଅରେନ୍ ଆୟା ସାରି ସିଜି ୱାତାନ୍ ୱାଣ୍ତ୍ରୁ ସାମରିୟା ଗଡ଼୍ତି ଅରେନ୍ ଲୋକୁ ମାର୍ହାନ୍। (ଶମିରିୟାଦି ଲୋକୁ ମାରି ଯିହୁଦାତି ଲୋକୁ ୱାରି-ୱାରିଲୋଇ କାରାଇଜି ମାର୍ହାର୍।) ମାରି ଆୟା ଶମିରୋଣୀୟ ଲୋକୁ ସାରିଦୁ ସୁଡ଼୍ତାନ୍। ୱାଣ୍ତ୍ରୁ ସୁଡ଼୍ତାନ୍ ଜେ ୱାଣ୍ତ୍ରୁ ଅରେନ୍ ଯିହୁଦି ଲୋକୁ ମାର୍ହାନ୍, ମାତର୍ ଆତିଙ୍ଗାଁ ବା ୱାନିଙ୍ଗ୍ ଦୟା କିତାନ୍। ମାରି ୱାଣ୍ତ୍ରୁ ୱାନି ଡାଗ୍ରୁ ସର୍ହାନ୍ ମାରି ୱାନି ଗାଉକାଙ୍ଗ୍ ୱିଜୁ ତହ୍ତାନ୍।”
“ଦାନିୱେନ୍କା ଆୟା ଶମିରୋଣୀୟ ଆୟା ଲୋକୁଦିଙ୍ଗ୍ ନିକ୍ସି ନିଜେ ଗଦ ମୁସ୍କୁ ବାସାକିତାନ୍ ମାରି ୱାନିଙ୍ଗ୍ ସାରି ଡାଗ୍ରୁହି ମେଡିକାଲ୍ଦୁ ଅତାନ୍ ଏମେବାନୁଗି ୱାଣ୍ତ୍ରୁ ୱାନି ଜତନ୍ କିଦେଙ୍ଗ୍ ଆସ୍ତାନ୍।”
“ଦାନି ୱେନ୍କାହି ଦିନାମ୍, ଆୟା ଶମିରୋଣୀୟ ଲୋକୁ ସନ୍ଣ୍ଡ୍ରେଙ୍ଗ୍ ମାର୍ହାତ୍। ୱାଣ୍ତ୍ରୁ ମେଡିକାଲ୍ତି ଲୋକୁଦିଙ୍ଗ୍ ଏସୋ ଇନି ଡାବୁ ସିତାନ୍। ମାରି ୱାଣ୍ତ୍ରୁ ୱାନିଙ୍ଗ୍ ୱେର୍ତାନ୍, “ଇୟା ଲୋକୁଦି ଜତନ୍ ଅଆ। ଜଦି ଇୟା ଡାବୁଦାନ୍ ନି ନାଣ୍ତୋ ଡାବୁ କାର୍ସୁ ଆନାତ୍, ମାରି ନାନୁ ଡ଼େସିୱାନି ୱାଲେ ନାନୁ ସିନା।”
ଦାନିୱେନ୍କା ଯିଶୁ ଆୟା ମାପ୍ରୁଦି ନିୟମ୍ ଶାସ୍ତ୍ରଦିଙ୍ଗ୍ ନେସ୍ତିୱାନିଙ୍ଗ୍ ୱେନ୍ବାତାନ୍, “ନିନୁ ଇନିକା ଅଡ଼୍ବିଜିନି? ଇୟା ମୁଏରି ଲୋଇହାନ୍ ଏୟେନ୍ ୱାରି ଡାଗ୍ରୁହି ଲୋକୁ ଏୟେନ୍, ଏୟେଙ୍ଗ୍ ଡାକ୍ତାର୍ ମାରି ଡାବୁ ଡ଼ିବିସ୍ତା ଅତାମାର୍ହାର୍? ୱାଣ୍ତ୍ରୁ ଉତ୍ତର ସିତାନ୍, “ଏୟେନ୍ଗି ୱାନିୱାନ୍ଦିଙ୍ଗ୍ ଦୟା ତର୍ପ୍ତାମାର୍ହାନ୍ ୱାଣ୍ତ୍ରୁନେ।” ଯିଶୁ ୱାନିଙ୍ଗ୍ ୱେର୍ତାନ୍, “ନିନୁ ବା ସନ୍ହା ମାରି ଆୟାୱାଜା କିଆ।”
ବାଇବଲ୍ଦି ଉଣ୍ତ୍ରେ କାତା ଲୁକ୧୦:୨୫-୩୭
Free to use, adapt, and share under an open license (CC BY-SA 4.0).