28. ୨୮. ଶାସନ୍ କିନି ଦନି ମୁର୍‌ଲି

ଅର୍‌ନେଣ୍ଡ୍, ଅରେନ୍ ଜିହୁଦି ଦନିମୁର୍‌ଲି ଯିଶୁଦି ଡାଗ୍‌ରୁ ୱାତାନ୍ ମାରି ୱାନିଙ୍ଗ୍ ୱେନ୍‌ବାତାନ୍, “ଏ ନେଗି ଗୁରୁ,ଏସେଙ୍ଗ୍‌ୱିଜ୍‌ଇ ଜିଉ ପାଏଆନି ୱାନ୍ଦିଙ୍ଗ୍ ନାନୁ ଇନିକା କିଦେଙ୍ଗ୍ ମାନାତ୍‌?” ଯିଶୁ ୱାନିଙ୍ଗ୍ ୱେର୍‌ତାନ୍ “ନାଙ୍ଗିଁ ଇନିଦାନିଙ୍ଗ୍ ନେଗିକା ୱେର୍‌ସିନି?” ଅରେନ୍ ମାତର୍ ନେଗିକାନ୍ ମାରି ୱାଣ୍ତ୍ରୁ ଆଜିନାନ୍ ମାପ୍‌ରୁ। ମାତର୍‌ ନିନୁ ଜଦି ଏସେଙ୍ଗ୍‌ୱିଜ୍‌ଇଜିଉ ପାଏଆଦେଙ୍ଗ୍‌ ମାନ୍‌ସୁ କିଜିନି ମାରି ମାପ୍‌ରୁଦି ନିୟମ୍ ମାନାଆ।”

“ୱାଣ୍ତ୍ରୁ ୱେନ୍‌ବାତାନ୍, ଏମେ-ଏମେ ନିୟମ୍ ନାନୁ ମାନାଦେଙ୍ଗ୍ ମାନାତ୍‌?” ୱାଣ୍ତ୍ରୁ ୱେନ୍‌ବାତାନ୍। ଯିଶୁ ଉତର୍ ସିତାନ୍, ସାୟାମାର୍‌ଗା ଡ଼େଇମାଟ୍। ଦାରିପାଣି କିମାଟ୍। ଡଙ୍ଗାଁ ପାଣି କିମାଟ୍। ବାଣ୍ଡିସ୍ ମାଟ୍। ନିଜେ ବୁବା ମାରି ୟାୟାଦିଙ୍ଗ୍ ଜିଉନୋଦୁ, ମାରି ନିଜେଦି ଡାଗ୍‌ରୁହି ଲୋକାଙ୍ଗ୍ ନିଜେଦିଙ୍ଗ୍ ଜିଉନୋତିୱାଜା ଜିଉନୋଦୁ।”

ମାରି ଆୟା ମୁର୍‌ଲି ୱାନିଙ୍ଗ୍ ୱେର୍‌ତାନ୍, “ନାନୁ ଇଜ୍‌ରି ୱାଲେରାନ୍ ଇୟାୱିଜୁ ମାନାଜିୱାଜିନା। ଏସେଙ୍ଗ୍‌ୱିଜ୍ଇଜିଉ ପାଏଆନି ୱାନ୍ଦିଙ୍ଗ୍ ନାଙ୍ଗିଁ ମାରି ଇନିକା କିଦେଙ୍ଗ୍‌ ମାନାତ୍?” ଯିଶୁ ୱାନି ମୁସ୍‌କୁ ସୁଡ଼୍‌ଜି ୱାନିଙ୍ଗ୍‌ ଜିଉ ନୋତାନ୍।

ଦାନିୱେନ୍‌କା ଯିଶୁ ଉତର୍ ସିତାନ୍, “ଜଦି ନିନୁ ପବିତ୍ର ଆଦେଙ୍ଗ୍ ମାନ୍‌ସୁ କିଜିନି, ମାରି ସନ୍‌ଆ ମାରି ନି ୱିଜୁ ସମ୍ପତି ପର୍‌ଆ ମାରି ଆୟାଡାବୁ କାକୁର୍ତି ଲୋକାଙ୍ଗ୍ ସିଆ, ମାରି ନିନୁ ସର୍‌ଗଦୁ ଦନ୍ ପାଏଆନି। ଦାନିୱେନ୍‌କା ୱାଜି ନା ୱେନ୍‌କା ବୁଲାଆ।”

ଏସ୍ତିୱାଲେ ଆୟା ମୁର୍‌ଲି ଯିଶୁଦି ମାଟା ୱେର୍‌ହାନ୍, ୱାଣ୍ତ୍ରୁ ନାଣ୍ଡୋ ଦୁକାମ୍ ଆତାନ୍, ମାତର୍ ୱାଣ୍ତ୍ରୁ ପେରି ଦନି ମାର୍‌ହାନ୍ ମାରି ନିଜେ ଉଣ୍ଡାକିତି ମାହି ୱିଜୁ ସମ୍ପତି ଡ଼ିସ୍‌ତେଙ୍ଗ୍ ମାନ୍‌ସୁ କିଏଜିମାର୍‌ହାନ୍‌। ୱାଣ୍ତ୍ରୁ ମୋକମ୍ ମାହ୍‌ସି ଯିଶୁଦିବାଣାନ୍ ସର୍‌ହାନ୍।

ଦାନିୱେନ୍‌କା ଯିଶୁ ୱାନି ସିସୁରିଙ୍ଗ୍ ୱେର୍‌ତାନ୍, “ଦନି ଲୋକୁ ମାପ୍‌ରୁଦି ରାଜିଦୁ ଡ଼ୁଗ୍‌ଦେଙ୍ଗ୍ ନାଣ୍ଡୋ କାସ୍‌ଟାମ୍! ନିଜାମେ, ଅରେନ୍ ଦନି ଲୋକୁ ସର୍‌ଗଦୁ ଡ଼ୁଗ୍‌ନି ବାଦ୍‌ଲୁ ସୁଜିଦି ବର ସିଜି ଉଟୁ ଡ଼ୁଗ୍‌ନିକା ଉସାସ୍।”

ଏସ୍ତିୱାଲେ ସିସୁର୍ ଯିଶୁଦି ମାଟା ୱେର୍‌ହାର୍, ୱାରୁ କାବା ଆତାର୍‌। ୱାଣ୍ତ୍ରୁ ୱେର୍‌ତାନ୍, “ମାରି ଜଦି ଇୟାୱାଜା ଆତିଙ୍ଗାଁ ମାରି ମାପ୍‌ରୁ ଏନେଟ୍‌ ରକିୟା କିନାନ୍‌?“

ଯିଶୁ ସିସୁରି ତରନ୍ ସୁଡ଼୍‌ଜି ୱେର୍‌ତାନ୍, “ଲୋକୁ ନିଜେଦିଙ୍ଗ୍ ରକିୟା କିଦେଙ୍ଗ୍ ଆଟ୍‌ଏର୍। ମାତର୍‌ ମାପ୍‌ରୁଦି ୱାନ୍ଦିଙ୍ଗ୍ ଏମେ ବିଷୟ୍ କିଦେଙ୍ଗ୍ ବା ଆଇକା ବା ଆନାତ୍‌।”

ପିତର ଯିଶୁଦିଙ୍ଗ୍ ୱେର୍‌ତାନ୍, “ମାପୁ ମି ସିସୁର୍ ୱିଜୁ ବିଷୟ ଡ଼ିସ୍‌ସି ନି ୱେନ୍‌କା ୱାତାମାନା। ମା ୱାନ୍ଦିଙ୍ଗ୍ ଇନି ପୁରସ୍‌କାର୍ ମାନ୍‌ଜିନାତ୍‌?”

ଯିଶୁ ଉତର୍ ସିତାନ୍, “ଏମେଲୋକୁ ନା ୱାନ୍ଦିଙ୍ଗ୍ ଇଲୁ, ତଡ଼ାନ୍‌, ଗାଡ଼୍‌ସି, ବୁବା, ୟାୟାଦିଙ୍ଗ୍ କଡ଼ କକ୍ରାରିଙ୍ଗ୍ ମାରି ଦନ୍ ଡ଼ିସ୍‌ନାମାନ୍‌ଜିନାନ୍‌ ମାରି ୱାଣ୍ତ୍ରୁ ଦାନିଙ୍ଗ୍‌ନି ୱାନ୍ଦା ଗୁଣ୍ ନାଣ୍ତୋ ପାଏଆନାନ୍। ମାରି ଏସେଙ୍ଗ୍‌ୱିଜ୍‌ଇଜିଉ ବା ପାଏଆନାନ୍‌। ମାତର୍‌ ପାର୍‌ତୁମ୍‌ଦୁମାନି ଏସୋ ଲୋକୁ ୱେନ୍‌କା ଆନାର୍, ମାରି ୱେନ୍‌କା ମାନି ଏସୋ ଲୋକୁ ଆଗ୍‌ଡ଼ି ଆନାର୍।”