30. ୩୦. ଯିଶୁ ଆଇଦୁ ୱେୟୁ ଲୋକାଙ୍ଗ୍ ଉଟ୍ପିସ୍ତାନ୍
ନାଣ୍ଡୋ ଆଇ-ଆଇ ନାହ୍କାଙ୍ଗ୍ ପ୍ରଚାର୍ କିଦେଙ୍ଗ୍ ମାରି ସିକିୟା ସିଦେଙ୍ଗ୍ ଯିଶୁ ୱାନି ପେରିତରିଙ୍ଗ୍ ପକ୍ତାନ୍। ଯିଶୁ ଏମେଡାଗ୍ରୁ ମାର୍ହାନ୍ ଆବେନୁ ୱାରୁ ଏସ୍ତିୱାଲେ ୱାତାର୍, ୱାରୁ ଇନିକା କିତାମାହାର୍ ଆୟାୱିଜୁ ୱାନିଙ୍ଗ୍ ୱେର୍ତାର୍। ଦାନିୱେନ୍କା ଯିଶୁ ୱାରିଙ୍ଗ୍ ସାମ୍ଦୁର୍ ଆୟାପାଡ଼୍କା ୱାନିୱାଲେ ଉଣ୍ଡ୍ରେ ସିମ୍ରା ବାଡିଦୁ ସନ୍ସି ଏସୋ ୱେଡ଼ା ରମ୍ନିୱାନ୍ଦିଙ୍ଗ୍ ୱେର୍ତାନ୍। ମାରି ୱାରୁ ଉଣ୍ଡ୍ରେ ଡଙ୍ଗାଦୁ ବାସ୍ତାର୍ ମାରି ସାମ୍ଦୁର୍ ଆୟାପାଡ଼୍କା ସର୍ହାର୍।
ମାତର୍ ଏମେକାର୍ ଆବେନୁ ଯିଶୁ ମାରି ୱାରି ସିସୁରିଙ୍ଗ୍ ଡଙ୍ଗାଦୁ ସନିକା ସୁଡ଼୍ତାମାର୍ହାର୍। ଲୋକୁ ଆକା ନେସ୍ସି ଆୟାପାଡ଼୍କା ସନିୱାନ୍ଦିଙ୍ଗ୍ ସାମ୍ଦୁର୍ ସିଜି ଉକ୍ସି ସର୍ହାର୍ ମାରି ୱାରୁ ଇନି ଆଗ୍ଡି ଇତାର୍। ମାରି ଯିଶୁ ମାରି ୱାରି ସିସୁର୍ ଏସ୍ତିୱାଲେ ଇତାର୍, ନାଣ୍ଡୋ ପେରି ଲୋକୁଗଲି ସାମ୍ଦୁର୍ ଆୟାପାଡ଼୍କା ୱାରୁ କାପ୍କିତା ମାର୍ହାର୍।
ଆଡ଼୍ସିକାଙ୍ଗ୍ ମାରି କଡ଼ କକ୍ରାରିଙ୍ଗ୍ ଡ଼ିସ୍ସି ୱାହି ମେମାର୍ଙ୍ଗୁଁ ପାଞ୍ଚ୍ ଅଜାର୍ଦାନ୍ ନାଣ୍ତୋ ମାର୍ହାର୍। ଯିଶୁ ଇୟା ଲୋକାମୁସ୍କୁ ନାଣ୍ଡୋ ଦୟା ଆତାନ୍। ମାତର୍ ଯିଶୁଦି ୱାନ୍ଦିଙ୍ଗ୍ ଗାଉଡ଼ୁ ସିଲି ମେଣ୍ତେଙ୍ଗାଁ ୱାଜା ମାର୍ହାର୍। ଇୟାୱାନ୍ଦିଙ୍ଗ୍ ୱାଣ୍ତ୍ରୁ ୱାରିଙ୍ଗ୍ ସିକିୟା ସିତାନ୍ ମାରି ୱାରିଲୋଇହାନ୍ ଏସୋଲୋକୁ ରୋଗ୍ଦୁ ମାହାର୍ ୱାରିଙ୍ଗ୍ ନେଗେଣ୍ଡ୍ କିତାନ୍।
ଇକା ମିଲି ମିଲିହି ୱେଡାଦୁ, ସିସୁର୍ ଯିଶୁଦିଙ୍ଗ୍ ୱେର୍ତାର୍ “ୱେଡ଼ା ନାଣ୍ଡୋ ଆଜିନାତ୍ ମାରି ଡାଗ୍ରୁ-ଡାଗ୍ରୁ ଇନି ଗଡ଼୍ବା ସିଲେତ୍। ଇୟା ଲୋକାଙ୍ଗ୍ ପୋକ୍ଆ ଏମେୱାଜା ୱାରୁ ସନ୍ସି କାଣ୍ଡେକ୍ ଉଣ୍ଡେକ୍ କଡ଼୍ନାର୍।”
ମାତର୍ ଯିଶୁ ସିସୁରିଙ୍ଗ୍ ୱେର୍ତାନ୍ “ମିରୁ ୱାରିଙ୍ଗ୍ କାଣ୍ଡେକ୍ ଉଣ୍ଡେଙ୍ଗ୍ ସିଦୁ! “ୱାରୁ ଉତର୍ ସିତାର୍ “ମାପୁ ଇକା ଏଣ୍ତେସ୍ କିଦେଙ୍ଗ୍ ଆଟ୍ଏପ୍। ମା ଡାଗ୍ରୁ ମାରି ଆଇଦୁ ରୁଟି ମାରି ରୁଣ୍ଡି ନିସ୍ରି ମିନ୍କୁ ମାନେ।”
ଯିଶୁ ନିଜେଦି ସିସୁରିଙ୍ଗ୍ ୱେହ୍ତାନ୍ ଲୋକାଙ୍ଗ୍ ୱେହ୍ତୁ ଲାଟା ମୁସ୍କୁ ପଚାସ୍ ପଚାସ୍ କିଜି ଦଲ୍ ଆଜି ବାସାନାର୍।
ଦାନିୱେନ୍କା ଯିଶୁ ଆୟା ଆଇଦୁ ରୁଟି ମାରି ରୁଣ୍ଡି ମିନ୍କାଙ୍ଗ୍ ଅସି ସାର୍ଗି ତରିନ୍ ସୁଡ଼୍ତାନ୍, ମାରି ମାପ୍ରୁଦିଙ୍ଗ୍ ଖାଦି ୱାନ୍ଦିଙ୍ଗ୍ ଦନ୍ୟବାଦ୍ ସିତାନ୍।
ଦାନିୱେନ୍କା ଯିଶୁ ରୁଟି ମାରି ମିନୁଦିଙ୍ଗ୍ ମୁକା ମୁକା କିତାନ୍। ୱାଣ୍ତ୍ରୁ ମୁକା ରୁଟିଙ୍ଗାଁ ଲୋକାଙ୍ଗ୍ ବାଟାକିନିୱାନ୍ଦିଙ୍ଗ୍ ସିସୁରିଙ୍ଗ୍ ସିତାନ୍। ସିସୁର୍ ଆୟା ଖାଦିଦିଙ୍ଗ୍ ବାଟାକିଜି ବୁଲାତାର୍, ମାରି ଆକା ଏସେଙ୍ଗ୍ ୱିଜ୍ଏତାତ୍! ଆୟାୱିଜୁ ଲୋକୁ ଉଣ୍ଜି ସାନ୍ତି ଆତାର୍।
ଦାନିୱେନ୍କା, ସିସୁର୍ ଆୟା ଖାଦିଦିଙ୍ଗ୍ ଉଣ୍ତାକିତାରା ଏମେ ଖାଦିଦିଙ୍ଗ୍ ଲୋକୁ ଉଣ୍ତେଙ୍ଗ୍ ଆଟ୍ଏତାର୍ ମାରି ଆକା ବାର ଡାଡ଼ି ଆତାମାର୍ହାତ୍। ଆୟାୱିଜୁ ଖାଦି ଆଇଦୁ ରୁଟି ମାରି ରୁଣ୍ଡି ମିନ୍କାଣାନ୍ ୱାତାମାର୍ହାତ୍।
ବାଇବଲ୍ଦି ଉଣ୍ଡ୍ରେ କାତାନି :ମାଥିଉ୧୪:୧୩-୨୧; ମାର୍କ ୬:୩୧-୪୪;ଲୁକ ୯;୧୦-୧୭; ଯୋହନ ୬:୫-୧୫
Free to use, adapt, and share under an open license (CC BY-SA 4.0).