31. ୩୧. ଯିଶୁ ଏରୁ ମୁସ୍‌କୁ ବୁଲାତାନ୍‌

ଯିଶୁ ଆଇଦୁ ୱେୟୁ ଲୋକାଙ୍ଗ୍ ଉଟ୍‌ପିସ୍‌ତି ୱେନ୍‌କା, ଯିଶୁ ନିଜେଦି ସିସୁରିଙ୍ଗ୍ ଡଙ୍ଗାଦାନ୍‌ ସନିୱାନ୍ଦିଙ୍ଗ୍ ୱେର୍‌ତାନ୍। ମିରୁ ଡଙ୍ଗା ଡାଗ୍‌ରୁ ସଣ୍ତ୍ରୁ। ୱାଣ୍ତ୍ରୁ ୱାରିଙ୍ଗ୍ ୱେର୍‌ତାନ୍ ସମ୍‌ଦୁର୍ ଆୟାପାଡ଼୍‌କା ସନି ୱାନ୍ଦିଙ୍ଗ୍ ୱେର୍‌ତାନ୍ ମାରି ୱାଣ୍ତ୍ରୁ ଏସୋ ୱେଡ଼ା ଆବେନୁ ମାର୍‌ହାନ୍। ମାରି ସିସୁର୍ ସର୍‌ହାର୍, ମାରି ଯିଶୁ ଆୟା ଲୋକାଙ୍ଗ୍ ୱାରି ଇଲ୍‌କାଙ୍ଗ୍ ସନି ୱାନ୍ଦିଙ୍ଗ୍ ୱେର୍‌ତାନ୍‌। ଇୟାୱେନ୍‌କା, ଯିଶୁ ପାର୍‌ତନା କିନିୱାନ୍ଦିଙ୍ଗ୍ ଉଣ୍ତ୍ରେ ଗରନୁ ମୁସ୍‌କୁ ସର୍‌ହାନ୍। ଯିଶୁ ଆବେ ଅରେନ୍‌ଡ୍ରେ ମାର୍‌ହାନ୍, ମାରି ୱାଣ୍ତ୍ରୁ ମିଲି ଆନି ସାନ୍ଦି ପାର୍‌ତନା କିତାନ୍।

ଆୟାୱେଡ଼ାଦୁ ସିସୁର୍ ନିଜେଦି ଡଙ୍ଗାଦୁ ସନ୍‌ସି ମାର୍‌ହାର୍‌, ମାରି ଗାଲି ୱାରିତରିନ୍ ନାଣ୍ତୋ ୱାଜି ମାର୍‌ହାତ୍। ନାଣ୍ତୋ ନାଡ଼ା ଆତି ୱେନ୍‌କା ବା ୱାରୁ ମାତର୍‌ ସାମ୍‌ଦୁର୍ ନାଡ଼୍‌ମି ଇତାମାର୍‌ହାର୍।

ଆୟାୱେଡ଼ାଦୁ ଯିଶୁ ପାର୍‌ତନା କିଦେଙ୍ଗ୍ ୱିସ୍‌ତାନ୍ ମାରି ନିଜେ ସିସୁରି ଡାଗ୍‌ରୁ ଡ଼େସି ସନ୍‌ଣ୍ତ୍ରେଙ୍ଗ୍ ସତାନ୍। ୱାଣ୍ତ୍ରୁ ଡଙ୍ଗା ତରିନ୍ ୱାନି ୱାନ୍ଦିଙ୍ଗ୍ ଏରୁ ମୁସ୍‌କୁ ବୁଲାତାନ୍!

ମାରି ସିସୁର୍ ୱାନିଙ୍ଗ୍ ସୁଡ଼୍‌ଜି ନାଣ୍ତୋ ତିଲାତାସର୍‌ହାର୍‌, ମାତର୍ ୱାରୁ ଅଡ଼୍‌ବିତାର୍ ଜେ ୱାଣ୍ତ୍ରୁ ଅରେନ୍ ଦୁବା। ଯିଶୁ ନେସ୍‌ତାନ୍ ଜେ ୱାରୁ ତିଲାତାମାର୍‌ହାର୍, ଇୟାୱାନ୍ଦିଙ୍ଗ୍‌ ୱାଣ୍ତ୍ରୁ ୱାରିଙ୍ଗ୍ କୁକ୍‌ସି ୱେର୍‌ତାନ୍ “ତିଲାମାଟ୍। ଇକାନ୍‌ ନାନୁ!”

ଦାନିୱେନ୍‌କା ପିତର୍ ଯିଶୁଦିଙ୍ଗ୍‌ ୱେର୍‌ତାନ୍, ଏ ପ୍ରବୁ ଇକାନ୍ ଜଦି ନିନୁ, ମାରି ନାଙ୍ଗିଁ ଏରୁ ମୁସ୍‌କୁ ବୁଲାଜି ନି ଡାଗ୍‌ରୁ ୱାଦେଙ୍ଗ୍‌ ଆଦେସ୍‌ ସିଦା। “ଯିଶୁ ପିତର୍‌ଦିଙ୍ଗ୍ ୱେର୍‌ତାନ ରାଆ!”

ମାରି ପିତର୍ ଡଙ୍ଗାଦାନ୍ ରେସି ଯିଶୁଦି ଡାଗ୍‌ରୁ ସନିୱାନ୍ଦିଙ୍ଗ୍‌ ଏରୁ ମୁସ୍‌କୁ ବୁଲାଦେଙ୍ଗ୍ ଆରାମ୍ କିତାନ୍। ମାରି ଏସୋ ଆକୋ ବୁଲାତି ୱେନ୍‌କା, ୱାଣ୍ତ୍ରୁ ଯିଶୁଦିଙ୍ଗ୍‌ ସୁଡ଼୍‌ନିକା ଡ଼ିସ୍‌ସି ଉଲ୍‌କା ତରିନ୍ ସୁଡ଼୍‌ଦେଙ୍ଗ୍ ଆସ୍‌ତାନ୍ ମାରି ୱାଣ୍ତ୍ରୁ ନାଣ୍ତୋ ଗାଲି ୱାଜିନାତ୍ ଇଜି ଅଡ଼୍‌ବିତାନ୍।

ମାରି ପିତର୍ ତିଲାତାନ୍ ମାରି ଏରୁଦୁ ମୁଡ଼ୁଗ୍‌ଦେଙ୍ଗ୍ ଆସ୍‌ତାନ୍। ୱାଣ୍ତ୍ରୁ ଆଉଲି ଆଜି ୱେର୍‌ତେଙ୍ଗ୍ ଆସ୍‌ତାନ୍‌ “ଏ ପ୍ରବୁ, ନାଙ୍ଗିଁରକିୟା କିଆ!” ଯିଶୁ ଆୟାୱେଡ଼ା କିୟୁ ସାକ୍‌ସି ୱାନିଙ୍ଗ୍ ଆସ୍‌ତାନ୍। ଦାନିୱେନ୍‌କ ୱାଣ୍ତ୍ରୁ ପିତର୍‌ଦିଙ୍ଗ୍ ୱେହ୍‌ତାନ୍ “ଏ କକୋ ବିସ୍‌ବାସି ନିଙ୍ଗିଁ ନେଗେଣ୍ତା ରକିୟା କିନି ୱାନ୍ଦିଙ୍ଗ୍ ନା ଡାଗ୍‌ରୁ ଇନିଦାନିଙ୍ଗ୍ ବିସ୍‌ବାସ୍‌ କିଏତି?”

ଏସ୍ତିୱାଲେ ପିତର୍ ମାରି ଯିଶୁ ଡଙ୍ଗାଦୁ ଏକ୍‌ତାର୍, ଆୟାଦାପ୍ରେ ଗାଲି ଆଲେତାତ୍‌ ମାରି ଉଲ୍‌କା ବନ୍ଦ୍ ଆତାତ୍‌। ସିସୁର୍ କାବାଆଜି ଯିଶୁଦି ଆଗ୍‌ଡ଼ି ମେଣ୍ତେଙ୍ଗ୍ ଉରିତାର୍‌। ୱାରୁ ୱାନି ଆରାଦନା କିଜି ୱେର୍‌ତାର୍ “ନିକାମେ ନେ ନିନୁ ମାପ୍‌ରୁଦି ମାରିସି।”