32. ୩୨. ଯିଶୁ ଅରେନ୍ ଦୁବା ଆସ୍ତିଲୋକୁଦିଙ୍ଗ୍ ମାରି ଅରେତ୍ ରୋଗ୍ତି ଆଡ଼୍ସିଦିଙ୍ଗ୍ ନେଗେଣ୍ଡ୍ କିନାନ୍
ଯିଶୁ ମାରି ୱାନି ସିସୁର୍ ଉଣ୍ଡ୍ରେ ଡଙ୍ଗାଦୁ ଏକ୍ସି ଗରାଶିୟ ଲୋକୁ ମାନ୍ଜିନି ବାଡିଦୁ ସର୍ହାର୍। ୱାରୁ ଆବେନୁ ଇତାର୍ ନେ ଡଙ୍ଗାଦୁ ରେତାର୍।
ଆବେନୁ ଅରେନ୍ ଲୋକୁ ମାର୍ହାନ୍ ଏୟେଙ୍ଗ୍ଗି ଦୁବା ଆସ୍ତା ମାର୍ହାତ୍।
ଇୟା ଲୋକୁ ଏସୋ ସାତୁମାର୍ହାନ୍ ଜେ ଏୟେର୍ ବା ୱାନିଙ୍ଗ୍ ଆସ୍ସି ଆଲେକିଦେଙ୍ଗ୍ ଆଟ୍ଏଜି ମାର୍ହାର୍। ନାଣ୍ତୋ ଜାରିଙ୍ଗ୍ ଲୋକୁ ୱାନି କିକାଙ୍ଗ୍ ମାରି କାଲ୍କାଙ୍ଗ୍ ସିକ୍ଣିଦାନ୍ ତହ୍ତାମର୍ହାର୍, ମାତର୍ ୱାଣ୍ତ୍ରୁ ଆୟାୱିଜୁ ତେଉଜି ପୋକ୍ସି ମାର୍ହାନ୍।
ଆୟା ଲୋକୁ ଆୟା ନାହ୍କାଙ୍ଗ୍ ମାନି ଦୁକିଦୁ ମାର୍ନ୍ଜି ମାର୍ହାନ୍। ଇୟା ଲୋକୁ ୱେଡ଼େ ନାଡ଼ା ଆଉଲି ଆଜିମାର୍ହାନ୍। ୱାଣ୍ତ୍ରୁ ସକେଙ୍ଗ୍ ଆରାଏଜି ମାର୍ହାନ୍ ମାରି ଜାରିଦିଙ୍ଗ୍ ଜାରି ନିଜେଦିଙ୍ଗ୍ କାଲ୍କାଣାନ୍ ଡ଼େୟାଜି ମାର୍ହାନ୍।
ଇୟା ଲୋକୁ ଯିଶୁଦିନ୍ ସୁଡ଼୍ତି ଦାପ୍ରେ ୱାଣ୍ତ୍ରୁ ଯିଶୁଦି ଡାଗ୍ରୁ ଉହ୍ସି ୱାତାନ୍ ମାରି ୱାଣ୍ତ୍ରୁ ୱାନି ଏଦ୍ରୁ ମେଣ୍ତେଙ୍ଗ୍ ଉରିତାନ୍। ମାରି ଯିଶୁ ଆୟା ଲୋକୁଦି ଲୋଇମାହି ତାଗ୍ଇ ଆତ୍ମାୱାଲେ ୱାର୍ଗିଜି ୱେର୍ତାନ୍, “ଇୟା ଲୋକୁଦି ବାଣାନ୍ ସୋସିରାଆ!”
ଦୁବାଆସ୍ତି ଲୋକୁ ନାଣ୍ଡୋ ଆଉଲି ଆଜି ୱେର୍ତାନ୍ “ଏ ପେରିମାପ୍ରୁଦି ମାରିନ୍ ଯିଶୁ ନିୱାଲେ ନାଦି ଇନିପାଣି ମାନାତ୍?” ଦୟାକିଜି ନାଙ୍ଗିଁ କାସ୍ଟାମ୍ ସିମା!” ଦାନିୱେନ୍କା ଯିଶୁ ଆୟା ଦୁବାଦିଙ୍ଗ୍ ୱେନ୍ବାତାନ୍ “ନିଦୋରୁ ଇନିକା? ୱାଣ୍ତ୍ରୁ ଉତର ସିତାନ୍ “ନାଦୋରୁ ବାହିନି, ମାତର୍ ମାପୁ ନାଣ୍ଡୋ।” (ରୋମିୟ ସେନାଦୁ ଅଜାର୍ ଅଜାର୍ ସେନାରି ଉନ୍ଡ୍ରେ ମାନ୍ଦାଦିଙ୍ଗ୍ ବାହିନି ୱେହ୍ସି ମାର୍ହାର୍।)
ଆୟା ତାଗ୍ଇଆତ୍ମେଙ୍ଗ୍ ଯିଶୁଦିଙ୍ଗ୍ ବାତିମାଲ୍ଜି ୱେହ୍ତେ “ଦୟାକିଜି ମାଙ୍ଗିଁ ଇୟା ନାହ୍କାଣାନ୍ ଆତ୍ରେ ପକ୍ମା!” ଆୟା ଡାଗ୍ରୁହି ଗୋରତୁ ପାନ୍ଣ୍ଡ୍ରିଙ୍ଗାଁଣି ମାନ୍ଦା ସାରାଜିମାହେ। ଇୟାୱାନ୍ଦିଙ୍ଗ୍ ଆୟା ଦୁବେଙ୍ଗାଁ ଯିଶୁଦିଙ୍ଗ୍ ବାତିମାଲିତେ, ଦୟାକିଜି ମାଙ୍ଗିଁ ଆୟା ପାନ୍ଣ୍ଡ୍ରିଙ୍ଗାଁ ଲୋଇ ପୋକ୍ଆ!” ଯିଶୁ ୱେହ୍ତାନ୍ ଟିକ୍ ମାନାତ୍, ୱାନ୍କା ଲୋଇ ସନ୍ଆ!”
ମାରି ତାଗ୍ଇଆତ୍ମେଙ୍ଗ୍ ଆୟା ଲୋକୁଦି ବାଣାନ୍ ସସି ପାନ୍ଣ୍ଡ୍ରିଙ୍ଗାଁ ଲୋଇ ଡ଼ୁଗିତେ। ଆୟା ପାନ୍ଣ୍ଡ୍ରିଙ୍ଗ୍ ୱାହ୍ତି ବାଡିଦାନ୍ ଉକ୍ସି ସାମ୍ଦୁର୍ଦୁ ଡାଟ୍ସି ମୁଡୁଗ୍ଜି ସାତେ। ଆୟା ମାନ୍ଦା ପାକାପାକି ଦୁଇ ଅଜାର୍ ପାନ୍ଣ୍ଡ୍ରିଙ୍ଗ୍ ମାହେ।
ଏମେଲୋକୁ ପାନ୍ଣ୍ଡ୍ରିଙ୍ଗ୍ ଜାତୁନ୍ କିଜିମାର୍ହାର୍ ୱାରୁ ଏମେକା ଗଟେଆତାତ୍ ଆକା ସୁଡ଼୍ତାନ୍, ମାରି ୱାରୁ ଗଡ଼୍ଦୁ ଉହ୍ସିସର୍ହାର୍। ମାରି ଯିଶୁ ଇନିକା କିତାମାର୍ହାନ୍ ଆକା ୱାରୁ ୱିଜୁଲୋକାଙ୍ଗ୍ ନେସିସ୍ତାନ୍। ଆୟା ଗଡ଼୍ଦୁ ଲୋକୁ ସୋସି ୱାଜି ଆୟା ଲୋକୁଦିଙ୍ଗ୍ ସୁଡ଼୍ତାର୍ ଏମେୱାନିଙ୍ଗ୍ ଗି ତାଗ୍ଇଆତ୍ମା ଆସ୍ତାମାର୍ନାତ୍। ୱାଣ୍ତ୍ରୁ ଶାନ୍ତିଦାନ୍ ସକା ଆରାଜି ନେଗିମାନ୍ସୁଦୁ ବାସ୍ତା ମାର୍ହାନ୍।
ଲୋକୁ ନାଣ୍ଡୋ ତିଲାତା ମାର୍ହାର୍ ମାରି ୱାରୁ ନାରୁଦାନ୍ ଯିଶୁଦିଙ୍ଗ୍ ସୋନିସନି ୱାନ୍ଦିଙ୍ଗ୍ ୱେର୍ତାନ୍। ମାରି ଯିଶୁ ଡ଼େସିସନି ୱାନ୍ଦିଙ୍ଗ୍ ଡଙ୍ଗାଁଦୁ ଏକ୍ତାନ୍। ଏମେଲୋକୁଦିଙ୍ଗ୍ ଦୁବାଆସ୍ତା ମାର୍ହାତ୍ ୱାଣ୍ତ୍ରୁ ଯିଶୁଦିୱାଲେ ସନିୱାନ୍ଦିଙ୍ଗ୍ ୱାନିଙ୍ଗ୍ ବାତିମାଲିତାନ୍।
ମାତର୍ ଯିଶୁ ୱାନିଙ୍ଗ୍ ୱେହ୍ତାନ୍ “ସିଲେ”। ନାନୁ ମାନ୍ସୁକିନା, ନିନୁ ଇନ୍ଡ୍ର ସନ୍ସି, ୱିଜେରିଙ୍ଗ୍ ୱେହ୍ଆ ମାପ୍ରୁ ନି ୱାନ୍ଦିଙ୍ଗ୍ ଏମେକା କିତାମାନାନ୍। ୱାରିଙ୍ଗ୍ ୱେହ୍ଆ ମାପ୍ରୁ ନିଙ୍ଗିଁ ଏମେୱାଜା ଦୟା ତର୍ପ୍ତାମାନାନ୍।
ଇୟାୱାନ୍ଦିଙ୍ଗ୍ ଆୟା ଲୋକୁ ୱାନି ସାରିଦୁ ସୋତାସର୍ହାନ୍ ମାରି ଯିଶୁ ୱାନିମୁସ୍କୁ ଇନି ଇନିକା କିତାମାହାନ୍ ଆୟା ୱିଜୁ ବିଷୟ ୱେର୍ତାନ୍। ଏମେକାର୍ ୱାନି ଗଟ୍ନା ୱେଆର୍ ୱାରୁ କାବାଆତାର୍।
ଯିଶୁ ସାମ୍ଦୁର୍ ଆୟାପାଡ଼୍କାଦାନ୍ ୱାତାନ୍। ୱାଣ୍ତ୍ରୁ ଆବେନୁ ଇତିୱେନ୍କା, ଉଣ୍ଡ୍ରେ ପେରି ଲୋକୁଗୋଲି ଉଣ୍ତାତାର୍ ମାରି ୱାନି ମୁସ୍କୁ ନେକ୍ସିସାଜିମାର୍ହାର୍। ଲୋକୁଗୋଲି ଲୋଇହାନ୍ ଆରେତ୍ ଆଡ଼୍ସି ପାନେଣ୍ତୁ ପାଟେଙ୍ଗ୍ ସାନ୍ଦି ନେତେର୍ ୱାଙ୍ଗ୍ଁନି କାସ୍ଟାମ୍ ମାର୍ହାତ୍। ୱାଦୁ ନିଜେଦି ୱିଜୁ ସମ୍ପତି ଡାକ୍ତର୍ରିଙ୍ଗ୍ ସିତାମାର୍ହାତ୍ ଏମେଦାଣାନ୍ଗି ଦାନିଙ୍ଗ୍ ନେଗେଣ୍ତ୍ କିଦେଙ୍ଗ୍ ଆଟ୍ନାର୍। ମାତର୍ ୱାନି କାସ୍ଟାମ୍ ଦିନାମ୍ଦିଙ୍ଗ୍ ଦିନାମ୍ ନାଣ୍ତୋ ଆଦେଙ୍ଗ୍ ଆସ୍ତାତ୍।
ୱାରୁ ୱେହାମାର୍ହାନ୍ ଜେ ଯିଶୁନାଣ୍ଡୋ ରୋଗ୍ଦି ଲୋକାଙ୍ଗ୍ ନେଗେଣ୍ଡ୍ କିଜିମାର୍ହାନ୍ ମାରି ୱାଦୁ ଅଡ଼୍ବିତାନ୍, ନାନୁ ନିକାମେନେ ଜେ ଜଦି ନାନୁ ମାତର୍ ଯିଶୁଦି ୱାତି ମୁଟ୍ନା, ମାରି ନାନୁ ନେଗେଣ୍ଡ୍ ଆନା!” ଇୟାୱାନ୍ଦିଙ୍ଗ୍ ୱାଦୁ ଯିଶୁଦି ୱେନ୍କାହାନ୍ ୱାଜି ୱାନିୱାତି ମୁଟ୍ନାନ୍। ୱାଦୁ ସକାଦିଙ୍ଗ୍ ମୁଟ୍ତାନ୍ ଦାପ୍ରେ ଦାନିନେତେର୍ ୱାଙ୍ଗ୍ଁନିକା ବନ୍ଦ୍ ଆତାତ୍ !
ଗାଜିବିଜି ଯିଶୁ ନେସ୍ତାନ୍ ଜେ ୱାନିବାଣାନ୍ ସାକ୍ତି ସତାୱାତାତ୍। ଇୟାୱାନ୍ଦିଙ୍ଗ୍ ୱାଣ୍ତ୍ରୁ ମାର୍ଜି ୱେନ୍ବାତାନ୍ “ଏୟେନ୍ ନାଇ ମୁଟ୍ତାନ୍” ସିସୁର୍ ଉତର ସିତାର୍, “ନାଣ୍ଡୋ ଲୋକୁ ନି ଚାରିବେଡ଼୍ତି ମାନାର୍ ମାରି ନି ମୁସ୍କୁ ନେକ୍ସି ସାଜିନାର୍। “ନାଙ୍ଗିଁ ଏୟେନ୍ ମୁଟ୍ତାନ୍?” ଇଜି ଇନିଦାନିଙ୍ଗ୍ ୱେନ୍ବାଜିନି?
“ଆୟା ଆଡ଼୍ସି ତିରିଗ୍ଜି-ତିରିଗ୍ଜି ନାଣ୍ଡୋ ତିଲାଜି ଯିଶୁଦି ଏଦ୍ରୁ ମେଣ୍ତେଙ୍ଗ୍ ଉରିତାତ୍। ମାରି ୱାଦୁ ଇନିକା କିତାମାର୍ହାତ୍, ଆୟାୱିଜୁ ୱାନିଙ଼୍ଗ ୱେହ୍ତାତ୍। ମାରି ଇକାବା ୱେହ୍ତାତ୍ ଜେ ୱାଦୁ ନେଗେଣ୍ତ୍ ଆତାମାନାତ୍। ଯିଶୁ ୱାନି ୱେର୍ତାନ୍ ନି ବିସ୍ବାସ୍ ମିଙ୍ଗିଁ ନେଗେଣ୍ଡ୍ କିତାତ୍। ସାନ୍ତିଦାନ୍ ସୋନ୍ଆ।”
ବାଇବଲ୍ଦି ଉଣ୍ଡ୍ରେ କାତାନି :ମାଥିଉ ୮:୨୮-୩୪; ୯:୨୦-୨୦; ମାର୍କ ୫:୧- ୨୦; ୫: ୨୪-୩୪; ଲୂକ ୮:୨୬-୩୯; ୮: ୪୨-୪୮
Free to use, adapt, and share under an open license (CC BY-SA 4.0).