33. ୩୩. ଦିନ୍‌ସୁ କିନି ଲୋକୁଦି କାତାନି

ଅର୍‌ନେଣ୍ତ୍, ଯିଶୁ ସାମ୍‌ଦୁର୍ ଗାଟୁଦି ଉଣ୍ଡ୍ରେ ନାଣ୍ଡୋ ଲୋକୁଗଲିଦୁ ସିକିୟା ସିଜି ମାର୍‌ହାନ୍। ନାଣ୍ଡୋ ଲୋକୁ ୱେନ୍‌ଣ୍ତ୍ରେଙ୍ଗ୍ ଯିଶୁଦି ଡାଗ୍‌ରୁ ୱାତାର୍ ଜେ ୱାରିଙ୍ଗ୍ ସିକିୟା ସିନି ୱାନ୍ଦିଙ୍ଗ୍‌ ଆବେନୁ ମାରି ବାଡି ସିଲେତାନ୍। ଆୟାୱାନ୍ଦିଙ୍ଗ୍ ୱାଣ୍ତ୍ରୁ ଗାଟୁଦି ଉଣ୍ଡ୍ରେ ଡ଼ଙ୍ଗାଦୁ ଏକ୍‌ତାନ୍। ୱାଣ୍ତ୍ରୁ ଆୟା ଡ଼ଙ୍ଗାଦୁ ବାସ୍‌ତାନ୍ ମାରି ଲୋକାଙ୍ଗ୍ ସିକିୟା ସିତାନ୍।

ଯିଶୁ ଇୟା କାତାନି ୱେର୍‌ତାନ୍। “ଅରେନ୍‌ ଦିନ୍‌ସୁ କିନିକାନ୍ ୱିତୁ ୱିତ୍‌ତେଙ୍ଗ୍ ସତାନ୍। ଏସେଙ୍ଗ୍ ୱାଣ୍ତ୍ରୁ କିୟୁଦାନ୍‌ ୱିତୁ ୱିତ୍‌ସିମାର୍‌ହାନ୍‌ ମାରି ଏସୋ ୱିତୁ ସାରିଦୁ ଆର୍‌ତେ। ମାରି ପଟିଙ୍ଗ୍ ୱାଜି ଆୟାୱିଜୁ ୱିତୁଦିଙ୍ଗ୍‌ ତିହେ।”

“ଆଇ ଏସୋ ୱିତୁ କାଲ୍‌କା ବୁମି ମୁସ୍‌କୁ ଆର୍‌ତେ, ଏମେବାନୁଗି କାଣ୍ଡେକ୍ ସିକ୍‌ଲା ମାର୍‌ହାତ୍। କାଲ୍‌କା ଭୁମିଦୁ ମାହି ୱିତୁ ଦାପ୍ରେ ଗାଜା ଆତାତ୍, ମାରି ଆୟା ଲେୱା ସିକ୍‌ଲା ଲୋହି ସଣ୍ଡ୍ରେଙ୍ଗ୍ ଆଟ୍ଏତାତ୍। ଏସ୍ତିୱାଲେ ୱେଡ଼ା ସତାତ୍ ମାରି ତେର୍‌ୱେଲ୍ ଆତାତ୍, ମାରାନୁ ୱାହ୍‌ତାତ ମାରି ସାତାତ୍।”

ମାରିବା ଆଇ ୱିତୁ ସାପ୍‌କା ବୁଟେଙ୍ଗାଁ ଲୋହି ଆର୍‌ତେ, ମାରି ଆୟା ୱିତୁ ପିରିଦେଙ୍ଗ୍ ଆସ୍‌ତେ, ମାରି ସାପ୍‌କୁ ୱିଜୁ ଦାନିଙ୍ଗ୍‌ ତିଗିତେ। ଇୟାୱାନ୍ଦିଙ୍ଗ୍‌ ସାପ୍‌କା ବୁମିଦୁ ୱିତୁଦାନ୍ ପିରିଜିମାହି ମାରାକୁ ଇନି ଫଲ୍‌ ଅସ୍‌ଉତେ।”

ଆଇ ଗିଡା ନେଗି ଭୁମିଦୁ ଆର୍‌ତାତ୍‌। ଆୟାଗିଡେଙ୍ଗ୍‌ ପିରିତେ ମାରି ଏସୋ ୱିତ୍‌ତାମାହାନ୍ ଆୟା ଗିଡେଙ୍ଗାଁ ମୁପାଇ ଗୁଣ୍ ମାରି ଆର୍‌ୱାଇ ଗୁଣ୍ ମାରି ଆୟାୱାଜା ନେ ୱାନ୍‌ନ୍ଦା ଗୁଣ୍ ସାନ୍ଦି ଫଲ୍ ଆସ୍‌ତାତ୍। ଏୟେନ୍‌ଗି ମାପ୍‌ରୁଦି ତରିନ୍ ସନ୍‌ଡ୍ରେଙ୍ଗ୍ ମାନ୍‌ସୁ କିନାନ୍‌, ନାନୁ ଏମେକା ୱେହ୍‌ସିନା ଦାନିଙ୍ଗ୍ ଗୁର୍‌ତୁ ସିଦୁ।”

ଇୟା କାତାନି ଶିସୁରିଙ୍ଗ୍ ଦାନ୍ଦାଦୁ ଆର୍‌ପ୍‌ତାତ୍। ମାରି ଯିଶୁ ବୁଜାକିତାନ୍‌, “ୱିତୁ ଆଜିନାତ୍ ମପ୍‌ରୁଦି ବାକ୍ୟ। ଆୟା ସାରି ଆଜିନାତ୍ ଅରେନ୍‌ଲୋକୁ ଏୟେନ୍ ମାପ୍‌ରୁଦି ବାକ୍ୟ ୱେନାନ୍, ମାତର୍ ଆୟା ବାକ୍ୟଦିଙ୍ଗ୍‌ ବୁଜାଦେଙ୍ଗ୍ ଆଟ୍‌ଏନ୍‌, ଦାନିୱେନ୍‌କା ସଇତାନ୍ ୱାନିବାଣାନ୍ ବାକ୍ୟଦିଙ୍ଗ୍ ଅନାତ୍। ମାତର୍ ସଇତାନ୍‌ ୱାନିଙ୍ଗ୍ ଆୟା ବାକ୍ୟ ବୁଜାଦେଙ୍ଗ୍ ସିଏତ୍।”

“କାଲ୍‌କା ବୁମି ଆଜିନାତ୍ ଅରେନ୍‌ଲୋକୁ ଏୟେନ୍ ମାପ୍‌ରୁଦି ବାକ୍ୟ ୱେନାନ୍, ମାରି ଦିନିଙ୍ଗ୍ ସାର୍‌ଦାଦାନ୍ ପାଏଆନାନ୍‌। ମାରି ଏସ୍ତିୱାଲେ ୱାଣ୍ତ୍ରୁ କାଷ୍ଟାମ୍ ଆନାନ୍, ମାରି ଏସ୍ତିୱାଲେ ଆଇକାର୍ ୱାନିଙ୍ଗ୍ ଦୁକ୍ ସିନାର୍, ୱାଣ୍ତ୍ରୁ ମାପ୍‌ରୁଦି ବାଣାନ୍ ଆକୋ ସନାନ୍‌। ମାରି ୱାଣ୍ତ୍ରୁ ମାପ୍‌ରୁଦି ମୁସ୍‌କୁ ବିସ୍‌ବାସ୍‌ କିଦେଙ୍ଗ୍ ବନ୍ଦ୍ କିନାନ୍‌।”

“ସାପ୍‌କୁ ବୁମି ଆଜିନାତ୍ ଅରେନ୍‌ଲୋକୁ ଏୟେନ୍ ମାପ୍‌ରୁଦି ବାକ୍ୟ ୱେନାନ୍। ମାତର୍ ୱାଣ୍ତ୍ରୁ ନାଣ୍ତୋ ଜିନିସ୍ ବିସୟ୍‌ଦାନ୍‌ ଆଡ଼୍‌ବିଦେଙ୍ଗ୍ ଆସ୍‌ତନ୍, ମାରି ନାଣ୍ତୋ ସମ୍ପତି ଉଣ୍ତାକିଦେଙ୍ଗ୍ ସେଷ୍ଟା କିନାନ୍‌, ମାରି ୱାଣ୍ତ୍ରୁ ନାଣ୍ତୋ ଜିନିସ୍ ପାଏଆଦେଙ୍ଗ୍ ସେଷ୍ଟା କିନାନ୍‌। ଏସୋ ୱେଡ଼ା ୱେନ୍‌କା, ୱାଣ୍ତ୍ରୁ ମାରି ମାପ୍‌ରୁଦିଙ୍ଗ୍ ଜିଉନୋଦେଙ୍ଗ୍ ଆଟ୍‌ଏନ୍। ଇୟାୱାନ୍ଦିଙ୍ଗ୍ ୱାଣ୍ତ୍ରୁ ମାପ୍‌ରୁଦି ବାକ୍ୟଦାନ୍ ଏମେକା ଅଜାତାନ୍ ଆକା ୱାନିଙ୍ଗ୍ ମାପ୍‌ରୁଦିଙ୍ଗ୍ ସାର୍‌ଦା କିଦେଙ୍ଗ୍ ଆଟ୍‌ଏନ୍। ୱାଣ୍ତ୍ରୁ ଗଦ୍‌ମୁ ଆକୁୱାଜା, ଇନି ଫଲ୍ ଆସ୍‌ତେଙ୍ଗ୍ ଆଟ୍‌ଏନ୍।

“ମାତର୍ ନେଗି ସିକ୍‌ଲାଦୁ ମାନ୍‌ଜିନି ଗିଡା ଆଜିନାତ୍ ଅରେନ୍‌ଲୋକୁ ଏୟେନ୍‌ଗି ମାପ୍‌ରୁଦି ବାକ୍ୟ ୱେନାନ୍, ମାରି ଦିନିଙ୍ଗ୍‌ ବିସ୍‌ବାସ୍ କିନାନ୍ ମାରି ଫଲ୍‌ ଆସ୍‌ନାତ୍।”