35. ୩୫. ଦୟାକିନି ବୁବାଦି କାତାନି
ଅର୍ନେଣ୍ଡ୍, ଯିଶୁ ନାଣ୍ଡୋ ଲୋକାଙ୍ଗ୍ ସିକିୟା ସିଜିମାର୍ହାନ୍ ଏମେକାର୍ ୱାରିବାଣାନ୍ ୱେନ୍ଡ୍ରେଙ୍ଗ୍ ଉଣ୍ତାତାମାର୍ହାର୍। ଇୟା ଲୋକୁ ସିସ୍ତୁ ଲସ୍ନିକାର୍ ମାରି ୱାରିୱାଲେ ମୋଶାଦି ନିୟମ୍ ମାନାଦେଙ୍ଗ୍ ସେଷ୍ଟା କିଏଣ୍ତାମାହି ଲୋକୁ ମାର୍ହାର୍।
ଆବେନୁ ମାନି ଏସୋ ଦାର୍ମୁ ନେତାର୍ ଜିଶୁଦିଙ୍ଗ୍ ଇୟା ଲୋକାୱାଲେ ତଡ଼ୁଦି ସାମାନ୍ ୱାର୍ଗିଜି ମିଡ଼ିଜିମାହିକା ସୁଡ଼୍ତାର୍, ଇୟାୱାନ୍ଦିଙ୍ଗ୍ ୱାରୁ ନିଜେ ନିଜେଦି ୱାର୍ଗିଦେଙ୍ଗ୍ ଆସ୍ତାର୍ ଜେ ୱାଣ୍ତ୍ରୁ ବୁଲ୍ କିଜିମାର୍ହାନ୍। ଯିଶୁ ୱାରି ୱାର୍ଗିନିକା ୱେହାନ୍, ଇୟାୱାନ୍ଦିଙ୍ଗ୍ ୱାଣ୍ତ୍ରୁ ୱାରିଙ୍ଗ୍ ଇୟା କାତାନି ୱେର୍ତାନ୍।
“ଅରେନ୍ ଲୋକୁଦି ରିଏର୍ କଡ଼ୋର୍ ମାର୍ହାର୍। ନିସ୍ରି କଡ଼ୋ ନିଜେଦି ବୁବାଦିଙ୍ଗ୍ ୱେର୍ତାନ୍, ‘ବୁବା, ସମ୍ପତ୍ତଦି ଏମେବାଟା ନାଦିମାନାତ୍ ଆକା ନାଙ୍ଗିଁ ସିଦା!’ ମାରି ବୁବା ଆୟା ରିଏର୍ କଡ଼ୋଦି ବାଣାନ୍ ସମ୍ପତି ବାଟା କିତାର୍।”
“ଦାପ୍ରେ ୱାନି ନିସ୍ରି କଡ଼ୋ ନିଜେଦି ୱିଜୁ ଦନ୍ଦିଙ୍ଗ୍ ଉଣ୍ତାକିଜି ଆକୋ ଦେଶେମ୍ଦୁ ସହାନ୍ ମାରି ପାପି ଜିଉ ଜିଦେଙ୍ଗ୍ ନିଜେଦି ୱିଜୁ ଦନ୍ ଇପ୍ତାନ୍।”
“ଦାନିୱେନ୍କା ନିସ୍ରି ମାରିନ୍ ଏମେ ଦେସେମ୍ଦୁ ମାର୍ହାନ୍ ଆୟା ଦେସେମ୍ଦୁ ବୟଙ୍କ୍କର୍ ମର୍ଡି ଆତାତ୍, ମାରି ୱାନି ଡାଗ୍ରୁ ଖାଦି କଣ୍ତେଙ୍ଗ୍ ଡାବୁ ସିଲେଣ୍ତା ମାର୍ହାତ୍। ଇୟାୱାନ୍ଦିଙ୍ଗ୍ ୱାନିଙ୍ଗ୍ ପାଡ୍ରିଙ୍ଗାଁ ମିନି ପାଣି ପୁଟ୍ତାତ୍ ୱାଣ୍ତ୍ରୁ ନିସା ଦୁକାମ୍ ମାରି ବାଙ୍ଗାଁଦୁ ମାର୍ହାନ୍ ଗାନି ୱାଣ୍ତ୍ରୁ ପାଡ୍ରିଙ୍ଗାଁଣି ଖାଦି ଉଣ୍ତେଙ୍ଗ୍ ମାନ୍ସୁ କିଜିମାର୍ହାନ୍।
“ସାରାସାରି ଆୟା ନିସ୍ରି ମାରିନ୍ ନିଜେଦିଙ୍ଗ୍ ୱେର୍ତାନ୍, ନାନୁ ଇନିକା କିଜିନା? ନା ବୁବାଦି ୱିଜୁ ଗତିମୁର୍ଲିରି ଡାଗ୍ରୁ ନାଣ୍ତୋ ଉଣ୍ତେଙ୍ଗ୍ ମାନାତ୍, ମାରିବା ନାନୁ ଇବେନୁ ବାଙ୍ଗାଁଦୁ ମାନା। ନାନୁ ନା ବୁବାଦି ଡାଗ୍ରୁ ମାରିଡ଼େସି ସନା ମାରି ୱାନି ଅରେନ୍ ଗତିମୁର୍ଲି ଆଦେଙ୍ଗ୍ ବାତିମାଲ୍ନା।”’
“ମାରି ଆୟା ନିସ୍ରି ମାରିନ୍ ନିଜେ ବୁବାଦି ଇନ୍ଡ୍ର ସନ୍ଡ୍ରେଙ୍ଗ୍ ଆସ୍ତାନ୍। ଏସ୍ତିୱାଲେ ୱାଣ୍ତ୍ରୁ ନାଣ୍ତୋ ଆକୋ ମାର୍ହାନ୍, ୱାନି ବୁବା ୱାନିଙ୍ଗ୍ ସୁଡ଼୍ଜି ୱାନି ୱାନ୍ଦିଙ୍ଗ୍ ଦୟା ତର୍ପତାନ୍। ୱାଣ୍ତ୍ରୁ ମାରିନ୍ ଡାଗ୍ରୁ ଉହ୍ସି ସନ୍ସି ୱାନିଙ୍ଗ୍ ପୋମ୍ଜି ନୋଣ୍ତିତାନ୍।”
“ଆୟା ମାରିନ୍ ୱେର୍ତାନ୍, “ଏ ବୁବା, ନାନୁ ମାପ୍ରୁଦି ବିରୁଦାନ୍ ମାରି ମି ବିରୁଦାନ୍ ପାପାମ୍ କିତାମାନା। ନାନୁ ନି ମାରିନ୍ ଆଦେଙ୍ଗ୍ ଜଗ୍ ସିଲେ।”’
“ମାରି ୱାନି ବୁବା ୱାନି ଅରେନ୍ ଗତିମୁର୍ଲିଦିଙ୍ଗ୍ ୱେର୍ତାନ୍, ‘ଦାପ୍ର ସନ୍ସି ୱିଜୁଦାନ୍ ନେଗି ସୋକା ତାଗା ମାରି ମାରିନ୍ଦିଙ୍ଗ୍ ଆରିସ୍ଆ! ୱାନି ଡ଼ାସ୍କାଦୁ ଉଣ୍ତ୍ରେ ୱେତରି ଆରିସ୍ତୁ ମାରି ୱାନି ପାଦାମ୍ଦୁ ଜୁତେଙ୍ଗ୍ ଆରିସ୍ତୁ। ଦାନିୱେନ୍କା ୱିଜୁଦାଣାନ୍ ନେଗି ବାସିଦିଙ୍ଗ୍ ଡ଼େଇଦୁ ଏମେଦାଣାନ୍ ମାଡୁ ଉଣ୍ଜି ସାର୍ଦା କିନାଟ୍, ମାତର୍ ନା ମାରିନ୍ ସାତାମାର୍ହାନ୍, ମାରି ଇଏଲ୍ ୱାଣ୍ତ୍ରୁ ଜିଉ ମାନାନ୍! ୱାଣ୍ତ୍ରୁ ମୁରୁତା ମାର୍ହାନ୍, ମାରି ଇଏଲ୍ ମାପୁ ୱାନିଙ୍ଗ୍ ପାଏଆତାପ୍!”’
“ଇୟାୱାନ୍ଦିଙ୍ଗ୍ ଲୋକୁ ସାର୍ଦା କିଦେଙ୍ଗ୍ ଆସ୍ତାର୍। ଏସୋ ୱେଡ଼ା ୱେନ୍କା ପେରି ମାରିନ୍ କିଡ଼୍ଇଦୁ ପାଣି କିଜି ଇନ୍ଡ୍ର ୱାତାନ୍। ୱାଣ୍ତ୍ରୁ ପାଟା ମାରି ଗାତ୍ନି ବଲୁ ୱେହାନ୍ ମାରି ଇନିକା ଗଟେଆଜିନାତ୍ ଇଜି ୱାଣ୍ତ୍ରୁ କାବାଆତା ସର୍ହାନ୍।” " “ଏସ୍ତିୱାଲେ ପେରି ମାରିନ୍ ନେସ୍ତେଙ୍ଗ୍ ଆଟ୍ତାନ୍ ଜେ ୱାରୁ ସାର୍ଦା କିଜିନାର୍, ମାତର୍ ୱାନି ତଡ଼ାନ୍ ଇନ୍ଡ୍ର ୱାତାମାର୍ହାନ୍, ୱାଣ୍ତ୍ରୁ ନାଣ୍ତୋ ରିସାଆତା ମାର୍ହାନ୍ ମାରି ଇଲୁ ଲୋଇ ସନ୍ଏତାନ୍। ୱାନି ବୁବା ଆତ୍ରେ ୱାଜି ୱାନିଙ୍ଗ୍ ସାର୍ଦା ଆଦେଙ୍ଗ୍ ୱେର୍ତାନ୍, ମାରି ୱାଣ୍ତ୍ରୁ ମନାକିତାନ୍।” "
ପେରି ମାରିନ୍ ନିଜେଦି ବୁବାଦିଙ୍ଗ୍ ୱେର୍ତାନ୍, ‘ଇୟାୱିଜୁ ପାଟେଙ୍ଗ୍ ନାନୁ ନି ୱାନ୍ଦିଙ୍ଗ୍ ବିସ୍ବାସ୍ଦି ୱାଲେ ପାଣି କିତା! ନାନୁ ନି ୱିଜୁ ମାଟା ମାନାତାମାନା, ମାରି ନିନୁ ନାଙ୍ଗିଁ ଉଣ୍ତ୍ରେ ନିସ୍ରି ଗୋରିୟା ପିଲା ଏସେଙ୍ଗ୍ ବା ସିଏତି ଏଣ୍ତେସ୍ଗି ନାନୁ ନା ତୋଡୁରି ୱାଲେ ସାର୍ଦା କିନା। ମାରି ନି ଇୟା ମାରିନ୍ ନି ଦନ୍ଦିଙ୍ଗ୍ ପାପାମ୍ ପାଣି କିଜି ନାସ୍ଟୁ କିତାମାନାନ୍। ମାରି ଇଏଲ୍ ଏସେଙ୍ଗ୍ ୱାଣ୍ତ୍ରୁ ଇନ୍ଡ୍ର ୱାତାନ୍ ମାରି ୱାନିୱାନ୍ଦିଙ୍ଗ ସାର୍ଦା କିନିୱାନ୍ଦିଙ୍ଗ୍ ନିନୁ ୱିଜୁଦାଣାନ୍ ନେଗି ବାସିପିଲାଦିଙ୍ଗ୍ ଡ଼େଇତିମାନି!”’
“ବୁବା ଉତର୍ ସିତାନ୍, ‘ଏ ନା ମାରିନ୍, ନିନୁ ୱିଜୁୱାଲେ ନା ୱାଲେ ମାନି, ମାରି ଏମେୱିଜୁ ନାଦି ଆୟାୱିଜୁ ନିଦି, ମାତର୍ ମା ୱାନ୍ଦିଙ୍ଗ୍ ସାର୍ଦାକିନିକା ଟିକ୍ ମାନାତ୍, ମାରି ନି ତଡ଼ାନ୍ ସାତାସହାମାର୍ହାନ୍, ମାରି ଇଏଲ୍ ୱାଣ୍ତ୍ରୁ ଜିଉ ମାନାନ୍। ୱାଣ୍ତ୍ରୁ ମୁରୁତାମାହାନ୍ ମାରି ଇଏଲ୍ ୱାନିଙ୍ଗ୍ ପାଏଆତାମାନାତ୍।
ଲୁକ ୧୫:୧୧-୩୨ ବାଇବଲ୍ଦି ଉଣ୍ଡ୍ରେ କାତାନି
Free to use, adapt, and share under an open license (CC BY-SA 4.0).