36. ୩୬. ଜିଶୁଦି ମୁର୍ତି ବଦ୍ଲେ ଆତାନ୍
ଅର୍ନେଣ୍ଡ୍, ଜିଶୁ ୱାନି ସିସୁରି ଲୋଇହାନ୍ ମୁଏର୍ଲୋଇ ପିତର, ଯାକୁବ ମାରି ଯୋହନଦିଙ୍ଗ୍ ୱାନି ୱାଲେ ଅତାନ୍। (ଯୋହନ ଦରୁତିକାନ୍ ଜିଶୁଦି ସିସୁ ମାରି ଜିଶୁଦିଙ୍ଗ୍ ଡୁବନ୍ ସିତାମାହାନ୍ ଯୋହନ ଅରେନ୍ ଆଏନ୍।) ଆକାର୍ ନିଜେ ପ୍ରାର୍ଥନା କିନିୱାନ୍ଦିଙ୍ଗ୍ ଉଣ୍ଡ୍ରେ ନିର୍ହି ଗୋରତୁ ସର୍ହାର୍।
ଜିଶୁ ଏସ୍ତିୱାଲେ ପ୍ରାର୍ଥନା କିଜିମାହାନ୍, ୱାନି ମୋକମ୍ ୱେଡାୱାଜା ଜାଇ ହାତାତ୍ ମାରି ୱାନି ସକା ଜାଇୱାଜା ଅଡିଙ୍ଗା ହାତାତ୍, ଏମେକାଗି ପୁର୍ତିବୀଦୁ ମାନି ଆଇଲୋକୁ ଆୟାୱାଜା ଅଡ଼ିଙ୍ଗାଁ କିଦେଙ୍ଗ୍ ଆଟ୍ଏର୍।
ଦାନିୱେନ୍କା ମୋଶା ମାରି ଏଲୀୟ ବାବବାଦିର୍ ତରିତାର୍। ଇୟା ରିଏର୍ଲୋକୁ ଇୟା ଗଟ୍ନାଦୁ ଏସୋଡ଼୍ ଏସୋଡ଼୍ ପାଟେଙ୍ଗ୍ ପୁର୍ବାମ୍ଦୁ ଇୟା ପୁର୍ତିବୀଦୁ ମାହାର୍। ଆକାର୍ ଜିଶୁଦି ୱାଲେ ୱାନି ସାନି ବିଷୟଦାନ୍ ୱାର୍ଗିଜି ମିଡିଜି ମାହାର୍, ମାତର୍ ଯିରୁଶାଲମଦୁ ଆକାନ୍ ନଣ୍ଡୋ ଦାପ୍ରେ ସାନାନ୍।
ଏସ୍ତିୱାଲେ ମୋଶା ମାରି ଏଲୀୟ ଜିଶୁଦି ୱାଲେ ୱାର୍ଗିଜି ମିଡିଜି ମାହାର୍, ଏସ୍ତିୱାଲେ ପିତର ଜିଶୁଦିଙ୍ଗ୍ ୱେହ୍ତାନ୍, “ମାପୁ ଇବେ ମାଣ୍ଡ୍ରେଙ୍ଗ୍, ମାୱାନ୍ଦିଙ୍ଗ୍ ନେଗେଣ୍ଡ୍। ମାପୁ ମୁଣ୍ଡ୍ରି ଗୁଡ଼େଙ୍ଗ୍ ତିହାର୍କିନାପ୍, ନିୱାନ୍ଦିଙ୍ଗ୍ ଉଣ୍ଡ୍ରି, ମୋଶାଦି ୱାନ୍ଦିଙ୍ଗ୍ ଉଣ୍ତ୍ରି ମାରି ଏଲୀୟଦି ୱାନ୍ଦିଙ୍ଗ୍ ଉଣ୍ଡ୍ରି।”ପିତର ଇନିକା ୱେହ୍ସିମାହାନ୍ ଆକା ନେସ୍ଏତାନ୍।
ନାସ୍ତିୱାଲେ ପିତର ୱାର୍ଗିଜିନେ ମାର୍ହାନ୍, ଉଣ୍ଡ୍ରେ ଜାଇ ବାଦଡ଼୍ ସାଲୁ ୱାତାତ୍ ମାରି ୱାରିଙ୍ଗ୍ ପିଡ଼୍କ୍ତାତ୍। ମାରି ବାଦଡ଼୍ଦାନ୍ ୱାରୁ ଇୟା ମାଟା ୱେର୍ହାର୍ “ଇୟା ମା ଲାଡ୍ତି ମାରିନ୍ ଏହେନ୍ଗି ନାନୁ ଜିଉନୋନା। ୱାନିବାଣାନ୍ ନାନୁ ନାଣ୍ଡୋ ସାର୍ଦା। ୱାନି ମାଟା ୱେନ୍ଆ।” ଆୟା ମୁଏର୍ ଶିଷୁର୍ ତିଏଲ୍ଆଜି ଭୁମିଦୁ ଆର୍ତା ମାହାର୍।
ଦାନିୱେନ୍କା ଯିଶୁ ୱାରିଙ୍ଗ୍ ମୁଟ୍ତାନ୍ ମାରି ୱେହ୍ତାନ୍, “ ତିଏଲ୍ଆମାଟ୍,ନିଙ୍ଗ୍ଦୁ।” ନାସ୍ତିୱାଲେ ୱାରୁ ଇନିଙ୍ଗାଁ ଆନିଙ୍ଗାଁ ସୁଡ଼୍ତାର୍, ଆବେନୁ ଯିଶୁଦି ଡ଼ିସ୍ସି ଏୟେର୍ ସିଲେର୍।
ଯିଶୁ ମାରି ୱାରି ମୁଏର୍ ଶିଷୁର୍ ଗୋର୍ନୁ ସାଲୁ ରେସିୱାତାର୍। ଦାନିୱେନ୍କା ଯିଶୁ ୱାରିଙ୍ଗ୍ ୱେହ୍ତାନ୍ “ଇଏଲ୍ ଇବେ ଏମେକା ଗଟେଆତାତ୍ ଆକା ଏହେଙ୍ଗ୍ ୱେହ୍ମାଟ୍। ନାନୁ ଦାପ୍ରେ ସାନାଲେ ମାରି ମାରିଡ଼େସି ଜିଉ ଆନା। ଦାନିୱେନ୍କା, ମିରୁ ଲୋକାଙ୍ଗ୍ ୱେର୍ତେଙ୍ଗ୍ ଆଟ୍ନିଦେର୍।”
ବାଇବଲ ଦି ଉଣ୍ଡ୍ରେ କାତାନି:ମାଥିଉ ୧୭:୧-୨; ମାର୍କ ୯:୨-୮ ଲୂକ ୯:୨୮
Free to use, adapt, and share under an open license (CC BY-SA 4.0).