37. ୩୭. ଜିଶୁ ସାତି ଲାଜାରଦିଙ୍ଗ୍ ଜିଉକିତାନ୍
ଲାଜାର୍ ଦୋରୁତିକାନ୍ ଅରେନ୍ ଲୋକୁ ମାହାନ୍। ମରିୟମ ମାରି ମାର୍ଥା ଦୋରୁଦି ଦାନି ରୁଣ୍ତି ବିବିକ୍ ମାହେ। ଆକେଙ୍ଗ୍ ଯିଶୁଦି ନାଣ୍ତୋ ନିଜେଦି ତୋଡୁ ମାହେ। ଅର୍ନେଣ୍ତ୍ ଲାଜାର୍ ନାଣ୍ତୋ କାଷ୍ଟାମ୍ ମାନାନ୍ ଇଜି ଯିଶୁଦିଙ୍ଗ୍ ଏହେନ୍ଗି ଅରେନ୍ ଖାବୁର୍ ସିତାନ୍। ଏସ୍ତିୱାଲେ ଯିଶୁ ଇକା ୱେର୍ହାନ୍, ୱାଣ୍ଡ୍ରୁ ୱେର୍ତାନ୍, “ଇୟା କାଷ୍ଟାମ୍ ଲାଜାରଦି ସାନି ୱାନ୍ଦିଙ୍ଗ୍ ଆଏତ୍, ମାରି ଇୟା ମାପ୍ରୁଦି ଗୌରବ ୱାନ୍ଦିଙ୍ଗ୍, ଏୟାବାଣାନ୍ ଲୋକୁ ମାପ୍ରୁଦିଙ୍ଗ୍ ମାନାନାର୍।”
ଯିଶୁ ୱାନି ତୋଡୁରିଙ୍ଗ୍ ଜିଉନଜି ମାର୍ହାନ୍, ମାରି ୱାଣ୍ଡ୍ରୁ ଏମେ ବାଡିଦୁ ମାର୍ହାର୍ ଆବେ ମାରି ରୁଣ୍ତିଦିନାମ୍ ମାର୍ହାର୍। ରୁଣ୍ତିଦିନାମ୍ ୱେନ୍କା, ଯିଶୁ ୱାରି ସିସୁରିଙ୍ଗ୍ ୱେର୍ତାନ୍, “ରାଦୁ, ମାଡୁ ଯିହୂଦା ଦେଶେମ୍ ଦୁ ସନାଟ୍।” ସିସୁର୍ ଉତର୍ ସିତାର୍,“ମାତର୍ ଗୁରୁ, ଏସୋ ୱେଡା ଆଗ୍ଡି ଲୋକୁ ନିଙ୍ଗିଁ ସାୟା ମାର୍ଗା ଢେଇନି ୱାନ୍ଦିଙ୍ଗ୍ ଅଡ଼୍ବିଜିମାର୍ହାର୍!” ଯିଶୁ ୱେର୍ତାନ୍ “ମା ତୋଡୁ ଲାଜାର ଗୁର୍ତା ମାହାନ୍, ମାରି ନାନୁ ୱାନିଙ୍ଗ୍ ଗୁର୍ତି ବାଣାନ୍ ନିକ୍ତେଙ୍ଗ୍ ମାନାତ୍।”
ସିସୁର୍ ଉତର୍ ସିତାର୍, “ହେ ଗୁରୁ, ଜଦି ଲାଜାର ଗୁର୍ତା ମାନାନ୍, ଆଦେଙ୍ଗେ ୱାଣ୍ଡ୍ରୁ ନିଙ୍ଗ୍ଁନାନ୍। “ଦାନିୱେନ୍କା ଯିଶୁ ୱାରିଙ୍ଗ୍ ନେଗିୱାଜା ୱେର୍ତାନ୍ “ଲାଜାର ସାତାମାନାନ୍। ନାନୁ ସାରଦା ଜେ ନାନୁ ଆବେ ମାନ୍ଏତା, ଏନେଟ୍ଗି ମିରୁ ନା ଡାଗ୍ରୁ ବିସ୍ବାସ୍ କିନିଦେର୍।”
ଏସ୍ତିୱାଲେ ଯିଶୁ ଲାଜାରଦି ଗଡ଼ଦୁ ୱାତାର, ଲାଜାର ସାଜି ନାଲ୍ଗିଦିନାମ୍ ଆତାମାର୍ହାତ୍। ମାର୍ଥା ଯିଶୁଦିଙ୍ଗ୍ ଆତ୍ରେ କୁଡ଼୍ଦେଙ୍ଗ୍ ସନ୍ସି ୱେର୍ହାତାତ୍ “ପ୍ରବୁ, ଜଦି ନିନୁ ଇବେ ମାର୍ହିଙ୍ଗାଁ, ଆଦେଙ୍ଗେ ନା ଭାଇ ସାଏତାନ୍ମାରି। ମାତର୍ ନାନୁ ବିସ୍ବାସ୍ କିନା ନିନୁ ମାପ୍ରୁଦିଙ୍ଗ୍ ଏମେକାବା ଲସ୍ନିଦେର୍ ୱାଣ୍ଡ୍ରୁ ଆକା ମିଙ୍ଗିଁ ସିନାନ୍।
ଯିଶୁ ଉତର୍ ସିତାନ୍ “ମାରିଜିନିକାନ୍ ମାରି ଜିଉ ନାନୁ। ଏୟେନ୍ ନାଡାଗ୍ରୁ ବିସ୍ବାସ୍ କିନାନ୍, ଜଦି ୱାଣ୍ଡ୍ରୁ ସାନାନ୍ ମାରିବା ୱାଣ୍ଡ୍ରୁ ଜିନାନ୍। ଏମେଲୋକୁ ନାଡାଗ୍ରୁ ବିସ୍ବାସ୍ କିନାନ୍ ଆକାନ୍ ଏସେଙ୍ଗ୍ ବା ସାଏନ୍। ନିନୁ ଇକା ବିସ୍ବାସ୍ କିଜିନି?”ମାର୍ଥା ଉତର୍ ସିତାତ୍, “ସତ୍, ହେ ଗୁରୁ! ନାନୁ ବିସ୍ବାସ୍ କିନା ଗାନି ନିନୁ ମାପ୍ରୁଦି ମାରିସି ଖ୍ରୀଷ୍ଟ୍।”
ଦାନିୱେନ୍କା ମରିୟମ ଇତାତ୍। ଆକାତ୍ ଯିଶୁଦି ପାଦାମ୍ ସାଲୁ ଆର୍ଜି ୱେହ୍ତାତ୍ “ହେ ପ୍ରବୁ, ଆଦେଙ୍ଗେ ନିନୁ ଇବେ ମାହିଙ୍ଗାଁ, ନା ଭାଇ ସାଏତାନ୍ମାରି। ଯିଶୁ ଦାନିଙ୍ଗ୍ ୱେନ୍ବାତାନ୍, “ମିରୁ ଲାଜାରଦିଙ୍ଗ୍ ଏମେଡାଗ୍ରୁ ଇଟ୍ତି ମାନିଦେର୍?”ଆୱିକ୍ ୱେର୍ତେ ଦୁକିବାଡିଦୁ। ରାହା ମାରି ସୁଡ୍ଆ।“ଦାନିୱେନ୍କା ଯିଶୁ ଆଡ଼୍ବାତାନ୍।
ଦୁକିବାଡି ଉଣ୍ତ୍ରେ ପର ମାର୍ହାତ୍ ମାରି ଇୟା ମକମ୍ଦୁ ଉଣ୍ତ୍ରେ କାଲୁ ମୁକ୍ତା ମାର୍ହାର୍। ନାସ୍ତିୱାଲେ ଯିଶୁ ଦୁକିଦୁ ଇତାନ୍, ୱାଣ୍ଡ୍ରୁ ୱାରିଙ୍ଗ୍ ୱେର୍ତାନ୍, କାଲୁଦିଙ୍ଗ୍ ଦୁକି ଦୁୱାର୍ତାନ୍ ଗୁସାକିଦୁ। “ମାତର ମାର୍ଥା ୱେର୍ତାତ୍, “ୱାଣ୍ଡ୍ରୁ ସାଜି ନାଲ୍ଗି ଦିନାମ୍ ଆଜିନାତ୍। ଆବେନୁ କାପୁ ୱାଜିମାନ୍ଜିନାତ୍।”
ଯିଶୁ ଉତର୍ ସିତାନ୍, “ଇନିକା ନାନୁ ମିଙ୍ଗିଁ ୱେର୍ଏଣ୍ଡା ମାର୍ହା ଜଦି ମିରୁ ନା ଡାଗ୍ରୁ ବିସ୍ବାସ୍ କିତିଙ୍ଗାଁ ଆଦେଙ୍ଗେଁ ମାପ୍ରୁଦି ମହିମା ସୁଣ୍ନିଦେର୍?“ ଇୟାୱାନ୍ଦିଙ୍ଗ୍ ୱାରୁ କାଲୁଦିଙ୍ଗ୍ ଗୁସାକିତାର୍।“
ଦାନିୱେନ୍କା ଯିଶୁ ସାରଗ୍ ତରନ୍ ମୁସ୍କୁସୁଡ୍ଜି ୱେର୍ତାନ୍, “ଏ ବା, ନା ପାର୍ତନା ୱେନିୱାନ୍ଦିଙ୍ଗ୍ ନାନୁ ମିଙ୍ଗିଁ ଦନ୍ୟବାଦ୍ ସିଜିନା। ନାନୁ ନେସ୍ତାମାନା ଗାନି ନିନୁ ୱିଜୁୱାଲେ ନା ପାର୍ତନା ୱେନି, ମାତର୍ ନିନୁ ନାଙ୍ଗିଁ ପକ୍ତିମାନି ଇଜି ଇବେ ନିଲ୍ତିମାହି ଲୋକୁ ଏଣ୍ତେସ୍ ବିସ୍ବାସ୍ କିନାର୍ ଆୟାୱାନ୍ଦିଙ୍ଗ୍ ନାନୁ ଇକା ୱେର୍ସିନା। “ଦାନିୱେନ୍କା ଯିଶୁ ନାଣ୍ତୋ ଆଉଲି ଆଜି ୱେର୍ତାନ୍, ଲାଜାର, ସସି ରାହା!”
ମାରି ଲାଜାର ସସି ୱାତାନ୍!ଆୟାୱେଡାଦୁ ଆକାନ୍ ଦୁକି ସକାଦାନ୍ ନେ ଗୁଡିୟା ଆତାମାହାନ୍। ଯିଶୁ ୱାରିଙ୍ଗ୍ ୱେହ୍ତାନ୍, “ଆୟା ଦୁକି ସକା ୱାନିବାନାଣ୍ କୁତ୍ସି ୱାନିଙ୍ଗ୍ ସାୟାମ୍ କିଦୁ ମାରି ୱାନିଙ୍ଗ୍ ୱେର୍ଏ!” ଯିଶୁଦି ଇୟା କାବାଆନି ପାଣିୱାନ୍ଦିଙ୍ଗ୍ ନାଣ୍ତୋ ଯିହୂଦୀଲୋକୁ ୱାନିଡାଗ୍ରୁ ବିସ୍ବାସ୍ କିତାର୍।
ମାତର୍ ଯିହୂଦୀରି ଦାର୍ମୁ ନେତାର୍ ଯିଶୁଦିଙ୍ଗ୍ କାକା ଆଜି ମାର୍ହାର୍, ଇୟାୱାନ୍ଦିଙ୍ଗ୍ ୱାରୁ ଏନେଟ୍ଗି ଯିଶୁଦିଙ୍ଗ୍ ମାରି ଲାଜାରଦିଙ୍ଗ୍ ସାୟାମାର୍ଗା ଡେଇନାର୍ ଆକା ଉଣ୍ତ୍ରେବାନୁ ଆଜି ପାଣି କିଦେଙ୍ଗ୍ ଆସ୍ତାର୍।
ବାଇବଲ ଦି ଉଣ୍ତ୍ରେ କାତାନି ଯୋହନ ୧୧:୧-୪୬
Free to use, adapt, and share under an open license (CC BY-SA 4.0).