38. ୩୮. ଜିଶୁଦିଙ୍ଗ୍ ସତ୍ରୁ କିୟୁଦୁ ସର୍ପେ କିତାନ୍
ୱିଜୁ ପାଟେଙ୍ଗ୍ଁ, ଯିହୂଦିର୍ ନିସ୍ତାର ପାଣ୍ତୋଇ ମାନାଜିମାହାର୍। ଇୟା ପାଣ୍ଡୋୟ ଇୟାୱାନ୍ଦିଙ୍ଗ୍ ମାନାତାର୍ ଗାନି ନାଣ୍ଡୋ ନାଣ୍ଡୋ ପାଟେଙ୍ଗ୍ଁଆଗ୍ଡ଼ି ମାପ୍ରୁ ଏମେୱାଜା ୱାରିଙ୍ଗ୍ ପୁର୍ବାମ୍ତି ଲୋକାଙ୍ଗଁ ମିଶର ଦେଶେମ୍ଦି ଦାସ୍ତିୱାଜା ବନ୍ଦନ୍ତି ବାଣାନ୍ ଉଦାର୍ କିଜି ତାତାନ୍। ପାକାପାକି ମୁଣ୍ତ୍ରିପାଟେଙ୍ଗ୍ଁ ୱେନ୍କା ଯିଶୁ ପାର୍ତୁମ୍ ୱିଜେରି ଡାଗ୍ରୁ ପ୍ରଚାର୍ ମାରି ସିକିୟା ସିଦେଙ୍ଗ୍ ଆରମ୍ କିତାନ୍, ଯିଶୁ ୱାରି ଶିସୁରିଙ୍ଗ୍ ୱେର୍ତାନ୍ ଗାନି, ୱାଣ୍ଡ୍ରୁ ୱାରିୱାଲେ ଯିରୁଶାଲମଦୁ ନିସ୍ତାର ପାଣ୍ତୋଇ ମାନାଦେଙ୍ଗ୍ ମାନ୍ସୁ କିଜିନାନ୍, ମାରି ଆବେ ୱାନିଙ୍ଗ୍ ସାଗୁମାର୍ଗା ଡେଇନାର୍।
ଯିଶୁଦି ଶିସୁରି ଲୋଇହାନ୍ ଯିହୂଦା ଦୋରୁତିକାନ୍ ଅରେନ୍ ସିସୁ ମାହାନ୍। ଯିହୂଦା ସିସୁରି ଡାବୁସାସି ଆସ୍ନି ଦାୟୋତ୍ ମାର୍ହାନ୍, ମାତର୍ ୱାଣ୍ଡ୍ରୁ ନଣ୍ତୋ ୱେଡାଦୁ ଆୟା ଡାବୁ ଡଙ୍ଗାଁ କିଜିମାର୍ହାନ୍। ଯିଶୁ ମାରି ୱାରି ଶିସୁର୍ ଯିରୁଶାଲମ୍ଦୁ ଇତିୱେନ୍କା, ଯିହୂଦା ଯିହୂଦୀ ନେତାରି ଡାଗ୍ରୁ ସହାନ୍। ୱାଣ୍ଡ୍ରୁ ଡ଼ାବୁଙ୍ଗାଁ ୱାନ୍ଦିଙ୍ଗ୍ ଅଦିକାରିରିଙ୍ଗ୍ ଯିଶୁଦି ନେଶ୍ପିସ୍ତେଙ୍ଗ୍ ସତ୍ରୁଦି କିୟୁଦାଣ୍ ସର୍ପେକିଦେଙ୍ଗ୍ ମାଟା ଇଟ୍ତାନ୍। ୱାଣ୍ଡ୍ରୁ ନେସ୍ତା ମାର୍ହାନ୍ ଗାନି ଯିହୂଦୀ ନେତାର୍ ଏସେଙ୍ଗ୍ବା ଯିଶୁଦିଙ୍ଗ୍ ଖ୍ରୀଷ୍ଟ୍ଇଜି ମାନାଆଏର୍। ୱାଣ୍ଡ୍ରୁ ଯିଶୁଦିଙ୍ଗ୍ ସାଗୁମାର୍ଗା ଡ଼େଇଦେଙ୍ଗ୍ ଇଜି ପାଣି କିଜିମାର୍ହାର୍ ଇକା ଆକାନ୍ ନେସ୍ତାମାହାନ୍।
ପେରିଜାଜକର୍ ୱେର୍ତି ୱାନ୍ଦିଙ୍ଗ୍ ଯିହୁଦିର୍ ନେତାର୍ ଯିଶୁଦିଙ୍ଗ୍ ୱାରି କିଦୁ ସ୍ର୍ପେ କିନିୱାନ୍ଦିଙ୍ଗ୍ ଜିହୁଦାଦିଙ୍ଗ୍ ମୁପାୟ୍ ୱେଣ୍ତି ଡାବୁ ସିତାର୍। ଇକା ଆୟାୱାଜାନେ ଆତାତ୍ ଏନେଟ୍ଗି ଭାବବାଦିର୍ ଆନାତ୍ ଇଜି ୱେର୍ତା ମାର୍ହାର୍। ଯିହୂଦା ଆବେ ରାଜିଆଜି ଡାବୁ ଆସ୍ସି ସର୍ହାନ୍। ୱାଣ୍ଡ୍ରୁ ୱାରିଙ୍ଗ୍ ଯିଶୁଦିଙ୍ଗ୍ ଆସ୍ସି ତର୍ତେଙ୍ଗ୍ ସାୟାମ୍ କିଦେଙ୍ଗ୍ ଉଣ୍ଡ୍ରେ ସୁଜଗ୍ ରେବାଜିମାର୍ହାନ୍
ଯିରୁଶାଲମଦୁ ଯିଶୁ ୱାରି ଶିସୁରି ୱାଲେ ନିସ୍ତାର ପଣ୍ତୋଇ ମାନାତାନ୍। ନିସ୍ତାରପଣ୍ତୋଇ ଉଣି ୱେଡାଦୁ, ଯିଶୁ ରୁଟି ଅସି ଦାନିଙ୍ଗ୍ ରୁକ୍ତାନ୍। ୱାଣ୍ଡ୍ରୁ ୱେର୍ତାନ୍ “ଇକା ଅସି ତିନ୍ଡ୍ରୁ। ଇକା ନା ମେନ୍ଦଲ୍, ଏମେକାବା ନାନୁ ମିୱାନ୍ଦିଙ୍ଗ୍ ସିଜିନା। ଇକା ନାଙ୍ଗିଁ ଅଡ୍ବିନି ୱାନ୍ଦିଙ୍ଗ୍ କିଦୁ।” ଇୟା ୱାଜା, ଯିଶୁ ୱେର୍ତାନ୍ ଗାନି ୱାରି ୱାନ୍ଦିଙ୍ଗ୍ ୱାଣ୍ଡ୍ରୁ ସାନାନ୍, ଇକା ଅର୍ତ ୱାରି ୱାନ୍ଦିଙ୍ଗ୍ ୱାଣ୍ଡ୍ରୁ ୱାନି ମେନ୍ଦଲ୍ ବଳିଦାନ୍ ସିନାନ୍।
ଦାନିୱେନ୍କା ଯିଶୁ ଉଣ୍ତ୍ରେ ଅଙ୍ଗୁଁର୍ରସ୍ତି ଉଣିଡୁବାଇ ନିକ୍ତାନ୍ ମାରି ୱେର୍ତାନ୍ “ଦେନିଙ୍ଗ୍ ଉଣ୍ତୁ। ଇକା ପୁନି ନିୟମ୍ତି ନା ନେତେର୍ ମିୱାନ୍ଦିଙ୍ଗ୍ ୱାକ୍ସିନା ଏମେକାଗି ମାପ୍ରୁ ମି ପାପାମ୍ କେମା କିନାନ୍। ନାନୁ ଇଏଲ୍ ଇନିକା କିଜିନା ମିରୁ ଆକା କିଦୁ, ଏନେଟ୍ଗି, ଏସିୱାଲେ ମିରୁ ଉଣିଦେର୍ ୱିଜୁ ୱାଲେ ନାଙ୍ଗିଁ ଅଡ଼୍ବିନିଦେର୍।”
ଦାନିୱେନ୍କା ଯିଶୁ ୱାରି ଶିସୁରିଙ୍ଗ୍ ୱେର୍ତାନ୍, “ ମି ଲୋଇହାନ୍ ଅରେନ୍ ନାଙ୍ଗିଁ ସାତ୍ରୁ କିୟୁଦାଣ୍ ସର୍ପେ କିନାନ୍।” ସିସୁର୍ କାବା ଆତାର୍, ମାରି ଏହେନ୍ ଇୱାଜା କିନାନ୍ ଇଜି ୱେନ୍ବାତାର୍। ଯିଶୁ ୱେର୍ତାନ୍, “ନାନୁ ଏହେଙ୍ଗ୍ ଇୟା ରୁଟି କାଣ୍ତେକ୍ ସିନା ୱାଣ୍ଡ୍ରୁ ନାଙ୍ଗିଁ ସାତ୍ରୁ କିୟୁଦାଣ୍ ସର୍ପେ କିନାନ୍।” ଦାନିୱେନ୍କା ୱାଣ୍ଡ୍ରୁ ଆୟା ରୁଟି ଯିହୂଦାଦିଙ୍ଗ୍ ସିତାନ୍।”
ଯିହୂଦା ଆୟା ରୁଟି କାଣ୍ତେକ୍ ଅତି ୱେନ୍କା, ଶୟତାନ୍ ୱାନି’ ଲୋଇ ଡୁଗିତାତ୍। ଯିହୂଦା ଆୟା ବାଡି ଡିସ୍ସି ଯିଶୁଦିଙ୍ଗ୍ ତହ୍ନି ୱାନ୍ଦିଙ୍ଗ୍ ଯିହୂଦା ନେତାରିଙ୍ଗ୍ ସାହାଯ୍ୟ କିନି ୱାନ୍ଦିଙ୍ଗ୍ ୱାରି ଡାଗ୍ରୁ ସର୍ହାନ୍ ଆକା ମିଲିହି ୱେଡା ମାର୍ହାତ୍।
ଉଟି ୱେନ୍କା, ଯିଶୁ ମାରି ୱାରି ସିସୁର୍ ଜୀତ ଗରତୁ ସର୍ହାର୍। ଯିଶୁ ୱେହ୍ତାନ୍, “ଇୟା ନାଡାଦିଙ୍ଗ୍ ମିରୁ ୱିଜେରେ ନାଙ୍ଗିଁ ଡିସ୍ନି ଦେର୍। ଇକା ରାସାତା ମାନାତ୍, ନାନୁ ମେଣ୍ଢା ଗାଉଡୁଏନ୍ଦିଙ୍ଗ୍ ଡେଇନା ମାରି ୱିଜୁ ମେଣ୍ଢା ଗୋରେଙ୍ଗ୍ ଚିନ୍ଚତର୍ ଆନେ।”
ପିତର ଉତର୍ ସିତାନ୍, “ଜଦି ୱିଜେରେ ନିଙ୍ଗିଁ ଡିସ୍ନାର୍, ନାନୁ ଏସେଙ୍ଗ୍ ଡ଼ିସ୍ଏ!” ମାରି ଯିଶୁ ପିତରଦିଙ୍ଗ୍ ୱେହ୍ତାନ୍, “ଶୟତାନ୍ ମି ୱିଜେରିଙ୍ଗ୍ ଅତେଙ୍ଗ୍ ମାନ୍ସୁ କିଜିନାତ୍, ମାତର୍ ହେ ପିତର, ନାନୁ ମିୱାନ୍ଦିଙ୍ଗ୍ ପାର୍ତନା କିତାମାନା ଗାନି ନିନୁ ବିଷ୍ବାସ୍ଦାଣ୍ ଆରେଆମା। ଇର୍ହିଁଙ୍ଗ୍ଆବା, ନେଣ୍ଡ୍ରୁ ନାଡ଼ାଦିଙ୍ଗ୍, କୋରୁ କେରେପି ଆଗ୍ଡି ନିନୁ ନାଙ୍ଗିଁ ମୁଣ୍ତ୍ରି ଜାରିଙ୍ଗ୍ ନେସ୍ଏ ଇଜି ୱେର୍ନି।
ଦାନିୱେନ୍କା ପିତର ଯିଶୁଦିଙ୍ଗ୍ ୱେର୍ତାନ୍ “ନାନୁ ସାତି ସର୍ହିଁଙ୍ଗ୍ଆବା, ନାନୁ ନିଙ୍ଗିଁ ଏସେଙ୍ଗ୍ବା ନେସ୍ଏ ଇଜି ୱେର୍ଏ!” ଆଇ ୱିଜୁ ସିସୁର୍ ବା ଇୟାୱାଜା ୱେର୍ତାନ୍।
ୱେନ୍କା ଯିଶୁ ୱାରି ସିସୁରି ୱାଲେ ଗେଥଶିମନୀ ଦୋରୁତି ଉଣ୍ତ୍ରେ ବାଡିଦୁ ସର୍ହାର୍। ଯିଶୁ ନିଜେ ସିସୁରିଙ୍ଗ୍ ପାର୍ତନା କିଦେଙ୍ଗ୍ ୱର୍ତାନ୍ ଏନେଟ୍ଗି ସୟତାନ୍ ୱାରିଙ୍ଗ୍ ପରିକା କିଦେଙ୍ଗ୍ ଆଟ୍ଏନ୍। ୱେନ୍କା ଯିଶୁ ନିଜେ ପାର୍ତନା କିଦେଙ୍ଗ୍ ସର୍ହାନ୍।
ଯିଶୁ ମୁଣ୍ତ୍ରି ଜାରିଙ୍ଗ୍ ପାର୍ତନା କିତାନ୍, “ହେ ନା ବୁବା, ଜଦି ଆଦେଙ୍ଗ୍ ହାଟ୍ନାନ୍ ମାରି ଦୁକ୍ବଗ୍ତି ଡୁବାଇ ଉଣିୱାନ୍ଦିଙ୍ଗ୍ ନାଙ୍ଗିଁ ସିମା। ମାତର୍ ଲୋକା ପାପାମ୍ କେମାକିନି ୱାନ୍ଦିଙ୍ଗ୍ ମାରି ଆଇ ସାରି ସିଲେତ୍, ମାରି ନି ଇଷ୍ଟାମ୍ନେ ପୁରଆପିତ୍।” ଯିଶୁ ନାଣ୍ତୋ ହାକାଦାକା ଆଜି ମାର୍ହାନ୍ ମାରି ୱାନି ରୁଣୁଏରୁ ନେତେର୍ ବଟିୱାଜା ମାର୍ହାତ୍। ମାପ୍ରୁ ଅରେନ୍ ଦୁତ୍ଦିଙ୍ଗ୍ ପକ୍ସି ୱାନିଙ୍ଗ୍ ଶାକ୍ତି ସିତାନ୍।
ୱିଜୁୱେଡ଼ାଦୁ ପାର୍ତନା ୱିଜ୍ନି ୱେନ୍କା, ଯିଶୁ ୱାରି ସିସୁରି ଡାଗ୍ରୁ ୱାଜିମାର୍ହାନ୍, ମାତର୍ ୱାରୁ ସୁଞ୍ଜିତା ମାର୍ହାର୍। ନାସ୍ତିୱାଲେ ୱାଣ୍ଡ୍ରୁ ମୁଣ୍ଡ୍ରି ଜାରିଙ୍ଗ୍ ୱାତାନ୍, ଯିଶୁ ୱେର୍ତାନ୍ “ନିଙ୍ଗ୍ଦୁ! ନା ସତ୍ରୁ କିୟୁଦୁ ସର୍ପେ କିନିକାନ୍ ଡାଗ୍ରୁ ୱାତାନ୍।”
ଯିହୂଦା ଯିହୂଦୀ ନେତାର୍ ମାରି ସେନାର୍ ମାରି ନାଣ୍ତୋ ଲୋକା ୱାଲେ ୱାତାନ୍। ୱାରୁ ଖଣ୍ଡା ମାରି କଣେଙ୍ଗ୍ ଆସ୍ତାମାହାର୍। ଯିହୂଦା ଯିଶୁଦି ଡାଗ୍ରୁ ୱାଜି ୱାନିଙ୍ଗ୍ ୱେର୍ତାନ୍ “ହେ ଗୁରୁ ଜୁୱାର୍” ମାରି ୱାନିଙ୍ଗ୍ ନଣ୍ତିତାନ୍। ଯିହୂଦୀ ନେତାରିଙ୍ଗ୍ ଏନେଟ୍ଗି ଯିଶୁଦିଙ୍ଗ୍ ଆସ୍ନାର୍ ଇୟା ୱାନ୍ଦିଙ୍ଗ୍ ୱାଣ୍ଡ୍ରୁ ଇକା କିତାନ୍। ଦାନିୱେନ୍କା ଯିଶୁ ୱେର୍ତାନ୍, “ଯିହୂଦା, ଇନିକା ନଣ୍ତିଜି ନିନୁ ନାଙ୍ଗିଁ ଶାତ୍ରୁ କିୟୁଦୁ ସର୍ପେକିଜିନି?”
ଏସ୍ତିୱାଲେ ସେନାର୍ ଯିଶୁଦିଙ୍ଗ୍ ତହ୍ସିମାହାର୍, ପିତର ୱାରି ଖଣ୍ଡା ସପ୍ତାନ୍ ମାରି ପେରିଜାଜ୍କ୍ରି ଦାସ୍ତି ଗିତଣି କହିତା ଡିସ୍ତାନ୍। ମାତର୍ ଯିଶୁ ୱେର୍ତାନ୍ “ଖଣ୍ଡାଦିଙ୍ଗ୍ ଆକୋ ଇଡ୍ଆ! ନାଙ୍ଗିଁ ରକ୍ୟା କିନି ୱାନ୍ଦିଙ୍ଗ୍ ନାନୁ ବୁବାଦିଙ୍ଗ୍ ଦୁତ୍ଙ୍ଗା ଉଣ୍ତ୍ରେ ସେନାମାନ୍ଦାଦିଙ୍ଗ୍ ଲସ୍ତେଙ୍ଗ୍ ଆଟ୍ନା। ମାତର୍ ସତ୍ନେ ନାନୁ ନା ବୁବାଦି ନିୟମ୍ ମାନାନା।” ଦାନିୱେନ୍କା’ ଯିଶୁ ଆୟା ଲୋକୁଦି ଗିତଣି ନେଗେଣ୍ତ୍ କିତାନା। ଯିଶୁ ତର୍ହତି ୱେନ୍କା ୱିଜୁ ସିସୁର୍ ଉର୍କ୍ସି ସର୍ହାର୍।
ବାଇବଲ ଦି ଉଣ୍ତ୍ରେ କାତାନି ମାଥିଉ ୨୬;୧୪-୫୬; ମାର୍କ ୧୪:୧୦-୫୦; ଲୂକ ୨୨:୧-୫୩; ଯୋହନ ୧୨:୬ ;୧୮:୧-୧୧
Free to use, adapt, and share under an open license (CC BY-SA 4.0).