39. ୩୯. ଯିଶୁଦି ମୁସ୍କୁ ବିଚାର୍ କିତାର୍
ଇଏଲ୍ ଇକା ମାଜେର୍ ନାଡା ମାର୍ହାତ୍। ଆୟା ସେନାର୍ ଯିଶୁଦିଙ୍ଗ୍ ପେରି ଯାଜକରି ଇଲୁଦୁ ଅତାର୍, ମାତର୍ ୱାଣ୍ଡ୍ରୁ ଯିଶୁଦିଙ୍ଗ୍ ମାଟା ୱନ୍ବାଦେଙ୍ଗ୍ ମାନ୍ସୁ କିଜିମାର୍ହାନ୍। ପିତର ଆକଣାନ୍ ୱାରି ୱାଲେ ୱାଲେ ସନ୍ସି ମାର୍ହାନ୍। ଏସ୍ତିୱାଲେ ସେନାର୍ ଯିଶୁଦିଙ୍ଗ୍ ଇଲୁଦୁ ଅତାର୍, ଆଦେଙ୍ଗେ ପିତର ଡ଼େୱାଦୁ ମାନ୍ଜି ସିସୁ କାଇଜି ମାର୍ହାନ୍।
ଇଲୁ ଲୋଇ, ଯିହୁଦି ନେତାର୍ ଯିଶୁଦିଙ୍ଗ୍ ବିଚାର୍ କିତାମାର୍ହାର୍। ୱାରୁ ୱାନି ବିଷୟଦିଙ୍ଗ୍ ମିଛ ମାଟା ୱେର୍ନିୱାନ୍ଦିଙ୍ଗ୍ ନାଣ୍ଡୋ ମିଛ୍ ସାକି ତାତାର୍। ମାତର, ୱାରି ମାଟା ୱାରି-ୱାରି ୱାଲେ ଉଣ୍ଡ୍ରେ ସମାନ୍ ସିଲେଣ୍ଡା ମାର୍ହାତ୍, ଇୟାୱାନ୍ଦିଙ୍ଗ୍ ଯିହୁଦି ନେତାର୍ ୱାଣ୍ଡ୍ରୁ ଦସି ଇଜି ପର୍ମାନ୍ କିଦେଙ୍ଗ୍ ଆଟ୍ଏତାର୍। ଯିଶୁ ଇନିକା ୱେର୍ଏତାନ୍।
ୱେନ୍କା, ପେରି ଯାଜକ ଯିଶୁଦିଙ୍ଗ୍ ତିନାଙ୍ଗାଁ ସୁଡ଼୍ଜି ୱେହ୍ତାନ୍, “ମାଙ୍ଗିଁ ୱେହ୍ଆ, ଇନିକା ନିନୁ ଜିଉତି ମାପ୍ରୁଦି ମାରିନ୍ କ୍ରିଷ୍ଟ ନା?”
ଯିଶୁ ୱେର୍ତାନ୍,“ହଁ ନାନୁ, ମାରି ମିରୁ ନାଙ୍ଗିଁ ମାପ୍ରୁଦି ୱାଲେ ବାସ୍ନି ମାନ୍ଜିନିକା ମାରି ସାରଗ୍ଦୁ ୱାନିକାବା ସୁଡ୍ନିଦେର୍।” ପେରି ଯାଜକ ନିଜେଦି ସକା କିସ୍ତାନ୍ ମାତର୍ ଯିଶୁଦି ଏମେ ମାଟ ୱେର୍ତାମାର୍ହାନ୍ ଆୟାୱାନ୍ଦିଙ୍ଗ୍ ୱାଣ୍ଡ୍ରୁ କାକା ଆତାମାର୍ହାନ୍। ୱାଣ୍ଡ୍ରୁ ଆଇ ନେତାରିଙ୍ଗ୍ ଆଉଲି ଆଜି ୱେହ୍ତାନ୍, “ଇୟାଲୋକୁ ଇନିକା କିତାମାନାନ୍ ଆକା ୱେହ୍ନି ୱାନ୍ଦିଙ୍ଗ୍ ମାଙ୍ଗିଁ ଆଇମାରି ସାକିରିଙ୍ଗ୍ ଦର୍କାର୍ ସିଲେ! ମିରୁ ନିଜେ ଇକା ୱେର୍ନିକା ୱେର୍ଇଦେର୍ ଗାନି ୱାଣ୍ଡ୍ରୁ ମାପ୍ରୁ ଦି ମାରିନ୍। ୱାନି ୱାନ୍ଦିଙ୍ଗ୍ ନି ନିସ୍ପତି ଇନିକା।
ଯିହୁଦି ନେତାର୍ ୱିଜେରେ ପେରି ଯାଜକଦିଙ୍ଗ୍ ଉତର୍ ସିତାର, “ୱାଣ୍ଡ୍ରୁ ସାଦେଙ୍ଗ୍ ଜଗ୍!” ଦାନିୱେନ୍କା ଯିଶୁଦିଙ୍ଗ୍ କାଣ୍କାଦୁ ତହ୍ତାର୍, ୱାନିମୁସ୍କୁ ପୁସ୍ତାର୍, ୱାନିଙ୍ଗ୍ ଢେଇତାର୍, ମାରି ୱାନିଙ୍ଗ୍ ସେମାର୍ କିତାର୍।
ମାରି ପିତର, ନାସ୍ତିୱାଲେ ୱାଣ୍ଡ୍ରୁ ଇଲୁ ଡେୱାଦୁ କାପ୍କିତା ମାର୍ହାନ୍। ଏସ୍ତିୱାଲେ ଅରେତ୍ ଦାସି ୱାନିଙ୍ଗ୍ ସୁଡ୍ତାତ୍। ଆକାତ୍ ୱାନିଙ୍ଗ୍ ୱେହ୍ତାତ୍, ନିନୁବା ଯିଶୁଦି ୱାଲେ ମାହି! ପିତର୍ ଦେନିଙ୍ଗ୍ ନେସ୍ଏ ଇର୍ହାନ୍। ୱେନ୍କା, ଆଇ ଅରେଦ୍ ଆଇଲିବା ସମାନ୍ ମାଟା ୱେର୍ତାତ୍, ମାରି ପିତର୍ ମାରିଢେସି ନେସ୍ଏ ଇହାନ୍। ୱେନ୍କା ଏସୋ ଲୋକୁ ୱେର୍ତାର୍, “ମାପୁ ନେସ୍ନାପ୍ ଗାନି ନିନୁ ଯିଶୁଦି ୱାଲେ ମାର୍ହି ମାତର୍ ମିରୁ ରିଇଦେର୍ ଗାଲିଲିତିକିଦେର୍।
ଦାନିୱେନ୍କା ପିତର ୱେହ୍ତାନ୍, “ଜଦି ନାନୁ ଇୟା ଲୋକାଙ୍ଗ୍ ନେସ୍ନାନ୍ ମାରି ମାପ୍ରୁ ନାଙ୍ଗିଁ ଆନାଦୁରିଆ ସିପିନ୍!” ପିତର ଇୟାୱାଜା ପାର୍ମାଣାମ୍ କିନି ୱେନ୍କା ଦାପେ-ଦାପେ ଉଣ୍ତ୍ରେ କୋରୁ କେରେତାତ୍। ଯିଶୁ ମାର୍ଜି ପିତର ତୋର୍ନ ସୁଡ୍ତାନ୍।
ପିତର ଆବେଣାନ୍ ସନ୍ସି ଡ଼େଢ୍ସି-ଡ଼େଢ୍ସି ଆଡ୍ବାତାନ୍। ଆୟା ୱେଡାଦୁ, ଯିଶୁଦିଙ୍ଗ୍ ଆସ୍ପିସ୍ତାନ୍ ଯିହୁଦା ସୁଡ଼୍ତାନ୍ ଗାନି ଯିହୁଦି ନେତାର୍ ଯିଶୁଦିଙ୍ଗ୍ ସାନିଡଣ୍ତୋ୍ ସିଜିନାର୍। ଯିହୁଦା ନାଣ୍ଡୋ ଦୁକାମ୍ଆଜି ସନ୍ସି ନିଜେ ପାସିଆଜି ସାତାନ୍।
ଇଏଲ୍ ପିଲାତ ଯିହୁଦାଦି ଗବର୍ନର୍ ମାର୍ହାନ୍। ୱାଣ୍ଡ୍ରୁ ରୋମଦେଶେମ୍ ୱାନ୍ଦିଙ୍ଗ୍ ପାଣି କିଜିମାର୍ହାନ୍। ଯିହୁଦି ନେତାର୍ ଯିଶୁଦିଙ୍ଗ୍ ୱାନି ଡାଗ୍ରୁ ତାତାର୍। ୱାରୁ ମାନ୍ସୁ କିଜିମାର୍ହାର୍ ଗାନି ପିଲାତ ଯିଶୁଦିଙ୍ଗ୍ ସାନିଦଣ୍ଡ ସିଜି ୱାନିଙ୍ଗ୍ ସାଗୁମାର୍ଗା ଢେଇନ୍। ପିଲାତ ଯିଶୁଦିଙ୍ଗ୍ ୱେନ୍ବାତାନ୍, “ଇନିକା ନିନୁ ଯିହୁଦିରି ରାଜା ନା?”
ଯିଶୁ ଉତର୍ ସିତାନ୍, “ନିନୁ ସତ୍ ୱେର୍ତିମାନି। ମାତର୍ ନା ରାଜି ପୁର୍ତିବିଦୁ ସିଲେତ୍। ଜଦି ଆତାତ୍ ଆଦେଙ୍ଗେଁ, ନା ସେବକର୍ ନା ୱାନ୍ଦିଙ୍ଗ୍ ଯୁଦ୍ଦ୍ କିତାର୍ମାରି। ନାନୁ ମାପ୍ରୁଦି ମାଟାଦାନ୍ ନିକାମେ ୱେର୍ନି ୱାନ୍ଦିଙ୍ଗ୍ ପୁର୍ତିବିଦୁ ୱାତାମାନା। ଏମେକାର୍ ସତ୍ଦିଙ୍ଗ୍ ଜିଉ ନୋନାର୍, ଆକାର୍ ନା ମାଟା ୱେନାର୍।” ପିଲାତ ୱେନ୍ବାତାନ୍, “ ଆଦେଙ୍ଗେ ନିକାମ୍ ଇନିକା?”
ଯିଶୁଦି ୱାଲେ ମାଟାୱାର୍ଗିନି ୱେନ୍କା, ପିଲାତ ଲୋକା ଡାଗ୍ରୁ ସନ୍ସି ୱେର୍ତାନ୍, “ନାନୁ ଇନିକା ଦୋସ୍ ରେବାଜି ଆଟ୍ଏନ୍ ଗାନି ଇୟା ଲୋକୁ ସାଦେଙ୍ଗ୍ ଜଗ୍।” ମାରି ଯିହୁଦି ନେତା ମାରି ଲୋକୁ ଆଉଲି ଆଜି ୱେର୍ତାର୍, “ୱାନିଙ୍ଗ୍ କ୍ରୁଶଦୁ ଏକିସ୍ତୁ!” ପିଲାତ ଉତର୍ ସିତାନ୍, “ ଆକାନ୍ ଇନିକା ବୁଲ୍ କିଏନ୍ ମାରି ଦୋସି ଆଏନ୍।” ମାରି ୱାରୁ ମାରି ନାଣ୍ତୋ ଆଉଲି ଆତାର୍। ଇୟାୱେନ୍କା ପିଲାତ ମୁଣ୍ତ୍ରିଜାରିଙ୍ଗ୍ ୱେର୍ତାନ୍, “ଆକାନ୍ ଦୋସି ସିଲେନ୍।”
ପିଲାତ ତିଏଲାତାନ୍ ଗାନି ଆୟା ଲୋକୁଗୋଲି ଗଣ୍ତ୍ଗଲ୍ ଆରାମ୍ କିନାର୍, ଇୟାୱାନ୍ଦିଙ୍ଗ୍ ୱାଣ୍ଡ୍ରୁ ୱାନି ସେନାରିୱାଲେ ଯିଶୁଦିଙ୍ଗ୍ କ୍ରୁଶଦୁ ଏକିସ୍ତେଙ୍ଗ୍ ରାଜି ଆତାନ୍। ରୋମ୍ ଦେଶେମ୍ତି ସେନାର୍ ଯିଶୁଦିଙ୍ଗ୍ କର୍ଡ଼ା ଡ଼େଇତାର୍ ମାରି ୱାନି ମୁସ୍କୁ ଉଣ୍ତ୍ରେ ରାଜାରି ସୋକା ମାରି ସାପ୍କାଣାନ୍ ତିଆର୍ ଆତିମାହି ମୁକୁଟ୍ ଆର୍ପିସ୍ତାର୍। ଇୟା ୱେନ୍କା ୱାରୁ ୱାନିଙ୍ଗ୍ ସେମାର୍ କିଜି ୱେର୍ତାର୍, “ସୁଡ଼୍ଦୁ, ଯିହୁଦୀରି ରାଜା!”
ମାଥିଉ ୨୬:୫୭-୨୭:୨୬; ମାର୍କ ୧୪:୫୩-୧୫:୧୫; ଲୁକ ୨୨:୫୪-୨୩:୨୫; ଯୋହନ ୧୮:୧୨-୧୯:୧୬ ବାଇବଲଦି ଉଣ୍ଡ୍ରେ କାତାନି
Free to use, adapt, and share under an open license (CC BY-SA 4.0).