40. ୪୦. ଯିଶୁଦିଙ୍ଗ୍ କ୍ରୁଶଦୁ ଏକିସ୍ତାର୍
ଯିଶୁଦିଙ୍ଗ୍ ସେମାର୍କିତି ୱେନ୍କା, ସେନାର୍ ୱାନିଙ୍ଗ୍ କୁର୍ଶଦୁ ଏକିସ୍ତେଙ୍ଗ୍ ଅତାର୍। ୱାଣ୍ତ୍ରୁ ଆୟାକୁର୍ଶଦିଙ୍ଗ୍ ନିକ୍ତାନ୍ ଏମେବାନୁଗି ୱାଣ୍ତ୍ରୁ ସାଦେଙ୍ଗ୍ ମାର୍ହାତ୍।
ଆୟା ସେନାର୍ ଯିଶୁଦିଙ୍ଗ୍ “ଗିଡ୍ଗି“ ୱେର୍ନି ବାଡିଦୁ ତାସି ୱାନିକିୟୁ ମାରି ପାଦାମ୍କାଙ୍ଗ୍ କୁର୍ଶଦୁ ଏକିସ୍ତାର୍। ମାତର୍ ଯିଶୁ ୱେର୍ତାନ୍, ଏ ବାବୁ, ୱାରିଙ୍ଗ୍ କ୍ଷମା କିଆ, ମାତର୍ ୱାରୁ ଇନିକା କିଜିନାର୍ ଆକା ନେସ୍ଏର୍।“ ୱାରୁ ୱିଜୁ ୱାନି ତାଲାମୁସ୍କୁ କୁର୍ଶଦି ମୁସ୍କୁ ଉଣ୍ତ୍ରେ ପାଟା ଡ଼େଇତା ମାର୍ହାର୍। ଇୟା ମୁସ୍କୁ ରାସାତାମାର୍ହାତ୍, “ଯିହୁଦୀରି ରାଜା।“ ପୀଲାତ ୱାନିଙ୍ଗ୍ ଇକା ରାସ୍ତେଙ୍ଗ୍ ୱେର୍ତାନ୍।
ଇୟାୱେନ୍କା ସେନାର୍ ଯିଶୁଦି ସୋକା ୱାନ୍ଦିଙ୍ଗ୍ ସିଟିପୋକ୍ତାର୍। ଏସ୍ତିୱାଲେ ୱାରୁ ଇୟାୱାଜା କିତାର୍, ଭବିଷ୍ୟତ ବାଣୀଦିଙ୍ଗ୍ ପୁରା କିତାନ୍, ଏମେବାଣାନ୍ଗି ୱେହ୍ତାମାର୍ହାର୍, “ୱାଣ୍ତ୍ରୁ ନା ସୋକାଦିଙ୍ଗ୍ ନିଜେ ଡାଗ୍ରୁ ବାଟାକିତାର୍, ମାରି ନା ସୋକା ୱାନ୍ଦିଙ୍ଗ୍ ସିଟି ପୋକ୍ତାର୍।”
ଆବେନୁ ରିଏର୍ ଡାକୁର୍ ବା ମାର୍ହାର୍, ଏମେୱାନିଙ୍ଗ୍ ଗି ସେନାର୍ ଆୟାୱେଡ଼ାଦୁ କୁର୍ଶଦୁ ଏକିସ୍ତା ମାର୍ହାର୍। ୱାଣ୍ତ୍ରୁ ୱାରିଙ୍ଗ୍ ଯିଶୁଦି ରିୟାଙ୍ଗାଁ କ୍ରୁଶଦୁ ଏକିସ୍ତା ମାର୍ହାର୍। ଡାକୁରି ବାଣାନ୍ ଅରେନ୍ ଯିଶୁଦିଙ୍ଗ୍ ସେମାର୍ କିତାନ୍, ମାତର୍ ଆଇକାନ୍ ଅରେନ୍ ୱେର୍ତାନ୍, “ନିନୁ ଇନିଦାନିଙ୍ଗ୍ ତିଲାଇ ନା ମାପ୍ରୁ ନିଙ୍ଗିଁ ଡଣ୍ତ ସିନାନ୍? ମାପୁ ନାଣ୍ତୋ ସେଇପାଣି କିନିୱାନ୍ଦିଙ୍ଗ୍ ଦସି ଆତାପ୍, ମାତର୍ ଇୟା ଲୋକୁ ତୋ ଦସି ସିଲିକାନ୍।” ଦାନିୱେନ୍କା ୱାଣ୍ତ୍ରୁ ଯିଶୁଦିଙ୍ଗ୍ ୱେର୍ତାନ୍, “ଏସେଙ୍ଗ୍ ନି ଶାସନ୍ ୱାନାତ୍, ଦୟାକିଜି ନାଙ୍ଗିଁ ଅଡ଼୍ବିଆ।” ଯିଶୁ ଉତର୍ ସିତାନ୍, ନେରୁ ମିରୁ ନା ୱାଲେ ସର୍ଗଦୁ ମାନ୍ଜିନି।
ଦାନିୱେନ୍କା ଯିହୁଦୀ ନେତାର୍ ମାରି ଆଇକାର୍ ଯିଶୁଦିଙ୍ଗ୍ ସେମାର୍ କିଦେଙ୍ଗ୍ ଆସ୍ତାର୍, ୱାନିଙ୍ଗ୍ ୱେର୍ତାର୍, “ଜଦି ନିନୁ ମାପ୍ରୁଦି ମାରିନ୍, ଆହୁଇହିଙ୍ଗାଁ ନିନୁ କ୍ରୁଶଦାନ୍ ରେସିରାଆ ମାରି ନିଜେ ନିଜେଦିଙ୍ଗ୍ ରକିୟା କିଆ! ମାରି ଦାନିୱେନ୍କା ମାପୁ ନି ମୁସ୍କୁ ବିସ୍ବାସ୍ କିନାପ୍।”
ମାଦ୍ଲାମି ଆତିମାର୍ହି ୱେନ୍କା ଆୟାୱାଲେ ଆୟା ଦେସେମ୍ଦି ୱିଜୁବାଦଡ଼୍ ପୁରା ସିକାଟି ଆତାତ୍, ମାରି ରୁଣ୍ତି ଗାଣ୍ଟା ୱେଡ଼ାଦୁ ସିକାଟି ମାର୍ହାତ୍ ମାରି ମୁଣ୍ତ୍ରିଗାଣ୍ଟାସାନ୍ଦି ଆୟାୱାଜା ନେ ମାର୍ହାତ୍।
ଦାନିୱେନ୍କା ଯିଶୁ ସେଉଡୁ ଆଜି ୱେର୍ତାନ୍, “ଇକା ୱିଜିତାତ୍! ଏ ବୁବା, ନାନୁ ନା ଜିଉଦିଙ୍ଗ୍ ନି କିୟୁଦୁ ସିଜିନା।” ଦାନିୱେନ୍କା ୱାଣ୍ତ୍ରୁ ୱାନି ତାଲାପାଡ଼୍କ୍ସି ମାରି ନିଜେଦି ଜିଉଦିଙ୍ଗ୍ ସିତାନ୍। ଏସ୍ତିୱାଲେ ୱାଣ୍ତ୍ରୁ ସାତାନ୍ ଆୟାୱାଲେ ଉଣ୍ତ୍ରେ ବୁମି କାଦ୍ଲିତାତ୍। ମନ୍ଦିର୍ଦୁ ମାନ୍ଜି ଆୟା ପେରି ପାର୍ଦା ଏମେକାଗି ମାପ୍ରୁଦି ମାନ୍ଜିନି ବାଡୁଦାନ୍ ଲୋକାଙ୍ଗ୍ ୱେହେ କିଜିମାର୍ହାତ୍ ଆକା ମୁସ୍କୁହାନ୍ ସାଲୁ ସାନ୍ଦି ରୁଣ୍ତି ବାଗ୍ ଆତାତ୍।
ୱାନି ସାତିବାଣାନ୍, ଯିଶୁ ଲୋକାଙ୍ଗ୍ ମାପ୍ରୁଦି ଡାଗ୍ରୁ ୱାନିୱାନ୍ଦିଙ୍ଗ୍ ସାରି ରେତାମାର୍ହାର୍। ନାସ୍ତିୱାଲେ ଯିଶୁଦିଙ୍ଗ୍ ସୁଡ଼୍ଜିମାହି ଅରେନ୍ ସେନା ଏମେକା ୱିଜୁ ଗଟ୍ନା ଗଟେଆତିମାହିକା ସୁଡ଼୍ଜି ୱାଣ୍ତ୍ରୁ ୱେର୍ତାନ୍, “ନିକାମେ ନେ, ଇୟା ଲୋକୁ ଦସି ସିଲେଣ୍ତା ମାହାନ୍। ଇକାନ୍ ମାପ୍ରୁଦି ମାରିନ୍ ମାର୍ହାନ୍।”
ମାରି ଯୋଶେଫ ମାରି ନିକଦିମସ୍ ଦରୁଦି ରିଏର୍ ଯିହୁଦୀ ୱାତାର୍। ୱାରୁ ବିସ୍ବାସ୍ କିଜିମାହାର୍ ଜେ ଯିଶୁ ଆଜିନାନ୍ ଖ୍ରୀଷ୍ଟ। ୱାରୁ ପୀଲାତଦିଙ୍ଗ୍ ଯିଶୁଦି ମେନ୍ଦଲ୍ଦିଙ୍ଗ୍ ଲସ୍ତାର୍। ୱାଣ୍ତ୍ରୁ ୱାନି ମେନ୍ଦଲ୍ଦିଙ୍ଗ୍ ପାସ୍ସିୟା ପିଡ଼୍କ୍ତାର୍। ଦାନିୱେନ୍କା ୱାରୁ ୱାନିଙ୍ଗ୍ ଉଣ୍ତ୍ରେ କାଲୁ ପରାଲୋଇ ଅତାର୍ ମାରି ଆବେନୁ ଇଟ୍ତାର୍। ଦାନିୱେନ୍କା ୱାଣ୍ତ୍ରୁ ଆୟା ଦୁକିଦି ସେହ୍ଲାକେହ୍ନି ୱାନ୍ଦିଙ୍ଗ୍ ଉଣ୍ତ୍ରେ ପେରି କାଲୁ ଗୁର୍ପୁତାର୍।
ମାଥିଉ ୨୭:୨୭-୬୧; ମାର୍କ ୧୫:୧୬-୪୭; ଲୂକ ୨୩:୨୬-୫୬; ଯୋହନ ୧୯:୧୭-୪୨ ଦି ଉଣ୍ତ୍ରେ ବାଇବଲ ଦି କାତାନି
Free to use, adapt, and share under an open license (CC BY-SA 4.0).