41. ୪୧. ମାପ୍‌ରୁ ଯିଶୁଦିଙ୍ଗ୍ ସାତିବାଣାନ୍ ମାରିଡ଼େସି ନିକ୍‌ତାନ୍‌

ସେନାର୍ ଯିଶୁଦିଙ୍ଗ୍ କୁର୍‌ଶଦୁ ଏକିସ୍‌ତି ୱେନ୍‌କା, ଯିହୁଦୀ ନେତାର୍ ପିଲାତଦିଙ୍ଗ୍ ୱେର୍‌ତାର୍, “ଆୟା ବାଣ୍ତିସ୍‌ନି, ଯିଶୁ ୱେର୍‌ତାମାର୍‌ହାନ୍ ଜେ ୱାଣ୍ତ୍ରୁ ମୁଣ୍ତ୍ରିଦିନା ୱେନ୍‌କା ସାତିବାଣାନ୍ ମାରିଡ଼େସି ନିଙ୍ଗ୍‌ନାନ୍‌। ୱାନି ମେନ୍ଦଲ୍‌ଦିଙ୍ଗ୍ ୱାନି ସିସୁର୍ ଡଙ୍ଗାଁକିଜି ଅଇୱାନ୍ଦିଙ୍ଗ୍ ଗୁଟାଦୁ କାପ୍‌କିବିସ୍‌ତେଙ୍ଗ୍ ନିକାମେନେ ଦର୍‌କାର୍। ଜଦି ଆୟାୱାଜା କିତାର୍‌ ଆହିଙ୍ଗାଁ ୱାରୁ ୱେର୍‌ନାର ୱାଣ୍ତ୍ରୁ ସାଜି ମାରିଡ଼େସି ନିଙ୍ଗିଁତା ମାନାନ୍।”

ପିଲାତ ୱେର୍‌ତାନ୍, “ଏସୋ ସେନାରିଙ୍ଗ୍‌ ଅତୁ ମାରି ମିରୁ ଏଣ୍ତେସ୍ ଆଟ୍‌ନିଦେର୍ ଆୟାୱାଜା କାପ୍‌କିବିସ୍‌ତୁ।” ଆୟାୱାନ୍ଦିଙ୍ଗ୍ ୱାରୁ ଗୁଟାତି ଡ଼ୁଗ୍‌ନି ଦୁୱାର୍‌ତି କାଲୁଦିଙ୍ଗ୍ ତାଲାମ୍ ଆର୍‌ପ୍‌ତାର୍। ୱାରୁ ଯିଶୁଦି ମେନ୍ଦଲ୍ ଏୟେର୍ ଡଙ୍ଗାକିଜି ଅଇୱାନ୍ଦିଙ୍ଗ୍ ସେନାରିଙ୍ଗ୍ କାପ୍‌କିବିସ୍‌ତାର୍।

ଯିଶୁଦି ସାତି ୱେନ୍‌କାହି ଦିନାମ୍ ଆଦିୱାର୍ ମାହାତ୍‌। ଆଦିୱାର୍ ଦିନାମ୍‌ଦୁ ଏୟେର୍‌ବା ପାଣି କିଏଜିମାର୍‌ହାର୍‌, ଆୟାୱାନ୍ଦିଙ୍ଗ୍‌ ଯିଶୁଦି ଏମେ ତଡ଼ୁର୍‌ ଗୁଟାଦୁ ରେଏଣ୍ତାମାର୍‌ହାର୍‌। ମାତର୍ ଆଦିୱାର୍‌ତି ୱେନ୍‌କାହି ଦିନାମ୍ ନାଣ୍ତୋସାଲ୍‌ଦି ଏସୋ ଆଇଲିକଡ଼କ୍‌ ଯିଶୁଦି ଦୁକି ଡାଗ୍‌ରୁ ସନ୍‌ଣ୍ତ୍ରେଙ୍ଗ୍ ତିଆର୍ ଆତେ। ଆୱିକ୍‌ ୱାନି ମେନ୍ଦଲ୍‌ଦୁ ନିୟୁ ଉସୁତେଙ୍ଗ୍ ମାନ୍‌ସୁ କିଜିମାର୍‌ଏ।

ଆୟା ଆଇଲିକଡ଼କ୍‌ ସନି ଆଗ୍‌ଡ଼ି, ଦୁକି ଡାଗ୍‌ରୁ ଉଣ୍ତ୍ରେ ପେରି ବୁମିକମ୍ପ ଆତାତ୍‌। ସର୍‌ଗଦାନ୍ ଅରେନ୍ ଦୁତ୍ ୱାଜି ଗୁଟାଦୁ ଡ଼ୁଗ୍‌ନି ଦୁୱାର୍‌ଦୁ କେହ୍‌ସିମାହି କାଲୁଦିଙ୍ଗ୍ ଗୁରୁପ୍‌ସି ଦାନିମୁସ୍‌କୁ ବାସ୍‌ତାମାର୍‌ହାନ୍‌। ଆୟା ସରଗ୍‌ଦୁତ୍ ଜାଇଆଜି ତର୍‌ଜିମାର୍‌ହାତ୍। ଦୁକିଦୁମାନି ସେନାର୍ ୱାନିଙ୍ଗ୍ ସୁଡ଼୍‌ତାର୍। ୱାରୁ ଇୟାୱାଜା ତିଳାତା ମାହାର୍ ଜେ ସାତିୱାଜା ଆଜି ବୁମିଦୁ ଆର୍‌ତାମାର୍‌ହାର୍‌।

ଏସ୍ତିୱାଲେ ଆୟା ଆଇଲିକଡ଼କ୍‌ ଗୁଟାଦୁ ଇତେ, ମାରି ସର୍‌ଗଦୁତ୍ ୱାନ୍‌କାଙ୍ଗ୍ ୱେର୍‌ତାନ୍, “ତିଲାମାଟ୍। ଯିଶୁ ଇବେନୁ ସିଲେନ୍। ୱାଣ୍ତ୍ରୁ ସାତିବାଣାନ୍ ମାରିଢ଼େସି ନିଙ୍ଗିଁତା ମାନାନ୍, ଏମେୱାଜାଗି ୱେହ୍‌ତାମାହାନ୍ ୱାଣ୍ତ୍ରୁ ମାରିଢ଼େସି ନିଙ୍ଗିଁନା! ଇବେନୁ ସନ୍‌ଡ୍ରୁ ରେବାଜି ସୁଡ଼୍‌ଦୁ।” ଆୟା ଆଇଲିକଡ଼କ୍‌ ଗୁଟାଲୋଇ ସନ୍‌ସି ରେବାତେ ମାରି ଯିଶୁଦି ସାତିମେନ୍ଦଲ୍ ଏମେବାନୁ ଇଟ୍‌ତାମାର୍‌ହାର୍ ମାରି ସୁଡ଼୍‌ତେ ଜେ ୱାନିମେନ୍ଦଲ୍ ଆବେନୁ ସିଲେତ୍।

ଦାନିୱେନ୍‌କା ଆୟାସର୍‌ଗଦୁତ୍ ଆଇଲିକଡ଼କାଙ୍ଗ୍‌ ୱେର୍‌ତାନ୍‌, “ସନ୍‌ସି ୱାନିଙ୍ଗ୍ ସିସୁରିଙ୍ଗ୍ ୱେର୍‌ତୁ, ‘ଯିଶୁ ସାତିବାଣାନ୍ ମାରିଢ଼େସି ନିଙ୍ଗିଁତାମାନାନ୍ ମାରି ମି ଆଗ୍‌ଡ଼ି ଗାଲିଲିଦୁ ସନ୍‌ସିନାନ୍‌।’”

ଆୟା ଆଇଲିକଡ଼ କାବାଆଜି ମାରି ନାଣ୍ତୋ ସାର୍‌ଦାଆତେ। ଆୱିକ୍ ସିସୁରିଙ୍ଗ୍ ଇୟା ନେଗିକାବୁର୍‌ ୱେନିସ୍‌ତେଙ୍ଗ୍‌ ଉରୁକ୍‌ସି ସଏ।

ଏସ୍ତିୱାଲେ ଆୟା ଆଇଲିକଡ଼କ୍‌ ସିସୁରିଙ୍ଗ୍ ଇୟା ନେଗିକାବୁର୍ ୱେର୍‌ତେଙ୍ଗ୍ ସନ୍‌ସିମାର୍‌ଏ, ନାସ୍ତିୱାଲେ ଯିଶୁ ୱାନ୍‌କାଙ୍ଗ୍ ତରାତାନ୍ ଆୱିକ୍‌ ୱାନି ପାଦାମ୍ ସାଲୁ ପାଡ଼୍‌ଗିତେ। ଦାନିୱେନ୍‌କା ଯିଶୁ ୱେର୍‌ତାନ୍, “ତିଲାମାଟ୍। ସନ୍‌ସି ମାରି ନା ସିସୁରିଙ୍ଗ୍ ଗାଲିଲିଦୁ ସନ୍‌ଡ୍ରେଙ୍ଗ୍‌ ୱେହ୍‌ତୁ। ୱାରୁ ନାଙ୍ଗିଁ ଆବେନୁ ସୁଡ଼୍‌ନାର୍।”