42. ୪୨. ଯିଶୁ ସାର୍ଗିଦୁ ଡ଼େସିସର୍ହାନ୍
ଏମେ ଦିନାମ୍ ମାପ୍ରୁ ଯିଶୁଦିଙ୍ଗ୍ ସାତିବାଣାନ୍ ମାରିଡ଼େସି ନିକ୍ତାନ୍, ୱାନି ରିଏର୍ ସିସୁର୍ ଡାଗ୍ରୁହି ଉଣ୍ତ୍ରେ ନାଟ ସନ୍ସି ମାର୍ହାର୍। ୱାଣ୍ତ୍ରୁ ବୁଲାନିୱାଲେ ଯିଶୁଦି ୱାଲେ ଏମେକା ଗଟେଆତା ମାହାତ୍ ଆୟା ବିଷୟ୍ଦିଙ୍ଗ୍ ୱାର୍ଗିଜି ମାର୍ହାର୍, ୱାରୁ ଆସାକିଜି ମାର୍ହାର୍ ଜେ ୱାଣ୍ତ୍ରୁ କ୍ରିଷ୍ଟ, ମାତର୍ ଆତିଙ୍ଗାଁ ୱାନିଙ୍ଗ୍ ସାନିଡଣ୍ତ୍ ସିତାର୍। ଇଏଲ୍ ଆୟା ଆଇମେକ୍ ୱାର୍ଗିଜି ମାହେ ଜେ ୱାଣ୍ତ୍ରୁ ମାରି ଜିଉ ଆତାନ୍। ୱାରୁ ନେସ୍ତେଙ୍ଗ୍ ଆଟ୍ଏଜି ମାର୍ହାର୍ ଜେ ଏମେ ମାଟାଦିଙ୍ଗ୍ ବିସ୍ବାସ୍ କିଦେଙ୍ଗ୍।
ଯିଶୁ ୱାରି ଡାଗ୍ରୁ ୱାଜି ୱାରି ୱାଲେ ବୁଲାଦେଙ୍ଗ୍ ଆସ୍ତାନ୍, ମାତର୍ ୱାରୁ ୱାନିଙ୍ଗ୍ ପଲିସ୍ତେଙ୍ଗ୍ ଆଟ୍ଏତାର୍। ୱାରୁ ଇନିକା ୱେହ୍ସିନାର୍ ଇଜି ୱାଣ୍ତ୍ରୁ ୱେନ୍ବାତାନ୍। ୱେନ୍କାହି ଦିନାମ୍ଦୁ ଯିଶୁଦି ୱାଲେ ଗଟେଆତି ୱିଜୁ ଗଟଣା ବିସୟ୍ଦିଙ୍ଗ୍ ୱାରୁ ୱାନି୍ଙ୍ଗ୍ ୱେହ୍ତାମାର୍ହାର୍। ୱାରୁ ଅଢ୍ବିତାର୍ ଜେ ୱାଣ୍ତ୍ରୁ ଆରେନ୍ ଆଇ ଦେସେମ୍ତି ୱାନିୱାଲେ ୱାର୍ଜି ମିଡିଜି ମାର୍ହାର୍ ଜେ ଯିରୁଶାଲାମ୍ଦୁ ଇନିକା ଗଟେଆତାତ୍ ଆକା ନେସ୍ଏଣ୍ତା ମାର୍ହାର୍।
ଦାନିୱେନ୍କା ଯିଶୁ ୱାରିଙ୍ଗ୍ ବୁଜାକିତାନ୍ ଜେ ମାପ୍ରୁଦି ବାକ୍ୟ କ୍ରିଷ୍ଟଦି ବିସୟ୍ଦିଙ୍ଗ୍ ଇନିକା ୱେହ୍ସିନାତ୍। ପୁର୍ବାମ୍ଦୁ ବାବବାଦିର୍ ୱେର୍ତା ମାର୍ହାର୍ ଜେ ସେଇ ଲୋକୁ ଯିଶୁଦିଙ୍ଗ୍ କଷ୍ଟ ସିଜି ସାୟାମାର୍ଗା ଡେଇନାର୍। ମାରି ବାବବାଦିର୍ ଇକା ବା ୱେର୍ତାମାହାର୍ ଜେ ୱାଣ୍ତ୍ରୁ ମୁଣ୍ତ୍ରି ଦିନାମ୍ଦୁ ନିଙ୍ଗ୍ଁନାନ୍।
ଏସ୍ତିୱାଲେ ୱାରୁ ଆୟା ଗଡ଼୍ଦୁ ଇତାର୍ ଏମେବାନୁଗି ରିଏର୍ ମାଣ୍ତ୍ରେଙ୍ଗ୍ ମାନ୍ସୁକିଜି ମାର୍ହାର୍, ନାସ୍ତିୱାଲେ ପାକାପାକି ମିଲିମିଲି ଆତାମାର୍ଆତ୍। ୱାରୁ ଯିଶୁଦିଙ୍ଗ୍ ୱାରିୱାଲେ ମାଣ୍ତ୍ରେଙ୍ଗ୍ କୁକ୍ତାର୍, ମାରି ୱାଣ୍ତ୍ରୁ ୱାରିୱାଲେ ଉଣ୍ତ୍ରେ ଇଲୁଦୁ ସର୍ହାର୍। ୱାରୁ ମିଲିମିଲି ଉଣ୍ତେଙ୍ଗ୍ ବାସ୍ତାର୍। ଯିଶୁ ଉଣ୍ତ୍ରେ ରୁଟି ଅସି, ଦାନିୱାନ୍ଦିଙ୍ଗ୍ ମାପ୍ରୁଦିଙ୍ଗ୍ ଦନ୍ୟବାଦ୍ ସିତାନ୍, ମାରି ଦାନିଙ୍ଗ୍ ରୁକ୍ତାନ୍। ଗାଦେମ୍ ୱାରୁ ନେସ୍ତାର୍ ଜେ ଇକାନ୍ ଆଜିନାନ୍ ଯିଶୁ। ମାରି ଆୟାୱେଡ଼ାଦୁ ୱାଣ୍ତ୍ରୁ ୱାରି ଏଦ୍ରୁହାଣ୍ ତର୍ଏଣ୍ତା ଆତାନ୍।
ଆୟା ରିଏର୍ ୱାରିୱାରି ଲୋଇ ୱେର୍ତାର୍, “ୱାଣ୍ତ୍ରୁ ଯିଶୁ ମାର୍ହାନ୍! ଆୟାୱାନ୍ଦିଙ୍ଗ୍ ୱାଣ୍ତ୍ରୁ ଏସ୍ତିୱାଲେ ମାପ୍ରୁଦି ବାକ୍ୟଦିଙ୍ଗ୍ ବୁଜାକିତାନ୍, ନାସ୍ତିୱାଲ ମା ମାନ୍ସୁ ନାଣ୍ତୋ ସାର୍ଦା ଆଜିମାର୍ଆତ୍!” ଗାଜିବିଜି ୱାରୁ ଯିରୁଶାଲାମ୍ଦୁ ଢେସିସହାର୍। ଏସ୍ତିୱାଲେ ୱାରୁ ଇତିୱେନ୍କା ସିସୁରିଙ୍ଗ୍ ୱେର୍ତାର୍, “ଯିଶୁ ଜିଉ ମାନାନ୍! ମାପୁ ୱାନିଙ୍ଗ୍ ସୁଡ଼୍ତାପ୍!”
ଏସ୍ତିୱାଲେ ସିସୁର୍ ୱାର୍ଗିଜି ମାର୍ହାର୍, ଯିଶୁ ଗାଦେମ୍ ୱାରିୱାଲେ ଆୟାଗୁଡ଼ାଦୁ ତରାୟ୍ ଆତାନ୍। ୱାଣ୍ତ୍ରୁ ୱେର୍ତାନ୍, ମି ୱାଲେ ଶାନ୍ତି ଆପିତ୍!” ସିସୁର୍ ଅଡ଼୍ବିତାର୍ ଜେ ୱାଣ୍ତ୍ରୁ ଆରେନ୍ ଦୁବା, ମାତର୍ ଯିଶୁ ୱେର୍ତାନ୍, ମିରୁ ଇନିଦାନିଙ୍ଗ୍ ତିଲାଜିନିଦେର୍? ନିନୁ ଇନିଦାନିଙ୍ଗ୍ ଅଡ଼୍ବିଇଦେର୍ ଜେ ଇକାନ୍ ନିକାମେ ଯିଶୁ ଇଜି? ନା କିୟୁ ମାରି ନା ପାଦାମ୍ଦିଙ୍ଗ୍ ସୁଡ଼୍ଦୁ। ଦୁବେଙ୍ଗାଁ ଇୟାୱାଜା ମେନ୍ଦଲ୍ ସିଲେତ୍। ଏଣ୍ତେସ୍ଗି ନା ଡାଗ୍ରୁ ମାନାତ୍। ୱାଣ୍ତ୍ରୁ ଦୁବା ଆଏନ୍ ଇଜି ତର୍ପ୍ତେଙ୍ଗ୍ ୱାଣ୍ତ୍ରୁ କାଣ୍ତେକ୍ ଉଣ୍ତେଙ୍ଗ୍ ଲସ୍ତାନ୍। ୱାରୁ ୱାରିଙ୍ଗ୍ ଉଣ୍ତ୍ରେ ମିନୁ କାଣ୍ତେକ୍ ସିତାର୍, ମାରି ୱାଣ୍ତ୍ରୁ ଆକା ତିହାନ୍।
ଯିଶୁ ୱେର୍ତାନ୍, “ନା ବିଷୟ୍ଦାନ୍ ମାପ୍ରୁଦି ବାକ୍ୟ ଇନିକା ବା ୱେହ୍ନାତ୍ ଆକା ଗଟେଆନାତ୍। ନାନୁ ମିଙ୍ଗିଁ ୱେହ୍ତାମାହା ଜେ ଇକା ନିକାମେ ନେ ଗଟେଆନାତ୍।” ଦାନିୱେନ୍କା ଯିଶୁ ୱାରିଙ୍ଗ୍ ମାପ୍ରୁଦି ବାକ୍ୟ ନେଗେଣ୍ତ୍ଦାନ୍ ବୁଜାକିତାନ୍। ୱାଣ୍ତ୍ରୁ ୱେର୍ତାମାର୍ହାନ୍ ନାଣ୍ତୋ ଆଗ୍ଡ଼ି ବାବବାଦିର୍ ରାସ୍ତାମାର୍ହାର୍ ଜେ ନାଙ୍ଗିଁ, କ୍ରିଷ୍ଟ ଦୁକ୍ ପାଏଆଦେଙ୍ଗ୍ ମାନାତ୍, ମାରି ସାଦେଙ୍ଗ୍ ମାନତ୍ ମାରି ମୁଣ୍ତ୍ରି ଦିନାମ୍ଦୁ ମାରିଢେସି ନିଙ୍ଗ୍ନାନ୍।”
ଆୟା ବାବବାଦିର୍ ଇକା ବା ରସ୍ତାମାହାର୍ ଜେ ନା ସିସୁର୍ ମାପ୍ରୁଦି ବାକ୍ୟ ୱେର୍ନାର୍। ୱାରୁ ୱିଜେରିଙ୍ଗ୍ ମନ୍ଦିଙ୍ଗ୍ ଡ଼େପ୍ତେଙ୍ଗ୍ ୱେର୍ନାର୍। ଜଦି ୱାରୁ ଇକା କିନାର୍ ମାରି ମାପ୍ରୁ ୱାରି ପାପାମ୍ କେମା କିନାନ୍। ନା ସିସୁର୍ ଯିରୁଶାଲାମ୍ଦାନ୍ ଇୟା ବାକ୍ୟ ପ୍ରଚାର୍ କିଦେଙ୍ଗ୍ ଆରାମ୍ କିନାର୍। ଦାନିୱେନ୍କା ୱାରୁ ୱିଜୁ ବାଡିଦୁ ମାରି ଜତିତି ଡାଗ୍ରୁ ସନାର୍। ମିରୁ ନା ୱିଜୁ ମାଟା ମାରି ୱିଜୁ ପାଣିଦି ସାକି ଆନାର୍, ଏମେକାଗି ୱେହ୍ତାମାହା ମାରି କିତାମାହା, ମାରି ଆୟାୱିଜୁ ବିଷୟ୍ ବା ଏମେକାଗି ନା ୱାଲେ ଆତାମାନାତ୍।”
ମାରି ନାଲ୍ପାଇଦିନାମ୍ ୱେନ୍କା, ଯିଶୁ ନିଜେ ସିସୁରିଙ୍ଗ୍ ନାଣ୍ତୋ ଜାରିଙ୍ଗ୍ ତରାତାନ୍। ଅର୍ସୁ ୱଣ୍ତ୍ରୁ ଉଣ୍ତ୍ରେ ୱେଡ଼ାଦୁ ୫୦୦ ଦାନ୍ ନାଣ୍ତୋ ଲୋକାଙ୍ଗ୍ ତରାତାନ୍! ୱାଣ୍ତ୍ରୁ ଜିଉ ମାନାନ୍ଇଜି ନିଜେଦି ସିସୁରିଙ୍ଗ୍ ଆଇ-ଆଇ ୱାଜା ତରାତାନ୍। ମାରି ୱାଣ୍ତ୍ରୁ ୱାରିଙ୍ଗ୍ ମାପ୍ରୁଦି ରାଜି ବିଷୟ୍ଦାନ୍ ସିକିୟା ସିତାନ୍।
ଯିଶୁ ନିଜେ ସିସୁରିଙ୍ଗ୍ ୱେର୍ତାନ୍, ମାପ୍ରୁ ନାଙ୍ଗିଁ ସାର୍ଗି ମାରି ପୁର୍ତିବିତି ୱିଜୁ ଲୋକା ମୁସ୍କୁ ସାସନ୍ କିଦେଙ୍ଗ୍ ଅଦିକାର୍ ସିତାମାନାନ୍। ଆୟାୱାନ୍ଦିଙ୍ଗ୍ ଇଏଲ୍ ନାନୁ ମିଙ୍ଗିଁ ୱେର୍ସିନା ସନ୍ଣ୍ତ୍ରୁ ମାରି ୱିଜୁ ଜାତିତି ଲୋକାଙ୍ଗ୍ ସିସୁର୍ କିଦୁ। ଇକା କିନି ୱାନ୍ଦିଙ୍ଗ୍ ମିରୁ ୱାରିଙ୍ଗ୍ ବୁବା ମାରିନ୍ ପବିତ୍ରାତ୍ମାଦୁ ଡୁବନ୍ ସିଦୁ।” ଏମେକା ନାନୁ ମିଙ୍ଗିଁ ଆଦେସ୍ ସିତାମାନା ଆୟାୱିଜୁ ଆଦେସ୍ ମାନାଦେଙ୍ଗ୍ ମାରି କିଦେଙ୍ଗ୍ ୱାରିଙ୍ଗ୍ ସିକିୟା ସିତାନ୍। ମାନ୍ସୁଦୁ ଇଡ୍ଦୁ ନାନୁ ୱିଜୁଦିନାମ୍ ମି ୱାଲେ ମାନ୍ଜିନା।”
ଯିଶୁ ସାତିବାଣାନ୍ ମାରିଢେସି ନିଙ୍ଗ୍ଜି ଚାଲିସ୍ ଦିନାମ୍ ୱେନ୍କା, ୱାଣ୍ତ୍ରୁ ନିଜେ ସିସୁରିଙ୍ଗ୍ ୱେର୍ତାନ୍, ଏମେସାନ୍ଦି ନା ବୁବା ମିଙ୍ଗିଁ ସାକ୍ତି ସିଏନ୍ ଆୟା ସାନ୍ଦି ଯିରୁଶାଲାମ୍ଦୁ ମାନ୍ଣ୍ତ୍ରୁ। ୱାଣ୍ତ୍ରୁ ମି ମୁସ୍କୁ ପବିତ୍ରଆତ୍ମା ପକ୍ନିବାଣାନ୍ ଇକା କିନାନ୍।” ଦାନିୱେନ୍କା ଯିଶୁ ସାର୍ଗିଦୁ ସର୍ହାନ୍ ମାରି ଉଣ୍ତ୍ରେ ବାଦଡ଼୍ ୱାନିଙ୍ଗ୍ ୱାରି ଏଦ୍ରୁଆନ୍ ମାରାକ୍ସି ଇଟ୍ତାତ୍। ସାର୍ଗିଦୁ ଯିଶୁ ୱିଜୁ ବିଷୟ୍ ମୁସ୍କୁ ସାସନ୍ କିନିୱାନ୍ଦିଙ୍ଗ୍ ମାପ୍ରୁଦି ଉଣିତୋରନ୍ ବାସ୍ତାମାର୍ହାନ୍।
ମଥିଉ ୨୮:୧୬-୨୦; ମାର୍କ ୧୬:୧୨-୨୦; ଲୂକ ୨୪:୧୩-୫୩; ଯୋହନ ୨୦:୧୯-୨୩; ପ୍ରେରିତ ୧:୧-୧୧ ଦି ଉଣ୍ଡ୍ରେ ବାଇବଲ୍ ଦି କାତାନି
Free to use, adapt, and share under an open license (CC BY-SA 4.0).