43. ୪୩. ମଣ୍ତୋଲି ଆରାମ୍ ଆତାତ୍
ଯିଶୁ ସରଗ୍ଦୁ ସହି ୱେନ୍କା, ସିସୁର୍ ଯିଶାଲାମ୍ଦୁ ମାର୍ହାର୍ ଏନେଟ୍ ମାପ୍ରୁ ୱାରିଙ୍ଗ୍ ଆଦେସ୍ ସିତାମାର୍ହାନ୍। ଆବେନୁ ମାନି ବିସ୍ବାସ୍ତି ଲୋକୁ ପାର୍ତନା କିନି ୱାନ୍ଦିଙ୍ଗ୍ ଉଣ୍ତ୍ରେ ଡାଗ୍ରୁ ଆତାମାର୍ହାର୍।
ୱିଜୁ ପାଟେଙ୍ଗ୍, ନିସ୍ତାର୍ ପଣ୍ତୋୟ୍ ଏମ୍ବାଇ ଦିନ୍ ୱେନ୍କା, ଯିହୁଦୀ ଲୋକୁ ପେଣ୍ଟିକୋଷ୍ଟ୍ ଦରୁତି ଉଣ୍ତ୍ରେପେରି ଦିନାମ୍ ମାନାଜି ମାର୍ହାର୍। ପେଣ୍ଟିକୋଷ୍ଟ୍ ଆୟାୱେଡ଼ାମାର୍ହାତ୍ ଏସ୍ତିୱାଲେ ଯିହୁଦୀର୍ ଗଦ୍ମୁ ମାଟିସ୍ସି ତାସି ପଣ୍ତୋୟ୍ ମାନାଜି ମାର୍ହାର୍। ୱିଜୁ ପୁର୍ତିବୀଦି ଯିହୁଦୀର୍ ପେଣ୍ଟିକୋଷ୍ଟ ଦିନ୍ ଅର୍ସେଦେବା ମାନାଦେଙ୍ଗ୍ ଯିରୁଶାଲାମ୍ଦୁ ୱାତାମାର୍ହାର୍। ଇୟା ବରଷ୍, ପେଣ୍ଟିକୋଷ୍ଟ ପଣ୍ତୋୟ କିନି ୱେଡ଼ା ଯିଶୁ ସରଗ୍ଦୁ ସନ୍ସି ଉଣ୍ତ୍ରେୱାରାମ୍ ୱେନ୍କା ୱାତାନ୍।
ଏସ୍ତିୱେଡ଼ାଦୁ ବିସ୍ବାସିର୍ ଉଣ୍ତ୍ରେଡାଗ୍ରୁ ମାର୍ହାର୍, ଏମେ ଇଲୁଦୁ ମାହାର୍ ଗାଦେମ୍ ସେଉଡୁଦାନ୍ ମାନ୍ଜିମାହି ଇଲୁ ନାଣ୍ତୋ ଗାଲିତି ସେଉଡୁଦାନ୍ ବର୍ତି ଆତାତ୍। ଦାନି’ୱେନ୍କା ୱାରୁ ସିସୁୱାଜା ସୁଡ଼୍ଜିମାହି ଏସୋ ବିସ୍ବାସିରି ତାଲାଦି ମୁସ୍କୁ ରେତାତ୍। ୱାରୁ ୱିଜେରେ ପବିତ୍ରଆତ୍ମାଦାନ୍ ପୁରା ଆତାର୍ ମାରି ୱାରୁ ଆଇ ବାସାଦାନ୍ ମାପ୍ରୁଦିଙ୍ଗ୍ ପ୍ରଶଂସା କିଦେଙ୍ଗ୍ ଆସ୍ତାର୍। ୱାରୁ ଇୟା ବାସା ନେସ୍ଏଣ୍ତା ମାର୍ହାର୍। ଇୟା ବାସାୱିଜୁ ୱାରୁ ପବିତ୍ର ଆତ୍ମାଦିବାଣାନ୍ ୱେହ୍ନି ୱାନ୍ଦିଙ୍ଗ୍ ବପୁ ଆତାମାର୍ହାର୍।
ଏସ୍ତିୱାଲେ ଯିରୁଶାଲାମ୍ଦୁ ମାନ୍ଜିମାହି ଲୋକୁ ଆୟା ସେଉଡ଼ୁ ୱେହାର୍, ୱାରୁ ଇନିକା ଗଟେଆଜିନାତ୍ ସୁଡ଼୍ନି ୱାନ୍ଦିଙ୍ଗ୍ ଉଣ୍ତ୍ରେ ବାନୁ ଉଣ୍ତାତିୱାଜା ଉଣ୍ତ୍ରେଡାଗ୍ରୁ ଆତାର୍। ୱାରୁ ବିସ୍ବାସିର୍ ମାପ୍ରୁ କିତିମାହି ପେରିପାଣି ବିଷୟ୍ଦାନ୍ କାବୁର୍ କିତାର୍। ୱାରୁ କାବା ଆତାମାର୍ହାର୍ ମାତର୍ ୱାରି ଆଇ-ଆଇ ଦେସେମ୍ଦାନ୍ ୱାତାମାର୍ହାର୍ ମାରି ଆଇ-ଆଇ ବାସାଦାନ୍ ନାଣ୍ତୋ ୱାର୍ଗିଜି ମାର୍ହାର୍ ମାରି ୱାରୁ ନିଜେ-ନିଜେଦି ବାସାଦାନ୍ ଆୟା ପାଣିୱିଜୁ ୱେନ୍ଜି ମାର୍ହାର୍। ସିସୁର୍ ଇସ୍ରାଏଲ୍ଦୁ ମାର୍ହାର୍ ମାରି ଆରାମିକ୍, ମାରି ଗ୍ରୀକ୍, ଏବ୍ରୀ ବାସା ୱେହ୍ସିମାର୍ହାର୍, ମାତର୍ ଲୋକୁ ନିଜେ-ନିଜେଦିବାସାଦାନ୍ ୱେନ୍ଜିମାର୍ହାର୍ ମାପ୍ରୁ ଇନି-ଇନିପାଣି କିତାମାର୍ହାନ୍।
ଇୟା ଲୋକା ଲୋଇରାଣ୍ ଏସୋ ଲୋକୁ ୱେର୍ତାର୍ ଗାନି ସିସୁର୍ ସସ୍ତାମାନାର୍ ଇଜି ୱେହ୍ସିମାର୍ହାର୍। ମାରି ପିତର୍ ନିଲ୍ଜି ୱାରିଙ୍ଗ୍ ୱେର୍ତାନ୍, ନା’ ମାଟା ୱେନ୍ଣ୍ତ୍ରୁ! ଇୟା ଲୋକୁ ସୋସ୍ଏର୍! ଦିନି ମାଟା, ମିରୁ ଏମେକା ସୁଡ଼୍ଜିନିଦେର୍ ଆକା ଇୟାୱାଜା ବା ଆନାମାନ୍ଜିନାତ୍ ଜେ ଯୋୟେଲ୍ ବାବବାଦି ୱେହ୍ତାମାର୍ହାନ୍ ଆୟାୱାଜା ଆନାତ୍ ଇଜି: ମାପ୍ରୁ ୱେହ୍ତାନ୍, ‘ୱିଜ୍ତି ଦିନାମ୍ଦୁ, ନାନୁ ନା ଆତ୍ମାଦିଙ୍ଗ୍ ୱାକ୍ନାସିନାନ୍।”’
”ଏ ଇସ୍ରାଏଲ୍ ଲୋକୁ, ଯିଶୁ ଅରେନ୍ ଲୋକୁ ଏୟେନ୍ ତର୍ପ୍ନି ୱାନ୍ଦିଙ୍ଗ୍ ନାଣ୍ତୋ କାବାଆନି ପାଣି କିତାମାର୍ହାନ୍। ୱାଣ୍ତ୍ରୁ ମାପ୍ରୁଦି ସାତୁଦାନ୍ ନାଣ୍ତୋ ପେରିପାଣି କିତାମାର୍ହାନ୍। ନିନୁ ଇକା ନେସ୍ତିମାନି, ମାତର୍ ନିନୁ ୱାଣ୍ତ୍ରୁ କିତିପାଣି ସୁଡ଼୍ତିମାନିଦେର୍।” ମାରିବା ମିରୁ ୱାନିଙ୍ଗ୍ କ୍ରୁଶଦୁ ଏକିସ୍ତିଦେର୍!”
”ଯିଶୁ ସାତାନ୍ ମାରି ମାପ୍ରୁ ୱାନିଙ୍ଗ୍ ସାତିବାଣାନ୍ ମାରିଡ଼େସି ନିକ୍ତାନ୍। ୱାଣ୍ତ୍ରୁ ଆୟାୱିଜୁ ମାଟା ପୁରାକିତାନ୍ ଏମେକାଗି ଅରେନ୍ ବାବବାଦି ରାସ୍ତାମାନାନ୍: ‘ମିରୁ ମି ପବିତ୍ରଦିଙ୍ଗ୍ ଗୁଣ୍ତାମ୍ଦୁ ସେଏଣ୍ତା ଆଦେଙ୍ଗ୍ ସିଏନ୍।’ ମାପୁ ସାକି ମାନାପ୍ ଜେ ମାପ୍ରୁ ଯିଶୁଦିଙ୍ଗ୍ ମାରିଡ଼େସି ନିକ୍ତାନ୍।”
“ମାପ୍ରୁ ବୁବା ଇୟେଲ୍ ଯିଶୁଦିଙ୍ଗ୍ ୱାନି ଉଣିତରନ୍ ବାସ୍ସି ସନ୍ମାନ୍ କିତାମାନାନ୍। ମାରି ଯିଶୁ ମା ୱାନ୍ଦିଙ୍ଗ୍ ପବିତ୍ରଆତ୍ମା ପୋକ୍ତାନ୍ ଏମେକାଗି ସପତ୍ କିଜି ୱେହ୍ତାମାହାନ୍ ଜେ ୱାଣ୍ତ୍ରୁ ପୋକ୍ନାନ୍ ଇଜି। ମିରୁ ଏମେକା ଗଟେକିଦେଙ୍ଗ୍ ମାନ୍ସୁ କିଜିନିଦେର୍, ପବିତ୍ରଆତ୍ମା ସାରି ସିଜିନାନ୍ ଏମେକା ମିରୁ ସୁଡ଼୍ଜିନିଦେର୍ ମାରି ୱେନ୍ଜିନିଦେର୍।”
“ମିରୁ ଆୟା ଲୋକୁଦିଙ୍ଗ୍, ଯିଶୁଦିଙ୍ଗ୍ କ୍ରୁଶଦୁ ଏକିସ୍ତିଦେର୍। ମାରି ନିକାମେ ନେସ୍ତୁ ଜେ ମାପ୍ରୁ ଯିଶୁଦିଙ୍ଗ୍ ୱିଜୁ ବିଷୟଦାନ୍ ପ୍ରବୁ ମାରି କ୍ରିଷ୍ଟ୍ଦିଙ୍ଗ୍ ଆୟା ରିଏରିଙ୍ଗ୍ ମୁସ୍କୁ ତିଆର୍ କିତାମାନାନ୍!”
ପିତର୍ଦି ମାଟା ୱେନି ଲୋକୁ, ୱାନି ୱେହ୍ତିମାହି ମାଟାଦାନ୍ ପୁରା ତିଲାତାମାର୍ହାର୍। ଇୟାୱାନ୍ଦିଙ୍ଗ୍ ୱାରୁ ପିତର୍ ମାରି ସିସୁରିଙ୍ଗ୍ ୱେନ୍ବାତାନ୍, “ଏ ତଡ଼ାନ୍ଙ୍ଗୁଁ, ମାଡୁ ଇନିକା କିଦେଙ୍ଗ୍ ମାନାତ୍?”
ପିତର ୱାରିଙ୍ଗ୍ ଉତର୍ ସିତାନ୍, “ମି ଲୋଇହାନ୍ ୱିଜେରେ ନିଜେ ପାପାମ୍ଦି ୱାନ୍ଦିଙ୍ଗ୍ ମନ୍ଦିଙ୍ଗ୍ ଡ଼େପ୍ତୁ ଏନେଟ୍ଗି ମାପ୍ରୁ ମି ପାପାମ୍ କେମା କିନାନ୍ ମାରି ଯିଶୁ କ୍ରିଷ୍ଟଦି ଦରୁଦାନ୍ ଡୁବନ୍ ଅତୁ। ଆଦେଙ୍ଗେ ୱାଣ୍ତ୍ରୁ ମିଙ୍ଗିଁ ବରଦାନ୍ୱାଜା ପବିତ୍ର ଆତ୍ମା ବା ସିନାନ୍।”
ପାକାପାକି ମୁଣ୍ଡ୍ରିୱେୟୁ ଲୋକୁ ପିତର୍ ଏମେକା ୱେହ୍ତାମାର୍ହାନ୍ ଆକା ବିସ୍ବାସ୍ କିତାର୍ ମାରି ଯିଶୁଦି ସିସୁର୍ ଆତାର୍। ୱାରୁ ଡୁବନ୍ ଅତାର୍ ମାରି ଯିରୁଶାଲାମ୍ଦି ମଣ୍ତଲିଦି ଲୋକୁ ଆତାମାର୍ହାନ୍।
ଏସ୍ତିୱାଲେ ପେରିତର୍ ୱାରିଙ୍ଗ୍ ଅଜାକିତାର୍, ମାରି ବିସ୍ବାସିର୍ ୱିଜୁୱାଲେ ୱେନ୍ଜି ମାର୍ହାର୍। ୱାରୁ ଏସେଙ୍ଗ୍-ଏସେଙ୍ଗ୍ ଉଣ୍ତ୍ରେବାନୁ କୁଡ୍ଜି ମାର୍ହାର୍ ମାରି ୱାରୁ ଉଣ୍ତ୍ରେବାନୁ ଉଣୁଜି ମାର୍ହାର୍ ମାରି ୱାରୁ ୱାରି-ୱାରିଲୋଇ ପାର୍ତନା କିଜିମାହାର୍। ୱାରୁ କୁଡ୍ଜି ମାପ୍ରୁଦିଙ୍ଗ୍ ପ୍ରଶଂସା କିତାର୍ ମାରି ୱାରି-ୱାରିୱାଲେ ଇନିକା ମାହାତ୍ ଆକା ବାଟା କିତାର୍। ଗଡ଼୍ତି ୱିଜୁ ଲୋକୁ ୱାନିୱାନ୍ଦିଙ୍ଗ୍ ନେଗି ବିଚାର୍ କିଜିମାର୍ହାର୍। ୱିଜୁଦିନାମ୍ ନାଣ୍ତୋଦାନ୍ ନାଣ୍ତୋ ଲୋକୁ ବିସ୍ବାସିର୍ ଆତାର୍।
ପ୍ରେରିତ ୨ ଦି ଉଣ୍ତ୍ରେ ବାଇବଲ୍ ଦି କାତା
Free to use, adapt, and share under an open license (CC BY-SA 4.0).