6. ୬. ମାପ୍ରୁ ଇସାକ୍ଦିଙ୍ଗ୍ କାପ୍କିବିସ୍ତାନ୍
ଏସେଙ୍ଗ୍ ଆବ୍ରାହାମ୍ ନାଣ୍ଡ ଡକ୍ରା ଆତାମାର୍ହାନ୍ ଆୟାୱେଡ଼ାଦୁ ୱାନି କଢୋ, ଇସାକ୍, ପେଡ଼ିଆନି ବଇଁସ୍ ଆତାନ୍। ଇଆୱାନ୍ଦିଙ୍ଗ୍ ଆବ୍ରାହାମ୍ ନିଜେ ଉଣ୍ଡ୍ରେ ଗତିମୁର୍ଲିଦିଙ୍ଗ୍ ନିଜେ କଢ଼ୋଦିଙ୍ଗ୍ ଆୟା ଦେଶେମ୍ଦାନ୍ ଉଣ୍ଡ୍ରି ଆଡ଼୍ସି ତାତେଙ୍ଗ୍ ପକ୍ତାନ୍, ଏମେ ଦେଶେମ୍ ୱାରି ନିଜେ ଲୋକୁବାକୁ ମାର୍ହାର୍।
ଉଣ୍ଡ୍ରି ନିହି ସାରି ବୁଲାତିୱେନ୍କା, ଆବ୍ରାହାମ୍ଦି ଗତିମୁର୍ଲି ଆୟା ଦେଶେମ୍ଦୁ ସର୍ହାନ୍, ଏମେମାବୁ ଆବ୍ରାହାମ୍ଦି ଲୋକୁବାକୁ ମାନ୍ଜିମାର୍ହାର୍। ମାପ୍ରୁ ୱାନିଙ୍ଗ୍ ସାରି ତୋରପ୍ତାନ୍, ଜେ ୱାଣ୍ଡ୍ରୁ ରିବିକାଦିଙ୍ଗ୍ ବୁଡ଼ୁଦେଙ୍ଗ୍। ୱାଦୁ ଅବ୍ରାହାମ୍କା ତଡ଼ାନ୍ଦି ଗାଡ଼୍ସି ମାର୍ହାତ୍।
ରିବିକା ନିଜେ ପରିବାର୍ଦିଙ୍ଗ୍ ଢ଼ିସ୍ସି ଆୟା ଗତିମୁର୍ଲି ୱାଲେ ସନ୍ଣ୍ଡ୍ରେଙ୍ଗ୍ ମାନ୍ସୁ ଆତାତ୍। ଏଣ୍ଡେସ୍ ଇତାର୍ ଇସାକ୍ ଦାନିଙ୍ଗ୍ ପେଡ଼ି ଆତାନ୍।
ନାଣ୍ତୋ ପାଟେଙ୍ଗ୍ ୱେନ୍କା, ଆବ୍ରାହାମ୍ ସାତାନ୍। ମାରି ମାପ୍ରୁ ଆବ୍ରାହାମ୍ଦି କଢୋ ଇସାକ୍ଦିଙ୍ଗ୍, ଆବ୍ରାହାମ୍ ୱାଲେ ତୋର୍ତିମାହିଁ ପାର୍ମାଣାମ୍ ୱାନ୍ଦିଙ୍ଗ୍ ଆର୍ଶିବାଦ୍ କିତାନ୍। ଆୟା ପାର୍ମାଣାମ୍ଦାନ୍ ମାପ୍ରୁଦି ଉଣ୍ଡ୍ରି ପାର୍ମାଣାମ୍ କିତାନ୍ ଜେ ଆବ୍ରାହାମ୍ଦି ଲେକିସ୍ତେଙ୍ଗ୍ ଆଟ୍ଇୱାଜା କୁଟୁମ୍ ଆନାର୍। ମାତର୍ ଇସାକ୍ଦି ଆଡ଼୍ସି ରିବିକାଦିଙ୍ଗ୍ କଢୋକକ୍ରାର୍ ଆଏତାର୍।
ଇସାକ୍ ରିବିକା ୱାନ୍ଦିଙ୍ଗ୍ ପାର୍ତନା କିତାନ୍, ମାରି ମାପ୍ରୁ ଦାନିଙ୍ଗ୍ ଯାଆଁଲା କଢୋଦି ପଟାଦୁ ଆନି ୱାନ୍ଦିଙ୍ଗ୍ ଶାକ୍ତି ଆତାତ୍। ଏମେ ୱେଡ଼ାଦୁ ଆୟା କଢୋର୍ ରିବିକା ପଟାଦୁ ମାହାର୍ ନାସ୍ତିୱାଲେହାନ୍ ୱାରୁ ଲାଗାଜି ସାଜି ମାର୍ହାର୍, ଇୟାୱାନ୍ଦିଙ୍ଗ୍ ରିବିକା ମାପ୍ରୁଙ୍ଗ୍ ୱେହ୍ତାତ୍ ଏମେକାଗି ଦାନିୱାଲେ ଆଜିମାର୍ହାତ୍।
ମାପ୍ରୁ ରିବିକାଦିଙ୍ଗ୍ ୱେହ୍ତାତ୍, “ନିନୁ ରୁଣ୍ଡି କଢୋରିଙ୍ଗ୍ ଜନମ୍ ସିନି। ୱାରି କୁଟୁମ୍ ରୁଣ୍ଡି ଆଇ ଆଇକା ଜାତି ଆନାତ୍। ୱାରୁ ନିଜେ ନିଜେଦି ଲୋଇ ଲାଗାଜି ସାନାର୍। ମାତର୍ ପେରି କଡ଼ଦାନାନ୍ ଜନମ୍ ଆତିମାହି ଜାତି ନିସ୍ରି କଢୋଦି ବାଣାନ୍ ୱାତିମାହି ଜାତିଦି ଆଦେସ୍ଦିଙ୍ଗ୍ ମାନାଦେଙ୍ଗ୍ ମାନାତ୍।”
ଏସେଙ୍ଗ୍ ରିବିକାଦି କଢୋର୍ ଜନମ୍ ଆତାର୍, ମାରି ପେରି କଢୋ ଏରାଙ୍ଗାଁ ମାର୍ହାନ୍ ମାରି ନାଣ୍ଡ କୁକୁଟି ମାହାତ୍, ମାରି ୱାରୁ ୱାନି ଦୋରୁ ଏସାଉ ଇଟ୍ତାର୍। ନାସ୍ତିୱାଲେ ନିସ୍ରି କଢୋ ଏସାଉଦି କାଲୁ ଆସ୍ସି ଜନମ୍ ଆତାନ୍, ମାରି ୱାରୁ ୱାନି ଦୋରୁ ଯାକୁବ ଇଟ୍ତାର୍।
ଆଦି ପୁସ୍ତକ୍ ୨୪: ୧ – ୨୫: ୨୬ଦି ଉଣ୍ଡ୍ରି ବାଇବଲଦି କାତାନି
Free to use, adapt, and share under an open license (CC BY-SA 4.0).