10. ୧୦. ଦଶ୍ଗଟା ମାର୍ଡି ବିଷୟ୍
ମୋଶା ଆରେ ହାରଣ ଫାର ଲାଗାୟ୍ ହାଚାର୍। ହେୱାର୍ ୱେଚାର୍, ଇସ୍ରାଏଲନି ଈଶ୍ୱର ଇଦାଙ୍ଗ୍ ୱେଚ୍ନାନା, “ନା ମାନାୟାରିଙ୍ଗ୍ ପିସ୍ତି ହିଦା। ଫାର ହେୱାର୍ କାତାତିଙ୍ଗ୍ ୱେନ୍ୱାତାନ୍।” ଇସ୍ରାଏଲ ଦେସ୍ତାକାରିଙ୍ଗ୍ ମୁକ୍ତି କିନି ବାଦୁଲ୍ ହେୱାରିଙ୍ଗ୍ ଆଦିକ୍ କଷ୍ଟନି କାମାୟ୍ କିଦେଙ୍ଗ୍ ଆଦେସ୍ ହିତାନ୍।
ମାନାୟାରିଙ୍ଗ୍ ସ୍ୱାଦିନ୍ କିଦେଙ୍ଗ୍ ଫାର ମୁନା କିଜି ମାଚାନ୍, ହେଦାଙ୍ଗ୍ କାଜିଙ୍ଗ୍ ଈଶ୍ୱର ଦଶ୍ଗଟା ସମ୍ୱାଲିକିୱି ମାର୍ଡି, ମିଶର ଦେସ୍ତ ପକ୍ତାନ୍। ଇ ମାର୍ଡି କାଜିଙ୍ଗ୍ ଈଶ୍ୱର ଫାରଙ୍ଗ୍ ଚଚ୍ଚି ମାଚାନ୍ ଯେ ହେୱାନ୍ ଫାରଙ୍ଗ୍ ଆରେ ମିଶର ଦେସ୍ନି ୱିଜୁ ଦେବିର୍ତାଙ୍ଗ୍ ଆଦିକ୍ ଶାକ୍ତି କାଟାକାନ୍।
ଈଶ୍ୱର ନିଲି ନାଗୁଡ଼୍ନି ଏଜୁକାଙ୍ଗ୍ ନେତେର୍ କିତାନ୍, ମାତର୍ ଫାର ନଙ୍ଗୟ୍ ପାତେକ୍ ଇସ୍ରାଏଲ ଦେସ୍ତାକାରିଙ୍ଗ୍ ପିହ୍ୱାତାନ୍।
ଈଶ୍ୱର ୱିଜୁ ମିଶର ଦେସ୍ତାକେ ପାଣାକାଙ୍ଗ୍ ପକ୍ତାନ୍। ପାଣାକାଙ୍ଗ୍ ପେଜ୍ଦେଙ୍ଗ୍ ମୋଶାଙ୍ଗ୍ ଫାର ଗୁୱାରି କିତାନ୍। ମାତର୍ ୱିଜୁ ପାଣାକାଙ୍ଗ୍ ହାଃତି ପାଚେ, ଫାର ତା ଗରବ୍ତିଙ୍ଗ୍ ଟ୍ରିଟ୍ କିତାନ୍ ଆରେ ଇସ୍ରାଏଲନି ମାନାୟାରିଙ୍ଗ୍ ମିଶର ଦେସ୍ତାଙ୍ଗ୍ ପିସ୍ତି ହିୱାତାନ୍।
ଲାଗିଙ୍ଗ୍ ଈଶ୍ୱର ଦୁଡ଼ି ପେନ୍କୁ ହାଃନି ମାର୍ଡି ପକ୍ତାନ୍। ତା ପାଚେ ହେୱାନ୍ ୱିଜାଙ୍ଗ୍ ହାଃନି ମାର୍ଡି ପକ୍ତାନ୍। ଫାର ମୋଶା ଆରେ ହାରଣଙ୍ଗ୍ କୁକ୍ତାନ୍ ଆରେ ୱେଚ୍ଚାନ୍, ଯଦି ହେୱାର୍ ମାର୍ଡିତିଙ୍ଗ୍ ବନ୍ଦ୍ କିନାର୍, ଲାଗିଙ୍ଗ୍ ହେୱାନ୍ ଇସ୍ରାଏଲନି ମାନାୟାରିଙ୍ଗ୍ ମିଶର ଦେସ୍ତାଙ୍ଗ୍ ହାଞ୍ଜେଙ୍ଗ୍ ଆଡ୍ନାର୍। ଏଚେପାଦ୍ନା ମୋଶା ପାର୍ତାନା କିତାନ୍, ଈଶ୍ୱର ୱିଜାକାଙ୍ଗ୍ ମିଶର ଦେସ୍ତାଙ୍ଗ୍ ଗୁଚାଇ କିତାନ୍। ମାତର୍ ଫାର ତା ଗରବ୍ତିଙ୍ଗ୍ ଟ୍ରିଟ୍ କିତାନ୍ ଆରେ ମାନାୟାରିଙ୍ଗ୍ ପିସ୍ତି ହିୱାତାନ୍।
ତାପାଚେ ଈଶ୍ୱର ୱିଜୁ ପର୍କାର୍ ପଶୁକାଙ୍ଗ୍ ଇନାକା ୱିଜୁ ମିଶରନି ମାନାୟାରିଙ୍ଗ୍ ମାଚାତ୍, ହେୱେକିୟାକାଙ୍ଗ୍ ବେମାର୍ କିଜି ପାଗ୍ତାନ୍। ମାତର୍ ଫାର ଗରବ୍ ଟ୍ରିଟ୍ ଆତାତ୍, ଆରେ ହେୱାନ୍ ଇସ୍ରାଏଲନି ମାନାୟାରିଙ୍ଗ୍ ପିସ୍ତି ହିୱାତାନ୍।
ତାପାଚେ ଈଶ୍ୱର ମୋଶାଙ୍ଗ୍ ଫାର ଲାଗାୟ୍ ନିସ୍ ତୁସିହିଦେଙ୍ଗ୍ ୱେଚ୍ଚାନ୍। ଏଚେପାଦ୍ନା ହେୱାନ୍ ହେ ନିସ୍ତିଙ୍ଗ୍ ତୁସିହିତାନ୍, ମିଶର ଦେସ୍ନି ମାନାୟାର୍ ତଲ୍ ଜପି ବେସି ନନି ପାଚୁ ଆତି ଗାଉ ଚଞ୍ଜି ଆତାତ୍, ମାତର୍ ଇସ୍ରାଏଲ ଦେସ୍ନି ମାନାୟାରିଙ୍ଗ୍ ଆୱାତାତ୍। ଈଶ୍ୱର ଫାର ଗରବ୍ତିଙ୍ଗ୍ ଟ୍ରିଟ୍ କିତାନ୍, ଆରେ ଫାର ଇସ୍ରାଏଲନି ମାନାୟାରିଙ୍ଗ୍ ପିସ୍ତି ହିୱାତାନ୍।
ତାପାଚେ ଈଶ୍ୱର ଆଞ୍ଜ୍ଗା ବାର୍ହାତାଙ୍ଗ୍ ମିଶର ଦେସ୍ତ କେତେକ୍ ତାସ୍ ନଷ୍ଟ କିତାନ୍, ଆରେ ଇମ୍ଣାକାର୍ ବାର୍ତ ହାଚାର୍ ହେୱାର୍ ହାଃତାର୍। ଫାର ମୋଶା ଆରେ ହାରଣଙ୍ଗ୍ କୁକ୍ତାନ୍ ଆରେ ୱେଚ୍ଚାନ୍, “ଆନେଙ୍ଗ୍ ପାପ୍ କିତାଙ୍ଗ୍ନା। ଏପେଙ୍ଗ୍ ନଙ୍ଗୟ୍ ହାଞ୍ଜେଙ୍ଗ୍ ଆଡ୍ନାଦେର୍।” ହେଦାଙ୍ଗ୍ କାଜିଙ୍ଗ୍ ମୋଶା ପାର୍ତାନା କିତାନ୍ ଆରେ ବାଦାଡ଼୍ତାଙ୍ଗ୍ ଆଞ୍ଜ୍ଗା ବାର୍ହାଆନାକା ବନ୍ଦ୍ ଆତାତ୍।
ମାତର୍ ଆରେରଗ ଫାର ପାପ୍ କିତାନ୍ ଆରେ ତା ଗରବ୍ତିଙ୍ଗ୍ ଟ୍ରିଟ୍ କିତାନ୍। ହେୱାନ୍ ଇସ୍ରାଏଲ ଦେସ୍ତି ମାନାୟାରିଙ୍ଗ୍ ହାଞ୍ଜେଙ୍ଗ୍ ପିସ୍ତି ହିୱାତାନ୍।
ହେଦାଙ୍ଗ୍ କାଜିଙ୍ଗ୍ ଈଶ୍ୱର ପାମିଙ୍ଗ୍ତାଙ୍ଗ୍ କାତାର୍ ପକ୍ତାତାନ୍ ଆରେ ମିଶର ଦେସ୍ ୱିଜୁ ନିପଣ୍ ବିଚାଆତାତ୍। ଇମ୍ଣି ତାସ୍ ଆଞ୍ଜ୍ଗା ବାର୍ହାତାଙ୍ଗ୍ ନଷ୍ଟ ଆୱାଦାଙ୍ଗ୍ ମାଚାତ୍ ହେ ୱିଜୁତିଙ୍ଗ୍ ପାମିଙ୍ଗ୍ ୱାତିକ୍ ଆରେ ନଷ୍ଟ କିତିକ୍।
ତାପାଚେ ଈଶ୍ୱର ମାଜ୍ଗାତିଙ୍ଗ୍ ପକ୍ତାତାନ୍ ହେ ମାଜ୍ଗା ତିନ୍ଦିନ୍ ପାତେକ୍ ମାଚାତ୍। ଇ ମାଜ୍ଗା ଏଚେକ୍ ମାଜ୍ଗା ମାଚାତ୍ ଯେ ମିଶର ଦେସ୍ତାକାର୍ ତା ଇଲ୍ ପିସ୍ତି ଇମେ ପା ହାଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। ମାତର୍ ଇମ୍ଣି ବାହାତାକେ ଇସ୍ରାଏଲ ଦେସ୍ତାକାର୍ ବାହାକିଜି ମାଚାର୍ ହେ ବାହାତାକେ ଅଜଡ଼୍ ମାଚାତ୍।
ଇ ନଅଗାଟା ମାର୍ଡି ଆତି ପାଚେ ପା ଫାର ଇସ୍ରାଏଲ ଦେସ୍ତାକାରିଙ୍ଗ୍ ପିସ୍ତି ହିୱାତାନ୍। ଇନେସ୍କି ଫାର ଇ କାତାତିଙ୍ଗ୍ ୱେନ୍ୱି କାଜିଙ୍ଗ୍ ଈଶ୍ୱର ହାରିହାରା ରଞ୍ଜାଙ୍ଗ୍ ମାର୍ଡି ପକ୍ତେଙ୍ଗ୍ ଉପାୟ୍ କିତାନ୍। ଇଦାଙ୍ଗ୍ ଫାର ମାନ୍ତିଙ୍ଗ୍ ବାଦ୍ଲାୟ୍ କିନାତ୍।
ବାଇବଲ୍ନି ର କାତା: ଯାତ୍ରାବହି ୫-୧୦
Free to use, adapt, and share under an open license (CC BY-SA 4.0).