9. ୯. ଈଶ୍ୱର ମୋଶାଙ୍ଗ୍ କୁକ୍ତାନ୍
ଯୋଶେଫ ହାଃତି ପାଚେ, ତା ୱିଜୁ ଜାତି କୁଟୁମ୍ ମିଶର ଦେସ୍ତ ମାଚାର୍। ହେୱାର୍ ଆରେ ହେୱାର୍ ଲାତ୍ରା ହେବେ କେତେକ୍ ବାର୍ହୁ ମାଞ୍ଜେଙ୍ଗ୍ ଲାଗାତାର୍ ଆରେ ହେୱାର୍ କେତେକ୍ ହିମ୍ଣା ୱାକ୍ଡ଼ା ଜନମ୍ ଆତାର୍। ହେୱାରିଙ୍ଗ୍ ଇସ୍ରାଏଲ ଦେସ୍ତାକାର୍ ଇଞ୍ଜି କୁକ୍ତାର୍।
ଶହେ-ଶହେ ବାର୍ହୁ ପାଚେ, ଇସ୍ରାଏଲନି ମାନାୟ୍ ଆଦିକ୍ ବାଡାଆତାତ୍। ମିଶର ଦେସ୍ତ ବାହା କିନାକାର୍ ଯୋଶେଫତିଙ୍ଗ୍ ଆରେ ହେୱାନ୍ ହେୱାରିଙ୍ଗ୍ କିଜିମାଚି ସାଇଜତିଙ୍ଗ୍ ଇନେୱାଡ଼ାଙ୍ଗ୍ ପା ୱେନ୍ୱାତାର୍। ହେୱାର୍ ଇସ୍ରାଏଲ ଜାତିନି ମାନାୟାରିଙ୍ଗ୍ ପାଣ୍ଡ୍ରା ଆଦେଙ୍ଗ୍ ଲାଗାତାର୍, ଇନେସ୍କି ହେୱାର୍ ବେସିହେନି ମାଚାର୍। ଲାଗିଙ୍ଗ୍ ହେପାଦ୍ନା ଇମ୍ଣି ଫାର ମିଶର ଦେସ୍ତିଙ୍ଗ୍ ସାସନ୍ କିଜି ମାଚାନ୍ ହେୱାନ୍ ଇସ୍ରାଏଲନି ମାନାୟାରିଙ୍ଗ୍ ମିଶରନି ମାନାୟାର୍ତାକେ ଦାସ୍ କିତାନ୍।
ମିଶର ମାନାୟାର୍ ଇସ୍ରାଏଲ ଜାତିନି ମାନାୟାରିଙ୍ଗ୍ ଅଟାଳିକା ଆରେ ୱିଜୁ ସହର୍ ପା ରସ୍ତେଙ୍ଗ୍ ବାଦ୍ୟ କିତାର୍। ବେସି କଷ୍ଟନି କାମାୟ୍ ହେୱାର୍ ଜିବୁନ୍ତିଙ୍ଗ୍ ଦୁକ୍ ଗିଟାଆତାତ୍, ମାତର୍ ହେୱାରିଙ୍ଗ୍ ଈଶ୍ୱର ଆଶ୍ରିବାଦ୍ କିତାନ୍, ଆରେ ହେୱାର୍ କେତେକ୍ ହିମ୍ଣା ୱାକ୍ଡ଼ା ଆତାର୍।
ଫାର ହୁଡ଼୍ତାନ୍ ଯେ ଇସ୍ରାଏଲ ଜାତିନି ହିମ୍ଡ଼ା ୱାକ୍ଡ଼ା ବେସି ମାନାର୍, ଲାଗିଙ୍ଗ୍ ହେୱାନ୍ ତା ମାନାୟାରିଙ୍ଗ୍ ୱିଜୁ ଇସ୍ରାଏଲ ଜାତିନି ହିମ୍ଣା ୱାକ୍ଡ଼ାକା ୱିଜାକାରିଙ୍ଗ୍ ନିଲି ନାଗୁଡ଼୍ତାକେ ତୁସିହିଦେଙ୍ଗ୍ ଆଦେସ୍ ହିତାନ୍।
ଇସ୍ରାଏଲ ଜାତିନି ରଞ୍ଜେଲ୍ କଗ୍ଲେ ର ହିମ୍ଣା ଜନମ୍ କିତାତ୍। ହେଦେଲ୍ ଆରେ ତା ଡକ୍ରାହି ହେ ହିମ୍ଣାତିଙ୍ଗ୍ ଆଡ୍ନି ପାତେକ୍ ବେସିଦିନ୍ ଡ଼ୁକ୍ଚି ଇଡ଼୍ତାନ୍।
ଏଚେପାଦ୍ନା ହେ ହିମ୍ଣା ତାଞ୍ଜିବା ଆରେ ତାଞ୍ଜିୟା ବେସିଦିନ୍ ହୁକ୍ତେଙ୍ଗ୍ ଆଡ୍ତାର୍, ହେୱାର୍ ହେ ହିମ୍ଣାତିଙ୍ଗ୍ ଉଦାର କିନି କାଜିଙ୍ଗ୍ ନିଲି ନାଗୁଡ଼୍ନି ଏଜୁଙ୍ଗ୍ ହୁଦାଙ୍ଗ୍ ନାଡ଼ାତାକେ ର ବଡ଼ାଆନି ପାର୍ଡା ଲେକ୍ତିତାକେ ହେ ହିମ୍ଣାତିଙ୍ଗ୍ ହୁଚ୍ପାତାର୍। ତା ଗାଜା ତଣ୍ଦେହି ତା କାଜିଙ୍ଗ୍ ଇନାକା ଆନାତ୍ ହେଦାଙ୍ଗ୍ କାଜିଙ୍ଗ୍ ଦେହା ମାନ୍ଞ୍ଜି ହୁଡ଼୍ଜି ମାଚାତ୍।
ଫାର ଡକ୍ରୁହି ପାର୍ଡାତିଙ୍ଗ୍ ଆରେ ହେ ବିତ୍ରେ ତା ହୁଡ଼୍ତାତ୍। ଏଚେପାଦ୍ନା ହେଦେଲ୍ ର ହିମ୍ଣାତିଙ୍ଗ୍ ହୁଡ଼୍ତାତ୍, ହେଦେଲ୍ ହେୱାନିଙ୍ଗ୍ ଜାର୍ ହିମ୍ଣା କିଜି ଅତାତ୍। ହେଦେଲ୍ ଇସ୍ରାଏଲ ଲାତ୍ରାନି କଗ୍ଲେଙ୍ଗ୍ ହିମ୍ଣା ତେହି ଇଞ୍ଜି ବୁଜାଆୱାଦାଙ୍ଗ୍ ମାଇ ଉଟ୍ତେଙ୍ଗ୍ ବାଚିକିତାତ୍। ଏଚେପାଦ୍ନା ହିମ୍ଣା ଗାଜା ଆତାନ୍ ହେୱାନିଙ୍ଗ୍ ତା ତେହି ମାୟ୍ନି ପଟ ପାଞ୍ଜ୍ୱାତାନ୍, ହେ ହିମ୍ଣାତିଙ୍ଗ୍ ହେ ତେହିଆତାକାଦେଲ୍ ଫାର ଡକ୍ରୁହିଙ୍ଗ୍ ଲେଉଟାଇ କିତାତ୍, ଇନେର୍କି ତା ତର୍ ମୋଶା ହିତାତ୍।
ଦିନେକ୍ ମୋଶା ଗାଜା ଆତି ପାଚେ, ହେଦେଲ୍ ହୁଡ଼୍ତାତ୍, ରକାନ୍ ମିଶରିୟ ଇସ୍ରାଏଲ ଦାସଙ୍ଗ୍ ଟ୍ରାକ୍ନାନା। ମୋଶା ତା ଇସ୍ରାଏଲ ମାନାୟ୍ତିଙ୍ଗ୍ ରକ୍ଷା କିଦେଙ୍ଗ୍ ଉପାୟ୍ କିତାନ୍।
ଏଚେପାଦ୍ନା ମୋଶା ପୁଞ୍ଜେଙ୍ଗ୍ ଆଡ଼୍ତାନ୍, ଇନେର୍ ହୁଡ଼ୁରା, ହେୱାନ୍ ମିସରିୟଙ୍ଗ୍ ମାର୍ନେ ଅସ୍ତାନ୍ ଆରେ ତା ଗାଗାଡ଼୍ତିଙ୍ଗ୍ ମୁଚ୍ଚାନ୍। ମାତର୍ ଇନେର୍ ରକାର୍ ମୋଶା ଇନାକା କିଜି ମାଚାନ୍ ହେଦାଙ୍ଗ୍ ହୁଡ଼୍ଜି ମାଚାନ୍।
ଏଚେପାଦ୍ନା ଫାର ଇନାକା ମୋଶା କିତାକା ୱେଚାନ୍, ହେୱାନ୍ ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାନ୍। ମୋଶା ଫାରନି ସେନାର୍ତାଙ୍ଗ୍ ରକ୍ଷା ପାୟାଆଦେଙ୍ଗ୍ ମିଶର ଦେସ୍ତାଙ୍ଗ୍ ଟଙ୍ଗ୍ରା ବାହାତାକେ ଇମେତାକେ ହେୱାନ୍ ହାର୍ଦାଙ୍ଗ୍ ମାନାନ୍, ଦେହା ହାଚାନ୍।
ମିଶର ଦେସ୍ତାଙ୍ଗ୍ ବେସିଦେହା ଟାଙ୍ଗ୍ରା ବାହାତାକେ ମୋଶା ର ମେଣ୍ଢା ଗଡ଼ିୟା ଆତାନ୍। ହେ ବାହାନି ର କଗ୍ଲେ ହୁଦାଙ୍ଗ୍ ହେୱାନ୍ ବିବା ଆତାନ୍ ଆରେ ହେୱାନିଙ୍ଗ୍ ରିକାର୍ ହିମ୍ଣାଙ୍ଗ୍ ଜନମ୍ ଆତାର୍।
ଦିନେକ୍ ଏଚେପାଦ୍ନା ମୋଶା ତା ମେଣ୍ଢାକାଙ୍ଗ୍ ଜାତୁନ୍ କିନିହିଙ୍ଗ୍, ର ବୁଟାତାକେ ଣାଣି କାଚାଆନାକା ହୁଡ଼୍ତାନ୍। ମାତର୍ ହେ ବୁଟା କାଡ଼୍ଜି ନିସ୍ ଆୱାତାତ୍। ମୋଶା ହେ ବୁଟା ନିପଣ୍ ହୁଡ଼୍ଦେଙ୍ଗ୍ ହାଚାନ୍। ଏଚେପାଦ୍ନା ହେ କାଚାଆନି ବୁଟା ଲାଗାୟ୍ତାଙ୍ଗ୍ ହାଲ୍ଜି ମାଚାତ୍, ଈଶ୍ୱର ବେଣ୍ ୱେଚ୍ଚାନ୍, “ମୋଶା, ନି କାଲ୍ ଏନେଙ୍ଗ୍ ହପ୍ତା। ଏନେଙ୍ଗ୍ ପବିତ୍ର ବାହାତାକେ ନିଲ୍ତାଇନା।”
ଈଶ୍ୱର ୱେଚ୍ଚାନ୍, “ନା ମାନାୟାରିଙ୍ଗ୍ ଦୁକ୍ ଆନେଙ୍ଗ୍ ହୁଡ଼୍ନାଙ୍ଗା। ନିଙ୍ଗେଙ୍ଗ୍ ଆନେଙ୍ଗ୍ ଫାର ଲାଗାୟ୍ ପକ୍ତାନାଙ୍ଗ୍ ଇନେସ୍କି ଏନେଙ୍ଗ୍ ଇସ୍ରାଏଲନି ମାନାୟାରିଙ୍ଗ୍ ମିଶର ଦେସ୍ତି ଦାସ୍ କାମାୟ୍ କିନିତାଙ୍ଗ୍ ହପ୍ଚି ତାସି ୱାନାୟ୍। ହେୱାରିଙ୍ଗ୍ ଆନେଙ୍ଗ୍ କିଣାନ ଦେସ୍ ହିନାଙ୍ଗ୍, ଇମ୍ଣି ଦେସ୍ ଆନେଙ୍ଗ୍ ଅବ୍ରାହାମ ଆରେ ଯାକୁବଙ୍ଗ୍ ପାର୍ମାଣ୍ କିଜି ମାଚାଙ୍ଗ୍।”
ମୋଶା ୱେନ୍ବାତାନ୍, “ଯଦି ମାନାୟାର୍ ପୁଞ୍ଜେଙ୍ଗ୍ ଇଚାକିନାର୍ ନାଙ୍ଗେଙ୍ଗ୍ ଇନେର୍ ପକ୍ତାତାର୍ନା, ଆନେଙ୍ଗ୍ ହେୱାରିଙ୍ଗ୍ ଇନାକା ଇନାଙ୍ଗ୍?” ଈଶ୍ୱର ୱେଚ୍ଚାନ୍, “ଆପେଙ୍ଗ୍ ଯେ ମାନାପ୍ ହେୱାନ୍ ମାନାପ୍।ହେୱାରିଙ୍ଗ୍ ୱେଚା,‘ନି ଲାଗାୟ୍ ନାଙ୍ଗେଙ୍ଗ୍ ମାପୃ ପକ୍ତାତାନ୍ନା।’ ଆରେ ପା ହେୱାରିଙ୍ଗ୍ ୱେଚା, ଆପେଙ୍ଗ୍ ମାପୃ, ମି ଆକଦାଦି, ଅବ୍ରାହାମ, ଇସାହାକ ଆରେ ଯାକୁବ ଈଶ୍ୱର। ୱିଜ୍ୱି ଦିନ୍ ପାତେକ୍ ଇଦାଙ୍ଗ୍ ନେ ନାତର୍।”
ମୋଶା ପାଣ୍ଡ୍ରାଆଜି ମାଚାନ୍ ଆରେ ଫାର ଲାଗାୟ୍ ହାଞ୍ଜେଙ୍ଗ୍ ଇଚା କିୱାଦାଙ୍ଗ୍ ମାଚାନ୍, ଇନେସ୍କି ହେୱାନ୍ ବାବିକିତାନ୍, ହେୱାନ୍ ହାର୍ଦାଙ୍ଗ୍ ବେଣ୍ କିଦେଙ୍ଗ୍ ଆଡୁନ୍, ଲାଗିଙ୍ଗ୍ ଈଶ୍ୱର ମୋଶା ଟଣ୍ଡାହି, ହାରଣଙ୍ଗ୍ ସାଇଜ କିନି କାଜିଙ୍ଗ୍ ପକ୍ତାନ୍। ଈଶ୍ୱର ମୋଶା ଆରେ ହାରଣଙ୍ଗ୍ ଜାଗ୍ରତ୍ କିୟିକିତାନ୍, ଯେ ଫାର ଟ୍ରିଟ୍ ଆନାନ୍।
ବାଇବଲନି ର କାତା: ଯାତ୍ରାବହିନି ୧-୪
Free to use, adapt, and share under an open license (CC BY-SA 4.0).