8. ୮. ଯୋଷେଫ ଆରେ ତା ପରିବାର୍ତିଙ୍ଗ୍ ଈଶ୍ୱର ଉଦାର୍ କିନାନ୍
କେତେକ୍ ବାର୍ହୁ ପାଚେ, ଯାକୁବ ଏଚେପାଦ୍ନା ବୁଡ଼୍ହି ଆଜି ମାଚାନ୍, ହେୱାନ୍ ତା ଆଦିକ୍ ଲାଡ୍ନି ମାଜି, ଯୋଷେଫତିଙ୍ଗ୍ ତା ଟଣ୍ଡାହିର୍ ଲାଗାୟ୍ ହୁଡ଼୍ଦେଙ୍ଗ୍ ଇମ୍ଣାକାର୍ ପଶୁ ମାନ୍ଦାତିଙ୍ଗ୍ ଜାତୁନ୍ କିଜି ମାଚାର୍ ହେୱାରିଙ୍ଗ୍ ପକ୍ତାର୍।
ଯୋଷେଫ ଟଣ୍ଡାହିର୍ ହେୱାନିଙ୍ଗ୍ ଗିଣ୍ କିଜି ମାଚାର୍, ଇନେସ୍କି ତାଞ୍ଜ୍ବା ଆଦିକ୍ ଲାଡ୍ କିଜି ମାଚାନ୍, ଯୋଷେଫ କେଚ୍କଣ୍ତ ହୁଡ଼୍ଜି ମାଚାନ୍ ଯେ ହେୱାନ୍ ହେୱାରିଙ୍ଗ୍ ସାସନ୍ କିନାନ୍। ଏଚେପାଦ୍ନା ଯୋଷେଫ ହେୱାର୍ ଲାଗାୟ୍ ୱାତାନ୍, ହେୱାର୍ ହେୱାନିଙ୍ଗ୍ ଚର୍ କିତାର୍ ଆରେ ହେଦାଙ୍ଗ୍ ତିଙ୍ଗ୍ କ୍ରିତ ଦାସ୍ନି ବେପ୍ରିୟାର୍ତାକେ ପତାର୍।
ଯୋଷେଫ ଟଣ୍ଡାହିର୍ ଇଞ୍ଜ ୱାନି ଆଗେ, ଯୋଷେଫ ଉସ୍ପିତି ଆଙ୍ଗିତିଙ୍ଗ୍ କେଚ୍ଚାର୍ ଆରେ ହେଦାଙ୍ଗ୍ତିଙ୍ଗ୍ ଅଡା ନେତେର୍ତାକେ ଚବ୍ଡ଼ାୟ୍ କିତାର୍। ତାପାଚେ ଆଙ୍ଗିତିଙ୍ଗ୍ ତାଞ୍ଜ୍ବାଙ୍ଗ୍ ଚଚ୍ଚାର୍, ହେଦାଙ୍ଗ୍ କାଜିଙ୍ଗ୍ ହେୱାନ୍ ଚିନ୍ତା କିନାନ୍ ଯେ ର ରାନ୍ତି ପଶୁ ଯୋଶେପତିଙ୍ଗ୍ ପାଗ୍ତାତ୍ନା। ଯାକୁବ ବେସି ଦୁକ୍ ଆତାନ୍।
କ୍ରିତ ଦାସ୍ନି ବେପ୍ରିୟାର୍ ଯୋଷେଫତିଙ୍ଗ୍ ମିସର ଦେସ୍ତାକେ ଅସାହାଚାର୍। ମିଶର୍ ରଞ୍ଜାଙ୍ଗ୍ ବେସି ଶାକ୍ତିକାଟି ଦେସ୍ ନିଲିନାଗୁଡ଼୍ ଲାଗାୟ୍ ମାଚାତ୍। କ୍ରିତ ଦାସ୍ନି ବେପ୍ରିୟାର୍ ଯୋଷେଫତିଙ୍ଗ୍ ର ଦାସ୍ ଲେକେ ଶାକ୍ତିକାଟି ସର୍କାର୍ ପାଦ୍ ପାୟାଆତାକାର୍ ତାକେ ପତାର୍। ଯୋଷେଫ ତା ମାଲିକ୍ତିଙ୍ଗ୍ ହାର୍ଦି ହେବା କିତାନ୍ ଆରେ ଈଶ୍ୱର ଯୋଷେଫତିଙ୍ଗ୍ ଆଶ୍ରିବାଦ୍ କିତାନ୍।
ତା ମାଲିକ୍ ଡକ୍ରୁହି ଯୋଷେଫ ହୁଦାଙ୍ଗ୍ ହୁଞ୍ଜ୍ଞ୍ଜେଙ୍ଗ୍ ଉପାୟ୍ କିତାତ୍, ମାତର୍ ଯୋଷେଫ ଈଶ୍ୱର ବିରଦ୍ତାକେ ପାପ୍ କାମାୟ୍ କିଦେଙ୍ଗ୍ ମୁନା କିତାନ୍। ଲାଗିଙ୍ଗ୍ହେଦେଲ୍ ରିସା ଆଜି ମିଚ୍ରେ ଯୋଷେଫତିଙ୍ଗ୍ ଦସ୍ ହିତାତ୍, ହେଦାଙ୍ଗ୍ କାଜିଙ୍ଗ୍ ହେୱାନିଙ୍ଗ୍ ଗାଚ୍ଚାର୍ ଆରେ ଜଇଲ୍ ଇଞ୍ଜ ପକ୍ତାର୍। ଜଇଲ୍ ଇଞ୍ଜ ପା ଯୋଷେଫ ଈଶ୍ୱରତିଙ୍ଗ୍ ପାର୍ତିକିଜି ମାଚାନ୍, ଆରେ ହେୱାନିଙ୍ଗ୍ ଈଶ୍ୱର ଆଶ୍ରିବାଦ୍ କିତାନ୍।
ଦସ୍ କିୱାଦାଙ୍ଗ୍ ପା ଯୋଷେଫ ଜଇଲ୍ ଇଞ୍ଜ ରି ବାର୍ହୁ ମାଚାନ୍। ର ନାଣା, ମିସର ଦେସ୍ତାକାର୍ ଫାରଙ୍ଗ୍ ହେୱାର୍ ରାଜା ଇଞ୍ଜି ମାନି କିନାରା, ହେୱାନ୍ ହୁଡ଼୍ତି ରିଣ୍ଡାଙ୍ଗ୍ କେଚ୍କଣ୍ ହେୱାନିଙ୍ଗ୍ ବେସି ଗାବ୍ରା କିଜି ମାଚାତ୍। ହେୱାନିଙ୍ଗ୍ ତା କେଚ୍କଣ୍ନି ଅର୍ତ ଇନେର୍ ପା ବୁଜାଇ କିଜି ୱେଚ୍ଚେଙ୍ଗ୍ ଆଡ୍ୱାଦାଙ୍ଗ୍ ମାଚାର୍।
ଯୋଷେଫତିଙ୍ଗ୍ ହେ କେଚ୍କଣ୍ନି ଅର୍ତ ୱେଚ୍ଚେଙ୍ଗ୍ ଈଶ୍ୱର ବାଚିକିଜି ମାଚାନ୍, ଲାଗିଙ୍ଗ୍ ଫାର କାଜିଙ୍ଗ୍ ଯୋଷେଫତିଙ୍ଗ୍ ଜଇଲ୍ ଇଞ୍ଜାଙ୍ଗ୍ ତାସିୱାତାର୍। ହେୱାନ୍ କାଜିଙ୍ଗ୍ ଯୋଷେଫ କେଚ୍କଣ୍କାଙ୍ଗ୍ ବୁଜାଇ କିଜି ୱେଚ୍ଚାନ୍, “ସାତ୍ ବାର୍ହୁ ଈଶ୍ୱର ବେସି ତାସ୍ ପକ୍ତେଦେଙ୍ଗ୍ ଇଚା କିନାନା, ହେଲେକେ ସାତ୍ ବାର୍ହୁ ମାର୍ଡିଆନାତ୍।”
ଯୋଷେଫ ହୁଦାଙ୍ଗ୍ ଫାର ବେସି ସାଙ୍ଗ ଆତାନ୍ ଲାଗିଙ୍ଗ୍ ହେୱାନିଙ୍ଗ୍ ଦୁଇ ନମ୍ୱର୍ ଶାକ୍ତିକାଟି ମାନାୟ୍ ଲେକେ ବାଚି କିତାନ୍।
ସାତ୍ ବାର୍ହୁ ତାସ୍ ଆତି ପାଦ୍ନା କାଦିକଣ୍ଡା ଆଦିକ୍କିଜି ରୁଣ୍ଡାଇ କିଦେଙ୍ଗ୍ ଯୋଷେଫ ମାନାୟାରିଙ୍ଗ୍ ୱେଚ୍ଚାନ୍। ଏଚେପାଦ୍ନା ସାତ୍ ବାର୍ହୁ ମାର୍ଡି ୱାତାତ୍, ଯୋଷେଫ କାଦିକଣ୍ଡା ପତି ମାନାୟାରିଙ୍ଗ୍ ପତାନ୍ ଇନେସ୍କି ହେୱାର୍ ହାମାନ୍ ବାବ୍ରେ ଚିଞ୍ଜେଙ୍ଗ୍ ଆଡ୍ନାର୍।
ଆପ୍କା ମିସର ଦେସ୍ତାକେ ଆକାୟ୍, ମାତର୍ କିଣାନ ଦେସ୍ତାକେ ପା ଇମେତାକେ କି ଯାକୁବ ଆରେ ତା ପରିବାର୍ ବାହା କିଜି ମାଚାର୍, ହେବେ ପା ମାର୍ଡି ବେସି ଆର୍ତାତ୍।
ଲାଗିଙ୍ଗ୍ ଯାକୁବ ତା ଗାଜା ହିମ୍ଣାକାଙ୍ଗ୍ କାଦି କଡ଼୍ନି କାଜିଙ୍ଗ୍ ମିସର ଦେସ୍ତାକେ ପକ୍ତାନ୍। ଏଚେପାଦ୍ନା ଟଣ୍ଡାହିର୍ କାଦି କଡ଼୍ଦେଙ୍ଗ୍ ଯୋଷେଫ ମୁମ୍ଦ ନିଲ୍ଚି ମାଚାର୍ ହେୱାର୍ ଯୋଷେଫତିଙ୍ଗ୍ ଚିନ୍ କିଦେଙ୍ଗ୍ ଆଡ୍ୱାତାର୍। ମାତର୍ ହେୱାରିଙ୍ଗ୍ ଯୋଷେଫ ଚିନ୍ କିତାନ୍।
ହେୱାର୍ ବାଦ୍ଲା ଆତାର୍ନା କି ଆକାୟ୍ ହେଦାଙ୍ଗ୍ ପରିକ୍ଷା କିତି ପାଚେ, ଯୋଷେଫ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମି ଟଣ୍ଡେନ୍ ଯୋଷେଫ,ପାଣ୍ଡ୍ରା ଆମାଟ୍ ଏପେଙ୍ଗ୍ କରାପ୍ କିଦେଙ୍ଗ୍ ଉପାୟ୍ କିତାଦେର୍ ହେପାଦ୍ନା ଏପେଙ୍ଗ୍ ନାଙ୍ଗେଙ୍ଗ୍ ଦାସ୍କିଜି ପତ୍ତାଦେର୍, ମାତର୍ ଈଶ୍ୱର କରାପ୍ତିଙ୍ଗ୍ ହାର୍ତାକେ ବାଦ୍ଲାୟ୍ କିତାନ୍। ମିସର ଦେସ୍ତାକେ ୱାଜି ବାହା କିୟାଟ୍ ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଆରେ ମି ପରିବାର୍ କାଜିଙ୍ଗ୍ କାଦି ଜାଗାଇ କିଦେଙ୍ଗ୍ ଆଡ଼୍ଦାନାଙ୍ଗ୍।”
ଏଚେପାଦ୍ନା ଯୋଷେଫ ଟଣ୍ଡାହିର୍ ତାଞ୍ଜ ଲେଉଟାଆତାର୍ ଆରେ ହେୱାର୍ ତାଞ୍ଜ୍ବା, ଯାକୁବଙ୍ଗ୍ ୱେଚ୍ଚାର୍ ଯେ ନଙ୍ଗୟ୍ ପାତେକ୍ ଯୋଷେଫ ଜିବୁନ୍ ମାନାନ୍, ତାଞ୍ଜ୍ବା ବେସି ୱାରି ଆତାନ୍।
ଆରେ ଯାକୁବ ବୁଡ଼୍ହି ଆଜି ମାଚାନ୍, ଆତିସ୍ପା ହେୱାନ୍ ତା ପରିବାର୍ ହୁଦାଙ୍ଗ୍ ମିସର ଦେସ୍ତ ହାଚାନ୍ ଆରେ ହେବେ ହେୱାନ୍ ହେୱାର୍ ହୁଦାଙ୍ଗ୍ ବାହା କିତାନ୍। ଯାକୁବ ହାଃୱି ଆଗେ ହେୱାନ୍ ତା ୱିଜୁ ହିମ୍ଣାରିଙ୍ଗ୍ ଆଶ୍ରିବାଦ୍ କିତାନ୍।
ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତି ନିୟମ୍ ଇନାକା ଈଶ୍ୱର ଅବ୍ରାହାମ ହୁଦାଙ୍ଗ୍ କିଜି ମାଚାନ୍ ହେଦାଙ୍ଗ୍ ହେୱାନ୍ ଇସାହାକତିଙ୍ଗ୍ ହିତାନ୍, ପାଚେ ଯାକୁବଙ୍ଗ୍ ଆରେ ତା ବାରଜାଣ୍ ମେହିରିଙ୍ଗ୍ ଆରେ ତା ପରିବାର୍ତିଙ୍ଗ୍ ହିତାନ୍। ବାରଜାଣ୍ ମେହିର୍ନି ଲାତ୍ରା ଇସ୍ରାଏଲନି ବାରଗଷ୍ଟି ଆତାର୍।
ବାଇବଲ୍ନି ର କାତା: ଆଦିବହି ୩୭-୫୦
Free to use, adapt, and share under an open license (CC BY-SA 4.0).