7. ୭. ଯାକୁବଙ୍ଗ୍ ଈଶ୍ୱର ଆଶ୍ରିବାଦ୍ କିତାନ୍
ଇନେସ୍ ହେ ହିମ୍ଣାଙ୍ଗ୍ ଗାଜା ଆଦେଙ୍ଗ୍ ଲାଗାତାର୍, ଯାକୁବ ଇଞ୍ଜ ମାଞ୍ଜେଙ୍ଗ୍ ଲାଡ୍ କିଜି ମାଚାନ୍, ମାତର୍ ଏଷୌ ବେଟ୍ ବୁଲାଆଦେଙ୍ଗ୍ ଲାଡ୍ କିଜି ମାଚାନ୍। ରିବିକା ଯାକୁବଙ୍ଗ୍ ଲାଡ୍ କିଜି ମାଚାତ୍, ମାତର୍ ଇସାହାକ ଏଷୌତିଙ୍ଗ୍ ଲାଡ୍ କିଜି ମାଚାନ୍।
ଦିନେକ୍ ଏଷୌ ବେଟ୍ ହାଲ୍ଜି ୱାତାନ୍, ହେୱାନ୍ ବେସି ନାସ୍କିତାକେ ମାଚାନ୍। ଏଷୌ ଯାକୁବଙ୍ଗ୍ ୱେଚ୍ଚାନ୍, “ଏନେଙ୍ଗ୍ ରସ୍ତି କାଦିତାଙ୍ଗ୍ ନାଙ୍ଗେଙ୍ଗ୍ ଦୟାକିଜି ଇଚ୍କେ ଚିଞ୍ଜେଙ୍ଗ୍ ହିଦା।” ୱିଜୁ ହଟ୍ ଯାକୁବ ୱେଚ୍ନାକା, “ଆଗେ ନି ଗାଜା ହିମ୍ଣାନି ଆଦିକାର୍ ନାଙ୍ଗେଙ୍ଗ୍ ହିଦା।” ହେବେତାଙ୍ଗ୍ ଏଷୌ ତା ଗାଜା ହିମ୍ଣାନି ଆଦିକାର୍ ଯାକୁବଙ୍ଗ୍ ହିତାନ୍। ଲାଗିଙ୍ଗ୍ ହେୱାନିଙ୍ଗ୍ ଯାକୁବ ଇଚ୍କେ ଚିଞ୍ଜେଙ୍ଗ୍ କାଦି ହିତାନ୍।
ଏଷୌଙ୍ଗ୍ ଇସାହାକ ତା ଆଶ୍ରିବାଦ୍ ହିଦେଙ୍ଗ୍ ଇଚା କିତାନ୍। ମାତର୍ ହେୱାନ୍ ହେଦାଙ୍ଗ୍ କିନି ଆଗେ, ଯାକୁବ ଏଷୌ ଲେକେ ବେସ୍ ଆସ୍ତି ରିବିକା ଆରେ ଯାକୁବ ହେୱାନିଙ୍ଗ୍ ପକ୍ଚି ମାଚାନ୍। ଇସାହାକ୍ ବୁଡା ଆଜି ହେୱାନ୍ ହୁଡ଼୍ଦେଙ୍ଗ୍ ଆଡ୍ୱାଦାଙ୍ଗ୍ ମାଚାନ୍। ଲାଗିଙ୍ଗ୍ ଯାକୁବ ଅଡା ତଲ୍ ହାକ୍ତ ଆରେ କେଇକୁକାଙ୍ଗ୍ ହୁର୍ପି ଆତାନ୍ ଆରେ ଏଷୌତି ଆଙ୍ଗି ଉସ୍ପାତାନ୍।
ଇସାହାକ ଲାଗାୟ୍ ଯାକୁବ ୱାଜି ୱେଚ୍ଚାନ୍ ଆରେ ୱେଚ୍ଚାନ୍, “ଆନେଙ୍ଗ୍ ନେ ଏଷୌ, ଆନେଙ୍ଗ୍ ୱାତାଙ୍ଗ୍ନା, ହେଦାଙ୍ଗ୍ କାଜିଙ୍ଗ୍ ଏନେଙ୍ଗ୍ ନାଙ୍ଗେଙ୍ଗ୍ ଆଶ୍ରିବାଦ୍ କିଦ୍ନାୟ୍।” ଇସାହାକ ଏଚେପାଦ୍ନା ଆଙ୍ଗିନି ବାସ୍ନା ଆରେ ଅଡାନି ତଲ୍ତିଙ୍ଗ୍ ଅନ୍ମାନ୍ କିତାନ୍, ହେୱାନ୍ ଏଷୌ ଇଞ୍ଜି ବାବିକିତାନ୍ ଆରେ ହେୱାନିଙ୍ଗ୍ ଆଶ୍ରିବାଦ୍ କିତାନ୍।
ଏଷୌ ଯାକୁବଙ୍ଗ୍ ଗିଣ୍ କିତାନ୍ ଇନେସ୍କି ଯାକୁବ ତା ଗାଜା ଟଣ୍ଡାହି ଆଦିକାର୍ ଆରେ ତା ଆଶ୍ରିବାଦ୍ ଅଜି ମାଚାନ୍। ଲାଗିଙ୍ଗ୍ ତାଞ୍ଜ୍ବା ହାଃତି ପାଚେ ଯାକୁବଙ୍ଗ୍ ମାର୍ନେ ଅସ୍ତେଙ୍ଗ୍ ହେୱାନ୍ ଉପାୟ୍ କିତାନ୍।
ମାତର୍ ରିବିକା ଏଷୌ କିତି ଉପାୟ୍ତିଙ୍ଗ୍ ପୁଚାତ୍। ଲାଗିଙ୍ଗ୍ ହେଦେଲ୍ ଆରେ ଇସାହାକ, ଯାକୁବଙ୍ଗ୍ ଦେହା ତା ଲକ୍ବା ହୁଦାଙ୍ଗ୍ ମାଞ୍ଜେଙ୍ଗ୍ ପକ୍ତାତ୍।
ଯାକୁବ ରିବିକା ଲକ୍ବାକ୍ ହୁଦାଙ୍ଗ୍ ବେସି ବାର୍ହୁ ଆସ୍ତି ମାଚାନ୍। ହେପାଦ୍ନା ହେୱାନ୍ ବିବା ଆତାନ୍ ଆରେ ହେୱାନିଙ୍ଗ୍ ବାରଗଟା ମେହିର୍ ଆରେ ର ଗାଡ଼୍ଚେ ଆଚାତ୍। ଈଶ୍ୱର ହେୱାନିଙ୍ଗ୍ ବେସି ଆଶ୍ରିବାଦ୍ କିତାନ୍।
ତାଞ୍ଜ୍ବା କିଣାନ ଦେସ୍ତାକେ କୁଡ଼େ ବାର୍ହୁ ମାଚି ପାଚେ, ଯାକୁବ ତା ପିରିବାର୍ ହୁଦାଙ୍ଗ୍ ତା ଦାସ୍ ମାନାୟାର୍ ଆରେ ତା ପଶୁ ମାନ୍ଦାଙ୍ଗ୍ ହୁଦାଙ୍ଗ୍ ହେବେ ଲେଉଟା ଆଜି ୱାତାର୍।
ଯାକୁବ ବେସି ପାଣ୍ଡ୍ରାଆଜି ମାଚାନ୍ ଇନେସ୍କି ହେୱାନ୍ ଚିନ୍ତା କିଜି ମାଚାନ୍ ଯେ ନଙ୍ଗୟ୍ ପାତେକ୍ ଏଷୌ ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଇଚା କିନାନା। ଲାଗିଙ୍ଗ୍ ହେୱାନ୍ ବେସି ପଶୁ ମାନ୍ଦାକାଙ୍ଗ୍ ଏଷୌଙ୍ଗ୍ ଗିପ୍ଟ୍ ଲେକେ କିଜି ପକ୍ତାନ୍। ଇମ୍ଣି ଦାସ୍ ଆତି ମାନାୟାର୍ ପଶୁ ମାନ୍ଦାକାଙ୍ଗ୍ ତାସିୱାତାର୍ ଆରେ ଏଷୌଙ୍ଗ୍ ୱେଚ୍ଚାର୍, “ନି ଦାସ୍ ଯାକୁବ, ନିଙ୍ଗେଙ୍ଗ୍ ଇ ପଶୁ ମାନ୍ଦାଙ୍ଗ୍ ହିତ୍ତାନ୍ନା ହେୱାନ୍ ବେଗି ୱାନାନା।”
ମାତର୍ ଏଷୌ ଯାକୁବଙ୍ଗ୍ କେମାକିଜି ୱିସ୍ତି ମାଚାନ୍, ଆରେ ହେୱାର୍ ଜାର୍-ଜାର୍ ବିତ୍ରେ ୱାରିତାଙ୍ଗ୍ ହୁଡ଼୍କା ଆଦେଙ୍ଗ୍ ଇଚାକିତାର୍ ତାପାଚେ ଯାକୁବ କିଣାନ ଦେସ୍ତାକେ ଶାନ୍ତିରେ ବାହା କିତାନ୍। ଇଦାଙ୍ଗ୍ ପାଚେ ଇସାହାକ ହାଃତାନ୍, ଆରେ ଏଷୌ ଆରେ ଯାକୁବ ହେୱାନିଙ୍ଗ୍ ମୁଚ୍ଚାର୍। ଈଶ୍ୱର ଇମ୍ଣି ନିୟମନି ପାର୍ମାଣ୍ ୱିଜୁ ଅବ୍ରାହାମତିଙ୍ଗ୍ କିଜି ମାଚାନ୍, ନଙ୍ଗୟ୍ ଇସାହାକତାଙ୍ଗ୍ ଯାକୁବଙ୍ଗ୍ ହାର୍ପି କିଜି ହିତାନ୍।
ବାଇବଲ୍ନି ର କାତା: ଆଦିବହିନି ୨୫: ୨୭-୩୩:୨୦
Free to use, adapt, and share under an open license (CC BY-SA 4.0).