12. ୧୨. ମାନ୍ଦାଆଜି ହାନାକା
ମିଶର ଦେସ୍ ପିସ୍ତି କାଜିଙ୍ଗ୍ ଇସ୍ରାଏଲନି ମାନାୟାର୍ ବେସି ୱାରି ମାଚାର୍। ହେୱାର୍ ଆରେ ଦାସ୍ ମାନ୍ୱାତାର୍, ଆରେ ଈଶ୍ୱର ହେୱାରିଙ୍ଗ୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍କିତି ଦେସ୍ତ ହାଲ୍ଜି ମାଚାର୍। ଇସ୍ରାଏଲନି ମାନାୟାର୍ ଇନାକା ମିଶର ଦେସ୍ତାକାରିଙ୍ଗ୍ ଏନ୍ତାର୍, ହେୱାର୍ ହେ ୱିଜୁ ହିତାର୍, ଏଲେଙ୍ଗ୍ କି ହନା ଆରେ ରୁପା ଆରେ ଜେକନି ମୁଲ୍ୟମାନି ଜିନିଷ୍ ପା ହିତାର୍। ଜେକନି ଦେସ୍ନି କେତେକ୍ ମାନାୟ୍ ଈଶ୍ୱରତାକେ ପାର୍ତି କିତାର୍ ଆରେ ହେୱାର୍ ମିଶର ଦେସ୍ ପିସ୍ତିହିଙ୍ଗ୍ ଇସ୍ରାଏଲନି ମାନାୟାର୍ ହୁଦାଙ୍ଗ୍ ହାଚାର୍।
ୱେଡ଼ାଲିଙ୍ଗ୍ ଈଶ୍ୱର ହେୱାର୍ ମୁମ୍ଦ ର ଉଚା ବାଦାଡ଼୍ତାଙ୍ଗ୍ ହେୱାରିଙ୍ଗ୍ ହାଜି ଚଚ୍ଚି ଅଜି ମାଚାନ୍, ଆରେ ହେଦାଙ୍ଗ୍ ନାଣାଲିଙ୍ଗ୍ ଉଚା ନାଣି ଦୁଆଁ ଲେକେ ଆଜି ମାଚାତ୍। ଈଶ୍ୱର ହେୱାର୍ ହୁଦାଙ୍ଗ୍ ୱିଜୁଦିନ୍ ମାଚାନ୍ ଆରେ ହେୱାର୍ ହାନିହିଙ୍ଗ୍ ହେୱାରିଙ୍ଗ୍ ହାଜି ଚଚ୍ଚି ମାଚାନ୍। ହେୱାର୍ ତା ପାଚେ-ପାଚେ ହାଲ୍ଜି ମାଚାର୍।
ଅଲପ୍ ସମୟ୍ ପାଚେ, ଫାର ଆରେ ତା ମାନାୟାର୍ ହେୱାର୍ ମାନ୍ ବାଦ୍ଲାୟ୍ କିତାର୍ ଆରେ ଇସ୍ରାଏଲନି ମାନାୟାରିଙ୍ଗ୍ ହେୱାର୍ ଦାସ୍ ଆନି କାଜିଙ୍ଗ୍ ଆରେରଗ ଇଚା କିତାର୍। ଈଶ୍ୱର ଆରେରଗ ଇଚା କିୟିକିତାନ୍, ଇନେସ୍କି ମାନାୟାର୍ ରକାନ୍ ମାତର୍ ସତ୍ ଈଶ୍ୱର ହେଦାଙ୍ଗ୍ ପୁଞ୍ଜେଙ୍ଗ୍ ଆଡ୍ନାର୍, ଆରେ ବୁଜାଆନାର୍ ଆରେ ହେୱାନ୍, ୱିଜୁତାଙ୍ଗ୍ ଶାକ୍ତିକାଟି ମାପୃ ଫାର ଆରେ ଫାରନି ପେନ୍କୁ ପୁଦାଙ୍ଗ୍ତାଙ୍ଗ୍ ଆଦିକ୍ ଶାକ୍ତି କାଟାକାନ୍ ଆନାନ୍।
ଲାଗିଙ୍ଗ୍ ହେୱାରିଙ୍ଗ୍ ଆରେରଗ ଦାସ୍ କିଦେଙ୍ଗ୍ ଇସ୍ରାଏଲନି ମାନାୟାର୍ ପାଚେ-ପାଚେ ଫାର ଆରେ ତା ସେନାର୍ ପେସ୍ଦି ଅତାର୍। ମିଶରନି ସେନାର୍ ୱାନାକା ଏଚେପାଦ୍ନା ଇସ୍ରାଏଲନି ମାନାୟାର୍ ହୁଡ଼୍ତାର୍, ହେୱାର୍ ଗର୍ବ୍ତିଙ୍ଗ୍ ଦୁକ୍ କିତାର୍ ଯେ ହେୱାର୍ ଫାରନି ସେନାର୍ ଆରେ ଲୋହିତ ହାମ୍ଦୁର୍ ବିତ୍ରେ ହଣ୍ଜି ହାନାରା। ହେୱାର୍ ବେସି ପାଣ୍ଡ୍ରାଆଜି ମାଚାର୍ ଆରେ ହେୱାର୍ ରାଟୁ କିଜି ୱେଚ୍ଚାର୍, “ଆପେଙ୍ଗ୍ ଇନାକିଦେଙ୍ଗ୍ ମିଶର ଦେସ୍ ପିସ୍ତାପ୍? ଆପେଙ୍ଗ୍ ହାଃଦେଙ୍ଗ୍ ହାନାପା।”
ମୋଶା ଇସ୍ରାଏଲନି ମାନାୟାରିଙ୍ଗ୍ ୱେଚ୍ଚାନ୍, “ପାଣ୍ଡ୍ରା ଆମାଟ୍, ଈଶ୍ୱର ନେଞ୍ଜେଙ୍ଗ୍ ମି ନିପଣ୍ ଆଜି ଯୁଜ୍ କିନାନ୍ ମିଙ୍ଗେଙ୍ଗ୍ ରକ୍ଷା କିଦ୍ନାନ୍।”ତାପାଚେ ଈଶ୍ୱର ମୋଶାଙ୍ଗ୍ ୱେଚ୍ଚାନ୍, “ମାନାୟାରିଙ୍ଗ୍ ଲୋହିତ ହାମ୍ଦୁର୍ ନିପଣ୍ ହାଞ୍ଜେଙ୍ଗ୍ ୱେଚା।”
ତାପାଚେ ଈଶ୍ୱର ବାଦାଡ଼୍ନି ଡ଼ିଗା ଅଜି ଇସ୍ରାଏଲନି ମାନାୟାର୍ ଆରେ ମିଶରନି ମାନାୟାର୍ ବିତ୍ରେ ଇଡ଼୍ତାନ୍ ଇନେସ୍କି ମିଶର ଦେସ୍ତି ମାନାୟାର୍ ଇସ୍ରାଏଲନି ମାନାୟାରିଙ୍ଗ୍ ହୁଡ଼୍ଦେଙ୍ଗ୍ ଆଡୁର୍।
ଈଶ୍ୱର ମୋଶାଙ୍ଗ୍ ତା କେଇ ଜପିକିଜି ହାମ୍ଦୁର୍ନି ଏଜୁକାଙ୍ଗ୍ ରି ବାଗ୍ କିଦେଙ୍ଗ୍ ୱେଚ୍ଚାନ୍। ତାପାଚେ ଈଶ୍ୱର ତା ଇ କେଇଦାଙ୍ଗ୍ ଏଜୁକାଙ୍ଗ୍ ଟେଲାଇ କିଦେଙ୍ଗ୍ ଗିଟାଇ କିତାନ୍, ଇନେସ୍କି ହାମ୍ଦୁର୍ ବିତ୍ରେ ର ହାଜି ଆତାତ୍।
ଇସ୍ରାଏଲନି ମାନାୟାର୍ ହାମ୍ଦୁର୍ ବିତ୍ରେ ୱାଚ୍ଚି ମେଦ୍ନିତାକେ ତାଙ୍ଗ୍ଜି ହାଚାର୍ ଆରେ ହେୱାର୍ ରିପଣ୍ଡାଙ୍ଗ୍ ଏଜୁଙ୍ଗ୍ନି କାତି ମାଚାତ୍।
ତାପଚେ ଈଶ୍ୱର ବାଦାଡ଼୍ତିଙ୍ଗ୍ ହେ ବାହାତାଙ୍ଗ୍ ଜପି ଅସାହାଚାନ୍, ଇନେସ୍କି ଇସ୍ରାଏଲନି ମାନାୟାର୍ ହୁଡ଼୍ଜି ହନ୍ଚି ହାନାକା ମିଶର ଦେସ୍ତାକାର୍ ହୁଡ଼୍ଦେଙ୍ଗ୍ ଆଡ୍ନାର୍। ମିଶର ଦେସ୍ତାକାର୍ ହେୱାରିଙ୍ଗ୍ ପେସ୍ଦି ଅନି କାଜିଙ୍ଗ୍ ଇଚା କିତାର୍।
ଲାଗିଙ୍ଗ୍ ହେୱାର୍ ହାମ୍ଦୁର୍ ବିତ୍ରେଆତି ହାଜି ନିପଣ୍ ଇସ୍ରାଏଲନି ମାନାୟାରିଙ୍ଗ୍ ପେସ୍ଦି ଅତାର୍, ମାତର୍ ଈଶ୍ୱର ମିଶର ଦେସ୍ତାକାରିଙ୍ଗ୍ କଷ୍ଟ ହିତାନ୍ ଆରେ ହେୱାର୍ ରତ୍କୁକାଙ୍ଗ୍ ହଟ୍ପି କିତାର୍। ହେୱାର୍ ରାଟୁକିଜି ୱେଚ୍ଚାର୍, “ହନ୍ଞ୍ଚି ହାଲାଟ୍! ଈଶ୍ୱର ଇସ୍ରାଏଲନି ମାନାୟାର୍ ନିପଣ୍ ଆଜି ଯୁଜ୍ କିନାନା।”
ଇସ୍ରାଏଲନି ମାନାୟାର୍ ହାମ୍ଦୁର୍ ଆନ୍ଟି ପାଡ଼୍କା ହାର୍ଦାଙ୍ଗ୍ ଏକିତି ପାଚେ ଈଶ୍ୱର ମୋଶାଙ୍ଗ୍ ତା କେଇ ଆରେରଗ ଜପି କିଦେଙ୍ଗ୍ ୱେଚ୍ଚାନ୍। ଏଚେପାଦ୍ନା ହେୱାନ୍ ଈଶ୍ୱରତିଙ୍ଗ୍ ମାନି କିତାନ୍, ଏଜୁଙ୍ଗ୍ ମିଶର ଦେସ୍ତାକାର୍ ଜପି ଏଜୁଙ୍ଗ୍ ଡାବାଇ କିତାତ୍ ଆରେ ହାମ୍ଦୁର୍ ଆଗେ ଲେକେ ହାମାନ୍ ଆତାତ୍। ୱିଜୁ ମିଶର ଦେସ୍ନି ସେନାର୍ ହାମ୍ଦୁର୍ତାକେ ମୁଞ୍ଚାର୍।
ଇସ୍ରାଏଲନି ମାନାୟାର୍ ଏଚେପାଦ୍ନା ହୁଡ଼୍ତାର୍ ମିଶର ଦେସ୍ତାକାର୍ ହାଃତାର୍ନା, ହେୱାର୍ ଈଶ୍ୱରତାକେ ଆହା କିତାର୍ ଆରେ ମୋଶା ଈଶ୍ୱରତି ରକାନ୍ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଇଞ୍ଜି ହେଦାଙ୍ଗ୍ ପାର୍ତି କିତାର୍।
ଇସ୍ରାଏଲନି ମାନାୟାର୍ ପା ଆଦିକ୍ ଏନ୍ଦ୍ଜି ୱାରି ଆତାର୍ ଇନେସ୍କି ଈଶ୍ୱର ହେୱାରିଙ୍ଗ୍ ହାଃନିତାଙ୍ଗ୍ ଆରେ ଦାସ୍ତାଙ୍ଗ୍ ରକ୍ଷା କିତାନ୍! ନଙ୍ଗୟ୍ ହେୱାର୍ ଈଶ୍ୱରତିଙ୍ଗ୍ ହେବା କିଦେଙ୍ଗ୍ ପୁରାପୁରି ଇଚା ମାଚାର୍। ଇସ୍ରାଏଲନି ମାନାୟାର୍ ହେୱାରିଙ୍ଗ୍ ପୁନି ସ୍ୱାଦିନ୍ତିଙ୍ଗ୍ ମାନି କିଦେଙ୍ଗ୍ ଆରେ ଈଶ୍ୱରତିଙ୍ଗ୍ ଜୟ୍-ଜୟ୍ କିନି କାଜିଙ୍ଗ୍ କେତେକ୍ କେର୍କଣିଙ୍ଗ୍ କେର୍ତାର୍ ଇନେସ୍କି ହେୱାନ୍ ମିଶର ଦେସ୍ତାକାର୍ ସେନାର୍ତାଙ୍ଗ୍ ହେୱାରିଙ୍ଗ୍ ରକ୍ଷା କିଜି ମାଚାନ୍।
ଈଶ୍ୱର ଇସ୍ରାଏଲନି ମାନାୟାରିଙ୍ଗ୍ ମିଶର ଦେସ୍ତାକାର୍ ଜପି ଇନେସ୍ ଜିତା ଆତାନ୍ ଆରେ ହେୱାରିଙ୍ଗ୍ ଦାସ୍ତାଙ୍ଗ୍ ଇନେସ୍ କିଜି ଉଦାର୍ କିତାନ୍, ହେଦାଙ୍ଗ୍ ଏତୁକିନି କାଜିଙ୍ଗ୍ ଇସ୍ରାଏଲନି ମାନାୟାରିଙ୍ଗ୍ ନିସ୍ତାର ପାର୍ବୁ ମାନି କିଦେଙ୍ଗ୍ ଆଦେସ୍ ହିତାନ୍। ହେୱାର୍ ର ଚିନା ହିଲ୍ୱି ମେଣ୍ଢା ହିମ୍ଣାତିଙ୍ଗ୍ ବଲି ପୁଜା ହିତି କାଜିଙ୍ଗ୍ ଆରେ ତାଡ଼ି ମାହାଆୱିତି ରୁଟି ହୁଦାଙ୍ଗ୍ ହେଦାଙ୍ଗ୍ତିଙ୍ଗ୍ ତିନ୍ଞ୍ଜି ପାର୍ବୁ ମାନି କିତାର୍।
ବାଇବଲ୍ନି ର କାତା: ଯାତ୍ରାବହି ୧୨: ୩୩- ୧୫: ୨୧
Free to use, adapt, and share under an open license (CC BY-SA 4.0).