13. ୧୩. ଇସ୍ରାଏଲନି ମାନାୟାର୍ ହୁଦାଙ୍ଗ୍ ଈଶ୍ୱର ନିୟମ୍ କିତାର୍
ଈଶ୍ୱର ଇସ୍ରାଏଲନି ମାନାୟାରିଙ୍ଗ୍ ଲୋହିତ ହାମ୍ଦୁର୍ ନାପ୍ତି ପାଚେ, ହେୱାନ୍ ର ଟାଙ୍ଗ୍ରାବାହା ନିପଣ୍ ଆଜି ସୀନୟ ତର୍ଦି ମାଡ଼ିତାକେ ତାସି ୱାତାନ୍। ମୋଶା ଇମେତାକେ କାଚାଆନି ବୁଟା ହୁଡ଼୍ଜି ମାଚାନ୍ ଇଦାଙ୍ଗ୍ ହେ ମାଡ଼ି ମାଚାତ୍। ମାନାୟାର୍ ହେ ମାଡ଼ି ତାରେନ୍ କୁଡ଼ିୟାଙ୍ଗ୍ ରସ୍ତାର୍।
ଈଶ୍ୱର ମୋଶାଙ୍ଗ୍ ଆରେ ଇସ୍ରାଏଲନି ମାନାୟାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଯଦି ନା ଆଦେସ୍ ମାନି କିନାଦେର୍ ଆରେ ନା ନିୟମ୍ତିଙ୍ଗ୍ ରକ୍ଷା କିନାଦେର୍ ଲାଗିଙ୍ଗ୍ ଏପେଙ୍ଗ୍ ନା ରୁଣ୍ଡାଇ କିତି ଦନ୍, ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ରାଜା ଲାତ୍ରା ଆରେ ର ପବିତ୍ର ଦେସ୍ ଆନାତ୍।”
ତିନ୍ଦିନ୍ ପାଚେମାନାୟାର୍ ଜାର୍ତିଙ୍ଗ୍ ଆତ୍ମିକ୍ ଲେକେ ଜାଗ୍ରତ୍ କିତି ପାଚେ, ଈଶ୍ୱର ବାଦାଡ଼୍ ଗାର୍ଜା, ବିଜ୍ଲି, ଦୁଆଁ ଆରେ ର ଗାଜାକାଟ୍ ମରି ହୁଦାଙ୍ଗ୍ ସୀନୟ ମାଡ଼ି ଜପି ଜୁଜି ୱାତାନ୍। ମୋଶା ରକାନ୍ ନେ ମାଡ଼ି ଜପି ହାଞ୍ଜେଙ୍ଗ୍ ଅଡର୍ ପାୟାଆତାନ୍।
ତାପାଚେ ଈଶ୍ୱର ହେୱାରିଙ୍ଗ୍ ତା ନିୟମ୍ ହିତାନ୍ ଆରେ ୱେଚ୍ଚାନ୍, “ଆନେଙ୍ଗ୍ ମି ଈଶ୍ୱର ୱିଜୁତାଙ୍ଗ୍ ଶାକ୍ତିକାଟି ମାପୃ, ଇନେର୍ ମିଙ୍ଗେଙ୍ଗ୍ ମିଶର ଦେସ୍ତାଙ୍ଗ୍ ଦାସ୍ତାଙ୍ଗ୍ ରକ୍ଷା କିଜି ତାସିୱାତାନ୍। ଜେକନି ପେନ୍କୁ ପୁଦାକାଙ୍ଗ୍ ପୁଜା କିମାଟ୍।”
“ଇମ୍ଣି ମୁର୍ତି ରହ୍ମାଟ୍ ଆରେ ହେୱେକାଙ୍ଗ୍ ପୁଜା କିମାଟ୍, ଇନେସ୍କି ଆନେଙ୍ଗ୍ ରିସା ଆନି ମାପୃ। ନା ତର୍ ଅସନ୍ମାନ୍ ବାବ୍ରେ ବ୍ୟବହାର୍ କିମାଟ୍। ଜମ୍ନି ଦିନ୍ତିଙ୍ଗ୍ ପବିତ୍ର ବାବ୍ରେ ମାନି କିୟାଟ୍। ଜେକନି ଅର୍ତତାଙ୍ଗ୍, ଆପ୍କା ଚଅ ଦିନ୍ତ ମି ୱିଜୁ କାମାୟ୍ କିନାଦେର୍, ମାତର୍ ସାତ୍ ଦିନ୍ତ ମି କାଜିଙ୍ଗ୍ ଜମ୍ନି ଦିନ୍ ଆନାତ୍ ଆରେ ଏପେଙ୍ଗ୍ ନାଙ୍ଗେଙ୍ଗ୍ କୁକ୍ତାନାଦେର୍।”
“ମି ଆୟା ଆବାରିଙ୍ଗ୍ ସନ୍ମାନ୍ କିୟାଟ୍। ମାନାୟ୍ ଅହ୍ମାଟ୍, ଦାରି କାମାୟ୍ କିମାଟ୍, ଚର୍ କିମାଟ୍, ମିଚ୍ କାତା ୱେଚ୍ମାଟ୍। ମି ପାଡ଼୍ହା ଇଲ୍ନି କଗ୍ଲେଙ୍ଗ୍, ତାଞ୍ଜ କି ପାଡ଼୍ହା ଇଲ୍ନି ଜେକ ଇନାକା ପା ଜିନିଷ୍ତିଙ୍ଗ୍ ଇମ୍ଣାକା ତାଦି, ହେଦାଙ୍ଗ୍ତିଙ୍ଗ୍ ଲବ୍ ଆମାଟ୍।”
ତାପାଚେ ଈଶ୍ୱର ରିଣ୍ଡାଙ୍ଗ୍ ଚାପ୍ଟା କାଲ୍କୁକାଙ୍ଗ୍ ଇ ଦଶ୍ ଗଟା ଆଦେଙ୍ଗ୍ ଲେକିକିତାନ୍ ଆରେ ମୋଶାଙ୍ଗ୍ ହିତାନ୍। ଈଶ୍ୱର ଆରେ କେତେକ୍ ସାସ୍ତର୍ନି ନିୟମ୍ ଆରେ ନିତିନିୟମ୍ ୱିଜୁ ମାନି କିଦେଙ୍ଗ୍ ହିତାନ୍। ଈଶ୍ୱର ପାର୍ମାଣ୍ କିଜି ୱେଚ୍ଚାନ୍, ମାନାୟାର୍ ଯଦି ଇ ସାସ୍ତର୍ନି ନିୟମ୍ ମାନି କିନାର୍, ଲାଗିଙ୍ଗ୍ ହେୱାରିଙ୍ଗ୍ ଆଶ୍ରିବାଦ୍ କିନାନ୍ ଆରେ ରକ୍ଷା କିନାନ୍। ହେୱାର୍ ଯଦି ହେ ୱିଜୁତିଙ୍ଗ୍ ମାନି କିଉର୍, ଲାଗିଙ୍ଗ୍ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍।
ଈଶ୍ୱର ଆରେ ପା ଇସ୍ରାଏଲନି ମାନାୟାରିଙ୍ଗ୍ ର ପୁଟ୍ କୁଡ଼ିଆତିଙ୍ଗ୍ ଚଚ୍ଚି ୱେଚ୍ଚାନ୍, ହେଦାଙ୍ଗ୍ତିଙ୍ଗ୍ ହେୱାର୍ କିୟେର୍ ଇଞ୍ଜି ହେୱାନ୍ ୱେଚ୍ଚି ମାଚାନ୍। ଇଦାଙ୍ଗ୍ତିଙ୍ଗ୍ ମାନାୟାର୍ ମାହାଆନି ପୁଟ୍ କୁଡ଼ିଆ ଇଞ୍ଜି ୱେଚ୍ଚିମାଚାର୍। ଆରେ ଇବେତାଙ୍ଗ୍ ରିଣ୍ଡାଙ୍ଗ୍ କୁଡ଼ିଆ ମାଚିକ୍ ହେଦାଙ୍ଗ୍ତିଙ୍ଗ୍ ର ଗାଜା ପାର୍ଦା ବାଗ୍ କିଜି ମାଚାତ୍। ହେବେ ଈଶ୍ୱରହେବାକିନି ମୁଡ଼୍ଦି ପୁଜାରି ନେ ପାର୍ଦାନି ପାଚ୍ବାଗାୟ୍ ମାନି ଇଞ୍ଜ ହାନି କାଜିଙ୍ଗ୍ ଆଦେସ୍ ପାୟାଆଜି ମାଚାନ୍, ଇନେସ୍କି ଈଶ୍ୱର ହେବେ ମାନାକା।
ଇମ୍ଣି ମାନାୟ୍ ଈଶ୍ୱର ସାସ୍ତର୍ତିଙ୍ଗ୍ ମାନିକିୱିତିସ୍ ହେୱାନ୍ ଈଶ୍ୱରତାଙ୍ଗ୍ ର ବଲି ପୁଜା ଲେକେ ର ପଶୁତିଙ୍ଗ୍ ମାନାୟାର୍ ମାହାଆନି ମୁମ୍ଦ ମାନି ବେଦି ଲାଗାୟ୍ ତାସି ୱାଦେଙ୍ଗ୍ ଆଡ଼୍ଜି ମାଚାର୍। ରକାନ୍ ଈଶ୍ୱର ହେବାକିନି ମୁଡ଼୍ଦି ପୁଜାରି ପଶୁତିଙ୍ଗ୍ ମାର୍ନେ ଅସ୍ତି ହେଦାଙ୍ଗ୍ତିଙ୍ଗ୍ ବେଦିତାକେ କାଡିକିଜି ମାଚାନ୍। ବଲି ପୁଜାକିତି ପଶୁନି ନେତେର୍ ହେ ମାନାୟ୍ନି ପାପ୍ତିଙ୍ଗ୍ ଡାବାୟ୍ କିଜି ମାଚାତ୍ ଆରେ ହେ ମାନାୟ୍ ଈଶ୍ୱର କାଣ୍କୁକାଙ୍ଗ୍ ସୁଚି ଆଜି ମାଚାନ୍। ଈଶ୍ୱର ମୋଶା ଟଣ୍ଡାହି ହାରୋଣ ଆରେ ହାରୋଣ ଲାତ୍ରାତିଙ୍ଗ୍ ତା ଈଶ୍ୱର ହେବାକିନି ମୁଡ଼୍ଦି ପୁଜାରି ଆନି କାଜିଙ୍ଗ୍ ବାଚି କିତାନ୍।
ୱିଜୁ ମାନାୟାର୍ ଈଶ୍ୱର ହେୱାରିଙ୍ଗ୍ ହିଜିମାଚି ସାସ୍ତର୍ତିଙ୍ଗ୍ ମାନି କିନି କାଜିଙ୍ଗ୍, ଆରେ ଈଶ୍ୱରତିଙ୍ଗ୍ ନେ ହେବାକିନି କାଜିଙ୍ଗ୍ ଆରେ ତା ଜାର୍ ମାନାୟ୍ ଆନି କାଜିଙ୍ଗ୍ ରାଜି ଆତାନ୍। ମାତର୍ ହେୱାର୍ ଈଶ୍ୱର କାତାତିଙ୍ଗ୍ ମାନିକିନି କାଜିଙ୍ଗ୍ ପାର୍ମାଣ୍ କିନି ଅଲପ୍ ହାଚି ପାଚେ ହେୱାର୍ ବୟଙ୍କାର୍ ପାପ୍ କିତାର୍।
ବେସି ଦିନ୍ ଆସ୍ତି ମୋଶା ଈଶ୍ୱର ହୁଦାଙ୍ଗ୍ ସୀନୟ ମାଡ଼ିନି ମୁଣ୍ଡିତାକେ କାତାବାର୍ତା କିଜି ମାଚାନ୍। ମୋଶା ୱାନାକାଦିଙ୍ଗ୍ କାସି ମାନୁ-ମାନୁ ମାନାୟାର୍ ୱାସ୍ତାର୍ ଆରେ ସମ୍ୱାଲି କିୱାଦାଙ୍ଗ୍ ନିଙ୍ଗ୍ତାର୍। ଲାଗିଙ୍ଗ୍ ହେୱାର୍ ହାରୋଣ ଲାଗାୟ୍ ହାନା ତାହିୱାଜି ହେୱାନିଙ୍ଗ୍ ହେୱାର୍ କାଜିଙ୍ଗ୍ ର ମୁର୍ତି ରସ୍ତେଙ୍ଗ୍ ୱେଚ୍ଚାର୍!
ହାରୋଣ ହେ ହନାତାଙ୍ଗ୍ ର ବାଚି ହିମ୍ଣାନି ମୁର୍ତି ରସ୍ତାନ୍। ମୁର୍ତିତିଙ୍ଗ୍ ପୁଜା କିନିହିଙ୍ଗ୍ ମାନାୟାର୍ କାଲିଙ୍ଗ୍ ଲାନ୍ଦାଙ୍ଗ୍ ଉଣ୍ଜି ବେସି କରାପ୍ ଆତାର୍ ଆରେ ବଲି ପୁଜା କିତାର୍! ହେୱାର୍ ପାପ୍ କାଜିଙ୍ଗ୍ ହେୱାର୍ତାକେ ଈଶ୍ୱର ବେସି ରିସା କିଜି ମାଚାନ୍ ଆରେ ହେୱାରିଙ୍ଗ୍ ନଷ୍ଟ କିଦେଙ୍ଗ୍ ଇଚା କିତାନ୍।
ମାତର୍ ମୋଶା ହେୱାର୍ କାଜିଙ୍ଗ୍ ପାର୍ତାନା କିତାନ୍, ଆରେ ଈଶ୍ୱର ତା ପାର୍ତାନାତିଙ୍ଗ୍ ୱେଚାନ୍ ଆରେ ହେୱାରିଙ୍ଗ୍ ନଷ୍ଟ କିୱାତାନ୍। ମୋଶା ଏଚେପାଦ୍ନା ମାଡ଼ିତାଙ୍ଗ୍ ତାରେନ୍ ଜୁଜି ୱାତାନ୍ ଆରେ ହେ ମୁର୍ତି ହୁଡ଼୍ତାନ୍, ହେୱାନ୍ ଏଚେକ୍ ରିସା କିଜି ମାଚାନ୍ ଯେ ଈଶ୍ୱର ଇମ୍ଣି କାଲ୍ ପାଟାତାକେ ଦଶ୍ ଗାଟା ଆଦେସ୍ ଲେକିକିଜି ମାଚାନ୍ ହେୱାନ୍ ହେଦାଙ୍ଗ୍ତିଙ୍ଗ୍ ତୁସିହିଜି ଗୁଣ୍ଡା କିଜି ଚାପାତାନ୍।
ତାପାଚେ ମୋଶା ହେ ମୁର୍ତିତିଙ୍ଗ୍ ଡ୍ରିକ୍ଚି ଗୁଣ୍ଡା କିତାନ୍, ଆରେ ହେ ଗୁଣ୍ଡାତିଙ୍ଗ୍ ଅଲପ୍ ଏଜୁକାଙ୍ଗ୍ ତୁସିହିତାନ୍ ଆରେ ହେୱାରିଙ୍ଗ୍ ହେ ଏଜୁକାଙ୍ଗ୍ ଉଣ୍ଡେଙ୍ଗ୍ ହିତାନ୍। ଈଶ୍ୱର ମାନାୟାର୍ ବିତ୍ରେ ମାର୍ଡି ପକ୍ତାନ୍ ଆରେ ହେ ମାର୍ଡିତାଙ୍ଗ୍ କେତେକ୍ ହେନି ମାନାୟ୍ ହାଃତାର୍। ମୋଶା ଇମ୍ଣି ପାର୍ତୁମ୍ କାଲ୍ ପାଟାତିଙ୍ଗ୍ ଡ୍ରିକ୍ଚି ମାଚାନ୍ ତା ବାଦୁଲ୍ତ ହେୱାନ୍ ର ପୁନି କାଲ୍ ପାଟାତାକେ ଦଶ୍ ଗଟା ଆଦେସ୍ ଲେକିକିତାନ୍।
ତାପାଚେ ହେୱାନ୍ ଆରେରଗ ହେ ମାଡ଼ିତାକେ ଦୁମ୍ତାନ୍ ଆରେ ମାନାୟାରିଙ୍ଗ୍ କେମା ହିନି କାଜିଙ୍ଗ୍ ଈଶ୍ୱର ଲାଗାୟ୍ ପାର୍ତାନା କିତାନ୍। ଈଶ୍ୱର ହେ ପାର୍ତାନାତିଙ୍ଗ୍ ୱେନ୍ଞ୍ଜି ହେୱାରିଙ୍ଗ୍ କେମା କିତାନ୍। ମୋଶା ମାଡ଼ିତାଙ୍ଗ୍ ପୁନି ଚାପ୍ଟା କାଲ୍ତାକେ ଦଶ୍ ଗଟା ଆଦେସ୍ ହୁଦାଙ୍ଗ୍ ତାରେନ୍ ଜୁତାନ୍। ତାପାଚେ ଈଶ୍ୱର ସୀନୟ ମାଡ଼ିତାଙ୍ଗ୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍କିତି ଦେସ୍ ନିପଣ୍ ଇସ୍ରାଏଲନି ମାନାୟାରିଙ୍ଗ୍ ଅସାହାଚାନ୍।
ବାଇବଲ୍ନି ର କାତା: ଯାତ୍ରାବହି ୧୯-୩୪
Free to use, adapt, and share under an open license (CC BY-SA 4.0).