14. ୧୪. ଟାଙ୍ଗ୍ରାବାହାତାକେ ବୁଲାଆନାକା
ଈଶ୍ୱର ଇସ୍ରାଏଲନି ମାନାୟାରିଙ୍ଗ୍ ନିୟମ୍ ୱିଜୁ ହେୱାନ୍ ହେୱାରିଙ୍ଗ୍ ହେୱାର୍ ହୁଦାଙ୍ଗ୍ ରାଜିରାମାନି ର ବାଗ୍ ଆଜି ମାନି କିଦେଙ୍ଗ୍ ଇଚାକିଜି ମାଚାନ୍, ୱେଚ୍ଚି ଦାପ୍ରେ ହେୱାର୍ ସନୀୟ ମାଡ଼ିତାଙ୍ଗ୍ ହସିୱାତାର୍। ଈଶ୍ୱର ହେୱାରିଙ୍ଗ୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତି ଦେସ୍ ନିପଣ୍ ଅଦେଙ୍ଗ୍ ଆରମ୍ କିତାନ୍, ହେ ଦେସ୍ତିଙ୍ଗ୍ କିଣାନ ଦେସ୍ ଇଞ୍ଜି ୱେଚ୍ଚି ମାଚାର୍। ବାଦାଡ଼୍ନି ଦୁଆଁ ହେୱାର୍ ଆଗେ-ଆଗେ କିଣାନ ଦେସ୍ ନିପଣ୍ ହାଲ୍ଜି ମାଚାତ୍ ଆରେ ହେୱାର୍ ତା ପାଚେ-ପାଚେ ହାଲ୍ଜି ମାଚାର୍।
ଈଶ୍ୱର ଅବ୍ରାହାମ, ଇସାହାକ ଆରେ ଯାକୁବଙ୍ଗ୍ ପାର୍ମାଣ୍ କିଜି ମାଚାନ୍, ଯେ ହେୱାନ୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍କିତି ଦେସ୍ ହେୱାର୍ ଲାତ୍ରାନି ମାନାୟାରିଙ୍ଗ୍ ହିନାନ୍, ମାତର୍ ନଙ୍ଗୟ୍ ହେ ବାହାତାକେ କେତେକ୍ ମାନାୟ୍ ମାନ୍ଦା ବାହା କିଜି ମାଚାର୍। ହେୱାରିଙ୍ଗ୍ କିଣାନୀୟ ଇଞ୍ଜି ୱେଚ୍ଚି ମାଚାର୍। କିଣାନ୍ ଦେସ୍ତାକାର୍ ଈଶ୍ୱରତିଙ୍ଗ୍ ପୁଜା କିୱାଦାଙ୍ଗ୍ ମାଚାର୍ କି ତା ଆଦେସ୍ତିଙ୍ଗ୍ ମାନିକିୱାଦାଙ୍ଗ୍ ମାଚାର୍। ହେୱାର୍ ମିଚ୍ୱା ଦେବିତିଙ୍ଗ୍ ପୁଜାକିଜି ମାଚାର୍ ଆରେ କେତେକ୍ କରାପ୍ କାମାୟ୍ କିଜି ମାଚାର୍।
ଈଶ୍ୱର ଇସ୍ରାଏଲନି ମାନାୟାରିଙ୍ଗ୍ ୱେଚ୍ଚାନ୍, “ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍କିତି ଦେସ୍ ତାକେ ଏପେଙ୍ଗ୍ ୱିଜାକାଦେର୍ ହେବେ ମାନି କିଣାନୀୟ ମାନାୟାରିଙ୍ଗ୍ ପେଜାଟ୍। ହେୱାର୍ ହୁଦାଙ୍ଗ୍ ଶାନ୍ତି ରହ୍ମାଟ୍ କି ହେୱାରିଙ୍ଗ୍ ବିବା ଆମାଟ୍। ଏପେଙ୍ଗ୍ ହେ ୱିଜୁ ମୁର୍ତିକାଙ୍ଗ୍ ନଷ୍ଟ କିନାଦେର୍। ଏପେଙ୍ଗ୍ ଯଦି ନା ଆଦେସ୍ତିଙ୍ଗ୍ ମାନି କିଉଦେର୍, ନା ବାଦୁଲ୍ତ ଏପେଙ୍ଗ୍ ହେୱାର୍ ମୁର୍ତିକାଙ୍ଗ୍ ପୁଜା କିଉଦେର୍।”
ଇସ୍ରାଏଲନି ମାନାୟାର୍ ଏଚେପାଦ୍ନା କିଣାନ ଦେସ୍ନି ହାନ୍ଦିତାକେ ଇକାତାର୍, ହେପାଦ୍ନା ମୋଶା ୱିଜୁ ଜାତିତାଙ୍ଗ୍ ରକାର୍-ରକାର୍ କିଜି ବାରଜାଣ୍ ଆଣ୍ଡ୍ରାହିମ୍ଣାକାଙ୍ଗ୍ ବାଚି କିତାନ୍। ହେୱାନ୍ ମାନାୟାରିଙ୍ଗ୍ ହେ ଦେସ୍ତାକେ ହାଲ୍ଜି ହେଦାଙ୍ଗ୍ ହୁଡ଼୍ଦେଙ୍ଗ୍ ଇନେସ୍ ମାନାତ୍ ହେଦାଙ୍ଗ୍ ଡ଼ୁଗ୍ଜି ହୁଡ଼୍ଜି ୱାନି କାଜିଙ୍ଗ୍ ଆଦେସ୍ ହିଜି ମାଚାନ୍। କିଣାନ ଦେସ୍ତାକାର୍ ଶାକ୍ତି କାଟାକାର୍ କି ଦୁର୍ବଲ୍ କାଟାକାର୍ ମାନାର୍ ହେଦାଙ୍ଗ୍ ପା ବୁଜାଆଜି ୱାଦେଙ୍ଗ୍ ହେୱାରିଙ୍ଗ୍ ୱେଚ୍ଚି ମାଚାନ୍।
ହେ ବାରଜାଣ୍ କିଣାନ ଦେସ୍ ୱିଜୁ ନିପଣ୍ ଚାଲିସ୍ ଦିନ୍ ବୁଲାଆଜି ଲେଉଟାଆଜି ୱାତାର୍। ହେୱାର୍ ମାନାୟାରିଙ୍ଗ୍ ୱେଚ୍ଚାର୍, “ହେ ଦେସ୍ତି ଜମି ବେସି ଗାତ୍ ଆରେ ହେବେ ବେସି ପାଡ଼୍ ଆହ୍ନାତ୍! ମାତର୍ ହେ ବୁଜାଆତି ମାନାୟାର୍ ବିତ୍ରେତାଙ୍ଗ୍ ଦଶ୍ଜାଣ୍ ୱେଚ୍ଚାର୍, ହେବେନି ଦେସ୍ ବେସି ବାଡ଼୍କାସ୍ ଆରେ ହେବେନି ମାନାୟାର୍ ବେସି ଶାକ୍ତି କାଟାକାର୍! ଯଦି ଆସେଙ୍ଗ୍ ହେୱାରିଙ୍ଗ୍ ଜୁଜ୍ କିନାସ୍, ହେୱାର୍ ହାତ୍ପା ମାଙ୍ଗେଙ୍ଗ୍ ଆରାୟ୍କିଜି ମାର୍ନେ ଅସ୍ତାନାର୍।”
ହେଦାପ୍ରେ ଜେକିନି ରିକାର୍ ଡ଼ୁଗ୍ଜି ଚର୍ କିନାକାନ୍ କାଲେବ ଆରେ ଯିହୋଶୁୟ ୱେଚ୍ଚାନ୍, “ଇଦାଙ୍ଗ୍ ସତ୍ ଯେ କିଣାନ ଦେସ୍ନି ମାନାୟାର୍ ଡେଙ୍ଗା ଆଜି ପାନ୍ତାକାର୍ ଆରେ ଶାକ୍ତି କାଟାକାର୍, ମାତର୍ ଆସେଙ୍ଗ୍ ହେୱାରିଙ୍ଗ୍ ହାତ୍ପା ଆରାୟ୍ କିନାସ୍! ଈଶ୍ୱର ମା ନିପଣ୍ ଆଜି ଜୁଜ୍ କିନାନ୍।”
ମାତର୍ ମାନାୟାର୍ କାଲେବ ଆରେ ଯିହୋଶୁୟ କାତା ମାନି କିୱାତାର୍। ହେୱାର୍ ମୋଶା ଆରେ ହାରୋଣଙ୍ଗ୍ ରିସା ଆଜି ୱେଚ୍ଚାର୍, “ଏନେଙ୍ଗ୍ ଇନାକିଦେଙ୍ଗ୍ ମାଙ୍ଗେଙ୍ଗ୍ ଇଲେଗ୍ଦି ର ବୟଙ୍କାର୍ ବାହାତାକେ ତାସିୱାତ୍ତାୟ୍ନା? ଆପେଙ୍ଗ୍ ଜୁଜ୍କିନି ବାହାତାକେ ହାଃନି ବାଦୁଲ୍ ମିଶର ଦେସ୍ତାକେ ମାନାକା ଟିକ୍ ମାଚାତ୍ ଆରେ ମା କଗ୍ଲେକ୍ ଆରେ ହିମ୍ଣା ୱାକ୍ଡ଼ାର୍ ଦାସ୍ ଲେକେ ମାଚାର୍ମା।” ମାନାୟାର୍ ହେୱାର୍ କାଜିଙ୍ଗ୍ ଜେକନିକାନ୍ ରକାନ୍ ନେତା ବାଚିକିଦେଙ୍ଗ୍ ଇଚା କିତାର୍ ଇନେର୍କି ହେୱାରିଙ୍ଗ୍ ଆରେରଗ ମିଶର ଦେସ୍ତ ଅସାହାନାର୍।
ଈଶ୍ୱର ବେସି ରିସା ଆତାନ୍ ଆରେ ମାନାୟାର୍ ରୁଣ୍ଡାଆନି ପୁଟ୍ କୁଡ଼ିଆତାକେ ୱାତାର୍। ଈଶ୍ୱର ୱେଚ୍ଚାନ୍, “ଏପେଙ୍ଗ୍ ନା ବିରଦ୍ତାକେ ବିରଦ୍ କିନାଦେରା, ହେଦାଙ୍ଗ୍ କାଜିଙ୍ଗ୍ ୱିଜୁ ମାନାୟାର୍ ଟାଙ୍ଗ୍ରା ବାହାତାକେ ହାଜିବାଣା ଆତି ଲେକେ ବୁଲାଆଦେଙ୍ଗ୍ ଆନାତ୍। ଯିହୋଶୁୟ ଆରେ କାଲେବଙ୍ଗ୍ ପିସ୍ତି ୱିଜୁ କୁଡ଼େ ବାର୍ହୁ କି ଜପିଣି ୱିଜାକାଦେର୍ ହେବେ ହାଃନାର୍ ଆରେ ହେୱାର୍ ପାର୍ମାଣ୍ କିତି ଦେସ୍ତାକେ ଇନାୱାଡ଼ାଙ୍ଗ୍ ପା ହଣ୍ଡେଙ୍ଗ୍ ଆଡୁର୍।”
ମାନାୟାର୍ ଏଚେପାଦ୍ନା ଇଦାଙ୍ଗ୍ ୱେଚାର୍, ହେପାଦ୍ନା ହେୱାର୍ ଯେ ପାପ୍ କିତାର୍ନା ହେଦାଙ୍ଗ୍ କାଜିଙ୍ଗ୍ ଦୁକ୍ କିତାର୍। ହେୱାର୍ ତା କାଣ୍ଡାଙ୍ଗ୍ ଅଜି କିଣାନ ଦେସ୍ତ ମାନି ମାନାୟାରିଙ୍ଗ୍ ଜୁଜ୍ କିଦେଙ୍ଗ୍ ହତାର୍। ମୋଶା ହେୱାରିଙ୍ଗ୍ ହାନି କାଜିଙ୍ଗ୍ ମୁନା କିତାନ୍ ଇନେସ୍କି ଈଶ୍ୱର ହେୱାର୍ ହୁଦାଙ୍ଗ୍ ହିଲ୍ୱାତାନ୍, ମାତର୍ ହେୱାର୍ ତା କାତାତିଙ୍ଗ୍ ୱେନ୍ୱାତାର୍।
ଈଶ୍ୱର ହେ ଜୁଜ୍କିନି ବାହାତାକେ ହେୱାର୍ ହୁଦାଙ୍ଗ୍ ହାଲ୍ୱାତାନ୍, ଲାଗିଙ୍ଗ୍ ହେୱାର୍ ଆରାଆତାର୍ ଆରେ ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ହାଃତାର୍। ତାପାଚେ ଇସ୍ରାଏଲନି ମାନାୟାର୍ କିଣାନ ଦେସ୍ତାଙ୍ଗ୍ ମୁମ୍ ମଡ଼ି କିଜି ଟାଙ୍ଗ୍ରା ବାହାତାକେ ଚାଲିଶ୍ ବାର୍ହୁ ପାତେକ୍ ବୁଲା ଆତାର୍।
ଇସ୍ରାଏଲନି ମାନାୟାର୍ ଟାଙ୍ଗ୍ରା ବାହାତାକେ ବୁଲା ଆଜି ଚାଲିଶ୍ ବାର୍ହୁ ସମୟ୍ତ ଈଶ୍ୱର ହେୱାରିଙ୍ଗ୍ ୱିଜୁ ଦର୍କାର୍ ଆନି ବିଷୟ ଜଗାୟ୍ କିତାନ୍। ହେୱାନ୍ ମାନ୍ନା ତର୍ଦି ଜଣାଶୁଣା ସରଗ୍ନି କାଦି ହିତାନ୍। ଆରେ ଈଶ୍ୱର ହେୱାର୍ ବାହାକିତି ବାହାତାକେ ମାନ୍ଦା-ମାନ୍ଦାକିଜି ଲାୱା ପଟିଙ୍ଗ୍ ପକ୍ତାନ୍ ଇନେସ୍କି ହେୱାର୍ ତିନି କାଜିଙ୍ଗ୍ ଜେଇ ଗାଟା ଆନାର୍। ଇ ୱିଜୁ ସମୟତ ଈଶ୍ୱର ହେୱାର୍ ଉସ୍ପିନି ହେନ୍ଦ୍ରା ଆରେ କାଲ୍ପାନାଙ୍ଗ୍ ଜିରା ଆଦେଙ୍ଗ୍ ହିୱାତାନ୍।
ଈଶ୍ୱର ଇଲେକେ ଚାନିଆ ଆତି ଲେକେ କାଲ୍କୁତାଙ୍ଗ୍ ହେୱାରିଙ୍ଗ୍ ଏଜୁଙ୍ଗ୍ ହିତାନ୍। ମାତର୍ ଇ ୱିଜୁ କାମାୟ୍ ୱିଜୁ, ଇସ୍ରାଏଲନି ମାନାୟାର୍ ଈଶ୍ୱର ଆରେ ମୋଶା ବିରଦ୍ତାକେ ୱେଚ୍ଚାର୍, “ଗୁର୍-ଗୁର୍ ଆତାର୍। ଇଲେକେ ୱିଜୁ ଈଶ୍ୱର ଅବ୍ରାହାମ, ଇସାହାକ ଆରେ ଯାକୁବ ହୁଦାଙ୍ଗ୍ ପାର୍ମାଣ୍ କାଜିଙ୍ଗ୍ ବିସ୍ବସ୍ତ ମାଚାର୍।”
ଜେକନି ର ସମୟତ, ମାନାୟାର୍ ଏଚେପାଦ୍ନା ଏଜୁଙ୍ଗ୍ ଗାଟାଆୱାତାର୍, ଈଶ୍ୱର ମୋଶାଙ୍ଗ୍ ୱେଚ୍ଚାନ୍, ହେ କାଲ୍ଦିଙ୍ଗ୍ ବେଣ୍ କିୟା ଆରେ ହେବେତାଙ୍ଗ୍ ଏଜୁଙ୍ଗ୍ ହତ୍ନିକ୍। ମାତର୍ ମୋଶା କାଲ୍ଦିଙ୍ଗ୍ ବେଣ୍ କିତି ଦାପ୍ରେ ରିହା ବାଡେଗେ ଲାହାଙ୍ଗ୍ ଇଡ଼୍ତି କାଜିଙ୍ଗ୍ ୱିଜାକାର୍ ମୁମ୍ଦ ଈଶ୍ୱରତିଙ୍ଗ୍ ଅସନ୍ମାନ୍ କିତାର୍। ୱିଜାକାର୍ ଇନେସ୍ ଏଜୁଙ୍ଗ୍ ଉଣାର୍ ହେଦାଙ୍ଗ୍ କାଜିଙ୍ଗ୍ ଏଜୁଙ୍ଗ୍ ହସି ୱାତିକ୍, ମାତର୍ ଈଶ୍ୱର ମୋଶାଙ୍ଗ୍ ରିସା ଆତାନ୍ ଆରେ ହେୱାନ୍ ୱେଚ୍ଚାନ୍, ଏପେଙ୍ଗ୍ ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍କିତି ଦେସ୍ତିଙ୍ଗ୍ ହାଞ୍ଜେଙ୍ଗ୍ ଆଡୁଦେର୍।
ଇସ୍ରାଏଲନି ମାନାୟାର୍ ଚାଲିଶ୍ ବାର୍ହୁ ଟାଙ୍ଗ୍ରା ବାହାତାକେ ବୁଲାଆତି ପାଚେ, ଈଶ୍ୱର ବିରଦ୍ତାକେ ଏଚେଜାଣ୍ ବିରଦ୍ କିଜି ମାଚାର୍, ୱିଜାକାର୍ ହାଃତାର୍। ତାପାଚେ ଈଶ୍ୱର ଆରେରଗ ପାର୍ମାଣ୍ କିତି ଦେସ୍ନି ହାନ୍ଦିତାକେ ଅସିହାଲ୍ଜି ମାଚାନ୍। ମୋଶା ନଙ୍ଗୟ୍ ବେସି ବୁଡ଼୍ହି ଆଜି ମାଚାନ୍, ଲାଗିଙ୍ଗ୍ ମାନାୟାରିଙ୍ଗ୍ ହାଜି ଚଚ୍ନି କାଜିଙ୍ଗ୍ ହେୱାରିଙ୍ଗ୍ ସାଇଜ କିନି କାଜିଙ୍ଗ୍ ହେୱାନ୍ ଯିହୋଶୁୟଙ୍ଗ୍ ବାଚି କିତାନ୍। ଈଶ୍ୱର ମୋଶାଙ୍ଗ୍ ଆରେ ର ପାର୍ମାଣ୍ କିତାନ୍ ଯେ, ହେୱାନ୍ ମୋଶା ଲେକେ ଆରେ ରକାନ୍ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ତିଙ୍ଗ୍ ପକ୍ତାନାନ୍।
ତାପାଚେ ଈଶ୍ୱର ମୋଶାଙ୍ଗ୍ ର ମାଡ଼ିନି ଟିପ୍ତାକେ ଦୁମ୍ଦେଙ୍ଗ୍ ୱେଚ୍ଚାନ୍, ଇନେସ୍କି ହେୱାନ୍ ହେବେତାଙ୍ଗ୍ ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍କିତି ଦେସ୍ ହୁଡ଼୍ଦେଙ୍ଗ୍ ଆଡ୍ନାନ୍। ମୋଶା ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍କିତି ଦେସ୍ ହୁଡ଼୍ଦେଙ୍ଗ୍ ଆଡ଼୍ଜି ମାଚାନ୍ ମାତର୍ ହେୱାନ୍ ହେବେ ହାଞ୍ଜେଙ୍ଗ୍ ଈଶ୍ୱର ଆଦେସ୍ ହିୱାତାନ୍। ତାପାଚେ ମୋଶା ହାଃତାନ୍, ଆରେ ଇସ୍ରାଏଲନି ମାନାୟାର୍ ତିରିଶ୍ ଦିନ୍ ତା କାଜିଙ୍ଗ୍ ଆଡ଼୍ବାତାର୍। ଯିହୋଶୁୟ ହେୱାର୍ ପୁନି ନେତା ଆତାନ୍। ଯିହୋଶୁୟ ରକାନ୍ ହାର୍ଦି ନେତା ମାଚାନ୍ ଇନେସ୍କି ହେୱାନ୍ ଈଶ୍ୱରତାକେ ଆହା ଇଡ଼୍ଜି ମାଚାନ୍ ଆରେ ତା ଆଦେସ୍ତିଙ୍ଗ୍ ମାନିକିଜି ମାଚାନ୍।
ବାଇବଲ୍ନି ର କାତା: ଯାତ୍ରାବହି ୧୬- ୧୭; ଗଣନା ବହି ୧୦- ୧୪; ୨୦; ୨୭; ଦ୍ୱିତୀୟ ବିବରଣ ୩୪
Free to use, adapt, and share under an open license (CC BY-SA 4.0).