16. ୧୬. ଉଦାର୍ କିଦ୍ନାକାର୍
ଯିହୋଶୁୟ ହାଃତି ପାଚେ, ଇସ୍ରାଏଲନି ମାନାୟାର୍ ଈଶ୍ୱର କାତାତିଙ୍ଗ୍ ମାନି କିୱାତାର୍ ଆରେ ହେୱାର୍ ବାଚାଆତି କିଣାନ ଦେସ୍ତାକାରିଙ୍ଗ୍ ହପ୍ୱାତାର୍ କି ଈଶ୍ୱର ସାସ୍ତର୍ ମାନି କିୱାତାର୍। ଇସ୍ରାଏଲନି ମାନାୟାର୍ ସତ୍ ଈଶ୍ୱର ଯିହୋବାଙ୍ଗ୍ ହେବା କିତି ପାଚେ କିଣାନ ଦେସ୍ତି ଦେବିକାଙ୍ଗ୍ ହେବା କିଦେଙ୍ଗ୍ ଲାଗାତାର୍। ଇସ୍ରାଏଲନି ମାନାୟାରିଙ୍ଗ୍ ଇମ୍ଣି ରାଜା ପା ହିଲ୍ୱାତାର୍, ଲାଗିଙ୍ଗ୍ ୱିଜାକାର୍ ତା କାଣ୍କୁକାଙ୍ଗ୍ ଇନାକା ହାର୍ ଚନ୍ଞ୍ଚ୍ଚାତ୍ ହେୱାର୍ ହେଦାଙ୍ଗ୍ କିତାର୍।
ଇନେସ୍କି ଇସ୍ରାଏଲନି ମାନାୟାର୍ ଈଶ୍ୱର କାତାତିଙ୍ଗ୍ ମାନି କିୱାଦାଙ୍ଗ୍ ମାଚାର୍, ଲାଗିଙ୍ଗ୍ ଈଶ୍ୱର ଶାତ୍ରୁରିଙ୍ଗ୍ ଆଦେସ୍ ହିତି କାଜିଙ୍ଗ୍ ହେୱାରିଙ୍ଗ୍ ଆରାୟ୍ କିଜି ୱିଜାକାରିଙ୍ଗ୍ ଦଣ୍ଡ୍ ହିତାନ୍। ଇ ଶାତ୍ରୁର୍ ଇସ୍ରାଏଲନି ମାନାୟାରିଙ୍ଗ୍ କେତେକ୍ ଜିନିଷ୍ ୱିଜୁ ଚର୍ କିତାର୍, ହେୱାର୍ ଦନ୍ ସମ୍ଫତି ନଷ୍ଟ କିତାର୍, ଆରେ ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ତିଙ୍ଗ୍ ମାର୍ନେ ଅସ୍ତାର୍। କେତେକ୍ ବାର୍ହୁ ଈଶ୍ୱର କାତା ମାନି କିୱାଦାଙ୍ଗ୍ ଆରେ ହେୱାର୍ ଶାତ୍ରୁର୍ତାଙ୍ଗ୍ ଦୁଃକ୍ କଷ୍ଟ ଆଜି ଇସ୍ରାଏଲନି ମାନାୟାର୍ ବାବିକିଜି ଏତ୍ କିତାର୍ ଆରେ ହେୱାରିଙ୍ଗ୍ ଉଦାର୍ କିନି କାଜିଙ୍ଗ୍ ଈଶ୍ୱରତାକେ ପାର୍ତାନା କିତାର୍।
ତାପାଚେ ଈଶ୍ୱର ହେୱାରିଙ୍ଗ୍ ରକାନ୍ ଉଦାର୍ କିନାକାନିଙ୍ଗ୍ ଜଗାଇ କିତାନ୍ ଇନେର୍ ହେୱାରିଙ୍ଗ୍ ହେୱାର୍ ଶାତ୍ରୁର୍ତାଙ୍ଗ୍ ରକ୍ଷା କିତାନ୍ ଆରେ ଦେସ୍ତାକେ ଶାନ୍ତି ତାସିୱାତାନ୍। ମାତର୍ ତାପାଚେ ମାନାୟାର୍ ଈଶ୍ୱରତିଙ୍ଗ୍ ବାଣା ଆତାର୍ ଆରେ ଆରେରଗ ମୁର୍ତି ପୁଜା କିଦେଙ୍ଗ୍ ଆରମ୍ କିତାର୍। ଲାଗିଙ୍ଗ୍ ଈଶ୍ୱର ଲାଗାୟ୍ନି ର ଶାତ୍ରୁ ମିଦିୟୋନନି ମାନାୟାର୍ କାଜିଙ୍ଗ୍ ହେୱାରିଙ୍ଗ୍ ଆରାୟ୍ କିଦେଙ୍ଗ୍ ହିତାନ୍।
ମିଦିୟୋନନି ମାନାୟାର୍ ସାତ୍ ବାର୍ହୁ ପାତେକ୍ ଇସ୍ରାଏଲନି ମାନାୟାର୍ ତାସ୍ ଅତାର୍। ଇସ୍ରାଏଲନି ମାନାୟାର୍ ବେସି ପାଣ୍ଡ୍ରା ଆତାର୍, ମିଦିୟୋନନି ମାନାୟାର୍ ଇନେସ୍ ହେୱାରିଙ୍ଗ୍ ଡେକ୍ତେଙ୍ଗ୍ ଆଡୁର୍, ହେଦାଙ୍ଗ୍ କାଜିଙ୍ଗ୍ ହେୱାର୍ ପାରାକାଙ୍ଗ୍ ଡ଼ୁକ୍ତାର୍। ତାପାଚେ ହେୱାରିଙ୍ଗ୍ ଉଦାର୍ କିନି କାଜିଙ୍ଗ୍ ହେୱାର୍ ଈଶ୍ୱରତିଙ୍ଗ୍ କୁକ୍ତାର୍।
ଦିନେକ୍ ଗିଦିୟୋନ ତର୍ଦାକାନ୍ ରକାନ୍ ଇସ୍ରାଏଲ ଦେସ୍ତ ଡ଼ୁଗ୍ଜି ତାସ୍ ହିସ୍ଦି ମାଚାନ୍ ଇନେସ୍କି ମିଦିୟୋନନି ମାନାୟାର୍ ହେଦାଙ୍ଗ୍ ଅଉର୍। ଈଶ୍ୱର ଦୁତ୍ ଗିଦିୟୋନ ଲାଗାୟ୍ ୱାଜି ୱେଚ୍ଚାତ୍, “ଶାକ୍ତି କାଟାକାୟ୍, ଈଶ୍ୱର ନି ହୁଦାଙ୍ଗ୍ ମାନାନ୍। ହାଲା ଆରେ ଇସ୍ରାଏଲ ଦେସ୍ତିଙ୍ଗ୍ ମିଦିୟୋନନି ମାନାୟାର୍ତାଙ୍ଗ୍ ରକ୍ଷା କିୟା।”
ର ମୁର୍ତିତିଙ୍ଗ୍ ପୁଜା କିଦେଙ୍ଗ୍ ରସ୍ତି ବେଦି ଗିଦିୟୋନନି ତାଞ୍ଜ୍ତାକେ ମାଚାତ୍। ହେ ପୁଜାକିନି ବେଦି ଗନ୍ଦା-ଗନ୍ଦା କିଦେଙ୍ଗ୍ ଈଶ୍ୱର ଗିଦିୟୋନତିଙ୍ଗ୍ ୱେଚ୍ଚାନ୍। ମାତର୍ ଗିଦିୟୋନ ମାନାୟାରିଙ୍ଗ୍ ପାଣ୍ଡ୍ରା ଆତାନ୍, ଲାଗିଙ୍ଗ୍ ହେ ନାଣା ଆୱାଦାଙ୍ଗ୍ କାସି ମାଚାନ୍। ଲାଗିଙ୍ଗ୍ ହେୱାନ୍ ହେ ପୁଜାକିନି ବେଦିତିଙ୍ଗ୍ ଗନ୍ଦା-ଗନ୍ଦା କିଜି ଡିକ୍ତାନ୍ ଆରେ ଗୁଣ୍ଡା କିତାନ୍। ମୁର୍ତି ଲାଗାୟ୍ ଇମ୍ଣି ପୁଜାକିନି ବେଦି ମାଚାତ୍ ହେ ପୁଜାକିନି ବେଦି ଲାଗାୟ୍ ହେ ଈଶ୍ୱର କାଜିଙ୍ଗ୍ ର ପୁନି ପୁଜାକିନି ବେଦି କିତାର୍ ଆରେ ଈଶ୍ୱର କାଜିଙ୍ଗ୍ ବଲି ପୁଜା କିତାନ୍।
ଆର୍କାତ୍ ନାଞ୍ଜିଙ୍ଗ୍ ନାଣାଙ୍ଗେ ମାନାୟାର୍ ହୁଡ଼୍ତାର୍ ଯେ ଇନେର୍ ରକାର୍ ହେ ପୁଜାକିନି ବେଦି ଡ୍ରିକ୍ର୍ ଆରେ ଗନ୍ଦା-ଗନ୍ଦାକିଜି ନଷ୍ଟ କିତାର୍ନା, ଆରେ ହେୱାର୍ ବେସି ରିସା ଆଜି ମାଚାର୍। ହେୱାର୍ ଗିଦିୟୋନ ଇଞ୍ଜ ହେୱାନିଙ୍ଗ୍ ମାର୍ନେ ଅହ୍ନି କାଜିଙ୍ଗ୍ ହାଚାର୍, ମାତର୍ ଗିଦିୟୋନ ତାଞ୍ଜ୍ବା ୱେଚ୍ଚାନ୍, ଏପେଙ୍ଗ୍ ଇନାକିଦେଙ୍ଗ୍ ମି ଦେବିତିଙ୍ଗ୍ ସାଇଜ କିଦେଙ୍ଗ୍ ଉପାୟ୍ କିଦେଙ୍ଗ୍ ଇଚା କିନାରା? ଯଦି ହେୱାନ୍ ରକାନ୍ ଈଶ୍ୱର, ଲାଗିଙ୍ଗ୍ ହେୱାନ୍ ଜାର୍ତିଙ୍ଗ୍ ରକ୍ଷା କିୟାଆୟେନ୍! ହେୱାନ୍ ଇ ବେଣ୍ ୱେଚ୍ଚିଲେଙ୍ଗ୍ ମାନାୟାର୍ ଗିଦିୟୋନତିଙ୍ଗ୍ ମାର୍ନେ ଅହ୍ୱାତାର୍।
ତାପାଚେ ମିଦିୟୋନନି ମାନାୟାର୍ ଇସ୍ରାଏଲନି ମାନାୟାର୍ତାଙ୍ଗ୍ ଚର୍ କିନି କାଜିଙ୍ଗ୍ ଆରେରଗ ୱାତାର୍। ହେୱାର୍ ଏଚେଜାଣ୍ ମାଚାର୍ ଯେ ହେୱାରିଙ୍ଗ୍ ଗାଣ୍ କିଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। ହେୱାର୍ ହୁଦାଙ୍ଗ୍ ଜୁଜ୍ କିନି କାଜିଙ୍ଗ୍ ଗିଦିୟୋନ ଇସ୍ରାଏଲନି ମାନାୟାରିଙ୍ଗ୍ ରବେ ରୁଣ୍ଡାଇ କିତାନ୍। ଈଶ୍ୱର ଯେ ଇସ୍ରାଏଲନି ମାନାୟାରିଙ୍ଗ୍ ଉଦାର୍ କିଦେଙ୍ଗ୍ ହେୱାନିଙ୍ଗ୍ ବ୍ୟବହାର୍ କିନାନ୍, ଇ ବିଷୟରେ ହାତ୍ପା ଆନି କାଜିଙ୍ଗ୍ ଗିଦିୟୋନ ଈଶ୍ୱରତାଙ୍ଗ୍ ରିଣ୍ଡାଙ୍ଗ୍ ଚିନାଙ୍ଗ୍ ଏନ୍ତାନ୍।
ପାର୍ତୁମ୍ ଚିନା ଲେକେ ଗିଦିୟୋନ ମେଦ୍ନିତାକେ ର ମେଣ୍ଢାନି ତଲ୍ ପାସ୍ତି ଆରେ ଈଶ୍ୱରତିଙ୍ଗ୍ ପାଙ୍ଗ୍ନିହିଙ୍ଗ୍ ପିନି ମେଦ୍ନି ଜପି ରାତ୍ୱାଦାଙ୍ଗ୍ ହେ ତଲ୍ ଜପି ରାତ୍ନି କାଜିଙ୍ଗ୍ ୱେଚ୍ଚାନ୍। ଈଶ୍ୱର ହେଦାଙ୍ଗ୍ କିତାନ୍। ଆର୍କାତ୍ ନାଞ୍ଜ୍ ନାଣା, ହେୱାନ୍ ଈଶ୍ୱରତିଙ୍ଗ୍ ୱେଚ୍ଚାନ୍ ଆପ୍କା ମେଦ୍ନି ଅଲ୍ ମାନେତ୍ ମାତର୍ ତଲ୍ ୱାଚ୍ଚାକା ମାନେତ୍। ଈଶ୍ୱର ହେଦାଙ୍ଗ୍ ପା କିତାନ୍। ଇ ରିଣ୍ଡାଙ୍ଗ୍ ଚିନାଙ୍ଗ୍ ଗିଦିୟୋନତିଙ୍ଗ୍ ହାତ୍ପା କିୟିକିତାନ୍ ଯେ ଇସ୍ରାଏଲନି ମାନାୟାରିଙ୍ଗ୍ ମିଦିୟୋନନି ମାନାୟାର୍ତାଙ୍ଗ୍ ଉଦାର୍ କିନି କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ବ୍ୟବହାର୍ କିନାନ୍।
୩୨,୦୦୦ ଇସ୍ରାଏଲନି ସେନାର୍ ଗିଦିୟୋନ ଲାଗାୟ୍ ୱାତାର୍, ମାତର୍ ଈଶ୍ୱର ୱେଚ୍ଚାନ୍ ଯେ ଇଦାଙ୍ଗ୍ ବେସି ଆଦିକ୍। ଲାଗିଙ୍ଗ୍ ଇମ୍ଣାକାର୍ ଜୁଜ୍ କିଦେଙ୍ଗ୍ ପାଣ୍ଡ୍ରାଆଜି ମାଚାର୍ ଇଲେକେ ୨୨,୦୦୦ ଜାଣ୍ତିଙ୍ଗ୍ ହେୱାନ୍ ଇଞ୍ଜ ପକ୍ତାନ୍। ଈଶ୍ୱର ଗିଦିୟୋନତିଙ୍ଗ୍ ୱେଚ୍ଚାନ୍ ଯେ ଇ ସଂଖ୍ୟା ପା ଆଦିକ୍ ବେସି। ଲାଗିଙ୍ଗ୍ ୩୦୦ଜାଣ୍ତିଙ୍ଗ୍ ପିସ୍ତି ଜେକନି ୱିଜାକାରିଙ୍ଗ୍ ଇଞ୍ଜ ପକ୍ତାନ୍।
ହେ ନାଣା ଈଶ୍ୱର ଗିଦିୟୋନତିଙ୍ଗ୍ ୱେଚ୍ଚାନ୍, “ମିଦିୟୋନନି ଚାଉଣିତାକେ ହାଲାଟ୍ ଆରେ ଏଚେପାଦ୍ନା ହେୱାର୍ ବେଣ୍ କିନାକା ଏପେଙ୍ଗ୍ ୱେନାଦେର୍, ଏପେଙ୍ଗ୍ ଆରେ ପାଣ୍ଡ୍ରା ଆଉଦେର୍।” ଲାଗିଙ୍ଗ୍ ହେ ନାଣା ଗିଦିୟୋନ ହେ ଚାଉଣିତାକେ ହାଚାନ୍ ଆରେ ରକାନ୍ ମିଦିୟୋନନି ମାନାୟାର୍ ସେନା ହୁଡ଼୍ଜି ମାଚି କେଚ୍କଣ୍ ବିଷୟରେ ତା ସାଙ୍ଗହିଙ୍ଗ୍ ୱେଚ୍ନାକା ୱେଚାନ୍।ହେ ମାନାୟ୍ନି ସାଙ୍ଗହି ୱେଚ୍ଚାନ୍, “ଇ କେଚ୍କଣ୍ନି ଅର୍ତ ଆନାତା ଗିଦିୟୋନନି ସେନା ମିଦିୟୋନନି ସେନାରିଙ୍ଗ୍ ଆରାୟ୍ କିନାନ୍!” ଗିଦିୟୋନ ଏଚେପାଦ୍ନା ଇଦାଙ୍ଗ୍ ୱେଚାନ୍, ହେୱାନ୍ ଈଶ୍ୱରତିଙ୍ଗ୍ ହେବା କିତାନ୍।
ହେପାଦ୍ନା ଗିଦିୟୋନ ତା ସେନାର୍ ଲାଗାୟ୍ ଲେଉଟାଆଜି ହାଲ୍ଜି ୱିଜାକାରିଙ୍ଗ୍ ର ମରି, ର ଚିକ୍ଲା ଟାଙ୍ଗା ଆରେ ର ନାଣି ହଲା ହିତାନ୍। ମିଦିୟୋନନି ସେନାର୍ ଇମେତାକେ ହୁନ୍ଞ୍ଜି ମାଚାର୍ ହେୱାର୍ ହେ ଚାଉଣିନି ଚାରିବେଣ୍ତାଙ୍ଗ୍ ଆତାର୍। ଗିଦିୟୋନତିଙ୍ଗ୍ ୩୦୦ଜାଣ୍ ସେନା ଇମ୍ଣି ଚିକ୍ଲା ଟାଙ୍ଗାକାଙ୍ଗ୍ ହେୱାର୍ ନାଣି ହଲା ୱିଜୁ ଇଡ଼୍ତାର୍ ଇନେସ୍କି ମିଦିୟୋନନି ମାନାୟାର୍ ହେ ନାଣୀ ହଲାନି ଅଜଡ଼୍ତିଙ୍ଗ୍ ହୁଡ଼୍ଦେଙ୍ଗ୍ ଆଡୁର୍।
ତାପାଚେ ଗିଦିୟୋନନି ୱିଜାକାର୍ ସେନାର୍ ରଞ୍ଜେମାଡ୍ ହେୱାର୍ ତା ଚିକ୍ଲା ଟାଙ୍ଗାଙ୍ଗ୍ ପାଡ଼୍ତାର୍, ହେଦାଙ୍ଗ୍ କାଜିଙ୍ଗ୍ ଟାଙ୍ଗାତାକେ ୱିଜୁ ନାଣି ହଲାନି ନାଣି ହେଦାପ୍ରେ ଚଞ୍ଜି ଆତାତ୍। ହେୱାର୍ ଆସ୍ତିମାଚି ମରିଙ୍ଗ୍ ତୁବ୍ଜି ଗାଜା କାଟ୍ତାଙ୍ଗ୍ ୱେଚ୍ଚାର୍, “ଈଶ୍ୱର ଆରେ ଗିଦିୟୋନ କାଜିଙ୍ଗ୍ ର କାଣ୍ଡା ଲେକେ।”
ଈଶ୍ୱର ମିଦିୟୋନନି ମାନାୟାରିଙ୍ଗ୍ ଦାନ୍ଦାତାକେ ପକାଇ କିତାନ୍, ହେଦାଙ୍ଗ୍ କାଜିଙ୍ଗ୍ ହେୱାର୍ ଜାର୍-ଜାର୍ ଟ୍ରାପ୍କା ଆଜି ଜାର୍-ଜାର୍ତିଙ୍ଗ୍ ମାର୍ନେ ଅସ୍ପା ଆତାର୍। ସାଙ୍ଗେ-ସାଙ୍ଗେ ବାଚାଆତି ଇସ୍ରାଏଲନି ମାନାୟାରିଙ୍ଗ୍ ହେୱାର୍ ଇଞ୍ଜାଙ୍ଗ୍ କୁକିକିଜି ମିଦିୟୋନନି ମାନାୟାରିଙ୍ଗ୍ ପେସ୍ଦେଙ୍ଗ୍ ସାଇଜ କିନି କାଜିଙ୍ଗ୍ ୱେଚ୍ଚାର୍। ହେୱାର୍ ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ତିଙ୍ଗ୍ ମାର୍ନେ ଅସ୍ତାର୍ ଆରେ ବାଚାଆତି ବେସିହେନିତିଙ୍ଗ୍ ଇସ୍ରାଏଲ ଦେସ୍ ବାର୍ତ ପେସ୍ଦି ଅତାର୍। ହେ ଦିନ୍ ୧,୨୦,୦୦୦ ମିଦିୟୋନନି ମାନାୟାର୍ ହାଃତାର୍। ଈଶ୍ୱର ଇସ୍ରାଏଲନି ମାନାୟାରିଙ୍ଗ୍ ଉଦାର୍ କିତାନ୍।
ମାନାୟାର୍ ଗିଦିୟୋନତିଙ୍ଗ୍ ହେୱାର୍ ରାଜା କିଦେଙ୍ଗ୍ ଇଚା କିତାର୍। ମାନାୟାର୍ ହେଲେକେ କିଦେଙ୍ଗ୍ ଗିଦିୟୋନ ରାଜି ଆୱାତାନ୍, ମାତର୍ ମିଦିୟୋନନି ମାନାୟାର୍ତାଙ୍ଗ୍ ହେୱାର୍ ଇମ୍ଣି ୱିଜୁ ହନା ୱାତୁସିଙ୍ଗ୍ ଅତାର୍, ହେୱାଙ୍ଗ୍ ଏନ୍ତାର୍। ମାନାୟାର୍ ଗିଦିୟୋନତିଙ୍ଗ୍ ଆଦିକ୍ କିଜି ହନା ହିତାର୍।
ତାପାଚେ ଈଶ୍ୱର ହେବାକିନି ମୁଡ଼୍ଦି ପୁଜାରି ଉସ୍ପିନି ଆଙ୍ଗି ଲେକେ ର ଅଲ୍ଗା ପର୍କାର୍ ହେନ୍ଦ୍ରା ଗିଦିୟୋନ ହେ ହନା ୱାତୁସ୍ ବ୍ୟବହାର୍ କିଜି ରସ୍ତାନ୍। ମାତର୍ ଇଦାଙ୍ଗ୍ତିଙ୍ଗ୍ ର ମୁର୍ତି ଲେକେ ମାନାୟାର୍ ପୁଜା କିଦେଙ୍ଗ୍ ଲାଗାତାର୍। ଲାଗିଙ୍ଗ୍ ଈଶ୍ୱର ଆରେରଗ ହେୱାରିଙ୍ଗ୍ ଦଣ୍ଡ୍ ହିତାନ୍ ଇନେସ୍କି ଇସ୍ରାଏଲନି ମାନାୟାର୍ ମୁର୍ତି ପୁଜା କିଜି ମାଚାର୍। ହେୱାରିଙ୍ଗ୍ ଆରାୟ୍ କିନି କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ରାଜି ଆତାନ୍। ହେୱାର୍ ହାରିହାରା ଆରେରଗ ଈଶ୍ୱର ସାଇଜ କାଜିଙ୍ଗ୍ ପାର୍ତାନା କିତାର୍, ଆରେ ଈଶ୍ୱର ହେୱାର୍ କାଜିଙ୍ଗ୍ ରକାନ୍ ଉଦାର୍ କିନାକାନିଙ୍ଗ୍ ପକ୍ତାନ୍।
ଇଲେକେ କେତ୍ ହଟ୍ ଆରେରଗ ଆତାତ୍: ଇସ୍ରାଏଲନି ମାନାୟାର୍ ପାପ୍ କିତାର୍, ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିଜି ମାଚାନ୍, ତାପାଚେ ହେୱାର୍ ବାବିକିଜି ମାଚାର୍ ଆରେ ହେୱାରିଙ୍ଗ୍ ଉଦାର୍ କିନି କାଜିଙ୍ଗ୍ ଈଶ୍ୱର ରକାନ୍ ଉଦାର୍ କିନାକାନିଙ୍ଗ୍ ପକ୍ଚି ମାଚାନ୍। କେତେକ୍ ବାର୍ହୁ ଆସ୍ତି ଈଶ୍ୱର କେତେକ୍ ଉଦାର୍ କିନାକାନିଙ୍ଗ୍ ପକ୍ତାନ୍, ଇମ୍ଣାକାର୍ ଇସ୍ରାଏଲନି ମାନାୟାରିଙ୍ଗ୍ ହେୱାର୍ ଶାତ୍ରୁତାଙ୍ଗ୍ ରକ୍ଷା କିଜି ମାଚାନ୍।
ହାରିହାରା ୱିଜୁ ଦେସ୍ତାକେ ଇନେସ୍ ରାଜା ମାଚାନ୍ ଟିକ୍ ହେଲେକେ ରାଜା ବାଚି କିନି କାଜିଙ୍ଗ୍ ମାନାୟାର୍ ଈଶ୍ୱର ଲାଗାୟ୍ ପାର୍ତାନା କିତାର୍। ହେୱାର୍ ଇଲେକେ ରକାନ୍ ରାଜାଙ୍ଗ୍ ଇଚା କିତାର୍ ଇନେର୍ ଗାଜା, ଶାକ୍ତିକାଟାକାନ୍ ଆରେ ଇନେର୍ ହେୱାରିଙ୍ଗ୍ ଜୁଜ୍ କାଜିଙ୍ଗ୍ ହାଜି ଚଚ୍ଚି ଅନାନ୍। ଈଶ୍ୱର ଇ ଗୁୱାରିତିଙ୍ଗ୍ ମାନ୍ କିୱାତାନ୍, ମାତର୍ ହେୱାର୍ ଇନେସ୍ ଇଚାକିଜି ମାଚାର୍ ହେଲେକେ ର ରାଜା ହିତାନ୍।
ବାଇବଲ୍ନି ର କାତା: ବିଚାରକର୍ତ୍ତା ୧- ୩; ୬-୮
Free to use, adapt, and share under an open license (CC BY-SA 4.0).