17. ୧୭. ଦାଉଦ ହୁଦାଙ୍ଗ୍ ଈଶ୍ୱର ନିୟମ୍
ଶାଉଲ ଇସ୍ରାଏଲନି ପାର୍ତୁମ୍ ରାଜା ମାଚାନ୍। ହେୱାନ୍ ଗାଜା ଆରେ ହଲ୍ନାକାନ୍ ମାଚାନ୍, ଇନେସ୍ ଲେକେ ରାଜାଙ୍ଗ୍ ମାନାୟାର୍ ହୁଡ଼୍ଜି ମାଚାର୍। ପାର୍ତୁମ୍ ଅଲପ୍ ବାର୍ହୁ କାଜିଙ୍ଗ୍ ଶାଉଲ ର ହାର୍ଦି ରାଜା ମାଚାନ୍ ଏଚେପାଦ୍ନା ହେୱାନ୍ ଇସ୍ରାଏଲ ଜପି ସାସନ୍ କିତାନ୍। ମାତର୍ ହେଦାଙ୍ଗ୍ ପାଚେ ହେୱାନ୍ ର କରାପ୍ ମାନାୟ୍ ଆତାନ୍ ଇନେର୍ ଈଶ୍ୱର କାତାତିଙ୍ଗ୍ ମାନି କିୱାତାନ୍, ଲାଗିଙ୍ଗ୍ ଈଶ୍ୱର ର ଜେକନି ମାନାୟ୍ତିଙ୍ଗ୍ ବାଚି କିତାନ୍ ଇନେର୍ ଦିନେକ୍ ହେୱାନ୍ ବାହାତାକେ ରାଜା ଆତାନ୍।
ଶାଉଲ ପାଚେ ଈଶ୍ୱର ରକାନ୍ ଯୁବା ଇସ୍ରାଏଲତିଙ୍ଗ୍ ରାଜା ଆନି କାଜିଙ୍ଗ୍ ବାଚି କିତାନ୍। ବେଥଲିହିମ ସହର୍ତାଙ୍ଗ୍ ୱାଜିମାଚି ଦାଉଦ ମେଣ୍ଢା ଗଡ଼ିଆ ମାଚାନ୍।ବିନ୍-ବିନ୍ ସମୟତ ହେୱାନ୍ ଏଚେପାଦ୍ନା ତା ଆବା ମେଣ୍ଢାଙ୍ଗ୍ କାସି ମାଚାନ୍, ହେପାଦ୍ନା ଦାଉଦ ତା ମେଣ୍ଢାକାଙ୍ଗ୍ ଜୁଜ୍ କିଜିମାଚି ର ସିଂହ ଆରେ ର ବାଲୁତିଙ୍ଗ୍ ଅସ୍ତି ମାଚାନ୍। ଦାଉଦ ରକାନ୍ ସାଦୁ ଆରେ ଦାର୍ମି ମାନାୟ୍ ମାଚାନ୍ ଇନେର୍ ଈଶ୍ୱରତାକେ ପାର୍ତି କିଜି ତା କାତାତିଙ୍ଗ୍ ମାନି କିଜି ମାଚାନ୍।
ଦାଉଦ ରକାନ୍ ସେନା ଆରେ ନେତା ଆତାନ୍। ଏଚେପାଦ୍ନା ଦାଉଦ ଯୁବା ମାଚାନ୍, ହେୱାନ୍ ଗାଲିୟାତ ତର୍ଦି ରକାନ୍ ବେସି ଗାଜାକାନ୍ ଆରେ ଶାକ୍ତି କାଟି ମାନାୟ୍ ହୁଦାଙ୍ଗ୍ ଜୁଜ୍ କିଜି ମାଚାନ୍। ଗାଲିୟାତ ରକାନ୍ ଜୁଜ୍ ବିଦ୍ୟା ହିକାଆତାକାନ୍, ବେସି ଶାକ୍ତି କାଟି ସେନାର୍ ପାକାପାକି ଚଅ ପୁଟ୍ ଅଦା ଡେଙ୍ଗା ମାଚାନ୍। ମାତର୍ ଈଶ୍ୱର ଗୋଲିୟାତତିଙ୍ଗ୍ ମାର୍ନେ ଅସ୍ତି ଇସ୍ରାଏଲତିଙ୍ଗ୍ ଉଦାର୍ କିନି କାଜିଙ୍ଗ୍ ଦାଉଦଙ୍ଗ୍ ସାଇଜ କିଜି ମାଚାନ୍। ଇଦାଙ୍ଗ୍ ପାଚେ ଦାଉଦ ଇସ୍ରାଏଲନି ଶତ୍ରୁର୍ ଜପି କେତ୍ ହଟ୍ ଜିତାଆଜି ମାଚାନ୍, ହେଦାଙ୍ଗ୍ କାଜିଙ୍ଗ୍ ମାନାୟାର୍ ହେୱାନିଙ୍ଗ୍ ଜୟ୍-ଜୟ୍ କିତାର୍।
ଦାଉଦତିଙ୍ଗ୍ ମାନାୟାର୍ ଲାଡ୍ତିଙ୍ଗ୍ ଶାଉଲ ହୁଡ଼୍ଦେଙ୍ଗ୍ ଆଡ୍ୱାତାର୍। ଶାଉଲ କେତେକ୍ ସମୟରେ ଦାଉଦଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାନ୍, ଲାଗିଙ୍ଗ୍ ଦାଉଦ ଶାଉଲତାଙ୍ଗ୍ ଡ଼ୁଗ୍ତାନ୍। ଦିନେକ୍ ଦାଉଦଙ୍ଗ୍ ଅହ୍ନି କାଜିଙ୍ଗ୍ ଶାଉଲ ହେୱାନିଙ୍ଗ୍ ଡେକ୍ଚି ମାଚାନ୍। ଶାଉଲ ହେ ପାରାତାକେ ହାଚାନ୍ ଇମେତାକେ ଦାଉଦ ଶାଉଲତାଙ୍ଗ୍ ଜାର୍ତିଙ୍ଗ୍ ଡ଼ୁକ୍ଚି ମାଚାନ୍, ମାତର୍ ଶାଉଲ ହେୱାନିଙ୍ଗ୍ ହୁଡ଼୍ଦେଙ୍ଗ୍ ଆଡ୍ୱାଦାଙ୍ଗ୍ ମାଚାନ୍। ଦାଉଦ ନଙ୍ଗୟ ଶାଉଲ ଲାଗାୟ୍ ମାଚାନ୍ ଆରେ ହେୱାନ୍ ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଆଡ଼୍ତାନ୍ମା, ମାତର୍ ହେୱାନ୍ ହେଲେକେ କିୱାତାନ୍। ମାତର୍ ଦାଉଦ ଶାଉଲତିଙ୍ଗ୍ ଜୱାର୍ କିନି କାଜିଙ୍ଗ୍ ଶାଉଲ ହେନ୍ଦ୍ରାତିଙ୍ଗ୍ ଇଚ୍କେ ହଣ୍ତାନ୍ ଇନେସ୍କି ହେୱାନ୍ ରାଜା ଆନି କାଜିଙ୍ଗ୍ ହେୱାନିଙ୍ଗ୍ ଅହ୍ୱାତାନ୍।
ପାଚେ ଶାଉଲ ଜୁଜ୍ତାକେ ହାଃତାନ୍, ଆରେ ଦାଉଦ ଇସ୍ରାଏଲନି ରାଜା ଆତାନ୍। ହେୱାନ୍ ରକାନ୍ ହାର୍ଦି ରାଜା ମାଚାନ୍, ଆରେ ମାନାୟାର୍ ହେୱାନିଙ୍ଗ୍ ଲାଡ୍ କିଜି ମାଚାର୍। ଈଶ୍ୱର ଦାଉଦତିଙ୍ଗ୍ ଆଶ୍ରିବାଦ୍ କିତାନ୍ ଆରେ (ସଫଳତା) ହିତାର୍। ଦାଉଦ କେତେକ୍ ଜୁଜ୍ କିଜି ମାଚାନ୍ ଆରେ ଈଶ୍ୱର ଇସ୍ରାଏଲନି ଶତ୍ରୁରିଙ୍ଗ୍ ଆରାୟ୍ କିନି କାଜିଙ୍ଗ୍ ହେୱାନିଙ୍ଗ୍ ସାଇଜ କିତାନ୍। ଦାଉଦ ଯିରୁଶାଲାମତାକେ ଜିତାଆତାନ୍ ଆରେ ଇଦାଙ୍ଗ୍ତିଙ୍ଗ୍ ତା (ରାଜଧନୀ) ଦେସ୍ କିତାନ୍।ଦାଉଦ ରାଜା ମାଚିହିଙ୍ଗ୍ ଇସ୍ରାଏଲ ଶାକ୍ତି କାଟାକାନ୍ ଆରେ ଦନ୍ କାଟାକାନ୍ ଆତାନ୍।
ଦାଉଦ ର ମନ୍ଦିର୍ ରହ୍ନି କାଜିଙ୍ଗ୍ ଇଚା କିତାନ୍ ଇମେତାକେ ୱିଜୁ ଇସ୍ରାଏଲ ଈଶ୍ୱରତିଙ୍ଗ୍ ହେବା କିଦେଙ୍ଗ୍ ଆଡ୍ନାର୍ ଆରେ ତା କାଜିଙ୍ଗ୍ ବଲି ପୁଜା କିଦେଙ୍ଗ୍ ଆଡ୍ନାର୍।ପାକାପାକି ୪୦୦ ବାର୍ହୁ ଆସ୍ତି, ମାନାୟାର୍ ଈଶ୍ୱରତିଙ୍ଗ୍ ହେବା କିଜି ମାଚାର୍ ଆରେ ମୋଶା ରସ୍ତି ମାଚି ମାନାୟାର୍ ରୁଣ୍ଡାଆନି ପୁଟ୍ କୁଡ଼ିଆତାକେ ବଲି ପୁଜାକିଜି ମାଚାର୍।
ମାତର୍ ଈଶ୍ୱର ନାଥନ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ତିଙ୍ଗ୍ ଦାଉଦ ଲାଗାୟ୍ ହିରୁ କାବୁର୍ ହିଜି ପକ୍ତାନ୍, “ଏପେଙ୍ଗ୍ ଜୁଜ୍ନି ର ମାନାୟ୍, ହେଦାଙ୍ଗ୍ କାଜିଙ୍ଗ୍ ନା କାଜିଙ୍ଗ୍ ଇ ମନ୍ଦିର୍ ରହ୍ମାଟ୍। ମି ହିମ୍ଣା ହେଦାଙ୍ଗ୍ ରହ୍ନାନ୍। ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ବେସିକିଜି ଆଶ୍ରିବାଦ୍ କିଦ୍ନାଙ୍ଗ୍। ମି ଲାତ୍ରା ବିତ୍ରେତାଙ୍ଗ୍ ରକାନ୍ ନା ମାନାୟ୍ ଜପି ରାଜା ଲେକେ ହାଃନି ପାତେକ୍ ସାସନ୍ କିନାନ୍!” ହାଃନି ପାତେକ୍ ସାସନ୍ କିଦେଙ୍ଗ୍ ଆଡ୍ନି ଦାଉଦନି ଲାତ୍ରା ନିକାନ୍ ଆନାନା ରକାନ୍ ନେ ଖ୍ରୀଷ୍ଟ। ଖ୍ରୀଷ୍ଟ ଈଶ୍ୱରତାଙ୍ଗ୍ ବାଚିକିୟା ଆତାକାନ୍ ଇନେର୍ ପୁର୍ତିନି ମାନାୟାରିଙ୍ଗ୍ ହେୱାର୍ ୱିଜୁ ପାପ୍ତାଙ୍ଗ୍ ରକ୍ଷା କିନାନ୍।
ଏଚେପାଦ୍ନା ଦାଉଦ ଇ ୱିଜୁ କାତା ୱେଚାନ୍, ହେୱାନ୍ ସାଙ୍ଗେ-ସାଙ୍ଗେ ଈଶ୍ୱରତିଙ୍ଗ୍ ଦନ୍ୟବାଦ୍ ହିତାନ୍ ଆରେ ହେୱାନିଙ୍ଗ୍ ଗୌରବ କିତାନ୍ ଇନେସ୍କି ହେୱାନ୍ ଦାଉଦତିଙ୍ଗ୍ ଇ ଗାଜା ସନ୍ମାନ୍ ଆରେ କେତେକ ଆଶ୍ରିବାଦ୍ ହିନି କାଜିଙ୍ଗ୍ ପାର୍ମାଣ୍ କିଜି ମାଚାନ୍। ଈଶ୍ୱର ଏଚେପାଦ୍ନା ଇ ୱିଜୁ ବିଷୟ କିନାନ୍ ହେଦାଙ୍ଗ୍ ଦାଉଦ ପୁନ୍ୱାଦାଙ୍ଗ୍ ମାଚାନ୍। ମାତର୍ ଇଲେକେ ଗଟାଆତାତ୍, ଇସ୍ରାଏଲ ନି ମାନାୟାରିଙ୍ଗ୍ ଖ୍ରୀଷ୍ଟ ୱାନି କାଜିଙ୍ଗ୍ ପାକାପାକି ୧୦୦୦ ବାର୍ହୁ କାତେଙ୍ଗ୍ ଲାଗିସ୍ ମାଚାତ୍।
କେତେକ୍ ବାର୍ହୁ ଆସ୍ତି ଦାଉଦ ନ୍ୟାୟ ଆରେ ବିସ୍ବସ୍ତ ଆଜି ସାସନ୍ କିତାନ୍ ଆରେ ଈଶ୍ୱର ହେୱାନିଙ୍ଗ୍ ଆଶ୍ରିବାଦ୍ କିତାନ୍। କି ତା ଜିବୁନ୍ତ ସେସ୍ ବାଗ୍ଦ ହେୱାନ୍ ଈଶ୍ୱର ବିରୁଦ୍ତାକେ ବୟଙ୍କାର୍ ପାପ୍ କିଜି ମାଚାନ୍।
ଦିନେକ୍ ଏଚେପାଦ୍ନା ଦାଉଦ ସେନାର୍ ୱିଜାକାର୍ ଜୁଜ୍ କିନି କାଜିଙ୍ଗ୍ ଇଞ୍ଜାଙ୍ଗ୍ ଦେହା ମାଚାନ୍, ହେୱାନ୍ ତା ରାଜ୍ ମହଲ୍ନି ବାର୍ତ ହୁଡ଼୍ତାନ୍ ଯେ ରକାନ୍ ହାଲ୍ନି କଗ୍ଲେ ଏଜୁଙ୍ଗ୍ ଇବାନାତା। ହେ କଗ୍ଲେ ତର୍ ବେଥଶିବା ମାଚାତ୍।
ଦୃଷ୍ଟକୁ ଅନ୍ୟତ୍ର କିନି ପାଚେ ଦାଉଦ ହେୱାନିଙ୍ଗ୍ ତାସିୱାନି କାଜିଙ୍ଗ୍ ରକାନ୍ ମାନାୟ୍ତିଙ୍ଗ୍ ପକ୍ତାନ୍। ହେୱାନ୍ ତା ହୁଦାଙ୍ଗ୍ ହୁନ୍ଞ୍ଚାନ୍ ଆରେ ହେୱାନିଙ୍ଗ୍ ତାଞ୍ଜ ପକ୍ତାନ୍। ଅଲପ୍ ଦିନ୍ ପାଚେ ବେଥଶିବା ଦାଉଦତିଙ୍ଗ୍ ର ବେଣ୍ ପକ୍ଚି ୱେଚ୍ଚାତ୍ ଯେ ହେଦେଲ୍ ଗାଗାଡ଼୍ତ ମାନାତ୍।
ଉରିୟ ତର୍ଦି ରକାନ୍ ମାନାୟ୍ ଦାଉଦ ସେନାର୍ ବିତ୍ରେତାଙ୍ଗ୍ ରକାନ୍ ହାର୍ଦି ସେନା, ବେଥଶିବା ଡକ୍ରାହି ମାଚାନ୍। ଦାଉଦ ଊରିୟଙ୍ଗ୍ ଜୁଜ୍ତାଙ୍ଗ୍ କୁକ୍ଚି ତା ଡକ୍ରୁହି ଲାଗାୟ୍ ହାନି କାଜିଙ୍ଗ୍ ୱେଚ୍ଚାନ୍। ମାତର୍ ଜେକନି ସେନାର୍ ଜୁଜ୍ତାକେ ମାନିହିଙ୍ଗ୍ ଊରିୟ ଇଞ୍ଜ ହାଞ୍ଜେଙ୍ଗ୍ ମୁନା କିତାତ୍। ଲାଗିଙ୍ଗ୍ ଦାଉଦ ଊରିୟଙ୍ଗ୍ ଆରେରଗ ଜୁଜ୍କିନି ବାହାତାକେ ପକ୍ତାନ୍ ଆରେ ସେନାନି ମୁକ୍ୟାଙ୍ଗ୍ ୱେଚ୍ଚି ପକ୍ତାନ୍ ଯେ ହେୱାନ୍ ଊରିୟଙ୍ଗ୍ ଇଲେକେ ବାହାତାକେ ଇଟେର୍ ଇମେତାକେ ଶତ୍ରୁ ପକ୍ଷାଦିକ୍ ବଳିଷ୍ଟ ମାନାତ୍ ଇନେସ୍କି ଊରିୟ ଶତ୍ରୁର୍ କାଜିଙ୍ଗ୍ ଅହି ଆନାର୍।
ଊରିୟଙ୍ଗ୍ ମାର୍ନେ ଅସ୍ତି ପାଚେ, ଦାଉଦ ବେଥଶିବାଙ୍ଗ୍ ବିବା କିତାନ୍। ପାଚେ ହେୱାନ୍ ଦାଉଦ ମେହିଙ୍ଗ୍ ଜନମ୍ ହିତାର୍। ଦାଉଦ ଇନାକା କିଜି ମାଚାନ୍ ହେଦାଙ୍ଗ୍ କାଜିଙ୍ଗ୍ ଈଶ୍ୱର ବେସି ରିସା ଆଜି ମାଚାନ୍, ଲାଗିଙ୍ଗ୍ ହେୱାନ୍ ତା ଲାଗାୟ୍ (ନାଥନ) ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ତିଙ୍ଗ୍ ପକ୍ଚି ତା ପାପ୍ ଇନେସ୍ କରାପ୍ ମାଚାତ୍ ହେଦାଙ୍ଗ୍ ୱେଚ୍ଚି ମାଚାନ୍।ଦାଉଦ ତା ପାପ୍ କାଜିଙ୍ଗ୍ ଅନୁତାପ କିତାନ୍ ଆରେ ଈଶ୍ୱର ହେୱାନିଙ୍ଗ୍ କେମା ହିତାନ୍। ଦାଉଦ ତା ବାଚାଆତି ଜିବୁନ୍ତ, ଇଲେକେକି ତା କଷ୍ଟନି ସମୟତ ପା ଈଶ୍ୱର ୱାଜି ତା କାତା ହିତାନ୍।
ମାତର୍ ଦାଉଦ ପାପ୍ନି ଦଣ୍ଡ୍ ଲେକେ ତା ମେହି ହାଃତାନ୍। ଦାଉଦତାଙ୍ଗ୍ ଅବଶିଷ୍ଟାଂଶ ଜିବୁନ୍ କାଳ୍ ସମୟ ବିତ୍ରେ ପରିବାର୍ତାକେ କୁର୍ଲି ଲାଗିସ୍ ମାଚାତ୍, ଆରେ ଦାଉଦନି ଶାକ୍ତି ବେସି ଦୁର୍ବଲ୍ ଆଜି ମାଚାତ୍। ଯଦି ଆରେ ଦାଉଦ ଈଶ୍ୱର କାଜିଙ୍ଗ୍ ବିସ୍ବସ୍ତ ହିଲ୍ୱାତାନ୍, ଆତିସ୍ପା ଈଶ୍ୱର ତା ଆଦେସ୍ତିଙ୍ଗ୍ ରକ୍ଷା କିନି କାଜିଙ୍ଗ୍ ବିସ୍ବସ୍ତ ମାଚାନ୍। ପାଚେନି ସମୟତ ଦାଉଦ ଆରେ ବେଥଶିବାତାଙ୍ଗ୍ ଆରେ ର ହିମ୍ଣା ଜନମ୍ କିତାର୍, ଆରେ ହେୱାର୍ ହେୱାନିଙ୍ଗ୍ ଶଲୋମନ ତର୍ ହିତାର୍।
ବାଇବଲନି ର କାତା: ୧ ଶାମୁୟେଲ ୧୦; ୧୫- ୧୯; ୨୪; ୩୧; ୨ଶାମୁୟେଲ ୫; ୭; ୧୧- ୧୨
Free to use, adapt, and share under an open license (CC BY-SA 4.0).