18. ୧୮. ବାଗ୍ଆତି ରାଜି
କେତେକ ବାର୍ହୁ ପାଚେ ଦାଉଦ ହାଃତାନ୍, ଆରେ ତାମେହି ଶଲୋମନ ଇସ୍ରାଏଲ ଜପି ସାସନ୍ କିଦେଙ୍ଗ୍ ଆରମ୍ କିତାନ୍। ଈଶ୍ୱର ଶଲୋମନତିଙ୍ଗ୍ ଆରେ ହେୱାନ୍ ଇମ୍ଣି ବିଷୟତିଙ୍ଗ୍ ୱିଜୁତାଙ୍ଗ୍ ଆଦିକ୍ ଇଚା କିନାନ୍ ହେଦାଙ୍ଗ୍ତିଙ୍ଗ୍ ୱେନ୍ବାତାନ୍। ଏଚେପାଦ୍ନା ଶଲୋମନ ବୁଦି କାଜିଙ୍ଗ୍ ଈଶ୍ୱର ଲାଗାୟ୍ ପାର୍ତାନା କିତାନ୍, ଈଶ୍ୱର ହେବେତାଙ୍ଗ୍ ୱାରି ଆଜି ମାଚାନ୍ ଆରେ ହେୱାନିଙ୍ଗ୍ ପୁର୍ତିତାକେ ୱିଜୁତାଙ୍ଗ୍ ଆଦିକ୍ ବୁଦି କିତାନ୍। ଶଲୋମନ କେତେକ୍ ବିଷୟ ହିକାଆତାନ୍ ଆରେ ହେୱାନ୍ ରକାନ୍ ବେସି ବୁଦିକାଟି ବିଚାର୍ କିନାକାନ୍ ଆତାନ୍। ଆରେ ପା ଈଶ୍ୱର ହେୱାନିଙ୍ଗ୍ ବେସି ହାଉକାର୍ ମାନାୟ୍ କିତାନ୍।
ଯିରୁଶାଲାମ ସହର୍ତାକେ ଶଲୋମନ ମନ୍ଦିର୍ ରସ୍ତାନ୍, ହେଦାଙ୍ଗ୍ ତାଞ୍ଜ୍ବା ରସ୍ତେଙ୍ଗ୍ ଯଜ୍ନା କିଜି ମାଚାନ୍ ଆରେ ଦର୍କାର୍ ଆନି ୱିଜୁ ରୁଣ୍ଡାଇ କିଜି ଇଡ଼୍ଜି ମାଚାନ୍। ମାନାୟାର୍ ଈଶ୍ୱରତିଙ୍ଗ୍ ହେବା ଆରେ ପୁଜାକିନି ଦାନ୍ ମାନାୟ୍ ମାହାଆନି ପୁଟ୍ କୁଡ଼ିଆତାକେ କିନି ବାଦୁଲ୍ ମିନ୍ଦିର୍ତାକେ କିଦେଙ୍ଗ୍ ଲାଗାତାର୍। ଈଶ୍ୱର ୱାତାନ୍ ଆରେ ମନ୍ଦିର୍ତାକେ ମାଚାନ୍, ଆରେ ହେୱାନ୍ ତା ମାନାୟାର୍ ହୁଦାଙ୍ଗ୍ ବାହା କିତାନ୍।
ମାତର୍ ଶଲୋମନ ଜେକନି ଦେସ୍ତି କଗ୍ଲେକାଙ୍ଗ୍ ମାନ୍ କିତାନ୍। ହେୱାନ୍ ୧୦୦୦ ବିଦେସ୍ନି କଗ୍ଲେକାଙ୍ଗ୍ ବିବା ଆଜି ଈଶ୍ୱର କାତାତିଙ୍ଗ୍ ମାନିକିଜି ମାଚାନ୍। ଇ କଗ୍ଲେକ୍ ବିତ୍ରେତାଙ୍ଗ୍ କେତେକ୍ ଜେକିନି ଦେସ୍ତାଙ୍ଗ୍ ୱାଜି ମାଚିକ୍ ଆରେ ହେୱେକ୍ ହୁଦାଙ୍ଗ୍ ତା ଦେବା ଦେବିକାଙ୍ଗ୍ ତାସି ୱାତିକ୍ ଆରେ ଲାଗାତାର୍ ହେୱେକିୟାକାଙ୍ଗ୍ ହେବା କିତିକ୍। ଏଚେପାଦ୍ନା ଶଲୋମନ ବୁଡ଼୍ହି ଆତାନ୍, ହେୱାନ୍ ପା ହେ ଦେବା ଦେବିକାଙ୍ଗ୍ ହେବା କିତାନ୍।
ଈଶ୍ୱର ଶଲୋମନତିଙ୍ଗ୍ ରିସା ଆଜି ମାଚାନ୍ ଆରେ ଶଲୋମନ ବିସ୍ବସ୍ତ ଆୱାଦାଙ୍ଗ୍ ଦଣ୍ଡ୍ ପାୟାଆନି ଲେକେ ଶଲୋମନ ହାଃତି ପାଚେ ହେୱାନ୍ ଇସ୍ରାଏଲ ଦେସ୍ତିଙ୍ଗ୍ ରିଣ୍ଡାଙ୍ଗ୍ ରାଜି ବାଗ୍ କିନି କାଜିଙ୍ଗ୍ ଇଚା କିତାନ୍।
ଶଲୋମନ ହାଃତି ପାଚେ, ତା ମେହି ରିହବିୟାମ ରାଜା ଆତାନ୍।ରିହବିୟମ ରକାନ୍ କରାପ୍ ମାନାୟ୍ ମାଚାନ୍। ଇସ୍ରାଏଲ ଦେସ୍ନି ୱିଜୁ ମାନାୟାର୍ ରବେ ଆଜି ହେୱାନିଙ୍ଗ୍ ର ରାଜା କିଦେଙ୍ଗ୍ ଇଚା କିତାର୍। ହେୱାର୍ ରିହବିୟାମଙ୍ଗ୍ ବିରଦ୍ କିଜି ୱେଚ୍ଚାର୍ ଯେ ଶଲୋମନ ହେୱାରିଙ୍ଗ୍ ବେସି କଷ୍ଟନି କାମାୟ୍ କିୟିକିଦେଙ୍ଗ୍ ଆରେ କେତେକ୍ ସିସ୍ତୁ ହିଦେଙ୍ଗ୍ ଲାଗିସ୍ ମାନ୍ଞ୍ଚାତ୍।
ରିହବିୟାମ ହେୱାରିଙ୍ଗ୍ ରିସା ଆଜି ୱେଚ୍ଚାନ୍, “ଏପେଙ୍ଗ୍ ବାବିକିନାଦେର୍ ନା ଆବା ଶଲୋମନ ମିଙ୍ଗେଙ୍ଗ୍ ବେସି କଷ୍ଟନି କାମାୟ୍ କିୟିକିତ୍ତାନ୍ନା, ମାତର୍ ହେୱାନ୍ତାଙ୍ଗ୍ ଆନେଙ୍ଗ୍ ଆରେ ଆଦିକ୍ କଷ୍ଟନି କାମାୟ୍ କିଦେଙ୍ଗ୍ ହିଦ୍ନାଙ୍ଗ୍, ଆରେ ହେୱାନ୍ତାଙ୍ଗ୍ ଆଦିକ୍ ଆନେଙ୍ଗ୍ ମିଙ୍ଗେଙ୍ଗ୍ କଷ୍ଟନି ଦଣ୍ଡ୍ ହିଦ୍ନାଙ୍ଗ୍।”
ଇସ୍ରାଏଲ ଦେସ୍ନି ଦଶ୍ ଗଷ୍ଟି ରିହବିୟାମ ବିରଦ୍ତାକେ ବିରଦ୍ କିତାର୍। ମାତର୍ ରି ଗଷ୍ଟି ହେୱାନ୍ କାଜିଙ୍ଗ୍ ବିସ୍ବସ୍ତ ଆଜି ମାଚାର୍। ଇ ରି ଗଷ୍ଟି ଯିହୁଦା ରାଜି ଆତାତ୍।
ଇସ୍ରାଏଲ ଦେସ୍ନି ଜେକନି ଦଶ୍ଗଟା ଜାତି ରିହବିୟାମତିଙ୍ଗ୍ ବିରଦ୍ କିତାର୍ ଆରେ ଯାରବିୟାମ ତର୍ଦାକାନ୍ ରାକାନ୍ ମାନାୟ୍ତିଙ୍ଗ୍ ହେୱାର୍ ରାଜା ଆନି କାଜିଙ୍ଗ୍ ବାଚି କିତାର୍। ହେୱାର୍ ଉତ୍ତର୍ ବାଗ୍ଦ ହେୱାର୍ ରାଜି ରସ୍ତାର୍ ଆରେ ହେୱାରିଙ୍ଗ୍ ଇସ୍ରାଏଲ ରାଜି କି ବିନ୍ ଦେସ୍ ଇଞ୍ଜି ୱେଚ୍ଚାର୍।
ଯାରବିୟାମ ଈଶ୍ୱର ବିରଦ୍ତାକେ ବିରଦ୍ କିତାନ୍ ଆରେ ମାନାୟାରିଙ୍ଗ୍ ପାପ୍ କାମାୟ୍ କିୟିକିତାନ୍। ଯିହୁଦା ରାଜିତାକେ ମାନି ମନ୍ଦିର୍ତାକେ ଈଶ୍ୱରତିଙ୍ଗ୍ ହେବା କିନି ବାଦୁଲ୍ ହେୱାନ୍ ମୁର୍ତି ପୁଜା କିନି କାଜିଙ୍ଗ୍ ତା ମାନାୟାର୍ କାଜିଙ୍ଗ୍ ରିଣ୍ଡାଙ୍ଗ୍ ମୁର୍ତି ରସ୍ତାନ୍।
ଯିହୁଦା ରାଜି ଆରେ ଇସ୍ରାଏଲ ରାଜି ଶତ୍ରୁତାକେ ବାର୍ତି ଆତାତ୍, ଆରେ କେତ୍ହଟ୍ ଜାର୍-ଜାର୍ ବିରଦ୍ତାକେ ଜୁଜ୍ କିଜି ମାଚାର୍।
ପୁନି ରାଜି ଇସ୍ରାଏଲତାକେ ୱିଜୁ ରାଜାର୍ କରାପ୍ ମାଚାର୍। ଇ ୱିଜୁ ରାଜାର୍ ବିତ୍ରେତାଙ୍ଗ୍ କେତେକ୍ ରାଜା ଜେକନି ଇସ୍ରାଏଲନି ମାନାୟାର୍ତାଙ୍ଗ୍ ମାର୍ନେ ଅହିଆଜି ମାଚାର୍। ଇମ୍ଣାକାର୍ ହେୱାର୍ ବାହାତାକେ ରାଜା ଆଦେଙ୍ଗ୍ ଇଚାକିଜି ମାଚାର୍।
ୱିଜୁ ରାଜାର୍ ଆରେ ଇସ୍ରାଏଲ ରାଜିନି ୱିଜୁ ମାନାୟାର୍ ମୁର୍ତି ପୁଜାକିଜି ମାଚାର୍। ହେୱାର୍ ମୁର୍ତି ପୁଜାତାକେ କେତେକ୍ ସମୟତାକେ ଯୌନ ଅଶୁଚିତା ଆରେ ଇଲେକେ କି ରଗ-ରଗ ହିମ୍ଣାଙ୍ଗ୍ ପା ବଲି ପୁଜା କିଜି ମାଚାର୍।
ଯିହୁଦାନି ରାଜାର୍ ଦାଉଦନି ଲାତ୍ରା ମାଚାର୍। ଇ ୱିଜାକାର୍ ରାଜାର୍ ବିତ୍ରେତାଙ୍ଗ୍ କେତେକ୍ ହାର୍ ମାନାୟ୍ ମାଚାର୍, ଇମ୍ଣାକାର୍ କି ନ୍ୟାୟ ବାବ୍ରେ ସାସନ୍ କିଜି ମାଚାର୍ ଆରେ ଈଶ୍ୱରତିଙ୍ଗ୍ ହେବା କିଜି ମାଚାର୍। ମାତର୍ ଯିହୁଦାନି କେତ୍ଜାଣ୍ ରାଜାର୍ କରାପ୍ ଆରେ ବାନ୍ୟା ମାଚାର୍ ଆରେ ହେୱାର୍ ମୁର୍ତି ପୁଜା କିଜି ମାଚାର୍। କେତେକ୍ ରାଜାର୍ ଇଲେକେ କି ହେୱାର୍ ହିମ୍ଣାକାଙ୍ଗ୍ ବୁଲ୍କାୟ୍ କିନି ଦେବା ଦେବିକାଙ୍ଗ୍ ବଲିପୁଜା କିଜି ମାଚାର୍। ଯିହୁଦାନି କେତ୍ଜାଣ୍ ମାନାୟାର୍ ପା ଈଶ୍ୱର ବିରଦ୍ତାକେ ବିରଦ୍ କିତାର୍ ଆରେ ଜେକନି ଦେବିକାଙ୍ଗ୍ ବଲିପୁଜା କିଜି ମାଚାର୍। ଯିହୁଦାନି କେତ୍ଜାଣ୍ ମାନାୟାର୍ ପା ଈଶ୍ୱରତିଙ୍ଗ୍ ବିରଦ୍କିଜି ବିଦ୍ରୋହ କିତାର୍ ଆରେ ଜେକନି ଦେବା ଦେବିକାଙ୍ଗ୍ ହେବା କିଜି ମାଚାର୍।
ବାଇବଲନି ର କାତା: ୧ରାଜା ବଳୀ ୧- ୬; ୧୧- ୧୨
Free to use, adapt, and share under an open license (CC BY-SA 4.0).