20. ୨୦. ନିର୍ବାସନ ଏବଂ ପ୍ରତ୍ୟାବର୍ତ୍ତନ
ଜାର୍-ଜାର୍ବିତ୍ରେ ଇସ୍ରାଏଲ ରାଜି ଆରେ ଯିହୁଦା ରାଜି ଈଶ୍ୱର ବିରଦ୍ତାକେ ପାପ୍ କିତାର୍। ଈଶ୍ୱର ସୀନୟ ମାଡ଼ିତାକେ ହେୱାର୍ ହୁଦାଙ୍ଗ୍ ଇମ୍ଣି ନିୟମ୍ କିଜି ମାଚାନ୍ ହେୱାର୍ ହେ ନିୟମ୍ତିଙ୍ଗ୍ ବାଙ୍ଗାୟ୍ କିତାର୍। ମାନାୟାର୍ ଇନେସ୍ ଏତୁ କିନାର୍ ଆରେ ଆରେରଗ ହେୱାନିଙ୍ଗ୍ ହେବା କିନାର୍ ହେଦାଙ୍ଗ୍ କାଜିଙ୍ଗ୍ ଈଶ୍ୱର ତା ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାରିଙ୍ଗ୍ ପକ୍ଚି ଜାଗ୍ରତ୍ କିୟିକିତାର୍, ମାତର୍ ହେୱାର୍ ହେଦାଙ୍ଗ୍ ମାନି କିଦେଙ୍ଗ୍ ଆକାୟ୍ ଇଚାର୍।
ଲାଗିଙ୍ଗ୍ ଈଶ୍ୱର ଜାର୍-ଜାର୍ ରାଜିତିଙ୍ଗ୍ ହେୱାର୍ ଶତ୍ରୁର୍ କାଜିଙ୍ଗ୍ ନଷ୍ଟ ଆନି କାଜିଙ୍ଗ୍ ଆଦେସ୍ ହିତାନ୍। ର ଶାକ୍ତିକାଟାକାନ୍ ଆରେ ନିର୍ଦୟୀ ଦେସ୍ ଆସିରୀୟ ରାଜି ଇସ୍ରାଏଲ ରାଜିତିଙ୍ଗ୍ ନଷ୍ଟ କିତାନ୍। ଇସ୍ରାଏଲ ଦେସ୍ତାକେ ମାନି କେତେକ୍ ମାନାୟାରିଙ୍ଗ୍ ଆସିରୀୟନି ମାନାୟାର୍ ମାର୍ନେ ଅସ୍ତାର୍, ମୁଲ୍ୟମାନି ଜିନିଷ୍ତିଙ୍ଗ୍ ଅତାର୍, ଆରେ ଦେସ୍ନି କେତ୍ଜାଣ୍ତିଙ୍ଗ୍ କାଡି କିତାର୍।
ଆସିରୀୟନି ମାନାୟାର୍ ହାଉକାର୍ ମାନାୟାରିଙ୍ଗ୍, ଶାକ୍ତି ମାନି ମାନାୟାରିଙ୍ଗ୍ ଇଲେକେ ୱିଜୁ ନେତାରିଙ୍ଗ୍ ରବେ କିତାର୍ ଆରେ ହେୱାରିଙ୍ଗ୍ ଆସ୍ତି ଆସିରୀୟତାକେ ହାଚାର୍। ଆପ୍କା ବେସି ଗରିବ୍ ଇସ୍ରାଏଲନି ମାନାୟାର୍ ଇମ୍ଣାକାରିଙ୍ଗ୍ ମାର୍ନେ ଅହ୍ୱାଦାଙ୍ଗ୍ ମାଚାର୍ ହେୱାର୍ ନେ ଇସ୍ରାଏଲ ରାଜିତାକେ ମାଚାର୍।
ତାପାଚେ ଆସିରୀୟନି ମାନାୟାର୍ ବିନ୍ ଦେସ୍ନି ମାନାୟାରିଙ୍ଗ୍ ହେୱାର୍ ଦେସ୍ତାକେ ବାହା କିନି କାଜିଙ୍ଗ୍ ଇସ୍ରାଏଲ ରାଜିତାକେ ତାହି ୱାତାର୍। ବିନ୍ ଦେସ୍ନି ମାନାୟାର୍ ନଷ୍ଟ ଆତି ଦେସ୍କୁକାଙ୍ଗ୍ ଆରେରଗ ରସ୍ତାର୍ ଆରେ ଇମ୍ଣି ଇସ୍ରାଏଲନି ମାନାୟାର୍ ହେବେ ମାଚାର୍ ହେୱାରିଙ୍ଗ୍ ବିବା ଆତାର୍। ଇମ୍ଣି ଇସ୍ରାଏଲନି ମାନାୟାର୍ ଲାତ୍ରା ବିନ୍ ଦେସ୍ନିକାରିଙ୍ଗ୍ ବିବା କିଜି ମାଚାର୍ ହେୱାରିଙ୍ଗ୍ ଶମିରୋଣିୟ ଇଞ୍ଜି ୱେଚ୍ଚି ମାଚାର୍।
ଯିହୁଦା ରାଜିନି ମାନାୟାର୍ ହୁଡ଼୍ତାର୍ ଯେ ଇସ୍ରାଏଲ ରାଜିନି ମାନାୟାର୍ ଈଶ୍ୱରତିଙ୍ଗ୍ ପାର୍ତି କିୟିତିଲେ ଆରେ ତା କାତାତିଙ୍ଗ୍ ମାନି କିୟିତିଲେ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିଜି ମାଚାନ୍। ମାତର୍ ହେୱାର୍ କିଣାନନି ଦେବା ଦେବିକାଙ୍ଗ୍ ୱିଜାକାର୍ ମୁର୍ତିକାଙ୍ଗ୍ ହେବା କିତାର୍। ହେୱାରିଙ୍ଗ୍ ଜାଗ୍ରତ୍ କିୟିକିନି କାଜିଙ୍ଗ୍ ଈଶ୍ୱର ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାରିଙ୍ଗ୍ ପକ୍ଚି ମାଚାନ୍, ମାତର୍ ହେୱାର୍ ତା କାତା ୱେନ୍ୱାତାର୍।
ଆସିରୀୟନି ମାନାୟାର୍ ଇସ୍ରାଏଲ ରାଜି ନଷ୍ଟ କିନି ୧୦୦ ବାର୍ହୁ ପାଚେ, ଈଶ୍ୱର ବାବିଲନି ରାଜା ନବୁକଦ୍ନିସ୍ରଙ୍ଗ୍ ଯିହୁଦା ରାଜିତିଙ୍ଗ୍ ଯୁଜ୍ କିନି କାଜିଙ୍ଗ୍ ପକ୍ତାନ୍। ବାବିଲନ ର ଶାକ୍ତିକାଟି ଦେସ୍ ମାଚାତ୍। ଯିହୁଦାନି ରାଜା ନବୁକଦ୍ନସରଙ୍ଗ୍ ଦାସ୍ ଆନି କାଜିଙ୍ଗ୍ ଇଚା କିତାନ୍ ଆରେ ୱିଜୁ ବାର୍ହୁ ହେୱାନିଙ୍ଗ୍ କେତେକ୍ ଡାବୁଙ୍ଗ୍ ହିତାନ୍।
ମାତର୍ ଅଲପ୍ ବାର୍ହୁ ପାଚେ, ଯିହୁଦାନି ରାଜା ବାବିଲନ ବିରଦ୍ତାକେ ବିରଦ୍ କିତାନ୍। ଲାଗିଙ୍ଗ୍ ବାବିଲନନି ମାନାୟାର୍ ଲେଉଟାଆଜି ୱାଜି ଯିହୁଦା ରାଜିତିଙ୍ଗ୍ ଯୁଜ୍ କିତାର୍। ହେୱାର୍ ଯିରୁଶାଲାମ ଦେସ୍ତିଙ୍ଗ୍ ଆସ୍ତାର୍, ମନ୍ଦିର୍ତିଙ୍ଗ୍ ନଷ୍ଟ କିତାର୍, ଆରେ ଦେସ୍ନି ଆରେ ମନ୍ଦିର୍ନି ଦନ ହନାବାନା ଅତାର୍।
ବିରଦ୍ କିତି କାଜିଙ୍ଗ୍ ଯହୁଦାନି ରାଜାଙ୍ଗ୍ ଦଣ୍ଡ୍ ହିନି କାଜିଙ୍ଗ୍ ନବୁଖଦ୍ନସରନି ସେନାର୍ ରାଜା ହିମ୍ଣାଙ୍ଗ୍ ମୁମ୍ଦ ମାର୍ନେ ଅସ୍ତାର୍ ଆରେ ହେୱାନିଙ୍ଗ୍ କାଣ୍କୁ କାଣା କିତାର୍। ତାପାଚେ ହେୱାନ୍ ଇମେସ୍ ବାବିଲୋନନି ଜଇଲ୍ ଇଞ୍ଜ ହାଃନାନ୍ ହେଦାଙ୍ଗ୍ କାଜିଙ୍ଗ୍ ହେୱାର୍ ହେୱାନିଙ୍ଗ୍ ବାବିଲୋନତିଙ୍ଗ୍ ଅସାହାଚାର୍।
ନବୁଖଦ୍ନସର ଆରେ ତା ସେନାର୍ ଯିହୁଦାନି କେତ୍ ଜାଣ୍ତିଙ୍ଗ୍ ବାବିଲନ ଦେସ୍ତାକେ ଅସାହାଚାର୍ ଆରେ ଜମିତାକେ କାମାୟ୍ କିଦେଙ୍ଗ୍ ଆପ୍କା ଗରିବ୍ ମାନାୟାରିଙ୍ଗ୍ ଯିହୁଦା ଦେସ୍ତାକେ ପିସ୍ତି ହାଚାର୍। ଈଶ୍ୱର ମାନାୟାରିଙ୍ଗ୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତି ଦେସ୍ତାଙ୍ଗ୍ ଜବର୍ ଦସ୍ତିକିଜି ଅଜିମାଚି ଟିକ୍ ସମୟତିଙ୍ଗ୍ ନିର୍ବାସନ ୱେଚ୍ଚି ମାଚାର୍।
ଆରେ ଯଦି ପାପ୍ କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ଚାକର୍ ଆଦେଙ୍ଗ୍ ଜେକନି ଦେସ୍ତାକେ ପକ୍ତାର୍, ଆତିସ୍ପା ହେୱାନ୍ ହେୱାରିଙ୍ଗ୍ କି ତା ପାର୍ମାଣ୍ ୱିଜୁ ବାଣାଆୱାଦାଙ୍ଗ୍ ମାଚାନ୍। ଈଶ୍ୱର ତା ମାନାୟାରିଙ୍ଗ୍ ଦେକାଶୁଣା କିଜି ମାଚାନ୍ ଆରେ ତା ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାର୍ତାଙ୍ଗ୍ ହେୱାରିଙ୍ଗ୍ ବେଣ୍ ୱେଚ୍ଚି ମାଚାନ୍। ହେୱାନ୍ ପାର୍ମାଣ୍ କିତାନ୍ ଯେ, ସତୁରି ବାର୍ହୁ ପାଚେ ହେୱାର୍ ଆରେରଗ ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତି ଦେସ୍ତାକେ ଲେଉଟାଆଜି ୱାନାର୍।
ସତୁରି ବାର୍ହୁ ପାଚେ, ପାରସ୍ୟ ରାଜା ସାଇରସ ବାବିଲନ ଦେସ୍ତିଙ୍ଗ୍ ଆରାୟ୍ କିତାନ୍, ଲାଗିଙ୍ଗ୍ ପାରସ୍ୟ ରାଜି ବାବିଲୋନନି ମାନାୟାର୍ ରାଜିନି ବାହା ଅତାନ୍। ନଙ୍ଗୟ୍ ଇସ୍ରାଏଲନି ମାନାୟାରିଙ୍ଗ୍ ଯିହୁଦି ଇଞ୍ଜି ୱେଚ୍ଚାର୍ ଆରେ ହେୱାର୍ ତା ୱିଜୁ ଜିବୁନ୍ ବାବିଲନ ଦେସ୍ତାକେ ବାହା କିତାର୍।ଆପ୍କା ଅଲପ୍ ବୁଡ଼ା ଯିଜୁଦି ଯିହିଦା ରାଜିତିଙ୍ଗ୍ ଏତୁ କିତାର୍।
ପାରସ୍ୟ ରାଜି ବାଡ଼୍କାସ୍ ମାଚାତ୍ ମାତର୍ ଇଦାଙ୍ଗ୍ ଇମ୍ଣାକାରିଙ୍ଗ୍ ଜିତାଆଜି ମାଚାତ୍ ଲାଗିଙ୍ଗ୍ ମାନାୟାର୍ କାଜିଙ୍ଗ୍ ଦୟା ମାଚାନ୍। ସାଇରସ ତର୍ଦାକାନ୍ ପାରସ୍ୟନି ରାଜା ଆତି ଅଲପ୍ ସମୟ ବିତ୍ରେ, ହେୱାନ୍ ର ଆଦେସ୍ ହିତାନ୍ ଯେ ଇନେର୍ ପାରସ୍ୟ ଦେସ୍ ପିସ୍ତି ଯିହୁଦା ଦେସ୍ତାକେ ଲେଉଟାଆଜି ହାଞ୍ଜେଙ୍ଗ୍ ଇଚାକିନାନ୍ ହେୱାର୍ ହେବେ ଲେଉଟାଆଜି ହାଞ୍ଜେଙ୍ଗ୍ ଆଡ୍ନାର୍। ହେୱାନ୍ ଇଲେକେ ମନ୍ଦିର୍ ଆରେରଗ ରହ୍ନି କାଜିଙ୍ଗ୍ ଡାଡୁଙ୍ଗ୍ ହିତାନ୍! ଲାଗିଙ୍ଗ୍ ଚାକର୍ତାକେ ସତୁରି ବାର୍ହୁ ମାତି ପାଚେ, ଯିହୁଦିନି ମାନାୟାର୍ ର ହିରୁ ଦଳ୍ ଯିହୁଦାତାକେ ମାନି ଯିରୁଶାଲାମ ସହର୍ତାକେ ଲେଉଟାଆଜି ହାଚାର୍।
ଏଚେପାଦ୍ନା ମାନାୟାର୍ ଯିରୁଶାଲାମ ସହର୍ତାକେ ଇକାତାର୍, ହେୱାର୍ ମନ୍ଦିର୍ ଆରେ ଦେସ୍ ଚାରିବେଣ୍ତାଙ୍ଗ୍ ମାନି ବାଉଣ୍ଡେରି ଆରେରଗ ରସ୍ତାର୍। ଯଦି ହେୱାର୍ ନଙ୍ଗୟ ପାତେକ୍ ଜେକନି ମାନାୟାର୍ତାଙ୍ଗ୍ ସାସନ୍ କିୟାଆଜି ମାଚାର୍, ଆରେରଗ ହେୱାର୍ ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତି ଦେସ୍ତାକେ ବାହା କିତାର୍ ଆରେ ମନ୍ଦିର୍ତାକେ ହେବା କିତାର୍।
ବାଇବଲ୍ବି ର କାତା: ୨ ରାଜାବଳୀ ୧୭: ୨୪- ୨୫; ୨ ବଂଶାବଳୀ ୩୬`; ଏଜ୍ରା୧- ୧୦; ନିହିମିୟା ୧- ୧୦
Free to use, adapt, and share under an open license (CC BY-SA 4.0).