21. ୨୧. ଈଶ୍ୱର ଖ୍ରୀଷ୍ଟଙ୍ଗ୍ ପାର୍ମାଣ୍ କିତାନ୍
ଆରମ୍ତାଙ୍ଗ୍ ନେ ଈଶ୍ୱର ଖ୍ରୀଷ୍ଟଙ୍ଗ୍ ପକ୍ତିନି କାଜିଙ୍ଗ୍ ଯଜ୍ନା କିଜି ମାଚାନ୍। ଖ୍ରୀଷ୍ଟ ବିଷୟରେ ପାର୍ତୁମ୍ ପାର୍ମାଣ୍ ଆଦମ ଆରେ ହବା ଲାଗାୟ୍ ୱାଜି ମାଚାତ୍। ଈଶ୍ୱର ପାର୍ମାଣ୍ କିତାନ୍ ଯେ ହବା ଲାତ୍ରାତାଙ୍ଗ୍ ରକାନ୍ ଜନମ୍ ଆନାନ୍ ହେୱାନ୍ ରାଚ୍ନି କାପ୍ଡ଼ାତିଙ୍ଗ୍ ଗୁଣ୍ଡା କିନାନ୍। ହବାଙ୍ଗ୍ ଇମ୍ଣି ରାଚ୍ ଟକାଇ କିଜି ମାଚାତ୍ ହେ ରାଚ୍ ଶୟତାନ ମାଚାତ୍। ପାର୍ମାଣ୍ନି ଅର୍ତ ମାଚାତ୍ ଯେ ଖ୍ରୀଷ୍ଟ ଶୟତାନତିଙ୍ଗ୍ ପୁରାପୁରି ବାବ୍ରେ ଆରାୟ୍ କିନାନ୍।
ଈଶ୍ୱର ଅବ୍ରାହାମତିଙ୍ଗ୍ ପାର୍ମାଣ୍ କିଜି ମାଚାନ୍ ଯେ ହେୱାନ୍ କାଜିଙ୍ଗ୍ ପୁର୍ତିନି ୱିଜୁ ମାନାୟାର୍ ଆଶ୍ରିବାଦ୍ ପାୟାଆନାର୍। ଇଆଶ୍ରିବାଦ୍ ପୁରା ଆନାତ୍ ଏଚେପାଦ୍ନା ଖ୍ରୀଷ୍ଟ ବବିଷତ୍ରେ ର ଦିନ୍ ୱାନାନ୍। ପୁର୍ତିତାକେ ମାନି ୱିଜୁ ମାନାୟାର୍ ଉଦାର୍ ପାୟାଆନି କାଜିଙ୍ଗ୍ ହେୱାନ୍ ଇଦାଙ୍ଗ୍ ପୁରା କିନାନ୍।
ଈଶ୍ୱର ମୋଶାଙ୍ଗ୍ ପାର୍ମାଣ୍ କିଜି ୱେଚ୍ଚାନ୍ ଯେ ବବିଷତ୍ରେ ହେୱାନ୍ ମୋଶା ଲେକେ ରକାନ୍ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ତିଙ୍ଗ୍ ନିଲି କିନାନ୍। ଖ୍ରୀଷ୍ଟ ବିଷୟରେ ଇଦାଙ୍ଗ୍ ଜେକନି ର ପାର୍ମାଣ୍ ହେୱାନ୍ ପାଚେନି ସମୟତ ଦିନେକ୍ ୱାନାନ୍।
ଈଶ୍ୱର ରାଜା ଦାଉଦତିଙ୍ଗ୍ ପାର୍ମାଣ୍ କିଜି ମାଚାନ୍ ଯେ ତା ଲାତ୍ରାର୍ ବିତ୍ରେତାଙ୍ଗ୍ ରକାନ୍ ଈଶ୍ୱର ମାନାୟାର୍ କାଜିଙ୍ଗ୍ ୱିଜ୍ୱିଦିନ୍ ପାତେକ୍ ରାଜା ଆନାନ୍। ହେଦାଙ୍ଗ୍ ଇଲେକେ ବୁଜାଇ କିନାତା ଯେ ଖ୍ରୀଷ୍ଟ ରାଜା ଦାଉଦନି ଲାତ୍ରା ବିତ୍ରେତାଙ୍ଗ୍ ରକାନ୍ ଆନାନ୍।
ଯିରିମିୟ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ତାଙ୍ଗ୍ ଈଶ୍ୱର ପାର୍ମାଣ୍ କିତାନ୍ ଯେ ହେୱାନ୍ ର ପୁନି ନିୟମ୍ କିନାନ୍, ମାତର୍ ଈଶ୍ୱର ଇସ୍ରାଏଲ ହୁଦାଙ୍ଗ୍ ସୀନୟ ମାଡ଼ିତାକେ ଇମ୍ଣି ନିୟମ୍ କିଜି ମାଚାନ୍ ହେଲେକେ ନିୟମ୍ ଆକାୟ୍। ପୁନି ନିୟମ୍ତାକେ, ଈଶ୍ୱର ମାନାୟାର୍ ଗରବ୍ତାକେ ତା ଦରମ୍ ସାସ୍ତର୍ ଲେକିକିନାନ୍, ମାନାୟାର୍ ନିଜେ ଈଶ୍ୱରତିଙ୍ଗ୍ ପୁନାର୍, ହେୱାର୍ ତା ମାନାୟ୍ ଆନାର୍ ଆରେ ଈଶ୍ୱର ହେୱାର୍ କିତି ପାପ୍ତିଙ୍ଗ୍ କେମା କିନାନ୍। ଖ୍ରୀଷ୍ଟ ପୁନି ନିୟମ୍ ଆରମ୍ କିନାନ୍।
ଈଶ୍ୱରତି ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଆରେ ପା ୱେଚ୍ଚାନ୍, ଖ୍ରୀଷ୍ଟ ରକାନ୍ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍, ପୁଜାରି ଆରେ ରାଜା ପା ଆନାନ୍। ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଆନାନା ହେ ମାନାୟ୍ ହେୱାନ୍ ଈଶ୍ୱର କାତା ୱେନ୍ଞ୍ଜି ହେ କାତାତିଙ୍ଗ୍ ମାନାୟାରିଙ୍ଗ୍ ୱେଚ୍ନାନ୍। ଈଶ୍ୱର ପକ୍ତେଦେଙ୍ଗ୍ ପାର୍ମାଣ୍ କିଜିମାଚି ଖ୍ରୀଷ୍ଟ ରକାନ୍ ହାର୍ଦି ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଆନାନ୍।
ଇସ୍ରାଏଲନି ପୁଜାରିର୍ ଈଶ୍ୱର ଲାଗାୟ୍ ମାନାୟ୍ ନିପଣ୍ଡାଙ୍ଗ୍ ହେୱାର୍ ପାପ୍ନି ଦଣ୍ଡ୍ କାଜିଙ୍ଗ୍ ବାଦୁଲ୍ ଲେକେ ବଲି ପୁଜା କିଜି ମାଚାର୍। ପୁଜାରିର୍ ପା ମାନାୟାର୍ କାଜିଙ୍ଗ୍ ଈଶ୍ୱର ଲାଗାୟ୍ ପାର୍ତାନା କିଜି ମାଚାର୍। ଖ୍ରୀଷ୍ଟ ଆନାନା ହାର୍ଦି ପୁଜାରି ଇନେର୍ ଜାର୍ତିଙ୍ଗ୍ ଈଶ୍ୱର ର ହାର୍ଦି ବଲି ପୁଜା ଲେକେ ହିନାନ୍।
ରକାନ୍ ରାଜା ହେ ମାନାୟ୍ ଆନାନା ଇନେର୍ ର ରାଜି ଜପି ସାସନ୍ କିନାନ୍ ଆରେ ତା ମାନାୟାରିଙ୍ଗ୍ ବିଚାର୍ କିନାନ୍। ଖ୍ରୀଷ୍ଟ ରକାନ୍ ହାର୍ଦି ରାଜା ଆନାନ୍ ହେୱାନ୍ ତା ଆକଦାଦି ଦାଉଦନି ସିହାଂସନ୍ତାକେ କୁଚ୍ନାନ୍। ହେୱାନ୍ ୱିଜୁ ପୁର୍ତିତାକେ ୱିଜୁଦିନ୍ ସାସନ୍ କିନାନ୍, ଆରେ ୱିଜୁଦିନ୍ ଟିକ୍ ବାବ୍ରେ ବିଚାର୍ କିନାନ୍ ଆରେ ଟିକ୍ ଇଚା ଅନାନ୍।
ଈଶ୍ୱର ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାର୍ କେତେକ୍ ଜେକନି ବିଷୟରେ ୱିଜୁ ଖ୍ରୀଷ୍ଟ ବିଷୟରେ ୱେଚ୍ଚି ମାଚାର୍। ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ମଲାଖି ଆଗେ ୱେଚ୍ଚି ମାଚାନ୍ ଯେ ଖ୍ରୀଷ୍ଟ ଆନି ଆଗେ ରକାନ୍ ଗାଜା ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ୱାନାନ୍। ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଯିଶାଇୟ ୱେଚ୍ଚି ମାଚାନ୍ ଯେ ଖ୍ରୀଷ୍ଟ ରଞ୍ଜେଲ୍ ଜିପଲି ଗାଡ଼୍ଚେ ପଟତାଙ୍ଗ୍ ଜନମ୍ ଆନାନ୍। ମୀଖା ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ୱେଚ୍ଚାନ୍ ଯେ ହେୱାନ୍ ବେଥଲିହିମ ସହର୍ତାକେ ଜନମ୍ ଆନାନ୍
ଯିଶାଇୟ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ୱେଚ୍ଚାନ୍ ଯେ ଖ୍ରୀଷ୍ଟ ଗାଲିଲୀ ଜିଲ୍ଲାତାକେ ବାହା କିନାନ୍, ଗରବ୍ ବାଙ୍ଗାଆତି ମାନାୟାରିଙ୍ଗ୍ ବୁଜାଇ କିନାନ୍, ଆରେ ବନ୍ଦିଆତି ମାନାୟାରିଙ୍ଗ୍ ମୁକ୍ତି କିଦେଙ୍ଗ୍ ୱେଚ୍ନାନ୍ ଆରେ ବନ୍ଦି ଆତାକାରିଙ୍ଗ୍ ଉଦାର୍ କିନାନ୍। ହେୱାନ୍ ଆରେ ପା ଈଶ୍ୱର କାତା ଚଚ୍ଚି ୱେଚ୍ଚାନ୍ ଯେ ହେୱାନ୍ ରଗିୟାରିଙ୍ଗ୍ ଇମ୍ଣାକାର୍ ୱେଞ୍ଜେଙ୍ଗ୍ ଆଡୁର୍, ହୁଡ଼୍ଦେଙ୍ଗ୍ ଆଡୁର୍, ବେଣ୍ କିଦେଙ୍ଗ୍ ଆଡୁର୍ ଆରେ ତାଙ୍ଗ୍ଦେଙ୍ଗ୍ ଆଡ୍ୱି ମାନାୟାରିଙ୍ଗ୍ ହାର୍ କିନାନ୍।
ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଯିଶାଇୟ ପା ଈଶ୍ୱର କାତା ଚଚ୍ଚି ୱେଚ୍ଚାନ୍ ଯେ ଖ୍ରୀଷ୍ଟଙ୍ଗ୍ ଗିଣ୍ କିନାର୍ ଆରେ ବିନା ଦସ୍ରେ ମାର୍ନେ ଅହ୍ନାର୍। ଜେକନି ଈଶ୍ୱରତାଙ୍ଗ୍ ୱେଚି ବେନ୍ତିଙ୍ଗ୍ ୱେଚ୍ନି ମାନାୟ୍ ଈଶ୍ୱର କାତା ଚଚ୍ଚି ୱେଚ୍ଚାନ୍ ଯେ ଇମ୍ଣାକାର୍ ଖ୍ରୀଷ୍ଟଙ୍ଗ୍ ମାର୍ନେ ଅସ୍ତାର୍ ହେୱାର୍ ତା ହେନ୍ଦ୍ରାପାଟା କାଜିଙ୍ଗ୍ ଲାଟ୍ରି ପୁଟାଇ କିନାର୍ ଆରେ ରକାନ୍ ତା ସାଙ୍ଗହି ହେୱାନିଙ୍ଗ୍ ଶତ୍ରୁ କେଇଦ ଆହିକିନାନ୍। ଯିଖରିୟ ଈଶ୍ୱରତାଙ୍ଗ୍ ୱେଚି ବେନ୍ତିଙ୍ଗ୍ ୱେଚ୍ନି ମାନାୟ୍ ଈଶ୍ୱର କାତା ଚଚ୍ଚି ୱେଚ୍ଚାନ୍ ଯେ ଖ୍ରୀଷ୍ଟଙ୍ଗ୍ ଶତ୍ରୁ କେଇଦ ଆହିକିତି କାଜିଙ୍ଗ୍ ହେ ସାଙ୍ଗହିଙ୍ଗ୍ ତିରିସ୍ ଗଟା ରୁପା ଡାବୁଙ୍ଗ୍ ହିନାର୍।
ଈଶ୍ୱରତାଙ୍ଗ୍ ୱେଚି ବେନ୍ତିଙ୍ଗ୍ ୱେଚ୍ନି ମାନାୟାର୍ ଆରେ ପା ୱେଚ୍ଚି ମାଚାନ୍ ଖ୍ରୀଷ୍ଟ ଇନେସାଜି ହାଃନାନ୍। ଯିଶାଇୟ ଈଶ୍ୱର କାତା ଚଚ୍ଚି ୱେଚ୍ଚାନ୍ ଯେ ମାନାୟାର୍ ଖ୍ରୀଷ୍ଟ ଜପି ଚୁପ୍ନାର୍, ହେୱାନିଙ୍ଗ୍ ଗାୟ୍ନାର୍, ଆରେ ହେୱାନିଙ୍ଗ୍ ଲାତ୍ ବିଦା କିତାର୍। ହେୱାର୍ ହେୱାନିଙ୍ଗ୍ କୁଟିଙ୍ଗ୍ ହୁଦାଙ୍ଗ୍ କୃଶକାଟ୍ତାକେ ଇଡ଼୍ନାର୍ ଆରେ ହେୱାନ୍ ବେସି ଦୁକ୍କଷ୍ଟ ଆରେ ନନାକାଦିଙ୍ଗ୍ ଆଡ୍ୱାଦାଙ୍ଗ୍ ହାଃନାନ୍ ମାତର୍ ହେୱାନ୍ ଇନା ବୁଲ୍ ପା କିୱାଦାଙ୍ଗ୍ ମାଚାନ୍।
ଈଶ୍ୱରତାଙ୍ଗ୍ ୱେଚି ବେନ୍ତିଙ୍ଗ୍ ୱେଚ୍ନି ମାନାୟାର୍ ଆରେ ପା ୱେଚ୍ଚାର୍ ଯେ ଖ୍ରୀଷ୍ଟ ହାର୍ଦାକାନ୍ ଆନାନ୍ ହେୱାନିଙ୍ଗ୍ ଇନା ପାପ୍ ମାନ୍ଗୁତ୍। ହେୱାନ୍ ଜେକନି ମାନାୟାର୍ ପାପ୍ନି ଦଣ୍ଡ୍ ପାୟାଆନି କାଜିଙ୍ଗ୍ ହାଃନାନ୍। ତା ଦଣ୍ଡ୍ ଈଶ୍ୱର ଆରେ ମାନାୟାର୍ ବିତ୍ରେ ଶାନ୍ତି ତାସି ୱାନାନ୍।ଇଦାଙ୍ଗ୍ କାଜିଙ୍ଗ୍ ଖ୍ରୀଷ୍ଟଙ୍ଗ୍ କୃଶକାଟ୍ତାକେ କୁଟିଙ୍ଗ୍ ଇଡ଼୍ନି କାଜିଙ୍ଗ୍ ଈଶ୍ୱର ଇଚା କିଜି ମାଚାନ୍।
ଈଶ୍ୱରତାଙ୍ଗ୍ ୱେଚି ବେନ୍ତିଙ୍ଗ୍ ୱେଚ୍ନି ମାନାୟାର୍ ଈଶ୍ୱର କାତା ଚଚ୍ଚି ୱେଚାର୍ ଯେ ଖ୍ରୀଷ୍ଟ ହାଃନାନ୍ ଆରେ ଈଶ୍ୱର ହେୱାନିଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି ନିକ୍ନାନ୍। ଖ୍ରୀଷ୍ଟ ହାଃଜି ଆରେରଗ ଜିବୁନ୍ଆତି କାଜିଙ୍ଗ୍ ପାପି ମାନାୟାରିଙ୍ଗ୍ ଉଦାର୍ କିନାନ୍ ଆରେ ର ପୁନି ନିୟମ୍ ଆରମ୍ କିନି କାଜିଙ୍ଗ୍ ଈଶ୍ୱର କିତି ଉପାୟ୍ତିଙ୍ଗ୍ ପୁରା କିନାନ୍।
ଈଶ୍ୱର ଖ୍ରୀଷ୍ଟ ବିଷୟରେ ଈଶ୍ୱରତାଙ୍ଗ୍ ୱେଚି ବେନ୍ତିଙ୍ଗ୍ ୱେଚ୍ନି ମାନାୟାରିଙ୍ଗ୍ କେତେକ୍ ବିଷୟରେ ୱେଚ୍ଚାନ୍, ମାତର୍ ଖ୍ରୀଷ୍ଟ ଇ ୱିଜୁ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାର୍ ବିତ୍ରେତାଙ୍ଗ୍ ଇମ୍ଣି ରକାନ୍ ମାନାୟ୍ ସମୟ୍ରେ ପା ୱାୱାଦାଙ୍ଗ୍ ମାଚାନ୍। ଇ ୱିଜୁ ଈଶ୍ୱର କାତା ହିନି ୪୦୦ତାଙ୍ଗ୍ ଆଦିକ୍ ବାର୍ହୁ ପାଚେ, ଟିକ୍ ସମୟ୍ତ ଈଶ୍ୱର ଜଗତ୍ତାକେ ଖ୍ରୀଷ୍ଟଙ୍ଗ୍ ପକ୍ତାତାନ୍।
ବାଇବଲ୍ନି ର କାତା: ଆଦି ୩: ୧୫; ୧୨: ୧- ୩; ଦ୍ୱିତୀୟ ବିବରଣ ୧୮: ୧୫; ୨ଶାମୁୟେଲ ୭; ଯିରିମିୟ ୩୧; ଯଶାଇୟ ୫୯: ୧୬; ଦାନିୟେଲ ୭; ମଲାଖି ୪: ୫ ଯିଶାଇୟ ୭: ୧୪; ମୀଖା ୫: ୨; ଯିଶାଇୟ ୯: ୧- ୭; ୩୫: ୩- ୫; ୬୧; ୫୩; ଗିତସଂହିତା ୨୨: ୧୮; ୩୫: ୧୮; ୬୯: ୪; ଯିଖରିୟ ୧୧: ୧୨- ୧୩; ଯିଶାଇୟ ୫୦:୬; ଗୀତସଂହିତା ୧୬: ୧୦- ୧୧
Free to use, adapt, and share under an open license (CC BY-SA 4.0).