22. ୨୨. ଡୁବନ୍ ହିନି ଯୋହନ ଜନମ୍ ଆତାନ୍
ଆଗେ ଈଶ୍ୱର ତା ମାନାୟାରିଙ୍ଗ୍ ତା ଦୁତ୍କୁ ଆରେ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାର୍ତାଙ୍ଗ୍ ବେଣ୍ ୱେଚ୍ଚି ମାଚାନ୍। ମାତର୍ ୪୦୦ବାର୍ହୁ ଆତାତ୍ ମାତର୍ ନଙ୍ଗ୍ ପାତେକ୍ ହେୱାନ୍ ହେୱାରିଙ୍ଗ୍ ବେଣ୍ ୱେଚ୍ୱାତାନ୍। ହେଦାପ୍ରେ ର ଦୁତ୍ ଈଶ୍ୱରତାଙ୍ଗ୍ ର କାବୁର୍ ତାହିୱାଜି ଯିଖରିୟ ତର୍ଦି ର ବୁଡ଼ା ପୁଜାରି ଲାଗାୟ୍ ୱାତାତ୍। ଯିଖରିୟ ଆରେ ତା ଡକ୍ରୁହି ଏଲିଶାବେଥ ଈଶ୍ୱରତିଙ୍ଗ୍ ହେବା କିନି ମାନାୟାର୍ ମାଚାର୍, ମାତର୍ ହେଦେଲ୍ ହିମ୍ଣା ଜନମ୍ କିନି କାଜିଙ୍ଗ୍ ବେସି ବୁଡି ଆଜି ମାଚାତ୍।
ଦୁତ୍ ଯିଖରିୟଙ୍ଗ୍ ୱେଚଚାତ୍, “ନି ଡକ୍ରୁଦି ର ହିମ୍ଣାତିଙ୍ଗ୍ ଜନମ୍ ହିନାତ୍। ଏପେଙ୍ଗ୍ ହେୱାନିଙ୍ଗ୍ ଯୋହନ ଇଞ୍ଜି ତର୍ ହିନାଦେର୍।” ହେୱାନ୍ ପବିତ୍ର ଆତ୍ମାତାଙ୍ଗ୍ ପୁରା ଆନାନ୍ ଆରେ ଖ୍ରୀଷ୍ଟ କାଜିଙ୍ଗ୍ ମାନାୟାରିଙ୍ଗ୍ ଜାଗ୍ରତ୍ କିୟିକିନାନ୍। ଯିଖରିୟ ୱେଚ୍ଚାନ୍, “ଆନେଙ୍ଗ୍ ଆରେ ନା ଡକ୍ରି ହିମ୍ଣାତିଙ୍ଗ୍ ଜନମ୍ କିନି କାଜିଙ୍ଗ୍ ବେସି ବୁଡ଼୍ହି ଆତାପେ! ଇଦାଙ୍ଗ୍ ଗିଟାଆନାତ୍ ଇଞ୍ଜି ଆନେଙ୍ଗ୍ ଇନେସ୍ କିଜି ପୁନାଙ୍ଗ୍?”
ଦୁତ୍ ଯିଖରିୟଙ୍ଗ୍ ୱେଚ୍ଚାତ୍, “ଇ ହାର୍ଦି ବେଣ୍ ନିଙ୍ଗେଙ୍ଗ୍ ୱେଚ୍ଚେଦେଙ୍ଗ୍ ଈଶ୍ୱର ନାଙ୍ଗେଙ୍ଗ୍ ପକ୍ତାତାନ୍ନା। ଇନେସ୍କି ଏନେଙ୍ଗ୍ ନାବେ ପାର୍ତି କିୱାତାଇ ଲାଗିଙ୍ଗ୍ ହିମ୍ଣା ଜନମ୍ ଆନି ପାତେକ୍ ଏନେଙ୍ଗ୍ ବେଣ୍ କିଦେଙ୍ଗ୍ ଆଡୁଇ।” ହେଦାପ୍ରେ ଯିଖରିୟ ବେଣ୍ କିଦେଙ୍ଗ୍ ଆଡ୍ୱାତାନ୍। ତାପାଚେ ହେ ଦୁତ୍ ହେୱାନିଙ୍ଗ୍ ପିସ୍ତି ହାଚାତ୍। ଇଦାଙ୍ଗ୍ ପାଚେ ଯିଖରିୟ ଇଞ୍ଜ ଲେଉଟାଆଜି ହାଚାନ୍ ଆରେ ତା ଡକ୍ରୁହି ଗାଗାଡ଼୍ତ ଆତାତ୍।
ଏଚେପାଦ୍ନା ଏଲିଶାବେଥ ଗାଗାଡ଼୍ତ ଚଅ ମାସ୍ ଆତାତ୍, ହେ ଦୁତ୍ ଏଲିଶାବେଥନି ଜଣାଶୁଣା ମାନାୟ୍ତିଙ୍ଗ୍ ଚଞ୍ଜି ଆତାନ୍ ହେଦେଲ୍ ତର୍ ମରିୟମ ମାଚାତ୍। ହେଦେଲ୍ ରଞ୍ଜେଲ୍ ଜିପଲି ଗାଡ଼୍ଚେ ମାଚାତ୍ ଆରେ ଯୋଷେଫ ତର୍ଦି ରକାନିଙ୍ଗ୍ ବିବା ଆନି କାଜିଙ୍ଗ୍ ମାଲା କିଜି ମାଚାର୍। ଦୁତ୍ ୱେଚ୍ଚାତ୍, “ଏନେଙ୍ଗ୍ ପଟଆଜି ର ହିମ୍ଣା ଜନମ୍ କିନାୟ୍। ଏନେଙ୍ଗ୍ ହେୱାନିଙ୍ଗ୍ ଯୀଶୁ ତର୍ ହିନାୟ୍। ହେୱାନ୍ ୱିଜୁତାଙ୍ଗ୍ ଗାଜା ଈଶ୍ୱର ହିମ୍ଣା ଆନାନ୍ ଆରେ ୱିଜ୍ୱିଦିନ୍ ପାତେକ୍ ସାସନ୍ କିନାନ୍।“
ମରିୟମ ୱେଚ୍ଚାତ୍, “ଇଦାଙ୍ଗ୍ ଇନେସ୍ ଆନାତ୍, ଇନେସ୍କି ଆନେଙ୍ଗ୍ ରଞ୍ଜେଲ୍ ଜିପଲି ଗାଡ଼୍ଚେ?” ହେଦେଲିଙ୍ଗ୍ ଦୁତ୍ ବୁଜାଇକିଜି ୱେଚ୍ଚାତ୍, “ପବିତ୍ର ଆତ୍ମା ନି ଜପି ୱାନାତ୍, ଆରେ ଈଶ୍ୱର ଶାକ୍ତି ନି ଜପି ୱାନାତ୍। ଲାଗିଙ୍ଗ୍ ହେ ହିମ୍ଣା ପବିତ୍ର ଆରେ ଈଶ୍ୱର ହିମ୍ଣା ଆନାନ୍।” ଦୁତ୍ ହେଦେଲିଙ୍ଗ୍ ଇନାକା ୱେଚ୍ଚି ମାଚାତ୍ ମରିୟମ ହେଦାଙ୍ଗ୍ ପାର୍ତିକିଜି ଆସ୍ତାତ୍।
ଦୁତ୍ ମରିୟମତିଙ୍ଗ୍ ୱେଚ୍ଚି ୱିସ୍ତି ପାଚେ, ହେଦେଲ୍ ହାଲ୍ଜି ଏଲିଶାବେଥତିଙ୍ଗ୍ ଡେକ୍ତାତ୍। ଏଲିଶାବେଥ ମରିୟମ ଜୱାର୍ କିତାକା ୱେଚି ଦାପ୍ରେ ଏଲିଶାବେଥନି ପଟତ ମାନି ହିମ୍ଣା ଏନ୍ଦ୍ତାତ୍। ହେୱେକ୍ କାଜିଙ୍ଗ୍ ଈଶ୍ୱର ଇନାକା କିଜିମାଚାନ୍ ହେ ବିଷୟତିଙ୍ଗ୍ ବାବିକିଜି କଗ୍ଲେକ୍ ରବେ ୱାରି କିତିକ୍। ମରିୟମ ଏଲିଶାବେଥତିଙ୍ଗ୍ ଗିଟାଆଜି ତିନ୍ ମାସ୍ ପାଚେ ମରିୟମ ତାଞ୍ଜ ହାଚାତ୍।
ଏଲିଶାବେଥ ତା ହିମ୍ଣାତିଙ୍ଗ୍ ଜନମ୍ କିଜି ୱିସ୍ତି ପାଚେ, ଯିଖରିୟ ଆରେ ଏଲିଶାବେଥ, ଦୁତ୍ ହିଜିମାଚି ଆଦେସ୍ ଲେକେ ହେ ହିମ୍ଣାତିଙ୍ଗ୍ ଯୋହନ ତର୍ ହିତାର୍। ତାପାଚେ ଈଶ୍ୱର ଯିଖରିୟଙ୍ଗ୍ ବେଣ୍ ୱେଚ୍ନି କାଜିଙ୍ଗ୍ ଆରେରଗ ବେଣ୍ କିଦେଙ୍ଗ୍ ହିତାନ୍। ଯିଖରିୟ ୱେଚ୍ଚାନ୍, “ଈଶ୍ୱରତିଙ୍ଗ୍ ଜୟ୍-ଜୟ୍ ଆୟେତ, ଇନେସ୍କି ହେୱାନ୍ ଜାର୍ ମାନାୟାରିଙ୍ଗ୍ ପୁଚାନ୍ନା! ନା ମାଜି ମିଙ୍ଗେଙ୍ଗ୍ ୱିଜୁତାଙ୍ଗ୍ ଗାଜା ଈଶ୍ୱରତି ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଇଞ୍ଜି ମାନାୟାର୍ କୁକ୍ନାର୍ ମାନାୟାର୍ ଇନେସ୍ ବାବ୍ରେ ହେୱାର୍ ତା ପାପ୍ କାଜିଙ୍ଗ୍ କେମା ପାୟାଆନାର୍ ହେଦାଙ୍ଗ୍ ହେୱାନ୍ ହେୱାରିଙ୍ଗ୍ ୱେଚ୍ନାନ୍।”
ବାଇବଲ୍ତାଙ୍ଗ୍ ର କାତା: ଲୁକ ୧
Free to use, adapt, and share under an open license (CC BY-SA 4.0).