24. ୨୪. ଯୋହନ ଯୀଶୁଙ୍ଗ୍ ଡୁବନ୍ ହିନାନା
ଯିଖରିୟ ଆରେ ଏଲିଶାବେଥନି ହିମ୍ଣା ଯୋହନ ଗାଜାଆଜି ରକାନ୍ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଆତାନ୍। ହେୱାନ୍ ଟାଙ୍ଗ୍ରାବାହାତାକେ ବାହା କିତାନ୍, ରାନ୍ ପୁକି ଆରେ ତିନିଆନି ପାମିଙ୍ଗ୍ ତିନ୍ଞ୍ଜି ମାଚାନ୍, ଆରେ ଉଟ୍ ତେମୁଲ୍ନି ଆଙ୍ଗି ଉସ୍ପିସ୍ ମାଚାନ୍।
ବେସିହେନି ମାନାୟାର୍ ଯୋହନ ବେଣ୍ ୱେନି କାଜିଙ୍ଗ୍ ଟାଙ୍ଗ୍ରାବାହାତାକେ ୱାଜି ମାଚାର୍। ହେୱାନ୍ ହେୱାରିଙ୍ଗ୍ ଈଶ୍ୱର କାତା ଶୁଣାୟ୍ କିଜି ୱେଚ୍ଚାନ୍, “ପାପ୍ କାମାୟ୍ ପିସ୍ତି ମାପୃତାକେ ୱାଡ, ଇନେସ୍କି ଈଶ୍ୱର ସାସନ୍କିନି ରାଜି ଲାଗେ ୱାତାତେ!”
ଏଚେପାଦ୍ନା ମାନାୟାର୍ ଯୋହନ ବେଣ୍ ୱେଚାର୍, ହେୱାର୍ ବିତ୍ରେତାଙ୍ଗ୍ କେତେକ୍ ହେନି ହେୱାର୍ କିତି ପାପ୍ତିଙ୍ଗ୍ ପିସ୍ତାର୍, ଆରେ ଯୋହନ ହେୱାରିଙ୍ଗ୍ ଡୁବନ୍ ହିତାନ୍। କେତେକ୍ ଦାର୍ମି ନେତା ପା ଯୋହନତାଙ୍ଗ୍ ଡୁବନ୍ ଅଦେଙ୍ଗ୍ ୱାତାର୍, ମାତର୍ ହେୱାର୍ ମାନ୍ ବାଦ୍ଲାୟ୍ କିୱାଦାଙ୍ଗ୍ ମାଚାର୍ କି ହେୱାର୍ କିତି ପାପ୍ତିଙ୍ଗ୍ ୱେଚ୍ୱାଦାଙ୍ଗ୍ ମାଚାର୍।
ଯୋହନ ହେ ଦାର୍ମି ନେତାରିଙ୍ଗ୍ ୱେଚ୍ଚାନ୍, “ଏ ବିସ୍ମାନି ରାଚ୍ନି ଲାତ୍ରା କାଦେର୍! ଏତ୍ କିୟାଟ୍ ଆରେ ମି ବ୍ୟବହାର୍ତିଙ୍ଗ୍ ବାଦ୍ଲାୟ୍ କିୟାଟ୍।ଇମ୍ଣି ମାର୍ ହାର୍ଦି ପାଡ଼୍ ଆହୁତ୍ ହେଦାଙ୍ଗ୍ତିଙ୍ଗ୍ ହଣ୍ଜି ନାଣିତାକେ ତୁସିହିୟାଆନାତ୍।” ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାର୍ ଇନା-ଇନା ତା ବିଷୟରେ ୱେଚ୍ଚି ମାଚାର୍ ଯୋହନ ହେଦାଙ୍ଗ୍ ପୁରା କିତାନ୍, “ହୁଡ଼ାଟ୍ ଆନେଙ୍ଗ୍ ମି ଆଗେ ଦୁତ୍କୁ ଦଳ୍ତିଙ୍ଗ୍ ପକ୍ତାନାଙ୍ଗା ହେୱେକ୍ ମି ହାଜି ରହ୍ନିକ୍।”
କେତେକ୍ ଯିହୁଦିର୍ ଯୋହନତିଙ୍ଗ୍ ହେୱାନ୍ ଖ୍ରୀଷ୍ଟ କି ଇଞ୍ଜି ୱେନ୍ବାତାର୍। ଯୋହନ ୱେଚ୍ଚାନ୍, “ଆନେଙ୍ଗ୍ ଖ୍ରୀଷ୍ଟ ଆକାୟ୍, ମାତର୍ ନା ପାଚେ ରକାନ୍ ୱାନାନା। ହେୱାନ୍ ଏଚେକ୍ ଗାଜା ଆନେଙ୍ଗ୍ ତା କାଲ୍ନି ପାଣ୍ଡାଇନି ଗାଟି ରିକ୍ତେଙ୍ଗ୍ ଜଗ୍ୟ ଆକାୟ୍।”
ତାଆର୍କାତ୍ ନାଞ୍ଜିଙ୍ଗ୍ ଯୋହନତାଙ୍ଗ୍ ଡୁବନ୍ ଅଦେଙ୍ଗ୍ ଯୀଶୁ ୱାତାନ୍। ଯୋହନ ଏଚେପାଦ୍ନା ହେୱାନିଙ୍ଗ୍ ହୁଡ଼୍ତାନ୍, ହେୱାନ୍ ୱେଚ୍ଚାନ୍, “ଏହେଁ ହୁଡ଼ାଟ୍! ଈଶ୍ୱରତି ମେଣ୍ଢାଗଡ଼ିଆ ଇନେର୍ ଜଗତ୍ନି ପାପ୍ତିଙ୍ଗ୍ ପିଣ୍ଜି ଅନାନ୍।”
ଯୋହନ ଯୀଶୁଙ୍ଗ୍ ୱେଚ୍ଚାନ୍, “ନିଙ୍ଗେଙ୍ଗ୍ ଡୁବନ୍ ହିଦ୍ନି କାଜିଙ୍ଗ୍ ଆନେଙ୍ଗ୍ ଯଗ୍ୟ ଆକାୟ୍। ମାତର୍ ଏନେଙ୍ଗ୍ ନାଙ୍ଗେଙ୍ଗ୍ ଡୁବନ୍ ହିଦ୍ନି ଦର୍କାର୍।” ମାତର୍ ଯୀଶୁ ୱେଚ୍ଚାନ୍, “ଏନେଙ୍ଗ୍ ନାଙ୍ଗେଙ୍ଗ୍ ଡୁବନ୍ ହିଦ୍ନି ଦର୍କାର୍, ଇନେସ୍କି ଇଲେକେ ୱିଜୁ ଦାର୍ମି ପୁରା ଆନାତ୍,” ଲାଗିଙ୍ଗ୍ ଯୋହନ ହେୱାନିଙ୍ଗ୍ ଡୁବନ୍ ହିତାନ୍, ମାତର୍ ଯୀଶୁ ଇନେୱାଡ଼ାଙ୍ଗ୍ ପା ପାପ୍ କିୱାଦାଙ୍ଗ୍ ମାଚାନ୍।
ଯୀଶୁ ଡୁବନ୍ ଅଜି ଏଜୁଙ୍ଗ୍ତାଙ୍ଗ୍ ପାଚେ ତା ଜପି ଈଶ୍ୱର ଆତ୍ମା ର ପାରୁୱା ଲେକେ ଆଜି ଚଞ୍ଜିଆଜି ମାଚାତ୍ ଆରେ ଇଦାଙ୍ଗ୍ ତାରେନ୍ ୱାଜି ତା ଜପି କୁଚ୍ଚାତ୍। ହେପାଦ୍ନା ଈଶ୍ୱର ବାଦାଡ଼୍ତାଙ୍ଗ୍ ର ବେଣ୍ ୱେଚ୍ଚାନ୍, “ଏନେଙ୍ଗ୍ ମା ଲାଡ୍ ମାଜି ନିତାକେ ଆପେଙ୍ଗ୍ ବେସି ୱାରି।”
ଈଶ୍ୱର ଯୋହନତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଇନେରିଙ୍ଗ୍ ଡୁବନ୍ ହିନାୟ୍ ହେୱାର୍ ଜପି ପବିତ୍ର ଆତ୍ମା ୱାନାତ୍ ଆରେ ମାନ୍ଗାନାତ୍। ହେ ମାନାୟ୍ ଈଶ୍ୱର ମେହି।” ମାତର୍ ରକାନ୍ ନେ ଈଶ୍ୱର ମାନାନ୍। ମାତର୍ ଯୋହନ ଏଚେପାଦ୍ନା ଯୀଶୁଙ୍ଗ୍ ଡୁବନ୍ ହିତାନ୍, ହେୱାନ୍ ଆବା ୱେଚ୍ନାକା ୱେଚାନ୍, ଈଶ୍ୱର ମେହି ଯୀଶୁଙ୍ଗ୍ ହୁଡ଼୍ତାନ୍, ଆରେ ପବିତ୍ର ଆତ୍ମାତିଙ୍ଗ୍ ହୁଡ଼୍ତାନ୍।
ବାଇବଲ୍ନି ର କାତା: ମାଥିଉ ୩; ମାର୍କ ୧: ୯- ୧୧; ଲୁକ ୩: ୧- ୨୩
Free to use, adapt, and share under an open license (CC BY-SA 4.0).