25. ୨୫. ଯୀଶୁଙ୍ଗ୍ ଶୟତାନ ପରିକ୍ଷା କିନାତ୍
ଯୀଶୁ ଡୁବନ୍ ଆତି ଦାପ୍ରେ ପବିତ୍ର ଆତ୍ମା ହେୱାନିଙ୍ଗ୍ ଟାଙ୍ଗ୍ରାବାହାତାକେ ଅସାହାଚାତ୍, ହେବେ ହେୱାନ୍ ଚାଲିଶ୍ ଦିନ୍ ଆରେ ଚାଲଶ୍ ରାତି ତିନ୍ୱାଦାଙ୍ଗ୍ ଉଣ୍ୱାଦାଙ୍ଗ୍ ଉପାସ୍ କିଜି ମାଚାନ୍। ତାପାଚେ ଶୟତାନ ଯୀଶୁ ଲାଗାୟ୍ ୱାତାତ୍ ଆରେ ହେୱାନିଙ୍ଗ୍ ପାପ୍ କିନି କାଜିଙ୍ଗ୍ ପରିକ୍ଷା କିତାତ୍।
ଶୟତାନ ଇଦାଙ୍ଗ୍ ୱେଚ୍ଚି, “ଯୀଶୁଙ୍ଗ୍ ପରିକ୍ଷା କିଜି ମାଚାତ୍, ଏନେଙ୍ଗ୍ ଦଯି ଈଶ୍ୱର ମେହିତି, ଇ କାଲ୍କୁକାଙ୍ଗ୍ ରୁଟି ଆଦେଙ୍ଗ୍ ଆଦେସ୍ ହିୟା!”
ଯୀଶୁ ୱେଚ୍ଚାନ୍, “ଈଶ୍ୱର କାତାତାକେ ଲେକାମାନାତ୍, ମାନାୟ୍ ଆପ୍କା ରୁଟି ତିନ୍ଞ୍ଜି ଜିଦେଙ୍ଗ୍ ଆଡୁନ୍ ମାତର୍ ଈଶ୍ୱର ୱେଇଦାଙ୍ଗ୍ ହତ୍ତି ୱିଜୁ କାତାତାଙ୍ଗ୍ ଜିନାନ୍!”
ତାପାଚେ ଶୟତାନ ମନ୍ଦିର୍ନି ଟିପ୍ତ ଅସାହାଲ୍ଜି ହେୱାନିଙ୍ଗ୍ ୱେଚ୍ଚାତ୍, “ଏନେଙ୍ଗ୍ ଯଦି ଈଶ୍ୱର ମେହିତି ତାରେନ୍ ଗୁମା, ଇନେସ୍କି ସାସ୍ତର୍ତାକେ ଲେକା ମାନାତ୍ ନି କାଲ୍ପାନା ଇନେସ୍ ଗାଉ ଆଉତ୍ ଇଦାଙ୍ଗ୍ କାଜିଙ୍ଗ୍ ହେୱାର୍ ନିଙ୍ଗେଙ୍ଗ୍ କେଇଦାଙ୍ଗ୍ ଆସ୍ତିନି କାଜିଙ୍ଗ୍ ଈଶ୍ୱର ଦୁତ୍କୁକାଙ୍ଗ୍ ଆଦେସ୍ ହିନାନ୍।”
ମାତର୍ ଯୀଶୁ ସାସ୍ତର୍ତାଙ୍ଗ୍ ଚଚ୍ଚି ଶୟତାନତିଙ୍ଗ୍ ୱେଚ୍ଚାନ୍, “ଈଶ୍ୱର କାତାତାକେ ହେୱାନ୍ ତା ମାନାୟାରିଙ୍ଗ୍ ଆଦେସ୍ ହିନାନ୍ ନି ଜାର୍ ମାପୃ ଈଶ୍ୱରତିଙ୍ଗ୍ ପରିକ୍ଷା କିଉନ୍।”
ତାପାଚେ ଶୟତାନ ଜଗତ୍ନି ୱିଜୁ ରାଜି ଆରେ ହେବେନି ୱିଜୁ ହଲ୍ନାକା ଚଚ୍ଚି ୱେଚ୍ଚାତ୍, “ନାଙ୍ଗେଙ୍ଗ୍ ଯଦି ଏନେଙ୍ଗ୍ ମେଣ୍ଢାକୁନ୍ଦିକିଜି ଜୱାର୍ କିତ୍ତିସ୍ ଆନେଙ୍ଗ୍ ଇ ୱିଜୁ ନିଙ୍ଗେଙ୍ଗ୍ ହିଦ୍ନାଙ୍ଗ୍।”
ଯୀଶୁ ୱେଚ୍ଚାନ୍, “ନାବେତାଙ୍ଗ୍ ଦେହା ଆ ଶୟତାନ! ଈଶ୍ୱର କାତାତାଙ୍ଗ୍ ମାନାୟାରିଙ୍ଗ୍ ୱେଚି ଆତାତ୍ନା, ଏପେଙ୍ଗ୍ ଆପ୍କା ମି ମାପୃତିଙ୍ଗ୍ ନେ ପୁଜା କିନାଦେର୍ ଆରେ ହେୱାନିଙ୍ଗ୍ ନେ ହେବା କିନାଦେର୍।”
ଯୀଶୁ ଶୟତାନନି ପରିକ୍ଷାତାଙ୍ଗ୍ ଜାର୍ତିଙ୍ଗ୍ ହିୱାଦାଙ୍ଗ୍ ମାଚାନ୍, ଲାଗିଙ୍ଗ୍ ଶୟତାନ ହେୱାନିଙ୍ଗ୍ ପିସ୍ତି ହାଚାତ୍।ତାପାଚେ ଦୁତ୍କୁ ୱାଜି ଯୀଶୁଙ୍ଗ୍ ହେବା କିତିକ୍।
ବାଇବଲ୍ନି ର କାତା: ମାଥିଉ ୪: ୧- ୧୧; ମାର୍କ ୧: ୧୨- ୧୩: ଲୁକ ୪: ୧- ୧୩
Free to use, adapt, and share under an open license (CC BY-SA 4.0).