26. ୨୬. ଯିଶୁ ତା ହେବା କାମାୟ୍ ଆରମ୍ କିତାନ୍
ଶୟତାନନି ପରିକ୍ଷାତାଙ୍ଗ୍ ଯୀଶୁ ଜିତାଆତି ପାଚେ, ଯୀଶୁ ପବିତ୍ର ଆତ୍ମାନି ଶାକ୍ତିତାଙ୍ଗ୍ ହେୱାନ୍ ବାହା କିଜି ମାଚି ଗାଲିଲୀ ଜିଲ୍ଲାତାକେ ଲେଉଟାଆଜି ହାଚାନ୍।ଯୀଶୁ ହିକ୍ଷା ହିଜି ବାହାତିଙ୍ଗ୍ ବାହା ବୁଲାଆତାନ୍। ୱିଜାକାର୍ ତା ବିଷୟରେ ହାର୍ଦି ବିଷୟରେ ୱେଚ୍ଚାର୍।
ଯୀଶୁ ଇମ୍ଣି ନାଜରିତ ସହର୍ତାକେ ନିଜେ ହିମ୍ଣା ୱେଡ଼ାତାଙ୍ଗ୍ ମାଚାନ୍, ହେ ସହର୍ତାକେ ହାଚାନ୍। ଜମ୍ନି ଦିନ୍ତ ହେୱାନ୍ ପାର୍ତାନା କିନି ବାହାତାକେ ହାଚାନ୍। ହେୱାନ୍ କେଇଦ ନାଡ଼ାତାକେ ହୁର୍ପିତି ବହି ହେପାଦ୍ନା ମାନି ପାଃନି ନିୟମ୍ ହିତାର୍ ଇନେସ୍କି ହେଦାଙ୍ଗ୍ ଯିଶାଇୟ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ବହିତିଙ୍ଗ୍ ପଡ଼ି କିନାନ୍। ଯୀଶୁ ନାଡ଼ାତାକେ ହୁର୍ପିଆତି ବହିତିଙ୍ଗ୍ ଜେତାନ୍ ହେବେନି ଅଲପ୍ ବାଗ୍ତିଙ୍ଗ୍ ମାନାୟାର୍ ମୁମ୍ଦ ପଡ଼ି କିତାନ୍।
ଯୀଶୁ ପଡ଼ି କିତାନ୍, “ଈଶ୍ୱର ତା ଆତ୍ମା ନାଙ୍ଗେଙ୍ଗ୍ ହିତ୍ତାନ୍ନା ଇନେସ୍କି ଗରିବ୍ ମାନାୟାର୍ ଲାଗାୟ୍ ହାର୍ଦିକାବୁର୍ ଶୁଣାୟ୍ କିନାକା, ବନ୍ଦିଆତାକାରିଙ୍ଗ୍ ମୁକ୍ତିକିନି ବିଷୟ, କାଣା ମାନାୟାରିଙ୍ଗ୍ ହୁଡ଼ିକିନି ବିଷୟ, ଆରେ ଇନସ୍ତା ଆନି ମାୟାରିଙ୍ଗ୍ ମୁକ୍ତି କିନି ବିଷୟରେ ଶୁଣାୟ୍ କିନାଙ୍ଗ୍। ଇଦାଙ୍ଗ୍ ୱିଜୁତାଙ୍ଗ୍ ଶାକ୍ତିକାଟି ମାପୃତି ଦୟାନି ବାର୍ହୁ।”
ତାପାଚେ ଯୀଶୁ କୁଚ୍ଚାନ୍। ୱିଜାକାର୍ ହେୱାନିଙ୍ଗ୍ ଲାଗେତାଙ୍ଗ୍ ହୁଡ଼୍ତାର୍। ସାସ୍ତର୍ନି ଇମ୍ଣି ବାଗ୍ ଯୀଶୁ ପଡ଼ିକିଜି ମାଚାନ୍ ହେଦାଙ୍ଗ୍ ଖ୍ରୀଷ୍ଟ ୱେଚ୍ଚାକା ହେୱାର୍ ପୁଞ୍ଜେଙ୍ଗ୍ ଆଡ଼୍ତାର୍। ଯୀଶୁ ୱେଚ୍ଚାନ୍, “ଆନେଙ୍ଗ୍ ଇମ୍ଣି କାତାତିଙ୍ଗ୍ ପଡ଼ିକିତାଙ୍ଗ୍ ହେଦାଙ୍ଗ୍ ନଙ୍ଗୟ ଗଟାଆନାତା।” ୱିଜୁ ମାନାୟାର୍ ଚାନିଆ ଆତାର୍। ହେୱାର୍ ୱେଚ୍ଚାର୍, “ଇୱାନ୍ ଇନାକା ଯୋଷେଫ ମେହି ଆକାୟ?”
ତାପାଚେ ଯୀଶୁ ୱେଚ୍ଚାନ୍, “ଇଦାଙ୍ଗ୍ ସତ୍ ଯେ ଇମ୍ଣି ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ଜାର୍ ସହର୍ତାକେ ସନ୍ମାନ୍ ପାୟାଆଉନ୍। ଏଲୀୟ ଇମ୍ଣି ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ମାଚିହିଙ୍ଗ୍ ଇସ୍ରାଏଲ ଦେସ୍ତାକେ ବେସିହେନି ରାଣ୍ଡି କଗ୍ଲେକ୍ ମାଚିକ୍। ମାତର୍ ଏଚେପାଦ୍ନା ତିନ୍ବାର୍ହୁ ଅଦା ଆତାତ୍ ହେପାଦ୍ନା ଈଶ୍ୱର ଏଲୀୟଙ୍ଗ୍ ଇସ୍ରାଏଲତାକେ ମାନି ଇମ୍ଣି ରାଣ୍ଡି କଗ୍ଲେକ୍ ଲାଗାୟ୍ ପକ୍ୱାଦାଙ୍ଗ୍ ଜେକନି ର ଦେସ୍ତାକେ ମାନି ରାଣ୍ଡି କଗ୍ଲେକ୍ ଲାଗାୟ୍ ପକ୍ଚି ମାଚାର୍।”
ଯୀଶୁ ୱେଚ୍ଚି ଲାଗାତାନ୍, “ଆରେ ଇଲିଶାୟ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ସମୟ୍ତ କୁଷ୍ଟ ରଗ୍ ଆହିଆତି କେତେକ୍ ହେନି ଇସ୍ରାଏଲ ଦେସ୍ତାକେ ମାଚାର୍। ମାତର୍ ଇଲିଶାୟ ହେୱାର୍ ବିତ୍ରେତାଙ୍ଗ୍ ଇନେରିଙ୍ଗ୍ ପା ହାର୍ କିୱାଦାଙ୍ଗ୍ ମାଚାନ୍। ହେୱାନ୍ ଇସ୍ରାଏଲ ଶତ୍ରୁ ଦେସ୍ନି ର ସେନାପତିରିଙ୍ଗ୍ କୁଷ୍ଟ ରଗ୍ତାଙ୍ଗ୍ ହାର୍ କିଜି ମାଚାନ୍।” ଇମ୍ଣି ମାନାୟାର୍ ଯୀଶୁ କାତାତିଙ୍ଗ୍ ୱେନ୍ଞ୍ଜି ମାଚାର୍ ହେୱାର୍ ଯିହୁଦି ମାନାୟ୍ ମାଚାର୍। ଲାଗିଙ୍ଗ୍ ହେୱାର୍ ଏଚେପାଦ୍ନା ଇଦାଙ୍ଗ୍ କିନାକା ୱେଚାର୍, ହେୱାର୍ ତା ଜପି ବେସି ରିସା କିଜି ମାଚାର୍।
ନାଜରିତ ସହର୍ତାକେ ମାନି ମାନାୟ୍ ପୁଜାକିନି ବାହାତାଙ୍ଗ୍ ଯୀଶୁଙ୍ଗ୍ ବାର୍ତ ହପ୍ଚି ମାର୍ନେ ଅସ୍ତେଙ୍ଗ୍ ଜପିତାଙ୍ଗ୍ ତୁସିହିନି କାଜିଙ୍ଗ୍ ହେବେ ତାହିୱାତାର୍। ମାତର୍ ଯୀଶୁ ମାନାୟ୍ ଗୌଲି ବିତ୍ରେଆଜି ନାଜରିତ ସହର୍ ପିସ୍ତି ହାଚାନ୍।
ତାପାଚେ ଯୀଶୁ ଗାଲିଲୀ ଜିଲ୍ଲାତାକେ ହାଚାନ୍, ବେସିହେନି ମାନାୟ୍ ହେୱାନ୍ ଲାଗାୟ୍ ୱାତାର୍। ଇମ୍ଣି ମାନାୟାର୍ ହୁଡ଼୍ଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍, ୱେଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାର୍ ଇୱାର୍ ହୁଦାଙ୍ଗ୍ କେତ୍ଜାଣ୍ ରଗି ଆରେ କାଣା ଚଟାରିଙ୍ଗ୍ ତାସି ୱାତାର୍।
ବୁତ୍ ଡୁୟାଆତି ମାନାୟାରିଙ୍ଗ୍ ଯୀଶୁ ଲାଗାୟ୍ ତାହିୱାଜି ମାଚାର୍। ଯୀଶୁ ଆଦେସ୍ତାଙ୍ଗ୍ ବୁତ୍କୁ ମାନାୟାର୍ତାଙ୍ଗ୍ ହସି ହାଲ୍ଜି ମାଚିକ୍, ଆରେ କେତେକ୍ ସମୟତ ହେୱେକ୍ ଚେରା ଆଜି ମାଚିକ୍, “ଏନେଙ୍ଗ୍ ଈଶ୍ୱର ମେହି!” ବେସିହେନି ମାନାୟ୍ ଚାନିଆଆଜି ମାଚାର୍ ଆରେ ଈଶ୍ୱରତିଙ୍ଗ୍ ହେବା କିଜି ମାଚାର୍।
ତାପାଚେ ଯୀଶୁ ବାରଜାଣ୍ ଚେଲାହିରିଙ୍ଗ୍ ବାଚିକିତାନ୍ ହେୱାରିଙ୍ଗ୍ “ବାଚିକିଜି ପକ୍ତି ଚେଲା ଇଞ୍ଜି ତର୍ ହିତାନ୍।” ଚେଲାହିର୍ ଯୀଶୁ ହୁଦାଙ୍ଗ୍ ହାଲ୍ଜି ମାଚାର୍ ଆରେ ହେୱାନ୍ତାଙ୍ଗ୍ ହିକା ଆଜି ମାଚାର୍।
ବାଇବଲ୍ନି ର କାତା: ମାଥିଉ ୪: ୧୨- ୨୫; ମାର୍କ ୧: ୧୪- ୧୫, ୩୫- ୩୯; ୩: ୧୩- ୨୧; ଲୁକ ୪: ୧୪- ୩୦, ୩୮- ୪୪
Free to use, adapt, and share under an open license (CC BY-SA 4.0).