28. ୨୮. ଧନୀ ବେଣ୍ଡିଆ ହିମ୍‌ଣା ସାସନ୍ କିନାକାନ୍‌

ଦିନେକ୍ ରକାନ୍ ବେଣ୍ଡିଆ ହାଉକାର୍ ସାସନ୍ କିନାକାନ୍ ଯୀଶୁ ଲାଗାୟ୍ ୱାତାନ୍ ଆରେ ୱେନ୍‌ବାତାନ୍, “ହାର୍‌ଦି ଗୁରୁ ୱିଜ୍‌ୱି ଜିବୁନ୍ ପାୟାଆଦେଙ୍ଗ୍ ଆନେଙ୍ଗ୍ ଇନାକା କିନାଙ୍ଗ୍?” ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ନାଙ୍ଗେଙ୍ଗ୍ ଇନାକିଦେଙ୍ଗ୍ ହାର୍ ଇଞ୍ଜ୍‌ନାୟା? ରକାନ୍ ମାତର୍ ହାର୍‌ଦାକାନ୍‌ ମାନାନ୍ ଆରେ ହେୱାନ୍ ଆନାନା ଈଶ୍ୱର। ଏନେଙ୍ଗ୍ ଯଦି ୱିଜ୍‌ୱି ଜିବୁନ୍ ପାୟାଆଦେଙ୍ଗ୍ ଇଚା କିନାୟା ଲାଗିଙ୍ଗ୍ ଈଶ୍ୱର ଆଦେସ୍ ୱିଜୁ ମାନି କିୟା।“

ହେୱାନ୍ ୱେନ୍‌ବାତାନ୍, “ଇମ୍‌ଣି-ଇମ୍‌ଣି ଆଦେସ୍ ୱିଜୁ ଆନେଙ୍ଗ୍ ମାନିକିନି ଦର୍‌କାର୍?” ଯୀଶୁ ୱେଚ୍‌ଚାନ୍, “ମାନାୟ୍ ଅହ୍‌ମା, ଦାରି କାମାୟ୍ କିମା, ଚର୍ କାମାୟ୍ କିମା, ମିଚ୍‌କାତା ୱେଚ୍‌ମା, ମି ଆୟାଆବାରିଙ୍ଗ୍ ସନ୍‌ମାନ୍ କିୟା ଆରେ ମି ପାଡ଼୍‌ହା ଇଞ୍ଜାକାରିଙ୍ଗ୍ ମାନ୍ ହିଜି ଲାଡ୍ କିୟା।”

ମାତର୍ ହେ ବେଣ୍ଡିଆ ହିମ୍‌ଣା ହେୱାନିଙ୍ଗ୍ ୱେଚ୍‌ଚାନ୍, “ଆନେଙ୍ଗ୍ ଇ ୱିଜୁ ହିମ୍‌ଣା ୱେଡ଼ାତାଙ୍ଗ୍ ନେ ମାନିକିଜି ୱାନାଙ୍ଗା। ୱିଜ୍‌ୱି ଜିବୁନ୍ ପାୟାଆନି କାଜିଙ୍ଗ୍ ଆନେଙ୍ଗ୍ ଆରେ ଇନାକା କିଦେଙ୍ଗ୍ ଆନାତ୍?” ଯୀଶୁ ହେୱାନିଙ୍ଗ୍ ହୁଡ଼୍‌ଜି ହେୱାନିଙ୍ଗ୍ ଲାଡ୍ କିତାନ୍।

ଯୀଶୁ ୱେଚ୍‌ଚାନ୍, “ଏନେଙ୍ଗ୍ ଯଦି ପୁରା ଆଦେଙ୍ଗ୍ ଇଚା କିନାୟା, ଲାଗିଙ୍ଗ୍ ହାଲା ଆରେ ନିଦାଙ୍ଗ୍ ଇନାକା ମାନାତ୍ ହେଦାଙ୍ଗ୍ ୱିଜୁ ପୱା ଆରେ ଗରିବ୍‌ ମାନାୟାରିଙ୍ଗ୍ ନି ଦନ୍ ଦାନ୍ ହିୟା, ଆରେ ଏନେଙ୍ଗ୍ ସରଗ୍‌ତାକେ ଦନ୍ ପାୟାଆନାୟ୍। ତାପାଚେ ୱାଜି ନା ପାଚେ ୱା।”

ଯିଶୁ ୱେଚ୍‌ଚି ବିଷୟତିଙ୍ଗ୍ ବେଣ୍ଡିଆ ହିମ୍‌ଣା ଏଚେପାଦ୍ନା ୱେଚାନ୍, ହେୱାନ୍ ବେସି ଦୁକ୍ ଆତାନ୍, ଇନେସ୍‌କି ହେୱାନ୍ ବେସି ହାଉକାର୍ ମାନାୟ୍ ମାଚାନ୍ ଆରେ ହେୱାନ୍ ଆର୍ଜାଆତି ୱିଜୁତିଙ୍ଗ୍‌ ପିସ୍ତେଙ୍ଗ୍ ଇଚା କିୱାତାନ୍। ହେୱାନ୍ ମୁମ୍ ରାତ୍‌ଚି ଯୀଶୁ ଲାଗାୟ୍‌ତାଙ୍ଗ୍ ହାଚାନ୍।

ତାପାଚେ ଯୀଶୁ ତା ଚେଲାହିଙ୍ଗ୍ ୱେଚ୍‌ଚାନ୍, “ହାଉକାର୍ ମାନାୟ୍ ଈଶ୍ୱର ସାସନ୍‌କିନି ରାଜିତାକେ ହଣ୍ଡେଙ୍ଗ୍ ବେସି କଷ୍ଟ! ଆଁ ହାଉକାର୍ ମାନାୟ୍ ସରଗ୍‌ତାକେ ହଣି ବାଦୁଲ୍ ହୁଜା କାଣା ନିପଣ୍ ଉଟ୍ ହଣାକା ସହଜ୍।”

ଯିଶୁ ୱେଚ୍‌ଚିମାଚି ବିଷୟତିଙ୍ଗ୍ ଏଚେପାଦ୍ନା ଚେଲାହିର୍ ୱେଚାର୍ ଆରେ ହେୱାର୍ ଚାନିଆଆଜି ୱେନ୍‌ବାତାର୍, “ଲାଗିଙ୍ଗ୍ ଇନେର୍ ଉଦାର୍ ପାୟାଆନାର୍?”

ଯୀଶୁ ଚେଲାହିର୍ ନିପଣ୍ ହୁଡ଼୍‌ଜି ୱେଚ୍‌ଚାନ୍, “ମାନାୟ୍ କାଣ୍‌କୁକାଙ୍ଗ୍ ଇଦାଙ୍ଗ୍ କଷ୍ଟ, ମାତର୍ ଈଶ୍ୱର କାଣ୍‌କୁକାଙ୍ଗ୍ ୱିଜୁ ବିଷୟ ହାର୍।”

ପିତର ଯୀଶୁଙ୍ଗ୍ ୱେଚ୍‌ଚାନ୍, “ଆପେଙ୍ଗ୍ ୱିଜୁ ବିଷୟ ପିସ୍ତି ନି ପାଚେ-ପାଚେ ହାତାପ୍‌ନା। ମା କାଜିଙ୍ଗ୍ ଇନାକା ପୁରୁଷ୍କାର୍ ମାନାତ୍?”

ଯୀଶୁ ୱେଚ୍‌ଚାନ୍, “ଇମ୍‌ଣାକାନ୍ ନା କାଜିଙ୍ଗ୍ ଇଲ୍‌ଗାଣ୍, ଟଣ୍ଡାର୍, ତଣ୍‌ଦେଲ୍, ଆବା, ଆୟା, ହିମ୍‌ଣା ୱାକ୍‌ଡ଼ା ଆରେ ଦନ୍ ସମ୍ଫତିତିଙ୍ଗ୍ ପିହ୍‌ନାନ୍ ଆରେ ତା ୧୦୦ ଗୁଣ୍ ଇ ଜଗତ୍‌ତାକେ ଆରେ ୱିଜ୍‌ୱି ଜିବୁନ୍ ପାୟା ଆନାନ୍। ମାତର୍ ପାର୍ତୁମ୍ ମାନି କେତେକ୍ ସେସ୍‌ତ ମାନାର୍, ଆରେ ସେସ୍‌ତ ମାନି କେତେକ୍ ପାର୍ତୁମ୍ ଆନାତ୍।”