30. ୩୦. ଯୀଶୁ ପାଞ୍ଚ୍ ହାଜାର୍ ମାନାୟାରିଙ୍ଗ୍ ଚିଚ୍ପାନାନ୍
କେତେକ୍ ବିନ୍-ବିନ୍ ନାସ୍କୁକାଙ୍ଗ୍ ଈଶ୍ୱର କାତା ଶୁଣାୟ୍ କିଦେଙ୍ଗ୍ ଆରେ ହିକ୍ଷା ହିଦେଙ୍ଗ୍ ଯୀଶୁ ତା ଚେଲାହିଙ୍ଗ୍ ପକ୍ତାନ୍। ଯୀଶୁ ମାନି ବାହାତାକେ ହେୱାର୍ ଏଚେପାଦ୍ନା ଲେଉଟାଆତାର୍, ଇନା-ଇନାକା ଗଟାଆଜି ମାଚାତ୍ ହେଦାଙ୍ଗ୍ ହେୱାର୍ ହେୱାନିଙ୍ଗ୍ ୱେଚ୍ଚି ମାଚାର୍। ତାପାଚେ ଯୀଶୁ ହାମ୍ଦୁର୍ ଆଣ୍ଟି ପାଡ଼୍କା ର ଚିମ୍ରା ବାହାତାକେ ହାନି କାଜିଙ୍ଗ୍ ହେୱାରିଙ୍ଗ୍ କୁକ୍ତାନ୍। ଲାଗିଙ୍ଗ୍ ହେୱାର୍ ର ଡଙ୍ଗାତାକେ କୁଚ୍ଚାର୍ ଆରେ ହାମ୍ଦୁର୍ ଆଣ୍ଟିପାଡ଼୍କା ହାଚାର୍।
ମାତର୍ ହେ ବାହାତାକେ କେତେକ୍ ମାନାୟାର୍ ମାନି କାଜିଙ୍ଗ୍ ଯୀଶୁ ଆରେ ତା ଚେଲାହିର୍ ଡଙ୍ଗାତିଙ୍ଗ୍ ପିସ୍ତି ହାଚାର୍। ଇ ମାନାୟାର୍ ହେୱାର୍ ଲାଗାୟ୍ ହାନି କାଜିଙ୍ଗ୍ ହେୱାର୍ ଆଗେ ହାମ୍ଦୁର୍ କାଣ୍ଡିତାକେ ହନ୍ଞ୍ଚି ହାଚାର୍। ଲାଗିଙ୍ଗ୍ ଯୀଶୁ ଆରେ ତା ଚେଲାହିର୍ ଏଚେପାଦ୍ନା ଇକାତାର୍, କେତେକ୍ ହେନି ମାନାୟ୍ ମାନ୍ଦା ହାମ୍ଦୁର୍ ଆଣ୍ଟିପାଡ଼୍କା ହେୱାରିଙ୍ଗ୍ କାସି ମାଚାର୍।
କଗ୍ଲେକ୍ ଆରେ ହିମ୍ଣାକାଙ୍ଗ୍ ଇସାବ୍ କିୱାଦାଙ୍ଗ୍ ଆଣ୍ଡ୍ରାହିମ୍ଣାଙ୍ଗ୍ ପାକାପାକି ୫୦୦୦ ଜାଣ୍ ମାଚାର୍। ଯୀଶୁ ଇ ମାନାୟାର୍ କାଜିଙ୍ଗ୍ ବେସି ଦୟାତାଙ୍ଗ୍ ଟେନ୍ସନ୍ ଆଜି ମାଚାନ୍। ଯୀଶୁ କାଜିଙ୍ଗ୍ ଇ ମାନାୟାର୍ ମେଣ୍ଢା ଗଡ଼ିଆର୍ ହିଲ୍ୱି ମେଣ୍ଢାଙ୍ଗ୍ ଲେକେ ମାଚାର୍। ଲାଗିଙ୍ଗ୍ ହେୱାନ୍ ହେୱାରିଙ୍ଗ୍ ହିକ୍ଷା ହିତାନ୍ ଆରେ ହେୱାର୍ ବିତ୍ରେତାଙ୍ଗ୍ ଇମ୍ଣାକାର୍ ବେମାର୍ତାକେ ମାଚାର୍ ହେୱାରିଙ୍ଗ୍ ହାର୍ କିତାନ୍।
ୱେଡ଼ା ହାନିହିଙ୍ଗ୍ ଚେଲାହିର୍ ଯୀଶୁଙ୍ଗ୍ ୱେଚ୍ଚାର୍, “ସମୟ ବେସି ଆଦିକ୍ ଆତାତେ ଆରେ ଲାଗାୟ୍ ଇମ୍ଣି ସହର୍ ପା ହିଲୁତ୍। ମାନାୟାରିଙ୍ଗ୍ ପକାମ୍ଦେ ଇନେସ୍କି ହେୱାର୍ ହାଲ୍ଜି ଇଚ୍କେ ଚିଞ୍ଜେଙ୍ଗ୍ ଗାଟାଆଦେଙ୍ଗ୍ ଆଡ୍ନାର୍।”
ମାତର୍ ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ହେୱାରିଙ୍ଗ୍ ଇଚ୍କେ ଚିଞ୍ଜେଙ୍ଗ୍ ହିୟାଟ୍!” ହେୱାର୍ ୱେଚ୍ଚାର୍, “ଆପେଙ୍ଗ୍ ହେଦାଙ୍ଗ୍ ଇନେସ୍ କିଦେଙ୍ଗ୍ ଆଡ୍ନାପ୍? ମାବେ ଆପ୍କା ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ମିନ୍କୁ ମାନିକ୍।”
ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, ମାନାୟାରିଙ୍ଗ୍ ୱେଚାଟ୍ କାଚ୍ରା ଜପି ପଚାଶ୍-ପଚାଶ୍ ଜାଣ୍ ଆଜି କୁଚେର୍।
ତାପାଚେ ଯୀଶୁ ହେ ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ମିନ୍କୁ ଅଜି ସରଗ୍ ଜପି ମୁମ୍ କିତାନ୍, ଆରେ ହେ କାଦିକାଜିଙ୍ଗ୍ ଈଶ୍ୱର ଲାଗାୟ୍ ଦନ୍ୟବଦ୍ ହିତାନ୍।
ତାପାଚେ ଯୀଶୁ ରୁଟିଙ୍ଗ୍ ଆରେ ହେ ମିନ୍କୁ ଡ୍ରିକ୍ତାନ୍। ହେୱାନ୍ ହେ ଡ୍ରିକ୍ତି ରୁଟିକାଙ୍ଗ୍ ମାନାୟାରିଙ୍ଗ୍ ହିନି କାଜିଙ୍ଗ୍ ତା ଚେଲାହିରିଙ୍ଗ୍ ହିତାନ୍। ଚେଲାହିର୍ ହେ କାଦିତିଙ୍ଗ୍ ବାଟା କିଦେଙ୍ଗ୍ ଲାଗାତାର୍, ଆରେ ଇଦାଙ୍ଗ୍ ୱିଜ୍ୱାତାତ୍। ୱିଜାକାର୍ ମାନାୟ୍ ତିନ୍ଞ୍ଜି ପଟ ପାନ୍ଞ୍ଚାର୍।
ତାପାଚେ ଚେଲାହିର୍ ମାନାୟାର୍ ତିନ୍ଞ୍ଜି ଉବ୍ରାଆତି କାଦିତିଙ୍ଗ୍ ରୁଣ୍ଡାଇ କିତାର୍ ଆରେ ବାରଗଟା ଟପାକାଙ୍ଗ୍ ବାର୍ତି କିତାର୍। ୱିଜୁ କାଦି ଆପ୍କା ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ମିନ୍କୁତାଙ୍ଗ୍ ୱାଜି ମାଚାତ୍।
ବାଇବଲ୍ନି ର କାତା: ମାଥିଉ ୧୪: ୧୩- ୨୧; ମାର୍କ ୬: ୩୧- ୪୪; ଲୁକ ୯: ୧୦- ୧୭; ଯୋହନ ୬: ୫- ୧୫
Free to use, adapt, and share under an open license (CC BY-SA 4.0).