31. ୩୧. ଯୀଶୁ ଏଜୁଙ୍ଗ୍ ଜପି ତାଙ୍ଗ୍ନାନ୍
ତାପାଚେ ଯୀଶୁ ତା ଚେଲାହିରିଙ୍ଗ୍ ଡଙ୍ଗାତାକେ ଦୁମ୍ଜି ହାମ୍ଦୁର୍ ଆଣ୍ଟିପାଡ଼୍କା ହାଞ୍ଜେଙ୍ଗ୍ ୱେଚ୍ଚାନ୍ ଏଚେପାଦ୍ନା ହେୱାନ୍ ମାନାୟାରିଙ୍ଗ୍ ପକ୍ତାନ୍। ଯୀଶୁ ମାନାୟାରିଙ୍ଗ୍ ପକ୍ତି ପାଚେ, ହେୱାନ୍ ପାର୍ତାନା କିନି କାଜିଙ୍ଗ୍ ର ମାଡ଼ି ଜପି ହାଚାନ୍। ଯୀଶୁ ହେବେ ରକାନ୍ ମାଚାନ୍, ଆରେ ହେୱାନ୍ ଅଜଡ଼୍ ଆନି ପାତେକ୍ ହେବେ ପାର୍ତାନା କିଦେଙ୍ଗ୍ ଲାଗାତାନ୍।
ଲାଗିଙ୍ଗ୍ ଚେଲାହିର୍ ହେୱାର୍ ତା ଡଙ୍ଗାତାଙ୍ଗ୍ ହାଲ୍ଜି ମାଚାର୍, ମାତର୍ ମାଦିମାଦା ନାଣା ହେୱାର୍ ହାମ୍ଦୁର୍ ମାଦି ବାଗ୍ଦ ଇକାତାର୍। ହେୱାର୍ ବେସି କଷ୍ଟତାଙ୍ଗ୍ ଡଙ୍ଗା ଚାଲାଇ କିଜି ମାଚାର୍ ଇନେସ୍କି ଡ଼ୁଇଦୁକା ହେୱାର୍ ୱିଜୁ ନିପଣ୍ ଆଜି ମାଚାତ୍।
ତାପାଚେ ଯୀଶୁ ପାର୍ତାନା କିଜି ୱିସ୍ତାନ୍ ଆରେ ଚେଲାହିର୍ ଲାଗାୟ୍ ହାଚାନ୍। ଯୀଶୁ ହାମ୍ଦୁର୍ନି ଏଜୁଙ୍ଗ୍ ଜପି ହେୱାର୍ ଡଙ୍ଗା ନିପଣ୍ ତାଙ୍ଗ୍ଜି-ତାଙ୍ଗ୍ଜି ୱାତାନ୍।
ହେୱାର୍ ଏଚେପାଦ୍ନା ଯୀଶୁଙ୍ଗ୍ ହୁଡ଼୍ତାର୍ ହେପାଦ୍ନା ଚେଲାହିର୍ ପାଣ୍ଡ୍ରା ଆଜି ମାଚାର୍, ଇନେସ୍କି ହେୱାର୍ ବୁତ୍ ହୁଡ଼୍ନାପା ଇଞ୍ଜି ବାବିକିତାର୍। ଯୀଶୁ ପୁଚାନ୍ ଯେ ହେୱାର୍ ପାଣ୍ଡ୍ରା ଆତାର୍ନା, ଲାଗିଙ୍ଗ୍ ହେୱାନ୍ ହେୱାରିଙ୍ଗ୍ କୁକ୍ଚି ୱେଚ୍ଚାନ୍, “ପାଣ୍ଡ୍ରା ଆମାଟ୍। ଇଦାଙ୍ଗ ଆନେଙ୍ଗ୍ ନେ!”
ତାପାଚେ ପିତର୍ ଯୀଶୁଙ୍ଗ୍ ୱେଚ୍ଚାର୍, “ଗୁରୁ ଯଦି ହେଦାଙ୍ଗ୍ ଏନେଙ୍ଗ୍, ଲାଗିଙ୍ଗ୍ ଏଜୁଙ୍ଗ୍ ଜପି ତାଙ୍ଗ୍ଜି ୱାତି କାଜିଙ୍ଗ୍ ନାଙ୍ଗେଙ୍ଗ୍ ଆଦେସ୍ ହିଦା।” ଯୀଶୁ ପିତରତିଙ୍ଗ୍ ୱେଚ୍ଚାନ୍, “ୱା!”
ଲାଗିଙ୍ଗ୍ ପିତର ଡଙ୍ଗାତାଙ୍ଗ୍ ହସି ଯୀଶୁ ଲାଗାୟ୍ ଏଜୁଙ୍ଗ୍ ଜପି ତାଙ୍ଗ୍ଦେଙ୍ଗ୍ ଆରମ୍ କିତାନ୍। ମାତର୍ ଅଲପ୍ ଦେହା ତାଙ୍ଗ୍ତି ପାଚେ, ହେୱାନ୍ ଯୀଶୁ ଲାଗାୟ୍ତାଙ୍ଗ୍ ଜାର୍ କାଣ୍କୁ ଲେଉଟାଇ କିତାନ୍ ଆରେ ଲଉଡ଼ି କାଙ୍ଗ୍ ହୁଡ଼୍ଦେଙ୍ଗ୍ ଲାଗାତାନ୍ ଆରେ ହେୱାନ୍ ବେସି ଦୁକା ୱାନାତା ଇଞ୍ଜି ବାବି କିତାନ୍।
ଲାଗିଙ୍ଗ୍ ପିତର ପାଣ୍ଡ୍ରା ଆତାନ୍ ଆରେ ହାମ୍ଦୁର୍ ତାକେ ମୁନ୍ଞ୍ଜେଙ୍ଗ୍ ଲାଗାତାନ୍। ହେୱାନ୍ ଚେରାଆଜି ୱେଚ୍ଚାନ୍, “ଗୁରୁ ନାଙ୍ଗେଙ୍ଗ୍ ଉଦାର୍ କିଦା!” ଯୀଶୁ ହେଦାପ୍ରେ ହାଲ୍ଜି ହେୱାନିଙ୍ଗ୍ ଆସ୍ତାନ୍। ତାପାଚେ ହେୱାନ୍ ପିତରତିଙ୍ଗ୍ ୱେଚ୍ଚାନ୍, “ଏ ଅଲପ୍ ପାର୍ତି କିନାକାୟ୍, ଏନେଙ୍ଗ୍ ଇନାକିଦେଙ୍ଗ୍ ଡାଉଟ୍ କିତାୟ୍?”
ଏଚେପାଦ୍ନା ପିତର ଆରେ ଯୀଶୁ ଡଙ୍ଗା ବିତ୍ରେ ହାଚାର୍, ହେପାଦ୍ନା ଦୁକା ସାଙ୍ଗେ-ସାଙ୍ଗେ ଟେବା ଆତାତ୍ ଆରେ ଏଜୁଙ୍ଗ୍ ଶାନ୍ତି ଆତିକ୍।ଚେଲାହିର୍ ଚାନିଆ ଆତାର୍। ହେୱାର୍ ଯୀଶୁଙ୍ଗ୍ ହେବାକିଜି ହେୱାନିଙ୍ଗ୍ ୱେଚ୍ଚାର୍, “ସତ୍, ଏନେଙ୍ଗ୍ ଈଶ୍ୱର ମେହିତି।”
ବାଇବଲ୍ନି ର କାତା: ମାଥିଉ ୧୪: ୨୨- ୩୩; ମାର୍କ ୬: ୪୫- ୫୨; ଯୋହନ ୬: ୧୬- ୨୧
Free to use, adapt, and share under an open license (CC BY-SA 4.0).