32. ୩୨. ଯୀଶୁ ରକାନ୍ ବୁତ୍ ଡୁୟାଆତି ମାନାୟ୍ତିଙ୍ଗ୍ ଆରେ ରଞ୍ଜେଲ୍ ବେମାର୍ କଗ୍ଲେଙ୍ଗ୍ ହାର୍ କିତାନ୍
ଦିନେକ୍ ଯୀଶୁ ଆରେ ତା ଚେଲାହିର୍ ର ଡଙ୍ଗାତାକେ ଦୁମ୍ଜି ଗରାଶୀୟ ମାନାୟାର୍ ବାହା କିତି ହାମ୍ଦୁର୍ ଆଣ୍ଟିପାଡ଼୍କା ହାଚାର୍।
ଏଚେପାଦ୍ନା ହେୱାର୍ ହାମ୍ଦୁର୍ ଆଣ୍ଟିପାଡ଼୍କା ଇକାତାର୍, ରକାନ୍ ବୁତ୍ ଡୁୟାଆତି ମାନାୟ୍ ଯୀଶୁ ଲାଗାୟ୍ ହନ୍ଞ୍ଚି ୱାତାନ୍।
ଇ ମାନାୟ୍ ଏଚେକ୍ ଶାକ୍ତି ମାଚାନ୍ ଯେ ଇମ୍ଣାକାର୍ ପା ହେୱାନିଙ୍ଗ୍ ଆସ୍ତେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। ମାନାୟାର୍ ଇଲେକେକି ତା ମାରାଙ୍ଗ୍ ଆରେ କାଲ୍କୁ ୱିଜୁ ହିକ୍ଡ଼ିଙ୍ଗ୍ତାଙ୍ଗ୍ ଗାଚ୍ଚାର୍, ମାତର୍ ହେୱାନ୍ ହେ ହିକ୍ଡ଼ିକାଙ୍ଗ୍ ନାଡ଼୍ଚି ତୁସିହିତାନ୍।
ମାନାୟ୍ ହେ ଲାଗାୟ୍ ମାନି ଦୁଗେର୍ ବାଟାତାକେ ବାହାକିଜି ମାଚାନ୍। ଇ ମାନାୟ୍ ୱିଜୁଦିନ୍ ଆରେ ୱିଜୁ ନାଣା ରାଟୁଆଜି ମାଚାନ୍। ହେୱାନ୍ ଆଙ୍ଗି ଉସ୍ପାୱାଦାଙ୍ଗ୍ ମାଚାନ୍ ଆରେ ବାରମ୍-ବାରମ୍ କାଲ୍କୁ ହୁଦାଙ୍ଗ୍ ଗାଉ ଦାଉ କିୟାଆଜି ମାଚାନ୍।
ଏଚେପାଦ୍ନା ହେୱାନ୍ ଯୀଶୁ ଲାଗାୟ୍ ୱାତାନ୍, ହେୱାନ୍ ତା ମୁମ୍ଦ ମେଣ୍ଡାକୁନ୍ଦି କିତାନ୍। ଯୀଶୁ ହେ ବୁତ୍ତିଙ୍ଗ୍ ୱେଚ୍ଚାନ୍, “ଇ ମାନାୟ୍ତାଙ୍ଗ୍ ହସି ହାଲା!”
ବୁତ୍ ଡୁୟାଆତି ମାନାୟ୍ ବେସି ଗାଜାକାଟ୍ କିଜି ୱେଚ୍ଚାନ୍, “ଏ ୱିଜୁତାଙ୍ଗ୍ ଗାଜା ଈଶ୍ୱର ମେହି ଯୀଶୁ ନି ହୁଦାଙ୍ଗ୍ ନାଦାଙ୍ଗ୍ ଇନାକା ମାନାତ୍? ଦୟାକିଜି ନାଙ୍ଗେଙ୍ଗ୍ ଦୁକ୍କଷ୍ଟ ହିଦ୍ମା!” ତାପାଚେ ଯୀଶୁ ବୁତ୍ତିଙ୍ଗ୍ ୱେନ୍ବାତାନ୍, “ନି ତର୍ ଇନାକା?”ହେ ବୁତ୍ ୱେଚ୍ଚାତ୍, “ନା ତର୍ ବାହିନୀ, ଇନେସ୍କି ଆପେଙ୍ଗ୍ ବେସିହେନି।” (ରୋମିୟ ସେନା ଦଳ୍ତାକେ ମାନି କେତେକ୍ ହାଜାର୍ନି ର ଦଳ୍।)
ବୁତ୍କୁ ଯୀଶୁଙ୍ଗ୍ ଗୁୱାରି କିଜି ୱେଚ୍ଚିକ୍, “ଦୟାକିଜି ମାଙ୍ଗେଙ୍ଗ୍ ଇ ବାହାତାଙ୍ଗ୍ ଜେକନି ବାହାତାକେ ପକ୍ତାମା!” ଲାଗାୟ୍ନି ମାଡ଼ି ଲାଗାୟ୍ ର ମାଞ୍ଜି ମାନ୍ଦା ହାରାଆଜି ମାଚିକ୍। ଲାଗିଙ୍ଗ୍ ହେ ବୁତ୍କୁ ଯୀଶୁଙ୍ଗ୍ ଗୁୱାରି କିଜି ୱେଚ୍ଚିକ୍, “ତା ବାଦୁଲ୍ ମାଙ୍ଗେଙ୍ଗ୍ ହେ ପାଞ୍ଜିଙ୍ଗ୍ ବିତ୍ରେ ପକ୍ତା!” ଯୀଶୁ ୱେଚ୍ଚାନ୍, “ହାଲାଟ୍!”
ବୁତ୍କୁ ହେ ମାନାୟ୍ତାଙ୍ଗ୍ ହସି ପାଞ୍ଜିଙ୍ଗ୍ ବିତ୍ରେ ହଟିକ୍। ହେ ପାଞ୍ଜିଙ୍ଗ୍ ଡେଙ୍ଗା କାଣ୍ଡିନି ହାମ୍ଦୁର୍ତାକେ ହାଲ୍ଜି ଆର୍ଜି ହାଃତିକ୍। ହେବେ ପାକାପାକି ମାନ୍ଦାନି ପାଞ୍ଜିଙ୍ଗ୍ ୨୦୦୦ ଗଟା ମାଚିକ୍।
ଇମ୍ଣି ମାନାୟାର୍ ମାଞ୍ଜିକାଙ୍ଗ୍ ଜାତୁନ୍ କିଜି ମାଚାର୍ ହେୱାର୍ ଇନାକା ଗଟାଆତାତ୍ ହେଦାଙ୍ଗ୍ ହୁଡ଼୍ତାର୍, ହେୱାର୍ ସହର୍ତାକେ ହନ୍ଞ୍ଚି ହାଚାର୍ ଆରେ ଯୀଶୁ ଇନା-ଇନାକା କିଜି ମାଚାନ୍ ହେଦାଙ୍ଗ୍ ହେୱାର୍ ଏଚେଜାଣ୍ତିଙ୍ଗ୍ ଗିଟାଆତାର୍ ୱିଜାକାରିଙ୍ଗ୍ ୱେଚ୍ଚାର୍। ସହର୍ତାକେ ମାନି ମାନାୟାର୍ ୱାଜି ଆଗେତାଙ୍ଗ୍ ବୁତ୍ ଡୁୟାଆତି ମାନାୟ୍ତିଙ୍ଗ୍ ଇନା-ଇନାକା ଗଟାଆଜି ମାଚାତ୍ ହେୱିଜୁ ହୁଡ଼୍ତାର୍। ହେୱାନ୍ ଶାନ୍ତିରେ ଆଙ୍ଗି ଉସ୍ପିସ୍ ହାର୍ଦି ମାନ୍ତାଙ୍ଗ୍ ସଦ୍ଦରମ୍ ମାନାୟ୍ ଲେକେ କୁଚ୍ଚାକା ହୁଡ଼୍ତାର୍।
ମାନାୟାର୍ ଆଦିକ୍ ପାଣ୍ଡ୍ରାଆଜି ମାଚାର୍ ଆରେ ହେୱାର୍ ତା ହାନ୍ଦିତାଙ୍ଗ୍ ଯୀଶୁଙ୍ଗ୍ ହାଞ୍ଜେଙ୍ଗ୍ ୱେଚ୍ଚାର୍। ଲାଗିଙ୍ଗ୍ ଯୀଶୁ ଡଙ୍ଗାତାକେ ଦୁମ୍ଜି ହାଞ୍ଜେଙ୍ଗ୍ ରେଡି ଆତାନ୍। ଇମ୍ଣାକାନିଙ୍ଗ୍ ବୁତ୍ ଡୁଜି ମାଚାତ୍ ହେୱାନ୍ ଯୀଶୁ ହୁଦାଙ୍ଗ୍ ହାଞ୍ଜେଙ୍ଗ୍ ହେୱାନିଙ୍ଗ୍ ଗୁୱାରି କିତାନ୍।
ମାତର୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆକାୟ୍ ଆନେଙ୍ଗ୍ ଇଚା କିନାଙ୍ଗା, ଏନେଙ୍ଗ୍ ମିଞ୍ଜ ହାଲା ଆରେ ମି ସାଙ୍ଗ ଆରେ ପରିବାର୍ତିଙ୍ଗ୍ ଈଶ୍ୱର ନି କାଜିଙ୍ଗ୍ ଇନା-ଇନାକା କିତ୍ତାନ୍ନା ଆରେ ନି କାଜିଙ୍ଗ୍ ଇମ୍ଣି ଦୟା ଚଚ୍ଚାତାନ୍ନା ହେ ୱିଜୁ ୱେଚା।”
ଲାଗିଙ୍ଗ୍ ହେ ମାନାୟ୍ ତା ହାଜ୍ଦିଙ୍ଗ୍ ହାଚାନ୍ ଆରେ ଯୀଶୁ ତା କାଜିଙ୍ଗ୍ ଇନା-ଇନକା କିଜି ମାଚାନ୍ ହେ ୱିଜୁ ବିଷୟ ୱେଚ୍ଚାନ୍। ଇମ୍ଣାକାର୍ ତା ବେଣ୍ ୱେଚାର୍ ହେୱାର୍ ଚାନିଆ ଆରେ କାବା ଆତାର୍।
ଯୀଶୁ ହାମ୍ଦୁର୍ ଆଣ୍ଟିପାଡ଼ାକା ହାଚାନ୍। ହେୱାନ୍ ହେବେ ଏକିତି ପାଚେ, ର ଗାଜା ମାନାୟ୍ ମାନ୍ଦା ରବେ ଆତାର୍ ଆରେ ତା ଜପି ତିବ୍ଗାଆଜି ମାଚାର୍। ମାନାୟ୍ ଗଉଲି ବିତ୍ରେତାଙ୍ଗ୍ ରଞ୍ଜେଲ୍ କଗ୍ଲେ ବାରବାର୍ହୁ ପାତେକ୍ମ ବିଟାଡ଼୍ ରଗ୍ ଆହିଆଜି ମାଚାତ୍। ହେଦେଲ୍ କେତେକ୍ ଡାକ୍ଟର୍ ଲାଗାୟ୍ ହାଲ୍ଜି ହାର୍ ଆନି କାଜିଙ୍ଗ୍ ୱିଜୁ ଡାବୁଙ୍ଗ୍ କର୍ଚ କିତାତ୍, ମାତର୍ ହେଦେଲ୍ ହାର୍ ଆୱାଦାଙ୍ଗ୍ ଦିନ୍ତିଙ୍ଗ୍-ଦିନ୍ ଆଦିକ୍ ହେ କରାପ୍ ଆଦେଙ୍ଗ୍ ଲାଗାତାତ୍।
ହେଦେଲ୍ ୱେଚାତ୍ ଯେ ଯୀଶୁ ବେସିହେନି ମାନାୟାରିଙ୍ଗ୍ ହାର୍ କିତାନ୍ନା ଆରେ ବାବିକିତାତ୍, “ହେଦେଲ୍ ପୁନ୍ଞ୍ଜି ମାଚାତ୍ ଯେ, ଯୀଶୁ ହେନ୍ଦ୍ରାତିଙ୍ଗ୍ ଆସ୍ପିତିସ୍ ଆନେଙ୍ଗ୍ ହାର୍ ଆନାଙ୍ଗ୍!” ଲାଗିଙ୍ଗ୍ ହେଦେଲ୍ ଯିଶୁ ପାଚ୍ବାଗାୟ୍ ୱାଜି ତା ହେନ୍ଦ୍ରାତିଙ୍ଗ୍ ଆସ୍ପାତାତ୍। ଏଚେପାଦ୍ନା ହେଦେଲ୍ ତା ହେନ୍ଦ୍ରା ଆସ୍ପାତାତ୍ ଆରେ ତା ବିଟାଡ଼୍ ରଗ୍ତାଙ୍ଗ୍ ହାର୍ ଆତାତ୍!
ସାଙ୍ଗେ-ସାଙ୍ଗେ ଯୀଶୁ ବାବିକିତାନ୍ ଯେ ତାବେତାଙ୍ଗ୍ ଶାକ୍ତି ହାଚାତ୍ନା। ଲାଗିଙ୍ଗ୍ ହେୱାନ୍ ବୁଲାଆଜି ୱେନ୍ବାତାନ୍, “ଇନେର୍ ନାଙ୍ଗେଙ୍ଗ୍ ଆସ୍ପା ଆତ୍ତାଦେର୍।”
ଚେଲାହିର୍ ୱେଚ୍ଚାର୍, “ଏନେଙ୍ଗ୍ ତ ହୁଡ଼୍ନାୟା ନି ଚାରିବେଣ୍ତାଙ୍ଗ୍ ମାନାୟ୍ ଟେଲାହେମ୍ଲା ଆନାରା।” ନାଙ୍ଗେଙ୍ଗ୍ ଇନେର୍ ଆସ୍ପା ଆତ୍ତାର୍ ଇଞ୍ଜି ଇନାକିଦେଙ୍ଗ୍ ୱେନ୍ବାଆଦ୍ନାୟା? ହେ କଗ୍ଲେ ଯୀଶୁ ଲାଗାୟ୍ ତ୍ରିଗ୍ଜି, ପାଣ୍ଡ୍ରାଆଜି ମେଣ୍ଡାକୁନ୍ଦିକିତାତ୍। ହେଦେଲ୍ ଇନାକା କିଜି ମାଚାତ୍, ହେଦାଙ୍ଗ୍ ୱିଜୁ ୱେଚ୍ଚାତ୍ ଆରେ ହେଦେଲ୍ ହାର୍ ଆତାତ୍। ଯୀଶୁ ହେଦେଲିଙ୍ଗ୍ ୱେଚ୍ଚାନ୍, “ନି ପାର୍ତି ନିଙ୍ଗେଙ୍ଗ୍ ହାର୍ କିତ୍ତାତ୍ନା। ନଙ୍ଗୟ୍ ଏନେଙ୍ଗ୍ ଶାନ୍ତିରେ ହାଲା।”
ବାଇବଲନି ର କାତା: ମାଥିଉ ୮:୨୮- ୩୪; ୯: ୨୦- ୨୦; ମାର୍କ ୫: ୧- ୨୦; ୫: ୨୪-୩୪; ଲୁକ ୮: ୨୬- ୩୯; ୮: ୪୨-୪୮
Free to use, adapt, and share under an open license (CC BY-SA 4.0).