33. ୩୩. ଚାସି ମାନାୟ୍ତି କାତା
ରଦିନ୍ ଯୀଶୁ ହାମ୍ଦୁର୍ କାଣ୍ଡିତାକେ ବେସି ହେନି ମାନାୟାରିଙ୍ଗ୍ ହିକ୍ଷାହିଜି ମାଚାନ୍।କେତେକ୍ ମାନାୟ୍ ୱେଞ୍ଜେଙ୍ଗ୍ ଯୀଶୁ ଲାଗାୟ୍ ୱାତାର୍। ଆରେ ମାନାୟାରିଙ୍ଗ୍ ୱିଜୁ ବାହାତାକେ ଇନେସ୍ ହିକ୍ଷା ହିଦେଙ୍ଗ୍ ଆଡ୍ନାନ୍ ହେଦାଙ୍ଗ୍ କାଜିଙ୍ଗ୍ ହେୱାନ୍ ହାମ୍ଦୁର୍ କାଣ୍ଡିତାକେ ମାନି ର ଡଙ୍ଗାତାକେ ହାଲ୍ଜି କୁଚ୍ଚାନ୍। ହେୱାନ୍ ଡଙ୍ଗାତାକେ କୁଚ୍ଚାନ୍ ଆରେ ମାନାୟାରିଙ୍ଗ୍ ହିକ୍ଷା ହିତାନ୍।
ଯୀଶୁ ଇ କାତା ୱେଚ୍ଚାନ୍, “ରକାନ୍ ଚାସି ଅଲପ୍ ବିୟାନ୍ ୱିତ୍ଦେଙ୍ଗ୍ ହତ୍ତାନ୍। ହେୱାନ୍ ଏଚେପାଦ୍ନା କେଇଦାଙ୍ଗ୍ ବିୟାନ୍ ୱିତ୍ଦେଙ୍ଗ୍ ଲାଗାତାନ୍, ଅଲପ୍ ବିୟାନ୍ ହାଜ୍ଦ ଆର୍ତାତ୍, ଆରେ ପଟିଙ୍ଗ୍ ୱାଜି ହେ ବିୟାନ୍ତିଙ୍ଗ୍ ଚିଚିକ୍।“
“ଜେକିନି ବିୟାନ୍ ରେଚ୍କି ବାହାତାକେ ଆର୍ତିକ୍, ହେବେ ଅଲପ୍ ଚିକ୍ଲା ମାଚାତ୍। ରଚ୍କି ମେଦ୍ନିତାକେ ମାନି ବିୟାନ୍ ବେଗି ଗଜା ଆତାତ୍, ମାତର୍ ଚିରାଙ୍ଗ୍ ମେଦ୍ନି ବିତ୍ରେ ହାଞ୍ଜେଙ୍ଗ୍ ଆଡ୍ୱିତିତ୍। ଏଚେପାଦ୍ନା ୱେଡ଼ା ହତ୍ତାତ୍ ଆରେ କାରା ଜୁରା ଆତାତ୍, ହେ ପାଡ଼ା କାମ୍ଜା ଆଜି ଆରେ ହାଃତାତ୍।“
“ଆରେ ଜେକିନି ବିୟାନ୍ ୱାଡ଼ିକୁଡ଼ିକାଙ୍ଗ୍ ଆର୍ତିକ୍। ଇ ୱିଜୁ ବିୟାନ୍ ଗଜା ଆଦେଙ୍ଗ୍ ଲାଗିତିକ୍, ମାତର୍ ୱାଡ଼ିକୁଡ଼ି ଗାଜାଆଜି ତା ଜପି ଡାବାୟ୍ କିତାତ୍। ଲାଗିଙ୍ଗ୍ ୱାଡ଼ିକୁଡ଼ିକାଙ୍ଗ୍ ମାନି ବିୟାନ୍ ଇମ୍ଣାକା ଗାଜା ଆଜି ମାଚିକ୍, ଇମ୍ଣି ତାସ୍ ପା ଉବ୍ଜା ଆୱାତାତ୍।”
“ଆରେ ଜେକନି ବିୟାନ୍ ହାର୍ଦି ମେଦ୍ନିତାକେ ଆର୍ତିକ୍। ହେ ବିୟାନ୍ ଗାଜାଆଜି ୩୦, ୬୦ ଆରେ ଇଲେକେ ୧୦୦ ଗୁଣ୍ ପାତେକ୍ ତାସ୍ ଆଦେଙ୍ଗ୍ ଲାଗାତାତ୍। ଇନେର୍ ୱେନ୍ଞ୍ଜି ବୁଜାଆନାକାର୍ ହେୱାର୍ ୱେନେର୍।”
ଇ କାତା ଚେଲାହିରିଙ୍ଗ୍ କାବା କିତାତ୍। ଲାଗିଙ୍ଗ୍ ଯୀଶୁ ବୁଜାଇ କିଜି ୱେଚ୍ଚାନ୍, “ବିୟାନ୍ ଆନାତା ଈଶ୍ୱର କାତା। ହାଜି ଆନାତା ହେ ମାନାୟ୍ ଇନେର୍ ଈଶ୍ୱର କାତା ୱେନାନ୍, ମାତର୍ ହେଦାଙ୍ଗ୍ ବୁଜାଆଦେଙ୍ଗ୍ ଆଡୁନ୍, ଆରେ ଶୟତାନ ହେୱାନ୍ତାଙ୍ଗ୍ କାତା ଚର୍କିଜି ଅନାନ୍।“
“ରେଚ୍କି ମେଦ୍ନି ଆନାତା ହେ ମାନାୟ୍ ଇନେର୍ ଈଶ୍ୱର କାତା ୱେନାନ୍ ଆରେ ୱାରିତାଙ୍ଗ୍ ଆହ୍ନାନ୍। ମାତର୍ ଏଚେପାଦ୍ନା ହେୱାନ୍ କଷ୍ଟ କି ନିନ୍ଦା ୱାତିସ୍, ହେୱାନ୍ ହେ କାତାତିଙ୍ଗ୍ ବାଣା ଆନାନ୍।”
“ୱାଡ଼ିକୁଡ଼ି ମେଦ୍ନି ଆନାତା ହେ ମାନାୟ୍ ହେୱାନ୍ ଈଶ୍ୱର କାତା ୱେନାନ୍, ମାତର୍ ଏଚେପାଦ୍ନା ସମୟ ୱାନାତ୍। ଜାତୁନ୍ ଅନାକା ଆରେ ହାଉକାର୍ ଆନି ବାରବିନି ଚିନ୍ତା ଇ ୱିଜୁ ଈଶ୍ୱର ତାକେ ମାନି ଲାଡ୍ତିଙ୍ଗ୍ ଡାବାୟ୍ କିନାତ୍।ପାଡ଼୍ ଲେକେ ଇମ୍ଣି ହିକ୍ଷା ହେୱାନ୍ ୱେନ୍ଞ୍ଜି ମାନାନ୍ ହେଦାଙ୍ଗ୍ ଉବ୍ଜାୟ୍ କିଉନ୍।”
“ମାତର୍ ହାର୍ଦି ମେଦ୍ନି ଆନାତା ହେ ମାନାୟ୍ ଇନେର୍ ଈଶ୍ୱର କାତାତିଙ୍ଗ୍ ୱେନାନ୍, ପାର୍ତି କିନାନ୍ ଆରେ ପାଡ଼୍ ଉବ୍ଜାୟ୍ କିନାନ୍।“
ବାଇବଲ୍ନି ର କାତା: ମାଥିଉ ୧୩: ୧- ୮, ୧୮- ୨୩; ମାର୍କ ୪: ୧-୮, ୧୩- ୨୦; ଲୁକ ୮: ୪- ୧୫
Free to use, adapt, and share under an open license (CC BY-SA 4.0).