34. ୩୪.ଯୀଶୁ ଜେକନି ୱିଜୁ କାତାତିଙ୍ଗ୍ କାତା ୱେଚ୍‌ନି ଲେକେ କିଜି ୱେଚ୍‌ନାନ୍‌

ଈଶ୍ୱର ସାସନ୍ କିନି ରାଜିନି ବିଷୟରେ ଯୀଶୁ ଆରେ କେତେକ୍ କାତା ୱିଜୁ ୱେଚ୍‌ଚାନ୍, “ଈଶ୍ୱର ସାସନ୍ କିନି ରାଜି ଆନାତା ର ହାର୍‌ହୁ ମାଞ୍ଜି ଲେକେ ହେଦାଙ୍ଗ୍ ଇନେର୍ ରକାନ୍ ତା ଜମିତ ମାଞ୍ଜି ରୁସ୍ତାନ୍। ଏପେଙ୍ଗ୍ ପୁନାଟ୍ ଯେ ହାର୍‌ହୁ ମାଞ୍ଜି ୱିଜୁ ମାଞ୍ଜିତାଙ୍ଗ୍ ହିରୁ।”

“ମାତର୍ ଏଚେପାଦ୍ନା ହାର୍‌ହୁ ମାଞ୍ଜି ଗାଜା ଆନାତ୍, ଇଦାଙ୍ଗ୍ ୱିଜୁ ମାର୍‌ତାଙ୍ଗ୍ ଗାଜା ମାର୍ ଆନାତ୍, ହେ ମାର୍‌ତାକେ ପଟିଙ୍ଗ୍ ୱାଜି ତା କେନ୍ଦାକାଙ୍ଗ୍ ଗୁଡା ଗାଚ୍‌ନିଙ୍ଗ୍।”

ଯୀଶୁ ଆରେ ର କାତା ୱେଚ୍‌ଚାନ୍, “ଈଶ୍ୱର ସାସନ୍‌କିନି ରାଜି ର ସଡ଼ାକାର୍ ଲେକେ ହେଦାଙ୍ଗ୍‌ ର କଗ୍‌ଲେ ଅଜି ମଇଦା ଗୁଣ୍ଡା ଲାହାଙ୍ଗ୍ ୱିଜୁ ନିପଣ୍ ଆନି ପାତେକ୍ ମାହାୟ୍ କିନାତ୍।”

“ଈଶ୍ୱର ସାସନ୍ କିନି ରାଜି ଆରେ ପା ଡ଼ୁକ୍ତି ଦନ୍ ଲେକେ ହେଦାଙ୍ଗ୍ ରକାନ୍ ଅଜି ଜମିତାକେ ଡ଼ୁକ୍‌ଚି ଇଡ଼୍‌ତାନ୍। ଆରେ ରକାନ୍ ମାନାୟ୍ ଇ ଡ଼ୁକ୍ତି ଦନ୍‌ତିଙ୍ଗ୍ ଗାଟାଆତାନ୍ ଆରେ ଆରେରଗ ମୁଚ୍‌ଚାନ୍। ହେୱାନ୍ ୱାରିତାଙ୍ଗ୍ ଏଚେକ୍ (ବିବର) ଆତାନ୍ ଯେ ହେୱାନ୍ ହାଲ୍‌ଜି ୱିଜୁ ଜିନିଷ୍ ପତାନ୍ ଆରେ ହେ ଜମିତିଙ୍ଗ୍ କଡ଼୍‌ନି କାଜିଙ୍ଗ୍ ହେ ଡାବୁକାଙ୍ଗ୍ ବ୍ୟବହାର୍ କିତାନ୍।”

“ଈଶ୍ୱର ରାଜି ର ବେସି ଦାମ୍‌ନି ହିରା ଲେକେ। ଏଚେପାଦ୍ନା ରକାନ୍ ହିରା ପନାକାନ୍ ଇଦାଙ୍ଗ୍ ହୁଡ଼୍‌ତାନ୍, ହେୱାନ୍ ହାଲ୍‌ଜି ଜାର୍ ୱିଜୁ ଜିନିଷ୍‌ତିଙ୍ଗ୍ ପସି ଇଦାଙ୍ଗ୍ ତିଙ୍ଗ୍ କକଡ୍‌ନି କାଜିଙ୍ଗ୍ ହେ ଡାବୁକାଙ୍ଗ୍ ବ୍ୟବହାର୍ କିତାନ୍।”

ତାପାଚେ ଯୀଶୁ ମାନାୟାରିଙ୍ଗ୍ ଜାର୍ ହାର୍‌ଦି କାମାୟ୍ ଜପି ପାର୍ତିକିଜି ଜେକନିକାରିଙ୍ଗ୍ ଗିଣ୍ କିଜିମାଚି ବିଷୟରେ ର କାତା ୱେଚ୍‌ଚାନ୍,“ହେୱାନ୍ ୱେଚ୍‌ଚାନ୍, ରିକାର୍ ମାନାୟ୍ ପାର୍ତାନା କିନି କାଜିଙ୍ଗ୍ ମନ୍ଦିର୍‌ତାକେ ହାଚାର୍। ହେୱାର୍ ବିତ୍ରେତାଙ୍ଗ୍ ରକାନ୍ ସିସ୍ତୁ ଏନ୍‌ନାକାନ୍ ଆରେ ରକାନ୍ ଦରମ୍ ଗୁରୁ।”

“ହେ ଦରମ୍ ଗୁରୁ ଇ ଲେକେ ପାର୍ତାନା କିତାନ୍,ଏ ଈଶ୍ୱର ଆନେଙ୍ଗ୍ ନିଙ୍ଗେଙ୍ଗ୍ ଦନ୍ୟବାଦ୍ ହିଦ୍‌ନାଙ୍ଗା ଯେ ଜେକନି ମାନାୟ୍ ଲେକେ ଆନେଙ୍ଗ୍ ପାପି ଆକାୟ୍, ଇନେସ୍‌କି ରକାନ୍ ଚର୍, ଅଦାରୁମ୍, ଦାରି କାମାୟ୍ କିନାକା କି ଇ ସିସ୍ତୁ ଏନ୍‌ନାକାନ୍ ଲେକେ ଆକାୟ୍।”

“ଆନେଙ୍ଗ୍ ଆଡ଼୍‌ଦିନ୍ ତିଙ୍ଗ୍ ରିହା ଉପାସ୍ କିନାଙ୍ଗା ଆରେ ନା ଆର୍‌ଜା ଆତି ଡାବୁଙ୍ଗ୍ ଆରେ ଜିନିଷ୍‌ନି ୱିଜୁତାଙ୍ଗ୍ ର ବାଗ୍ ଦାନ୍ ହିନାଙ୍ଗା।”

“ମାତର୍ ସିସ୍ତୁ ଏନ୍‌ନାକାନ୍ ଦରମ୍ ଗୁରୁତାଙ୍ଗ୍ ବେସି ଦେହା ନିଲ୍‌ତାନ୍‌, ଆରେ ସରଗ୍ ନିପଣ୍ ହୁଡ଼୍‌ଦେଙ୍ଗ୍ ସାହାସ୍ ପାୟାଆୱାନ୍‌। ଆରେ ହେୱାନ୍ ତା ନେଞ୍ଜାଡାତାକେ ଇଡ଼ିଆଜି ପାର୍ତାନା କିତାନ୍, ‘ଏ ଈଶ୍ୱର ନାଙ୍ଗେଙ୍ଗ୍ ଦୟାକିଦା, ଇନେସ୍‌କି ଆନେଙ୍ଗ୍ ରକାଙ୍ଗ୍ ପାପି ମାନାୟ୍।’”

ଲାଗିଙ୍ଗ୍ ଯୀଶୁ ୱେଚ୍‌ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, ଈଶ୍ୱର ସିସ୍ତୁ ଏନ୍‌ନି ମାନାୟ୍ ପାର୍ତାନା କିତାକା ୱେଚାନ୍ ଆରେ ହେୱାନିଙ୍ଗ୍ ଦରମ୍‌ ମାନାୟ୍ ଇଞ୍ଜି ଗାଣା କିତାନ୍। ମାତର୍ ହେ ଦରମ୍ ଗୁରୁକିତି ପାର୍ତାନା ୱେନ୍‌ୱାତାନ୍। ଇନେର୍ ଜାର୍‌ତିଙ୍ଗ୍ ଗାଜାକାନ୍ ଇନାନ୍, ଈଶ୍ୱର ହେୱାନିଙ୍ଗ୍ ହିରୁ କିନାନ୍, ଆରେ ଇନେର୍ ଜାର୍‌ତିଙ୍ଗ୍ ହିରୁ ଆନାନ୍, ହେୱାନିଙ୍ଗ୍ ଈଶ୍ୱର ଉଦାର୍ କିନାନ୍।”