35. ୩୫. ଦୟାମାନି ଆବାତି କାତା
ଦିନେକ୍ ଯୀଶୁ କେତେକ୍ ସିସ୍ତୁ ଏନ୍କାରିଙ୍ଗ୍ ଆରେ ଜେକନି ପାପି ମାନାୟାରିଙ୍ଗ୍ ଇମ୍ଣାକାର୍ ୱେଞ୍ଜେଙ୍ଗ୍ ରବେ ଆଜି ମାଚାର୍, ହେୱାରିଙ୍ଗ୍ ହିକ୍ଷା ହିଜି ମାଚାର୍।
ହେବେ ମାନି କେତେକ୍ ଦରମ୍ ନେତାର୍ ଯୀଶୁଙ୍ଗ୍ ପାପି ମାନାୟାର୍ ହୁଦାଙ୍ଗ୍ ସାଙ୍ଗ ଲେକେ ବ୍ୟବହାର୍ କିନାକା ହୁଡ଼୍ତାର୍, ଆରେ ଜାର୍-ଜାର୍ ବିତ୍ରେ ହେୱାର୍ ତା ବିରଦ୍ତାକେ ଜୁକ୍ତି କିଦେଙ୍ଗ୍ ଲାଗାତାର୍। ଲାଗିଙ୍ଗ୍ ଯୀଶୁ ହେୱାରିଙ୍ଗ୍ ଇ କାତା ୱେଚ୍ଚାନ୍।
“ରକାନ୍ ମାନାୟ୍ତିଙ୍ଗ୍ ରିକାର୍ ହିମ୍ଣାଙ୍ଗ୍ ମାଚାର୍।” ହିରୁ ହିମ୍ଣା ତାଞ୍ଜିବାଙ୍ଗ୍ ୱେଚ୍ଚାନ୍, “ଆବା, ଦନ୍ ସମ୍ଫତିନି ଇମ୍ଣାକା ନା ବାଗ୍ଦ ମାନାତ୍ ହେଦାଙ୍ଗ୍ ଆନେଙ୍ଗ୍ ଇଚା କିନାଙ୍ଗା!ଲାଗିଙ୍ଗ୍ ତାଞ୍ଜ୍ବା ହେ ରିକାର୍ ମେହିରିଙ୍ଗ୍ ବାଟା କିଜି ହିତାନ୍।”
“ତା ହିରୁ ମେହି ତାବେ ମାନି ୱିଜୁ ଜିନିଷ୍ ରବେ କିଜି ଦେହା ହାଚାନ୍ ଆରେ କରାପ୍ ଜିବୁନ୍ କାଟିକିନି କାଜିଙ୍ଗ୍ ଦନ୍ସମ୍ଫତି ଉପ୍ତାନ୍।”
“ତାପାଚେ ହିରୁ ହିମ୍ଣା ଇମ୍ଣି ଦେସ୍ତାକେ ମାଚାନ୍ ହେ ଦେସ୍ତ ର ଗାଜା ମାର୍ଡି ଆତାତ୍, ଆରେ କାଦି କଡ଼୍ଦେଙ୍ଗ୍ ତା ଲାଗାୟ୍ ଡାବୁଙ୍ଗ୍ ହିଲାତାତ୍। ଲାଗିଙ୍ଗ୍ ମାଞ୍ଜିକାଙ୍ଗ୍ ଚିଚ୍ପିନି କାମାୟ୍ ହେୱାନିଙ୍ଗ୍ ଗାଟାଆତାତ୍। ହେୱାନ୍ ଏଚେକ୍ ଦରିଦ୍ ଆରେ ନାସ୍କି ମାଚାନ୍ ଯେ ହେୱାନ୍ ମାଞ୍ଜିକାଙ୍ଗ୍ ହିତି କାଦିତିଙ୍ଗ୍ ଚିଞ୍ଜେଙ୍ଗ୍ ଲାଗାତାନ୍।”
“ତାପାଚେ ହିରୁ ହିମ୍ଣା ଜାର୍ତିଙ୍ଗ୍ ନିଜେ ୱେଚିଆତାନ୍ ଆନେଙ୍ଗ୍ ଇନାକା କିନାଙ୍ଗା? ମାଞ୍ଜ୍ବାନି ୱିଜୁ କୁଲିୟାର୍ କାଜିଙ୍ଗ୍ ବେସି କାଦି ମାନାତ୍, ଆରେ ଆନେଙ୍ଗ୍ ଇବେ ନାସ୍କିତାକେ ହାଃନାଙ୍ଗା। ଆନେଙ୍ଗ୍ ମାଞ୍ଜ୍ବା ଲାଗାୟ୍ ହାନାଙ୍ଗ୍ ଆରେ ନାଙ୍ଗେଙ୍ଗ୍ ତା କୁଲିୟା ଲେକେ ଇଡ଼୍ଦେଙ୍ଗ୍ ୱେଚ୍ନାଙ୍ଗ୍।”
“ଲାଗିଙ୍ଗ୍ ହିରୁ ହିମ୍ଣା ତାଞ୍ଜ୍ବା ଲଗାୟ୍ ଇଞ୍ଜ ଲେଉଟାଆଜି ହାଞ୍ଜେଙ୍ଗ୍ ହତାନ୍। ହେୱାନ୍ ଏଚେପାଦ୍ନା ଦେହା ମାଚାନ୍, ତାଞ୍ଜ୍ବା ଦେହାତାଙ୍ଗ୍ ହୁଡ଼୍ଜି ଦୟାତାଙ୍ଗ୍ ୱାରି ଆତାନ୍। ହେୱାନ୍ ତା ମେହି ଲାଗାୟ୍ ହନ୍ଚି ହାଲ୍ଜି ପମ୍ତାନ୍ ଆରେ ଚୁମା ହିତାନ୍।”
ମେହି ୱେଚ୍ଚାନ୍, “ଆବା ଆନେଙ୍ଗ୍ ଈଶ୍ୱର ବିରଦ୍ତାକେ ଆରେ ନି ବିରଦ୍ତାକେ ପାପ୍ କିତାଙ୍ଗ୍ନା। ନି ମେହି ଇଞ୍ଜି କୁକି ଆନାକା ନା ଯଗ୍ୟ ଆକାୟ୍।”
ମାତର୍ ତାଞ୍ଜ୍ବା ତା ଦାସ୍ ବିତ୍ରେତାଙ୍ଗ୍ ରକାନିଙ୍ଗ୍ ୱେଚ୍ଚାନ୍, “ବେଗି ହାଲ୍ଜି ୱିଜୁତାଙ୍ଗ୍ ହାର୍ଦି ଆଙ୍ଗି ତାସି ୱାଡ ଆରେ ହେଦାଙ୍ଗ୍ ନା ମାଜିଙ୍ଗ୍ ଉସ୍ପି କିୟାଟ୍। ତା ୱାଚ୍କାତାକେ ୱାତୁସ୍ ଆରେ କାଲ୍କୁକାଙ୍ଗ୍ ପାଣ୍ଡାଇ ହିୟାଟ୍। ତାପାଚେ ୱିଜୁତାଙ୍ଗ୍ ହାର୍ଦି ମଟାରଟା ବାଚି ଅହାଟ୍ ଆରେ ଆସେଙ୍ଗ୍ ବଜି ୱାନ୍ଞ୍ଜି ତିନାସ୍, ଇନେସ୍କି ନା ହିମ୍ଣା ହାଃଜି ମାଚାନ୍, ମାତର୍ ନଙ୍ଗୟ ହେୱାନ୍ ଜିବୁନ୍ ମାନାନ୍, ହେୱାନ୍ ଜାଙ୍ଗ୍ଜି ମାଚାନ୍, ମାତର୍ ନଙ୍ଗୟ ଗାଟାଆତ୍ତାନ୍।”
“ଲାଗିଙ୍ଗ୍ ମାନାୟାର୍ ବଜି ରସ୍ତେଙ୍ଗ୍ ଆରମ୍ କିତାର୍। ଆଦିକ୍ ସମୟ ଆତି ଆଗେ, ଜମିତ କାମାୟ୍ କିଦେଙ୍ଗ୍ ହାଲ୍ଜି ମାଚି ଗାଜାକାନ୍ ମେହି ଇଞ୍ଜ ୱାତାନ୍। ହେୱାନ୍ କେର୍କଣ୍ ଆରେ ଏନ୍ଦ୍ନାକା ୱେଚାନ୍ ଆରେ ଇନାକା ଆନାତା ଇଞ୍ଜି ଚାନିଆ ଆତାନ୍।”
“ତା ହିରୁକାନ୍ ଟଣ୍ଡାହି ୱାତିଲେ ଇ ୱିଜୁ ବଜି କିତାର୍ନା ଏଚେପାଦ୍ନା ହେ ଗାଜାକାନ୍ ଟଣ୍ଡାହି ହୁଡ଼୍ତାନ୍, ହେପାଦ୍ନା ହେୱାନ୍ ବେସି ରିସାଆଜି ମାଚାନ୍ ଆରେ ଇଲ୍ ବିତ୍ରେ ହାଲ୍ୱାତାନ୍। ତାଞ୍ଜ୍ବା ୱାତାନ୍ ଆରେ ହେୱାର୍ ହୁଦାଙ୍ଗ୍ ବଜି ମାନି କିଦେଙ୍ଗ୍ ଗୁୱାରି କିତାନ୍, ମାତର୍ ହେୱାନ୍ ଆକାୟ୍ ଇଚାନ୍।”
ଗାଜାକାନ୍ ମେହି ତାଞ୍ଜ୍ବାଙ୍ଗ୍ ୱେଚ୍ଚାନ୍, “ଏଚେକ୍ ବାର୍ହୁ ଆସ୍ତି ଆନେଙ୍ଗ୍ ବିସ୍ବସ୍ତ ଆଜି ନି କାମାୟ୍ କିଜି ୱାନାଙ୍ଗା! ଆନେଙ୍ଗ୍ ଇନେୱାଡ଼ାଙ୍ଗ୍ ପା ନି କାତାତିଙ୍ଗ୍ ଆକାୟ୍ ଇନ୍ୱାତାଙ୍ଗ୍ନା, ଆତିସ୍ପା ଏନେଙ୍ଗ୍ ନା କାଜିଙ୍ଗ୍ ର ହିରୁ ଅଡା ହିମ୍ଣା ପା ହିଦ୍ୱାତାଇନା ଇନେସ୍କି ଆନେଙ୍ଗ୍ ନା ସାଙ୍ଗର୍ ହୁଦାଙ୍ଗ୍ ବଜି କିଦେଙ୍ଗ୍ ଆଡ୍ନାଙ୍ଗ୍। ମାତର୍ ନି ଇ ହିରୁକାନ୍ ମାଜି ସତ୍ରେ ନି ସମ୍ଫତି ୱିସ୍ତି ଇଞ୍ଜ ୱାତାନ୍, ଏନେଙ୍ଗ୍ ତା କାଜିଙ୍ଗ୍ ୱିଜୁତାଙ୍ଗ୍ ମଟାରଟା ବାଚି ଅସ୍ତାଇ।”
ତାଞ୍ଜ୍ବା ୱେଚ୍ଚାନ୍, “ହିମ୍ଣା, ଏନେଙ୍ଗ୍ ୱିଜୁଦିନ୍ ନା ହୁଦାଙ୍ଗ୍ ମାନାୟା, ଇମ୍ଣି ୱିଜାକା ନାଦି ହେ ୱିଜୁ ପା ନିଦି। ମାତର୍ ମା କାଜିଙ୍ଗ୍ ବଜି ରହ୍ନାକା ଦର୍କାର୍ ମାଚାତ୍, ଇନେସ୍କି ନି ଟଣ୍ଡାଦି ହାଃଜି ମାଚାନ୍, ମାତର୍ ନଙ୍ଗୟ ଜିବୁନ୍ ମାନାନ୍। ହେୱାନ୍ ଜାଙ୍ଗ୍ଜି ମାଚାନ୍, ମାତର୍ ନଙ୍ଗୟ ଗାଟାଆତ୍ତାନ୍ନା।”
ବାଇବଲ୍ନି ର କାତା: ଲୁକ ୧୫: ୧୧- ୩୨
Free to use, adapt, and share under an open license (CC BY-SA 4.0).