38. ୩୮. ଯୀଶୁଙ୍ଗ୍ ଶତ୍ରୁ କେଇଦ ଆହିକିତାନ୍
ପାତି ବାର୍ହୁ ଯିହୁଦିର୍ ନିସ୍ତାର୍ ପାର୍ବୁ ତିନ୍ଞ୍ଜି ମାଚାର୍। ଇଦାଙ୍ଗ୍ ଆନାତା ହେ ପାର୍ବୁ ଇମ୍ଣାକାକି ବେସି ଶହେ ବାର୍ହୁ ଆଗେ ଈଶ୍ୱର ଇନେସ୍ ହେୱାର୍ ଆକଦାଦିରିଙ୍ଗ୍ ଦାସ୍ ଆତିତାଙ୍ଗ୍ ଉଦାର୍ କିଜି ତାସି ମାଚାନ୍। ଯୀଶୁ ୱିଜାକାର୍ ପୁନିଲେକେ କାତା ଶୁଣାୟ୍ କିନି ହିକ୍ଷା ଆରମ୍ କିତି ପାକାପାକି ତିନ୍ ବାର୍ହୁ ପାଚେ ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍ ଯେ ହେୱାନ୍ ହେୱାର୍ ହୁଦାଙ୍ଗ୍ ଯିରୁଶାଲାମ ସହର୍ତାକେ ନିସ୍ତାର ପାର୍ବୁ ତିଞ୍ଜେଙ୍ଗ୍ ଇଚା କିନାନା, ଆରେ ହେବେ ହେୱାନିଙ୍ଗ୍ ମାର୍ନେ ଅହ୍ନାର୍।
ଯୀଶୁ ଚେଲାହିର୍ ବିତ୍ରେତାଙ୍ଗ୍ ଯିହୁଦା ତର୍ଦାକାନ୍ ରକାନ୍ ଚେଲାହି ମାଚାନ୍। ଯିହୁଦା ଚେଲାହିର୍ ଡାବୁଙ୍ଗ୍ ମାଣା ଆହ୍ନି ଦାୟିତ୍ପ ମାଚାନ୍, ମାତର୍ ହେୱାନ୍ ଡାବୁକାଙ୍ଗ୍ ଲାଡ୍ କିତାନ୍ ଆରେ କେତେକ୍ ସମୟତ ହେ ମାଣାନି ଡାବୁଙ୍ଗ୍ ଚର୍ କିଜିମାଚାନ୍। ଯୀଶୁ ଆରେ ତା ଚେଲାହିର୍ ଯିରୁଶାଲାମ ସହର୍ତାକେ ଏକିତି ପାଚେ, ଯିହୁଦା ଡାବୁଙ୍ଗ୍ ବାଦୁଲ୍ ଯୀଶୁଙ୍ଗ୍ ଶତ୍ରୁ କେଇଦ ଆହିକିନି କାଜିଙ୍ଗ୍ ଯିହୁଦି ନେତାର୍ ଲାଗାୟ୍ ହାଚାନ୍।ହେୱାନ୍ ପୁନ୍ଞ୍ଜି ମାଚାନ୍ ଯେ ଯୀଶୁ ନେ ଖ୍ରୀଷ୍ଟ, ଇଦାଙ୍ଗ୍ ଯିହୁଦି ନେତାର୍ ପାର୍ତି କିୱାଦାଙ୍ଗ୍ ମାଚାର୍ ଆରେ ହେୱାର୍ ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିଜି ମାଚାର୍।
ଯିହୁଦି ନେତାର୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ତାଙ୍ଗ୍ ଯୀଶୁଙ୍ଗ୍ ଶତ୍ରୁ କେଇଦ ହିଦେଙ୍ଗ୍ ତିରିଶ୍ ଗଟା ରୁପା ଡାବୁଙ୍ଗ୍ ହିଜି ମାଚାର୍। ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାର୍ ଶୁଣାୟ୍ କିତି ଅନୁସାରେ ଇଦାଙ୍ଗ୍ ଗିଟାଆଜି ମାଚାତ୍। ଯିହୁଦା ହେଦାଙ୍ଗ୍ତିଙ୍ଗ୍ ରାଜିଆଜି ଡାବୁଙ୍ଗ୍ ଅତାନ୍। ହେୱାନ୍ ଇନେସ୍ ଯୀଶୁଙ୍ଗ୍ ଆସ୍ତି ଶତ୍ରୁ କେଇଦ ଆହିକିନାନ୍ ହେଦାଙ୍ଗ୍ କାଜିଙ୍ଗ୍ ହେୱାନ୍ ସୁଜଗ୍ ଡେକ୍ଚି ମାଚାନ୍।
ୟିରୁଶାଲାମ ସହର୍ତାକେ ଯୀଶୁ ତା ଚେଲାହିର୍ ହୁଦାଙ୍ଗ୍ ନିସ୍ତାର ପାର୍ବୁ ଚିଚାନ୍। ନିସ୍ତାର ପାର୍ବୁନି ବଜି ତିନିହିଙ୍ଗ୍, ଯୀଶୁ ର ରୁଟି ପେଜ୍ଦି ଡିକ୍ତାନ୍। ଆରେ ହେୱାନ୍ ୱେଚ୍ଚାନ୍, “ଇଦାଙ୍ଗ୍ ଅଜି ତିନାଟ୍।ଇଦାଙ୍ଗ୍ ନା ଗାଗାଡ଼୍, ଇନାକା ମି କାଜିଙ୍ଗ୍ ହିୟାଆତାତ୍ନା।ନାଙ୍ଗେଙ୍ଗ୍ ଏତୁ କିଦ୍ନି କାଜିଙ୍ଗ୍ ଇଦାଙ୍ଗ୍ କିୟାଟ୍।” ଇଲେକେଯୀଶୁୱେଚ୍ଚାନ୍, ହେୱାର୍ କାଜିଙ୍ଗ୍ ତା ଗାଗାଡ଼୍ ବଲି ପୁଜା ଲେକେ ଆନାତ୍।
ତାପାଚେ ଯୀଶୁ ର ଗିଲାସ୍ ନିକ୍ତାନ୍ ଆରେ ୱେଚ୍ଚାନ୍, “ଇଦାଙ୍ଗ୍ତିଙ୍ଗ୍ ଉଣାଟ୍। ଇଦାଙ୍ଗ୍ ନା ପୁନି ନିୟମ୍ନି ନେତେର୍ ଇମ୍ଣାକା ପାପ୍ କେମା କାଜିଙ୍ଗ୍ ବଡ଼ା ଆତାତ୍ନା। ଏପେଙ୍ଗ୍ ୱିଜୁ ହଟ୍ ଇଦାଙ୍ଗ୍ ଉଣିହିଙ୍ଗ୍ ନାଙ୍ଗେଙ୍ଗ୍ ଏତୁ କିଦାଟ୍।”
ତାପାଚେ ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ମି ବିତ୍ରେତାଙ୍ଗ୍ ରକାନ୍ ନାଙ୍ଗେଙ୍ଗ୍ ଶତ୍ରୁ କେଇଦ ଆହିକିଦ୍ନାନ୍।” ଚେଲାହିର୍ ଚାନିଆ ଆଜି ହାଚାର୍, ଆରେ ଇଲେକେ ଇନେର୍ କିନାର୍ ଇଞ୍ଜି ୱେନ୍ବାତାର୍। ଯୀଶୁ ୱେଚ୍ଚାନ୍, “ଆନେଙ୍ଗ୍ ଇମ୍ଣାକାନିଙ୍ଗ୍ ଇ ରୁଟି ହିନାଙ୍ଗ୍ ହେୱାନ୍ ନାଙ୍ଗେଙ୍ଗ୍ ଶତ୍ରୁ କେଇଦ ଆହି କିଦ୍ନାନ୍।” ତାପାଚେ ହେୱାନ୍ ହେ ରୁଟିତିଙ୍ଗ୍ ଯିହୁଦାଙ୍ଗ୍ ହିତାନ୍।
ଯିହୁଦା ହେ ରୁଟି ଅତି ପାଚେ, ଶୟତାନ ତା ବିତ୍ରେ ହଟାତ୍। ଯିହୁଦା ହେ ବାହା ପିସ୍ତି ଯୀଶୁଙ୍ଗ୍ ଆହ୍ନି କାଜିଙ୍ଗ୍ ଯିହୁଦିର୍ ଗୁରୁରିଙ୍ଗ୍ ସାଇଜ କିଦେଙ୍ଗ୍ ହେୱାର୍ ଲାଗାୟ୍ ହାଚାନ୍। ହେପାଦ୍ନା ନାଣା ଆଜି ମାଚାତ୍।
କାଦି ଚିଚି ପାଚେ, ଯୀଶୁ ଆରେ ତା ଚେଲାହିର୍ ଜିତ୍ ମାଡ଼ିତାକେ ହାଚାର୍।ଯୀଶୁ ୱେଚ୍ଚାନ୍, “ଏପେଙ୍ଗ୍ ୱିଜାକାଦେର୍ ନାଙ୍ଗେଙ୍ଗ୍ ପିସ୍ତାନାଦେର୍, ଲେକା ମାନାତ୍ ଆସେଙ୍ଗ୍ ମେଣ୍ଢା ଗଡ଼ିଆଙ୍ଗ୍ ଅହ୍ନାସ୍ ଆରେ ୱିଜୁ ମେଣ୍ଢାଙ୍ଗ୍ ଚିନ୍ବିନ୍ ଆଜି ହାନିକ୍।”
ପିତର ୱେଚ୍ଚାନ୍, “ଯଦି ୱିଜାକାର୍ ନିଙ୍ଗେଙ୍ଗ୍ ପିସ୍ତିତିସ୍ ପା ଆନେଙ୍ଗ୍ ନିଙ୍ଗେଙ୍ଗ୍ ପିସ୍ତୁଙ୍ଗ୍।” ଲାଗିଙ୍ଗ୍ ଯୀଶୁ ପିତରତିଙ୍ଗ୍ ୱେଚ୍ଚାନ୍, “ଶୟତାନ ମି ୱିଜାକାର୍ ହୁଦାଙ୍ଗ୍ ମାଞ୍ଜେଙ୍ଗ୍ ଇଚା କିନାତା, ମାତର୍ ପିତର ନି ପାର୍ତି ଇନେସ୍ ଦୁର୍ବଲ୍ ଆଉତ୍ ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଗୁୱାରି କିଦ୍ନାଙ୍ଗା। ଇଲେକେକି ନେଞ୍ଜେଙ୍ଗ୍ ନାଣା କୁଜୁ କେୱି ଆଗେ ଏନେଙ୍ଗ୍ ନାଙ୍ଗେଙ୍ଗ୍ ତିନ୍ହଟ୍ ନାଙ୍ଗେଙ୍ଗ୍ ପୁନୁଙ୍ଗ୍ ଇଞ୍ଜି ୱେଚ୍ନାୟ୍।”
ତାପାଚେ ପିତର ଯିଶୁଙ୍ଗ୍ ୱେଚ୍ଚାନ୍, “ଯଦି ଆନେଙ୍ଗ୍ ହାଃଦେଙ୍ଗ୍ ଆନାତ୍, ଆତିସ୍ପା ଆନେଙ୍ଗ୍ ଇନେୱାଡ଼ାଙ୍ଗ୍ ନିଙ୍ଗେଙ୍ଗ୍ ପୁନୁଙ୍ଗ୍ ଇଞ୍ଜି ୱେଚୁଙ୍ଗ୍।” ଜେନି ୱିଜୁ ଚେଲାହିର୍ ପା ହେଲେକେ ଇଚାର୍।
ତାପାଚେ ଯୀଶୁ ତା ଚେଲାହିର୍ ହୁଦାଙ୍ଗ୍ ଗେଥସିମାନି ତର୍ଦି ର ବାହାତାକେ ହାଚାର୍। ଚେଲାହିର୍ ଇନେସ୍ ପରିକ୍ଷାତାକେ ପଡ଼ାଆଉର୍ ହେଦାଙ୍ଗ୍ କାଜିଙ୍ଗ୍ ଯୀଶୁ ତା ଚେଲାହିରିଙ୍ଗ୍ ପାର୍ତାନା କିଦେଙ୍ଗ୍ ୱେଚ୍ଚାନ୍। ତାପାଚେ ଯୀଶୁ ନିଜେ ପାର୍ତାନା କିଦେଙ୍ଗ୍ ହାଚାନ୍।
ଯୀଶୁ ତିନ୍ହଟ୍ ପାର୍ତାନ୍ କିତାନ୍, “ଏ ନା ଆବା ଯଦି ଆଡ୍ନାୟ୍, ଲାଗିଙ୍ଗ୍ ଇ ଦୁକ୍କଷ୍ଟନି ନାବେତାଙ୍ଗ୍ ଦେହା କିୟା। ଯଦି ମାନାୟାର୍ ପାପ୍ କେମା କିନି କାଜିଙ୍ଗ୍ ଆରେ ଇନା ଉପାୟ୍ ହିଲୁତ୍, ଲାଗିଙ୍ଗ୍ ନି ଇଚା ପୁରା ଆୟେତ୍।” ଯୀଶୁ ବେସି ଦୁକ୍ ଆତାନ୍ ଆରେ ତା ରୁମିଙ୍ଗ୍ ନେତେର୍ ଲେକେ ମାଚାତ୍। ଈଶ୍ୱର ହେୱାନିଙ୍ଗ୍ ସାହାସ୍ ଆହ୍ନି କାଜିଙ୍ଗ୍ ରକାନ୍ ଦୁତ୍ତିଙ୍ଗ୍ ତା ଲାଗାୟ୍ ପକ୍ତାନ୍।
ୱିଜୁ ହଟ୍ ପାର୍ତାନା କିଜି ୱିସ୍ତି ପାଚେ, ଯୀଶୁ ତା ଚେଲାହିର୍ ଲାଗାୟ୍ ୱାଜି ମାଚାନ୍ ମାତର୍ ହେୱାର୍ ହୁନ୍ଜି ମାଚାର୍। ଏଚେପାଦ୍ନା ହେୱାନ୍ ତିନ୍ହଟ୍ ୱାତାନ୍, ଯୀଶୁ ୱେଚ୍ଚାନ୍, “ନିଙ୍ଗାଟ୍! ନାଙ୍ଗେଙ୍ଗ୍ ଶତ୍ରୁ କେଇଦ ଆହିକିଦ୍ନାକାନ୍ ଇବେ ମାନାନ୍।”
ଯିହୁଦା ନେତାରିଙ୍ଗ୍, ସେନାରିଙ୍ଗ୍ ଆରେ ବେସିହେନି ମାନାୟ୍ ହୁଦାଙ୍ଗ୍ ଯହୁଦା ୱାତାନ୍। ହେୱାର୍ କଣ୍ଡା ଆରେ ନାଣି ହଲାଙ୍ଗ୍ ଆସ୍ତି ମାଚାର୍। ଯିହୁଦା ଯୀଶୁ ଲାଗାୟ୍ ୱାଜି ୱେଚ୍ଚାନ୍, “ଏ ଗୁରୁ ଜୱାର୍!” ଆରେ ହେୱାନିଙ୍ଗ୍ ଚୁମା କିତାନ୍। ଯିହୁଦି ନେତାର୍ ଇନେରିଙ୍ଗ୍ ଆହ୍ନାର୍ ଇଦାଙ୍ଗ୍ ହେବେନି ର ଚିନା ଲେକେ ମାଚାତ୍। ତାପାଚେ ଯୀଶୁ ୱେଚ୍ଚାନ୍, “ଯିହୁଦା, ଚୁମା କାଜିଙ୍ଗ୍ କି ଏନେଙ୍ଗ୍ ନାଙ୍ଗେଙ୍ଗ୍ ଶତ୍ରୁ କେଇଦ ଆହିକିଦ୍ନାୟା?”
ଏଚେପାଦ୍ନା ସେନାର୍ ଯୀଶୁଙ୍ଗ୍ ଆସ୍ତାର୍, ପିତର ତା କଣ୍ଡା ହପ୍ଚି ଈଶ୍ୱର ହେବାକିନି ମୁଡ଼୍ଦି ପୁଜାରିନି ଦାସ୍ନି କୁତିଲ୍ତିଙ୍ଗ୍ ହଣ୍ତାନ୍। ଯୀଶୁ ୱେଚ୍ଚାନ୍, “କଣ୍ଡାତିଙ୍ଗ୍ ଦେହା ଇଟା! ନାଙ୍ଗେଙ୍ଗ୍ ରକ୍ଷା କିଦ୍ନି କାଜିଙ୍ଗ୍ ଆନେଙ୍ଗ୍ ନା ଆବାଙ୍ଗ୍ ଦୁତ୍କୁନି ର ସେନାଦଳ୍ତିଙ୍ଗ୍ ଏନ୍ତେଙ୍ଗ୍ ଆଡ୍ନାଙ୍ଗ୍। ମାତର୍ ଆନେଙ୍ଗ୍ ନା ଆବା କାତା ମାନିକିନି ଦର୍କାର୍।” ତାପାଚେ ଯୀଶୁ ହେ ମାନାୟ୍ କିତୁଲ୍ତିଙ୍ଗ୍ ହାର୍ କିତାନ୍। ଯୀଶୁ ଆହିଆତି ପାଚେ ୱିଜୁ ଚେଲାହିର୍ ହନ୍ଚି ହାଚାର୍।
ବାଇବଲ୍ନି ର କାତା: ମାଥିଉ ୨୬: ୧୪- ୫୬; ମାର୍କ ୧୪: ୧୦- ୫୦; ଲୁକ ୨୨: ୧- ୫୩; ଯୋହନ ୧୨: ୬; ୧୮: ୧- ୧୧
Free to use, adapt, and share under an open license (CC BY-SA 4.0).