39. ୩୯. ଯୀଶୁଙ୍ଗ୍ ବିଚାର୍ କିତାର୍
ହେପାଦ୍ନା ମାଦିମାଦା ନାଣା ମାଚାତ୍।ଈଶ୍ୱର ହେବାକିନି ମୁଡ଼୍ଦି ପୁଜାରି ଇନେସ୍ ଯୀଶୁଙ୍ଗ୍ ପ୍ରଶ୍ନ ୱେନ୍ବାନାନ୍ ହେଦାଙ୍ଗ୍ କାଜିଙ୍ଗ୍ ସେନାର୍ ହେୱାନିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଇଞ୍ଜ ଅସାହାଚାର୍।ପିତର ଦେହା ମାନ୍ଜି ହେୱାର୍ ପାଚେ-ପାଚେ ହାଲ୍ଜି ମାଚାନ୍।ଯୀଶୁଙ୍ଗ୍ ଏଚେପାଦ୍ନା ହେ ଇଞ୍ଜ ଅସତାର୍, ପିତର ବାର୍ତ ମାନ୍ଞ୍ଜି ନାଣି କାୟ୍ଜି ମାଚାନ୍।
ଇଲ୍ ବିତ୍ରେ ଯିହୁଦି ନେତାର୍ ଯୀଶୁଙ୍ଗ୍ ବିଚାର୍ କିତାର୍।ହେୱାର୍ କେତେକ୍ ମିଚ୍ ସାକି ହିନାକାରିଙ୍ଗ୍ ଯଗାଇ କିତାର୍ ଇମ୍ଣାକାର୍ ତା ବିରଦ୍ତାକେ ମିଚ୍ କାତା ୱେଚ୍ନାର୍।ମାତର୍ ହେୱାର୍ କାତା ୱିଜୁ ଜାର୍-ଜାର୍ ବିତ୍ରେ ମାହା ଆୱାଦାଙ୍ଗ୍ ମାଚାତ୍, ଲାଗିଙ୍ଗ୍ ଯିହୁଦି ନେତାର୍ ଇୱାନ୍ ବୁଲ୍ କିତାନ୍ନା ଇଞ୍ଜି ଚଚ୍ଚେଙ୍ଗ୍ ଆଡ୍ୱାତାର୍।ଯୀଶୁ ଇନାକା ପା ୱେଚ୍ୱାତାନ୍।
ତାପାଚେ ଈଶ୍ୱର ହେବାକିନି ମୁଡ଼୍ଦି ପୁଜାରି ଯୀଶୁଙ୍ଗ୍ ହାରାହାଣ୍କୁ ହୁଡ଼୍ଜି ହେୱାନିଙ୍ଗ୍ ୱେନ୍ବାତାନ୍, “ମାଙ୍ଗେଙ୍ଗ୍ ୱେଚ୍ଚା, ଏନେଙ୍ଗ୍ କି ଜିବୁନ୍ ମାନି ଈଶ୍ୱର ମେହି ଖ୍ରୀଷ୍ଟ?”
ଯୀଶୁ ୱେଚ୍ଚାନ୍, “ଆନେଙ୍ଗ୍ ହେୱାନ୍, ଆରେ ଏପେଙ୍ଗ୍ ନାଙ୍ଗେଙ୍ଗ୍ ଈଶ୍ୱର ସିଂହାସନ୍ତାକେ କୁଚ୍ନାକା ଆରେ ସରଗ୍ ଜପି ୱାନାକା ହୁଡ଼୍ଦାନାଦେର୍।”ଈଶ୍ୱର ହେବାକିନି ପ୍ରାଦାନ୍ ମୁଡ଼୍ଦି ପୁଜାରି ରିସାତିଙ୍ଗ୍ ତା ଆଙ୍ଗି କେଚ୍ଚି ଜେକନି ଦରମ୍ ଗୁରୁରିଙ୍ଗ୍ ଚେରାଆଜି ୱେଚ୍ଚାନ୍, “ମାଙ୍ଗେଙ୍ଗ୍ ଆରେ ସାକି ଦର୍କାର୍ ଆକାୟ୍! ଏପେଙ୍ଗ୍ ୱେଚାଦେର୍ ଯେ ଇୱାନ୍ ଈଶ୍ୱର ମେହି ଇଞ୍ଜି ୱେଚ୍ଚାନାନା।ମି ବିଚାର୍ ଇନାକା?”
ଯହୁଦି ନେତାର୍ ଈଶ୍ୱର ହେବାକିନି ମୁଡ଼୍ଦି ପୁଜାରିରିଙ୍ଗ୍ ୱେଚ୍ଚାର୍, “ହେୱାନ୍ ହାଃନି ଦଣ୍ଡ୍ ପାୟାଆନି ଯଗ୍ୟ।”ତାପାଚେ ହେୱାର୍ ଯୀଶୁ କାଣ୍କୁକାଙ୍ଗ୍ ଚିଡା ଗାଚ୍ଚାର୍, ଆରେ ହେୱାନିଙ୍ଗ୍ ଇଡ଼୍ତାର୍, ତା ଜପି ଚୁପ୍ତାର୍ ଆରେ ହେୱାନିଙ୍ଗ୍ ଇନସ୍ତା କିତାର୍।
ପିତର ଇଲ୍ ବାର୍ତ କାସି ମାନିହିଙ୍ଗ୍, ରଞ୍ଜେଲ୍ ଦାସି କଗ୍ଲେ ହେୱାନିଙ୍ଗ୍ ହୁଡ଼୍ଜି ୱେଚ୍ଚାତ୍, “ଏନେଙ୍ଗ୍ ପା ଯୀଶୁ ହୁଦାଙ୍ଗ୍ ମାଚାୟ୍! ପିତର ଇ ବିଷୟତିଙ୍ଗ୍ ମୁନା କିତାନ୍।ଅଲପ୍ ସମୟ ହାଚିପାଚେ ଆରେ ରଞ୍ଜେଲ୍ ହେ ର ବିଷୟ ନେ ୱେଚ୍ଚାତ୍, ମାତର୍ ପିତର ଇଦାଙ୍ଗ୍ ପା ମୁନା କିତାନ୍।ତାପାଚେ ମାନାୟାର୍ ୱେଚ୍ଚାର୍, ଆପେଙ୍ଗ୍ ପୁନାପ୍ ଯେ ଏନେଙ୍ଗ୍ ପା ଯୀଶୁ ହୁଦାଙ୍ଗ୍ ମାଚାୟ୍ ଇନେସ୍କି ଏପେଙ୍ଗ୍ ରିକାଦେର୍ ଗାଲିଲୀ ଜିଲ୍ଲାତାଙ୍ଗ୍ ୱାତାଦେର୍ନା।”
ତାପାଚେ ପିତର୍ ପାର୍ମାଣ୍ କିଜି ୱେଚ୍ଚାନ୍, “ଈଶ୍ୱର ନାଙ୍ଗେଙ୍ଗ୍ ଅବିଶାପ୍ ହିଦେନ୍ ଯଦି ଆନେଙ୍ଗ୍ ଇ ମାନାୟ୍ତିଙ୍ଗ୍ ପୁନ୍ଞ୍ଜି ମାଚିସ୍।” ହେଦାପ୍ରେ କୁଜୁ କେତାତ୍, ଆରେ ଯୀଶୁ ହେୱାନିଙ୍ଗ୍ ଲେଉଟା ଆଜି ହୁଡ଼୍ତାନ୍।
ଲାଗିଙ୍ଗ୍ ଯୀଶୁ ୱେଚ୍ଚି କାତାତିଙ୍ଗ୍ ପିତର ମାନ୍ତ ଏତୁ କିଜି ବେସି ଦୁକ୍ତାଙ୍ଗ୍ ଆଡ଼୍ବାତାନ୍।ଇଲେକେ ଶତ୍ରୁ କେଇଦ ଆହିକିତି ଯିହୁଦା ହୁଡ଼୍ତାନ୍ ଯେ ଯିହୁଦି ନେତାର୍ ଯୀଶୁଙ୍ଗ୍ ହାଃନି ଦଣ୍ଡ୍ କାଜିଙ୍ଗ୍ ଦସି କିତାର୍ନା।ଯିହୁଦା ବେସି ଦୁକ୍ ଆତାନ୍ ଆରେ ହାଲ୍ଜି କକ୍ଲା ପାଟିଆଜି ହାଃତାନ୍।
ତାଆର୍କାତ୍ ନାଞ୍ଜିଙ୍ଗ୍ ନାଣାଙ୍ଗେ, ଯିହୁଦି ନେତାର୍ ଯୀଶୁଙ୍ଗ୍ ପିଲାତ ରାଜାତାକେ ତାସି ୱାତାର୍ ହେୱାନ୍ ରୋମିୟ ସର୍କାର୍ ମାଚାନ୍।ହେୱାର୍ ଆହା କିତାର୍ ଯେ ପିଲାତ ଯୀଶୁଙ୍ଗ୍ ଦସ୍ ଆହିକିଜି ହାଃନି କାଜିଙ୍ଗ୍ ବିଚାର୍ କିନାନ୍।ପିଲାତ ରାଜା ଯୀଶୁଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇନାକା ଯିହୁଦିର୍ ରାଜା?”
ଯୀଶୁ ୱେଚ୍ଚାନ୍, “ଏନେଙ୍ଗ୍ ୱେଚ୍ଚାନାୟା, ମାତର୍ ନା ରାଜି ଇ ଜଗତ୍ ଲେକେ ଆକାୟ୍।ଯଦି ଇଲେକେ ଆଜି ମାଚିସ୍, ନା ଦାସ୍ ମାନାୟାର୍ ନା କାଜିଙ୍ଗ୍ ଯୁଜ୍ କିତାର୍ମା। ଈଶ୍ୱର ବିଷୟରେ ସତ୍ କାତା ୱେଚ୍ଚେଙ୍ଗ୍ ଆନେଙ୍ଗ୍ ପୁର୍ତିତାକେ ୱାତାଙ୍ଗ୍ନା। ଇମ୍ଣି ମାନାୟ୍ ସତ୍ତିଙ୍ଗ୍ ଲାଡ୍ କିନାନ୍ ହେୱାନ୍ ନା ବେଣ୍ ୱେନାନ୍।” ପିଲାତ ରାଜା ୱେଚ୍ଚାନ୍, “ସତ୍ ଇନାକା?”
ପିଲାତ ରାଜା ଯୀଶୁ ହୁଦାଙ୍ଗ୍ ବେଣ୍କିଜି ୱିସ୍ତି ପାଚେ, ମାନାୟ୍ ଗଉଲି ଲାଗାୟ୍ ହାଲ୍ଜି ୱେଚ୍ଚାନ୍, “ଇ ମାନାୟ୍ତାକେ ଆପେଙ୍ଗ୍ ଇନା ଦସ୍ ପା ଗାଟାଆଉପା।” ମାତର୍ ଯିହୁଦି ନେତାର୍ ଆରେ ମାନାୟ୍ ଗଉଲି ଚେରାଆଜି ୱେଚ୍ଚାର୍, “ହେୱାନିଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍!” ପିଲାତ ରାଜା ୱେଚ୍ଚାନ୍, “ହେୱାନ୍ ଦସି ଆକାୟ୍। ମାତର୍ ହେୱାର୍ ଆଦିକ୍ ଚେରା ଆଦେଙ୍ଗ୍ ଲାଗାତାର୍। ତାପାଚେ ପିଲାତ ରାଜା ତିନ୍ହଟ୍ ୱେଚ୍ଚାନ୍, “ହେୱାନ୍ ଦସି ଆକାୟ୍।”
ପିଲାତ ରାଜା ପାଣ୍ଡ୍ରାଆଜି ମାଚାନ୍ ଯେ କାତେ ମାନାୟାର୍ ଯୁଜ୍ କିଦେଙ୍ଗ୍ ଆରମ୍ କିନାର୍, ଲାଗିଙ୍ଗ୍ ଯୀଶୁଙ୍ଗ୍ କୃଶକାଟ୍ତାକେ ଦୁପ୍ଚି ଅହ୍ନି କାଜିଙ୍ଗ୍ ହେୱାନ୍ ତା ସେନାରିଙ୍ଗ୍ ଆଦେସ୍ ହିତାନ୍।ରୋମିୟ ସେନାର୍ ଯୀଶୁଙ୍ଗ୍ କର୍ଡା ହୁଦାଙ୍ଗ୍ ଟ୍ରାକ୍ତାର୍ ଆରେ ର ରାଜା ଉସ୍ପିନି ଆଙ୍ଗି ଆରେ କାପ୍ଡ଼ାତାକେ ୱାଡ଼ି ହାସ୍ନି ମୁକୁଟ୍ ରସ୍ତି ତୁଜିକିତାର୍। ତାପାଚେ ହେୱାର୍ ହେୱାନିଙ୍ଗ୍, “ଯିହୁଦିର୍ ରାଜାଙ୍ଗ୍ ହୁଡ଼ାଟ୍! ୱେଚ୍ଚି ଇନସ୍ତା କିତାର୍।”
ବାଇବଲ୍ନି ର କାତା: ମାଥିଉ ୨୬: ୫୭- ୨୭; ମାର୍କ ୧୪: ୫୩- ୧୫: ୧୫; ଲୁକ ୨୨: ୫୪- ୨୩: ୨୫; ଯୋହନ ୧୮: ୧୨- ୧୯: ୧୬
Free to use, adapt, and share under an open license (CC BY-SA 4.0).