40. ୪୦. ଯୀଶୁଙ୍ଗ୍ କୃଶକାଟ୍ତାକେ କୁଟିଙ୍ଗ୍ ଇଡ଼୍ତାର୍
ସେନାର୍ ଯୀଶୁଙ୍ଗ୍ ଇନସ୍ତା କିତି ପାଚେ, ହେୱାର୍ କୃଶକାଟ୍ତାକେ ଦୁପ୍ଚି ଅହ୍ନି କାଜିଙ୍ଗ୍ ହେୱାନିଙ୍ଗ୍ ଅତାର୍।ହେୱାନ୍ ଇମ୍ଣି କୃଶକାଟ୍ତାକେ ହାଃନାନ୍ ହେ କୃଶକାଟ୍ ହେୱାନିଙ୍ଗ୍ ପିଣ୍ଡି କିତାର୍।
ସେନାର୍, କାପ୍ଡ଼ା ଲେକେ ଚଞ୍ଜ୍ନି ର ବାହାତାକେ ତାସି ୱାତାର୍ ଆରେ କୃଶକାଟ୍ତାକେ ତା କେଇ ଆରେ କାଲ୍କୁକାଙ୍ଗ୍ କୁଟିଙ୍ଗ୍ ହୁଦାଙ୍ଗ୍ ଇଡ଼୍ତାର୍। ଲାଗିଙ୍ଗ୍ ଯୀଶୁ ୱେଚ୍ଚାନ୍, “ଆବା, ହେୱାରିଙ୍ଗ୍ କେମା କିୟା, ଇନେସ୍କି ହେୱାର୍ ଇନାକା କିନାରା ହେଦାଙ୍ଗ୍ ପୁନୁରା।” “ଯିହୁଦିର୍ ରାଜା ଇଞ୍ଜି ଲେକିକିଜି ଯିଶୁ,” କାପ୍ଡ଼ା ଜପି କୁଟି ହୁଦାଙ୍ଗ୍ ଇଡ଼୍ଦେଙ୍ଗ୍ ପିଲାତ ରାଜା ହେୱାରିଙ୍ଗ୍ ୱେଚ୍ଚାନ୍।
ସେନାର୍ ଯୀଶୁ ଆଙ୍ଗିତିଙ୍ଗ୍ ଲାଟ୍ରି ପୁଟାଇ କିତାର୍। ହେୱାର୍ ଏଚେପାଦ୍ନା ଇଦାଙ୍ଗ୍ କିତାର୍, ୱେଚିଆତି ଈଶ୍ୱର କାତା ପୁରା ଆତାତ୍, “ହେୱାର୍ ନା ଆଙ୍ଗିତିଙ୍ଗ୍ ବାଗ୍ କିତାର୍ ଆରେ ଆଙ୍ଗି କାଜିଙ୍ଗ୍ ଲାଟ୍ରି ପୁଟାଇ କିତାର୍।”
ଯିଶୁଙ୍ଗ୍ ରିକାର୍ ଚର୍କୁ ମାଦି କୃକାଟ୍ତାକେ ଦୁପ୍ତାର୍। ହେୱାର୍ ବିତ୍ରେତାଙ୍ଗ୍ ରକାନ୍ ଯୀଶୁଙ୍ଗ୍ ଇନସ୍ତା କିତାନ୍, ମାତର୍ ଜେକିନିକାନ୍ ରକାନ୍ ୱେଚ୍ଚାନ୍, “ଏନେଙ୍ଗ୍ ଇନାକା ଈଶ୍ୱରତିଙ୍ଗ୍ ପାଣ୍ଡ୍ରା ଆଉୟ୍? ଆସେଙ୍ଗ୍ ଦସି, ମାତର୍ ଇ ମାନାୟ୍ ଦସି ଆକାୟ୍।” ତାପାଚେ ହେୱାନ୍ ଯୀଶୁଙ୍ଗ୍ ୱେଚ୍ଚାନ୍, “ଦୟାକିଜି ନି ରାଜିତାକେ ନାଙ୍ଗେଙ୍ଗ୍ ଏତୁ କିଦେର୍।” ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ନେଞ୍ଜେଙ୍ଗ୍ ନା ହୁଦାଙ୍ଗ୍ ସରଗ୍ତାକେ ୱାନାଦେର୍।”
ଯିହୁଦି ନେତାର୍ ଆରେ ମାନାୟାର୍ ବିତ୍ରେତାଙ୍ଗ୍ କେତେକ୍ ଯୀଶୁଙ୍ଗ୍ ଇନସ୍ତା କିତାର୍। ହେୱାର୍ ହେୱାନିଙ୍ଗ୍ ୱେଚ୍ଚାର୍, “ଏନେଙ୍ଗ୍ ଯଦି ଈଶ୍ୱର ମେହିତି, କୃଶକାଟ୍ତାଙ୍ଗ୍ ଜୁଜି ତାରେନ୍ ୱା ଆରେ ଜାର୍ତିଙ୍ଗ୍ ରକ୍ଷା କିୟା! ଲାଗିଙ୍ଗ୍ ଆପେଙ୍ଗ୍ ନିଙ୍ଗେଙ୍ଗ୍ ପାର୍ତି କିଦ୍ନାପ୍।”
ତାପାଚେ ୱିଜୁ ବାହାତାକେ ମାନି ବାଦାଡ଼୍ ୱିଜୁ ମାଜ୍ଗା ଆତାତ୍, ହେପାଦ୍ନା ୱେଡ଼ା ବାର୍ଟା ଆଜି ମାଚାତ୍।ମୁଣ୍ଡେ ମେଦାଣ୍ ୱେଡ଼ାଙ୍ଗ୍ ନେ ମାଜ୍ଗା ଆତାତ୍ ଆରେ ପାକାପାକି ତିନ୍ ଗଣ୍ଟା ପାତେକ୍ ମାଚାତ୍।
ତାପାଚେ ଯୀଶୁ ଗାଜାକାଟ୍ କିଜି କୁକ୍ଚି ୱେଚ୍ଚାନ୍, “ୱିଜ୍ତାତ୍! ଆବା, ନି କେଇଦ ନା ମାତ୍ମା ହିଦ୍ନାଙ୍ଗା।ତାପାଚେ ହେୱାନ୍ କାପ୍ଡ଼ାତିଙ୍ଗ୍ ତାରେନ୍ କିତାନ୍ ଆରେ ହାଃତାନ୍।” ଏଚେପାଦ୍ନା ହେୱାନ୍ ହାଃତାନ୍. ହେପାଦ୍ନା ବୁମିକମ୍ଫ ଆଜି ମାଚାତ୍ ଆରେ ମନ୍ଦିର୍ତାକେ ଇମ୍ଣି ଗାଜା ପାର୍ଦା ଈଶ୍ୱରତିଙ୍ଗ୍ ପାର୍ତି କିନାକାରିଙ୍ଗ୍ ଜେକ ଇଡ଼୍ଜି ମାଚାତ୍ ହେଦାଙ୍ଗ୍ ଜପିତାଙ୍ଗ୍ ତାରେନ୍ ପାତେକ୍ ରି ପାଡ଼ାଆଜି କେଞ୍ଜ୍ଚାତ୍।
ଯୀଶୁ ତା ହାଃତି କାଜିଙ୍ଗ୍ ମାନାୟାରିଙ୍ଗ୍ ଈଶ୍ୱର ଲାଗାୟ୍ ୱାନି ହାଜି ଜେସି ହିତାନ୍।ଯୀଶୁଙ୍ଗ୍ କାସିମାଚି ସେନା ଏଚେପାଦ୍ନା ଇ ୱିଜୁ ଗଟାଆନାକା ହୁଡ଼୍ତାନ୍ ହେୱାନ୍ ୱେଚ୍ଚାନ୍, “ହାତ୍ପା ହେୱାନ୍ ଦସ୍ କିୱିତି ମାନାୟ୍ ମାଚାନ୍।ହେୱାନ୍ ଈଶ୍ୱର ମେହି ମାଚାନ୍।”
ତାପାଚେ ଯୋଷେଫ ଆରେ ନୀକଦୀମ, ଯୀଶୁଙ୍ଗ୍ ପାର୍ତି କିଜିମାନି ଇ ରିକାର୍ ଯିହୁଦି ନେତା ଯୀଶୁ ହାଃତି ଗାଗାଡ଼୍ତିଙ୍ଗ୍ ଅନି କାଜିଙ୍ଗ୍ ପିଲାତ ରାଜାଙ୍ଗ୍ ଗୁୱାରି କିତାର୍।ହେୱାର୍ ର ହେନ୍ଦ୍ରାତାକେ ତା ଗାଗାଡ୍ତିଙ୍ଗ୍ ହୁର୍ପିସ୍ କାଲ୍ତିଙ୍ଗ୍ ପତ୍ତି ରସ୍ତିମାଚି ର ଦୁଗେର୍ ବିତ୍ରେ ଇଡ଼୍ତାର୍।ତାପାଚେ ହେୱାର୍ ଦୁଗେର୍ ମୁମ୍ଦ ର ଗାଜା କାଲ୍ ଡାବାୟ୍ କିତାର୍ ଆରେ ହେବେନି ମୁମ୍ ବନ୍ଦ୍ କିତାର୍।
ବାଇବଲ୍ନି ର କାତା: ମାଥିଉ ୨୨: ୨୭- ୬୧; ମାର୍କ ୧୫: ୧୬- ୪୭; ଲୁକ ୨୩: ୨୬- ୫୬; ଯୋହନ ୧୯: ୧୭- ୪୨
Free to use, adapt, and share under an open license (CC BY-SA 4.0).