41. ୪୧. ଈଶ୍ୱର ଯୀଶୁଙ୍ଗ୍ ହାଃତିତାଙ୍ଗ୍ ନିକ୍ନାନ୍
ସେନାର୍ ଯୀଶୁଙ୍ଗ୍ କୃଶକାଟ୍ତାକେ ଅସ୍ତି ପାଚେ, ପାର୍ତିକିୱି ଯିହୁଦି ନେତାର୍ ପିଲାତ ରାଜାଙ୍ଗ୍ ୱେଚ୍ଚାର୍, “ହେ ମିଚ୍ୱା ଯୀଶୁ ୱେଚ୍ଚାତାନ୍ ଯେ ତିନ୍ଦିନ୍ ପାଚେ ନିଙ୍ଗ୍ନାନ୍।ଇନେର୍ ରକାର୍ ହେ ଦୁଗେର୍ ବାହାତାକେ କାସି ମାଞ୍ଜେଙ୍ଗ୍ ଆନାତ୍ ଆରେ ସତ୍ କିଦେଙ୍ଗ୍ ଆନାତ୍, ଇନେସ୍କି ଚେଲାହିର୍ ତା ହାଃତି ଗାଗାଡ଼୍ତିଙ୍ଗ୍ ଚର୍କିଜି ଅନାର୍ ଆରେ ୱେଚ୍ଚାନାର୍ ଯେ ହେୱାନ୍ ହାଃତି ମାନାୟାର୍ ବିତ୍ରେତାଙ୍ଗ୍ ଜିବୁନ୍ ଆତାନ୍ନା।”
ପିଲାତ ରାଜା ୱେଚ୍ଚାନ୍, “କେତ୍ଜାଣ୍ ସେନାରିଙ୍ଗ୍ ଅଜି ଏପେଙ୍ଗ୍ ଆଡ୍ନି ଏଚେକ୍ ଦୁଗେର୍ତିଙ୍ଗ୍ ହୁଡ଼ାଟ୍।“ ଲାଗିଙ୍ଗ୍ ହେୱାର୍ ଦୁଗେର୍ ବାହାନି ହଣି ଦୁୱେର୍ ତାକେ ମାନି କାଲ୍ଦିଙ୍ଗ୍ ସିଲ୍ କିତାର୍ ଆରେ ହେବେ ସେନାରିଙ୍ଗ୍ ଇଡ଼୍ତାର୍ ଇନେସ୍କି ଇନେର୍ ପା ତା ଗାଗାଡ଼୍ତିଙ୍ଗ୍ ଚର୍କିଜି ଅଦେଙ୍ଗ୍ ଆଡୁର୍।
ଯୀଶୁଙ୍ଗ୍ ଦୁଗେର୍ତାକେ ଇଡ଼୍ତି ଆର୍କାତ୍ ନାଞ୍ଜିଙ୍ଗ୍ ଜମ୍ନିବାର୍ ମାଚାତ୍, ଆରେ ହେଦିନ୍ ଦୁଗେର୍ତାକେ ହାନି କାଜିଙ୍ଗ୍ ଯିହୁଦିର୍ ହାନି ନିୟମ୍ ହିଲାତାତ୍।ଲାଗିଙ୍ଗ୍ ଜମ୍ନିଦିନ୍ନି ଆର୍କାତ୍ ନାଞ୍ଜିଙ୍ଗ୍ ନାଣାଙ୍ଗେ କେତେକ୍ କଗ୍ଲେକ୍ ଯୀଶୁ ଗାଗାଡ଼୍ତାକେ ଆଦିକ୍ ଦୁଗେର୍ତାକେ ବାସ୍ନା ଜିନିଷ୍ ହିନି କାଜିଙ୍ଗ୍ ଦୁଗେର୍ତାକେ ହାଞ୍ଜେଙ୍ଗ୍ ରେଡି ଆତିକ୍।
ହେଦାପ୍ରେ ର ଗାଜା ବୁମିକମ୍ଫ ଆତାତ୍।ବିଜ୍ଲିନି ଅଜଡ଼୍ ଲେକେ ଚଞ୍ଜ୍ଜିନି ର ଦୁତ୍ ସରଗ୍ତାଙ୍ଗ୍ ଚଞ୍ଜି ଆତାତ୍।ଦୁଗେର୍ନି ହାଜି ବାହାତାକେ ପାକ୍ଚି ମାଚି କାଲ୍ତିଙ୍ଗ୍ ଗୁଚାଇ କିଜି ହେ ଦୁତ୍ ହେବେ କୁଚ୍ଚାତ୍।ଇମ୍ଣି ଦୁଗେର୍ତାକେ ସେନାର୍ କାସି ମାଚାର୍ ହେୱାର୍ ପାଣ୍ଡ୍ରାଆଜି ହାଃତି ଲେକେ ମେଦ୍ନିତାକେ ଗୁର୍ତାର୍।
ଏଚେପାଦ୍ନା କଗ୍ଲେକ୍ ଦୁଗେର୍ ବାହାତାକେ ଏକିତିକ୍, ଦୁତ୍ ହେୱେକାଙ୍ଗ୍ ୱେଚ୍ଚାତ୍, “ପାଣ୍ଡ୍ରା ଆମାଟ୍।ଯୀଶୁ ଇବେ ହିଲୁନ୍।ହେୱାନ୍ ଇନେସ୍ ୱେଚ୍ଚି ମାନ୍ଞ୍ଚାନ୍, ହେଲେକେ ହାଃତି ମାନାୟାର୍ତାଙ୍ଗ୍ ଜିବୁନ୍ ଆତାନ୍ନା। ୱାଡ ଆରେ ଦୁଗେର୍ତିଙ୍ଗ୍ ହୁଡ଼ାଟ୍।” ଇମ୍ଣି ବାହାତାକେ ଯୀଶୁ ହାଃତି ଗାଗାଡ଼୍ ଇଡ଼୍ଜି ମାଚାର୍, କଗ୍ଲେକ୍ ଦୁଗେର୍ ବିତ୍ରେ ହାଲ୍ଜି ହୁଡ଼୍ତିକ୍।ତା ଗାଗାଡ଼୍ ହେବେ ହିଲାତାତ୍।
ତାପାଚେ ସରଗ୍ ଦୁତ୍ ହେ କଗ୍ଲେକାଙ୍ଗ୍ ୱେଚ୍ଚାତ୍, “ଏପେଙ୍ଗ୍ ହାଲ୍ଜି ଚେଲାହିରିଙ୍ଗ୍ ୱେଚାଟ୍, ଯୀଶୁ ଜିବୁନ୍ ଆଜି ନିଙ୍ଗ୍ତାନ୍ନା ଆରେ ମି ଆଗେ ଗାଲିଲୀ ଜିଲ୍ଲାତାକେ ହାନାନ୍।”
ହେ କଗ୍ଲେକ୍ ବେସି ପାଣ୍ଡ୍ରା ଆତିକ୍ ଆରେ ବେସି ୱାରି ଆଜି ମାଚିକ୍।ଚେଲାହିରିଙ୍ଗ୍ ହାର୍ଦି କାତା ୱେଚ୍ଚେଙ୍ଗ୍ ହେୱେକ୍ ହନ୍ଚି ହାଚିକ୍।
ଏଚେପାଦ୍ନା ହେ ହାର୍ଦି କାତାତିଙ୍ଗ୍ ଚେଲାହିରିଙ୍ଗ୍ ୱେଚ୍ନି କାଜିଙ୍ଗ୍ ହେୱେକ୍ ହାଜ୍ଦ ମାଚିକ୍, ଯୀଶୁ ହେ କଗ୍ଲେକାଙ୍ଗ୍ ଚଞ୍ଜି ଆତାନ୍ ଆରେ ହେୱେକ୍ ହେୱାନିଙ୍ଗ୍ ଜୱାର୍ କିତିକ୍।ଯୀଶୁ ୱେଚ୍ଚାନ୍, ପାଣ୍ଡ୍ରା ଆମାଟ୍!ହାଲାଟ୍ ଆରେ ଗାଲିଲୀ ଜିଲ୍ଲାତାକେ ହାନି କାଜିଙ୍ଗ୍ ନା ଚେଲାହିରିଙ୍ଗ୍ ୱେଚାଟ୍।ହେବେ ହେୱାର୍ ନାଙ୍ଗେଙ୍ଗ୍ ହୁଡ଼୍ଦାନାର୍।
ବାଇବଲ୍ନି ର କାତା: ମାଥିଉ ୨୭: ୬୨- ୨୮: ୧୫; ମାରକ ୧୬: ୧- ୧୧; ଲିକ ୨୪: ୧- ୧୨; ଯୋହନ ୨୦: ୧-୧୮
Free to use, adapt, and share under an open license (CC BY-SA 4.0).