42. ୪୨. ଈଶ୍ୱର ଯୀଶୁଙ୍ଗ୍ ସରଗ୍ ଜପି ଅତାନ୍
ଯୀଶୁ ଇମ୍ଣି ଦିନ୍ ହାଃତି ମାନାୟାର୍ ବିତ୍ରେତାଙ୍ଗ୍ ଜିବୁନ୍ ଆଜି ନିଙ୍ଗ୍ତାନ୍, ରିକାର୍ ଚେଲାହିର୍ ଲାଗାୟ୍ନି ର ନାସ୍ ହାଲ୍ଜି ମାଚାର୍।ହେୱାର୍ ତାଙ୍ଗ୍ନିହିଙ୍ଗ୍ ଯୀଶୁଙ୍ଗ୍ ଇନାକା ଗଟାଆଜି ମାଚାତ୍ ହେ ବିଷୟରେ ହେୱାର୍ ବେଣ୍ବାଟ୍ କିଜି ମାଚାର୍।ହେୱାର୍ ଆହାକିଜି ମାଚାର୍ ଯେ ହେୱାନ୍ ରକାନ୍ ଖ୍ରୀଷ୍ଟ ମାଚାନ୍ ମାତର୍ ହେୱାନିଙ୍ଗ୍ ମାର୍ନେ ଅସ୍ତି ମାଚାର୍।ନଙ୍ଗୟ୍ ହେ କଗ୍ଲେକ୍ ୱେଚ୍ଚିକ୍ ଯେ ହେୱାନ୍ ଆରେରଗ ଜିବୁନ୍ ଆତାନ୍ନା।ହେୱାର୍ ପୁଞ୍ଜେଙ୍ଗ୍ ଆଡ୍ୱାତାର୍ ଇନେରିଙ୍ଗ୍ ପାର୍ତି କିନାର୍।
ଯୀଶୁ ହେୱାର୍ ଲାଗାୟ୍ ୱାତାନ୍ ଆରେ ହେୱାର୍ ହୁଦାଙ୍ଗ୍ ତାଙ୍ଗ୍ଦେଙ୍ଗ୍ ଲାଗାତାନ୍, ମାତର୍ ହେୱାର୍ ହେୱାନିଙ୍ଗ୍ ଚିନ୍ କିଦେଙ୍ଗ୍ ଆଡ୍ୱାତାର୍।ହେୱାର୍ ଇମ୍ଣି ବିଷୟରେ ବେଣ୍ବାଟ୍ କିଜି ମାଚାର୍ ଇଞ୍ଜି ହେୱାନ୍ ହେୱାରିଙ୍ଗ୍ ୱେନ୍ବାତାନ୍, ଆରେ କେତ୍ଦିନ୍ ଆଗେ ଯୀଶୁ ହୁଦାଙ୍ଗ୍ ଇନାକା ୱିଜୁ ଗଟାଆଜି ମାଚାତ୍ ହେୱାନ୍ ମୁଡ଼୍ ଗଟ୍ନା ହେଦାଙ୍ଗ୍ ହେୱାର୍ ହେୱାନିଙ୍ଗ୍ ୱେଚ୍ଚାର୍।ହେୱାର୍ ବାବି କିତାର୍ ଯେ ଇୱାନ୍ ପା ରକାନ୍ ହାଜି ତାଙ୍ଗ୍କାନ୍ ହୁଦାଙ୍ଗ୍ ବେଣ୍ବାଟ୍ କିନାପା ଇନେସ୍କି ଇୱାନ୍ ପା ଯିରୁଶାଲାମ ସହର୍ତାକେ ଗଟାଆତି ବିଷୟରେ ପୁନ୍ୱାତାକାନ୍।
ତାପାଚେ ଯୀଶୁ ହେୱାରିଙ୍ଗ୍ କାତା ୱେଚ୍ନି ଲେକେକିଜି ୱେଚ୍ଚେଙ୍ଗ୍ ଲାଗାତାନ୍ ଯେ ଈଶ୍ୱର ଖ୍ରୀଷ୍ଟ ବିଷୟରେ ଇନାକା ୱେଚ୍ଚି ମାନ୍ଞ୍ଚାନ୍।ହେୱାନ୍ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ୱେଚ୍ଚି କାତାତିଙ୍ଗ୍ ଏତୁକିୟିକିଜି ୱେଚ୍ଚାନ୍ ଯେ ଖ୍ରୀଷ୍ଟ ଦୁକ୍କଷ୍ଟ ପାୟାଆନାନ୍ ଆରେ ହାଃନାନ୍ ଆରେ ତିନ୍ଦିନ୍ତାଙ୍ଗ୍ ଆରେରଗ ଜିବୁନ୍ ଆନାନ୍।ହେ ରିକାର୍ ଇମ୍ଣି ସହର୍ତାକେ ମାଞ୍ଜେଙ୍ଗ୍ ଉପାଇ କିଜି ମାଚାର୍, ହେୱାର୍ ଏଚେପାଦ୍ନା ହେବେ ଇକାତାର୍, ହେପାଦ୍ନା ନାଣାଆଜି ମାଚାତ୍।
ହେ ରିକାର୍ ହେୱାର୍ ହୁଦାଙ୍ଗ୍ କାନି କାଜିଙ୍ଗ୍ ଯୀଶୁଙ୍ଗ୍ କୁକ୍ତାର୍, ଲାଗିଙ୍ଗ୍ ହେୱାନ୍ ହେୱାର୍ ହୁଦାଙ୍ଗ୍ ହାଚାନ୍।ହେୱାର୍ ଏଚେପାଦ୍ନା ମିକାଲିଙ୍ଗ୍ ଚିଞ୍ଜେଙ୍ଗ୍ କାଦି ରସ୍ତାର୍, ଯୀଶୁ ର ରୁଟି ପେସ୍ଦି ଈଶ୍ୱରତିଙ୍ଗ୍ ଦନ୍ୟବାଦ୍ ହିତାନ୍ ଆରେ ରୁଟିତିଙ୍ଗ୍ ଡ୍ରିକ୍ତାନ୍।ସାଙ୍ଗେ-ସାଙ୍ଗେ ଇୱାନ୍ ନେ ଯୀଶୁ ଇଞ୍ଜି ହେୱାର୍ ଚିନ୍ କିତାର୍।ମାତର୍ ହେପାଦ୍ନା ହେୱାନ୍ ହେୱାର୍ କାଣ୍କୁତାଙ୍ଗ୍ ଡ଼ୁଗ୍ତାନ୍।
ହେ ରିକାର୍ ଜାର୍-ଜାର୍ ବିତ୍ରେ ୱେଚ୍ପା ଆତାର୍, ହେୱାନ୍ ଯୀଶୁ ମାଚାନ୍, “ହେଦାଙ୍ଗ୍ କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ଈଶ୍ୱର କାତା ବୁଜାଇ କିଦ୍ନିହିଙ୍ଗ୍ ମା ଗରବ୍ ଗାଡ଼୍ଜି ମାନ୍ଞ୍ଚାତ୍। ସାଙ୍ଗେ-ସାଙ୍ଗେ ହେୱାର୍ ଯିରୁଶାଲାମ ସହର୍ତାକେ ୱାତାର୍।” ହେୱାର୍ ଏଚେପାଦ୍ନା ଇକାତାର୍, ହେୱାର୍ ଚେଲାହିରିଙ୍ଗ୍ ୱେଚ୍ଚାର୍, “ଯୀଶୁ ଜିବୁନ୍ ମାନାନ୍! ଆପେଙ୍ଗ୍ ହେୱାନିଙ୍ଗ୍ ହୁଡ଼୍ତାପ୍ନା।”
ଚେଲାହିର୍ ଏଚେପାଦ୍ନା ବେଣ୍ବାଟ୍ କିଜି ମାଚାର୍, ଯୀଶୁ ହେୱାର୍ ମାନି ବାହାତାକେ ହେୱାର୍ ମୁମ୍ଦ ଚଞ୍ଜି ଆତାନ୍ ଆରେ ୱେଚ୍ଚାନ୍, “ମି କାଜିଙ୍ଗ୍ ଶାନ୍ତି ଆୟେତ୍!” ଚେଲାହିର୍ ବାବିକିତାର୍ ଯେ ହେୱାନ୍ ରକାନ୍ ବୁତ୍, ମାତର୍ ଯୀଶୁ ୱେଚ୍ଚାନ୍, ଏପେଙ୍ଗ୍ ଇନାକିଦେଙ୍ଗ୍ ପାଣ୍ଡ୍ରା ଆନାଦେରା ଆରେ ଡାଉଟ୍ କିନାଦେରା? ନା କେଇ ଆରେ କାଲ୍ପାନାତିଙ୍ଗ୍ ହୁଡ଼ାଟ୍। ନାଙ୍ଗେଙ୍ଗ୍ ଇନେସ୍ ଗାଗାଡ଼୍ ମାନାତ୍ ବୁତ୍କୁକାଙ୍ଗ୍ ହେଲେକେ ଗାଗାଡ଼୍ ହିଲ୍ଗୁତ୍।” ହେୱାନ୍ ବୁତ୍ ଆକାୟ୍ ହେଦାଙ୍ଗ୍ ସତ୍ ବିଷୟରେ ପୁନି କିଦେଙ୍ଗ୍, ହେୱାନ୍ ଚିଞ୍ଜେଙ୍ଗ୍ ଇଚ୍କେ ଏନ୍ତାନ୍। ହେୱାର୍ ହେୱାନିଙ୍ଗ୍ ୱାନ୍ଞ୍ଚି ମିନ୍କୁ ହିତାର୍, ଆରେ ହେୱାନ୍ ହେଦାଙ୍ଗ୍ ଚିଚାନ୍।
ଯୀଶୁ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍ ଯେ ନା ବିଷୟରେ ଈଶ୍ୱର କାତା ଲେକାଆତି ୱିଜୁ ବିଷୟ ସତ୍ରେ ପୁରା ଆଦେଙ୍ଗ୍ ଆନାତ୍।” ତାପାଚେ ହେୱାନ୍ ହେୱାର୍ ମାନ୍ତିଙ୍ଗ୍ ଜେତାନ୍, ଇନେସ୍କି ହେୱାର୍ ଈଶ୍ୱର କାତାତିଙ୍ଗ୍ ବୁଜା ଆଦେଙ୍ଗ୍ ଆଡ୍ନାର୍। ହେୱାନ୍ ୱେଚ୍ଚାନ୍, “ଆଗେ ଲେକାଆତାତ୍ନା ଯେ ଖ୍ରୀଷ୍ଟ ଦୁକ୍କଷ୍ଟ ପାୟାଆନାନ୍ ଆରେ ତିନ୍ ଦିନ୍ତାଙ୍ଗ୍ ଆରେରଗ ଜିବୁନ୍ ଆନାନ୍।“
“ସାସ୍ତର୍ତାକେ ଆରେ ପା ଲେକାଆଜି ମାଚାତ୍ ଯେ ୱିଜୁ ହେୱାର୍ ପାପ୍ କାମାୟ୍ତାଙ୍ଗ୍ କେମା ପାୟାଆନି କାଜିଙ୍ଗ୍ ବାବିକିନାର୍ ଇମ୍ଣାକାକି ଚେଲାହିର୍ ୱେଚ୍ନାର୍।ହେୱାର୍ ଇଦାଙ୍ଗ୍ ଯିରୁଶାଲାମ ସହର୍ତାଙ୍ଗ୍ ଆରମ୍ କିଜି ୱିଜୁ ବାହାତାକେ ମାନି ୱିଜୁ ମାନାୟାର୍ ଲାଗାୟ୍ ହାନାର୍।ଏପେଙ୍ଗ୍ ଇ ୱିଜୁ ବିଷୟନି ସାକି ଆନାଦେର୍।”
ୱାନି ଚାଲିଶ୍ ଦିନ୍ ଆସ୍ତି, ଯୀଶୁ କେତେକ୍ ହଟ୍ ତା ଚେଲାହିରିଙ୍ଗ୍ ଚଞ୍ଜି ଆତାନ୍।ରଗ ହେୱାନ୍ ରଞ୍ଜେମାଡ୍ ୫୦୦ଜାଣ୍ତାଙ୍ଗ୍ ଆଦିକ୍ ମାନାୟ୍ତିଙ୍ଗ୍ ଚିଞ୍ଜି ଆତାନ୍।ହେୱାନ୍ ଯେ ଜିବୁନ୍ ମାନାନ୍ ଇ ବିଷୟରେ ହେୱାନ୍ କେତ୍ହଟ୍ ତା ଚେଲାହିର୍ ଲାଗାୟ୍ ସତ୍ ଇଞ୍ଜି ଚଚ୍ଚାନ୍, ଆରେ ହେୱାନ୍ ଈଶ୍ୱର ସାସନ୍ କିନି ରାଜି ବିଷୟରେ ହିକ୍ଷା ହିତାନ୍।
ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ସରଗ୍ ଆରେ ପୁର୍ତିନି ୱିଜୁ ଆଦିକାର୍ ନାଙ୍ଗେଙ୍ଗ୍ ହିତ୍ତାନ୍ନା।ଇନେସ୍କି ହାଲାଟ୍ ୱିଜାକାର୍ ଲାଗାୟ୍ ହାଲ୍ଜି ଆବା, ହିମ୍ଣା ଆରେ ପବିତ୍ର ଆତ୍ମା ତର୍ଦାଙ୍ଗ୍ ହେୱାରିଙ୍ଗ୍ ଡୁବନ୍ ହିଜି ଆରେ ଆନେଙ୍ଗ୍ ମିଙ୍ଗେଙ୍ଗ୍ ଇମ୍ଣି-ଇମ୍ଣି ଆଦେସ୍ ହିତ୍ତାଙ୍ଗ୍ନା ହେ ୱିଜୁ ମାନି କିଦେଙ୍ଗ୍ ହିକ୍ଷା ହିଜି।ଏତୁ କିୟାଟ୍, ଆନେଙ୍ଗ୍ ୱିଜୁଦିନ୍ ମି ହୁଦାଙ୍ଗ୍ ମାନାଙ୍ଗ୍।”
ଯୀଶୁ ହାଃତିତାଙ୍ଗ୍ ଆରେରଗ ଜିବୁନ୍ ଆଜି ନିଙ୍ଗ୍ତି ଚାଲିଶ୍ ଦିନ୍ ପାଚେ, ହେୱାନ୍ ତା ଚେଲାହିରିଙ୍ଗ୍ ୱେଚ୍ଚାନ୍, “ପବିତ୍ର ଆତ୍ମା ମି ଜପି ୱାନିହିଙ୍ଗ୍ ନା ଆବା ଏଚେପାଦ୍ନା ପାତେକ୍ ମିଙ୍ଗେଙ୍ଗ୍ ଶାକ୍ତି ହିଦୁନ୍ ହେପାଦ୍ନା ପାତେକ୍ ଯିରୁଶାଲାମ ସହର୍ତାକେ ମାନାଟ୍।” ତାପାଚେ ଯୀଶୁ ସରଗ୍ ଜପି ହାଚାନ୍, ଆରେ ର ବାଦାଡ଼୍ ହେୱାର୍ ମୁମ୍ଦାଙ୍ଗ୍ ଯୀଶୁଙ୍ଗ୍ ଡ଼ୁକ୍ତାତ୍। ଯୀଶୁ ୱିଜୁ ବିଷୟ ପୁରାକିତି କାଜିଙ୍ଗ୍ ଈଶ୍ୱର ତିନାବାଗାୟ୍ନି ସନ୍ମାନ୍ ପାୟାଆନି ବାହାତାକେ କୁଚ୍ଚାନ୍।
ବାଇବଲ୍ନି ର କାତା: ମାଥିଉ ୨୮: ୧୬-୨୦; ମାର୍କ ୧୬: ୧୨- ୨୦; ଲୁକ ୨୪: ୧୩- ୫୩; ଯୋହନ ୨୦: ୧୯- ୨୩; ପ୍ରେରିତ ୧: ୧- ୧୧
Free to use, adapt, and share under an open license (CC BY-SA 4.0).