43. ୪୩. ମଣ୍ଡ୍ଲିନି ଆରମ୍
ଯୀଶୁ ସରଗ୍ ଜପି ହାଚି ପାଚେ, ଯୀଶୁ ଇନେସ୍ ଆଦେସ୍ ହିଜିମାଚାନ୍ ହେଲେକେ ଚେଲାହିର୍ ଯିରୁଶାଲାମ ସହର୍ତାକେ ମାଚାର୍।ପାର୍ତି କିନାକାର୍ ହେବେ ପାର୍ତାନା କିନି କାଜିଙ୍ଗ୍ ରବେ ଚିମ୍ରାଆଜି ମାଚାର୍।
ନିସ୍ତାର୍ ପାର୍ବୁନି ୫୦ ଦିନ୍ ପାଚେ ୱିଜୁ ବାର୍ହୁ ଯିହୁଦିର୍ ପେଣ୍ଟିକଷ୍ଟ ତର୍ଦି ର ୱିଜୁତାଙ୍ଗ୍ ମୁକ୍ୟ ପାର୍ବୁ ମାନିକିଜି ମାଚାର୍।ପେଣ୍ଟିକଷ୍ଟ ଆନାତା ହେ ସମୟ ଏଚେପାଦ୍ନା ଯିହୁଦିର୍ ତାସ୍ ରୁଣ୍ଡାଇକିନି ପାର୍ବୁ ତିନାର୍।ପେଣ୍ଟିକଷ୍ଟ ରବେ ମାନି କିଦେଙ୍ଗ୍ ୱିଜୁ ଜଗତ୍ତାଙ୍ଗ୍ ଯିହୁଦିର୍ ଯିରୁଶାଲାମ ସହର୍ତାକେ ୱାତାର୍।ଇ ବାର୍ହୁ ଯୀଶୁ ସରଗ୍ ଜପି ହାଲ୍ଜି ଆଡ଼୍ଦିନ୍ ପାଚେ ପେଣ୍ଟିକଷ୍ଟ ପାର୍ବୁଦିନ୍ ୱାତାତ୍।
ପାର୍ତି କିନାକାର୍ ଏଚେପାଦ୍ନା ରବେ ମାଚାର୍, ଇମ୍ଣି ଇଞ୍ଜ ହେୱାର୍ ମାଚାର୍ ବେସି ଡ଼ୁଇନି ଶବଦ୍ ଲେକେ ର ଶବଦ୍ ହେ ବାହା ଚାରିବେଣ୍ତାଙ୍ଗ୍ ପୁରାଆତାତ୍।ତାପାଚେ ନାଣି ଲେକେ ୱେନ୍ଦୁଲିଙ୍ଗ୍ ୱିଜୁ ପାର୍ତି କିନାକାର୍ କାପ୍ଡ଼ା ଜପି ଚଞ୍ଜି ଆତାତ୍।ହେ ୱିଜାକାର୍ ପବିତ୍ର ଆତ୍ମାତାଙ୍ଗ୍ ପୁରା ଆତାର୍ ଆରେ ବାରବିନି ବାଷାତାକେ ବେଣ୍ କିଦେଙ୍ଗ୍ ଲାଗାତାର୍।
ଏଚେପାଦ୍ନା ଯିରୁଶାଲାମ ସହର୍ତାକେ ମାନି ମାନାୟ୍ ଇ କାଟ୍ ୱେଚାର୍, ଇନାକା ଗଟାଆତାତ୍ ହେଦାଙ୍ଗ୍ ହୁଡ଼୍ଦେଙ୍ଗ୍ ମାନାୟ୍ ରବେ ରୁଣ୍ଡାଆତାର୍।ଈଶ୍ୱର ଚାନିଆ ଆନି କାମାୟ୍ତିଙ୍ଗ୍ ପାର୍ତି କିନାକାର୍ ଶୁଣାୟ୍ କିନାକା ମାନାୟାର୍ ଏଚେପାଦ୍ନା ୱେଚାର୍, ହେୱାର୍ ଚାନିଆ ଆତାର୍ ଇନେସ୍କି ହେୱାର୍ ହେ ୱିଜୁ ଜାର୍ ବାଷାରେ ବେଣ୍ କିନାକା ୱେଚାର୍।
କେତେକ୍ ମାନାୟ୍, ଚେଲାହିର୍ ହଚ୍ଚାର୍ନା ଇଞ୍ଜି ୱେଚ୍ଚାର୍।ମାତର୍ ପିତର ନିଲ୍ଚି ହେୱାରିଙ୍ଗ୍ ୱେଚ୍ଚାନ୍, “ନା ବେଣ୍ ୱେନାଟ୍! ଇ ୱିଜୁ ମାନାୟ୍ ହଚ୍ୱାତାର୍ନା।ଇଦାଙ୍ଗ୍ ଯୋୟେଲ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ୱେଚ୍ଚି ମାଚି କାତା ପୁରା ଆତାତ୍, ଇମେତାକେ ଈଶ୍ୱର ୱେଚ୍ଚି ମାଚାନ୍, ସେସ୍ କାଡ଼୍ଦ ଆପେଙ୍ଗ୍ ମା ଆତ୍ମା ହିଦ୍ନାପ୍।”
“ଏ ଇସ୍ରାଏଲନି ମାନାୟ୍ କାଦେର୍, ଯୀଶୁ ରକାନ୍ ମାନାୟ୍ ମାଚାନ୍ ହେୱାନ୍ ଈଶ୍ୱର ଶାକ୍ତିତାଙ୍ଗ୍ କେତେକ୍ ମାହାନ୍ ଆରେ ଚାନିଆଆନି କାମାୟ୍ ୱିଜୁ କିତାନ୍, ଇମ୍ଣାକା ଏପେଙ୍ଗ୍ ହୁଡ଼୍ତାଦେର୍ନା ଆରେ ପୁଚାଦେର୍ନା।ମାତର୍ ଏପେଙ୍ଗ୍ ହେୱାନିଙ୍ଗ୍ କୃଶକାଟ୍ତାକେ ମାର୍ନେ ଅସ୍ତାଦେର୍।”
“ଯୀଶୁ ଯଦି ହାଃତାନ୍, ମାତର୍ ଈଶ୍ୱର ହେୱାନିଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି ନିକ୍ତାନ୍।ଇଦାଙ୍ଗ୍ ଇ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ୱେଚ୍ଚି କାତା ପୁରା ଆତାତ୍, ଇନାକା ୱେଚ୍ନାନ୍ ଏପେଙ୍ଗ୍ ମି ପବିତ୍ର ମାନାୟ୍ତିଙ୍ଗ୍ ଦୁଗେର୍ତାକେ ନଷ୍ଟ ଆଦେଙ୍ଗ୍ ହିଦୁନ୍।ଈଶ୍ୱର ଯେ ଯୀଶୁଙ୍ଗ୍ ଆରେରଗ ଜିବୁନ୍ କିତାନ୍ନା, ଆସେଙ୍ଗ୍ ସାକି ମାନାସ୍।”
“ନଙ୍ଗୟ ଯୀଶୁ ଆବା ତିନା ବାଗାୟ୍ନି ସନ୍ମାନ୍ ପାୟାଆନି ବାହାତାକେ କୁଚ୍ଚାନ୍ନା।ଆରେ ଯୀଶୁ ଇନେସ୍ ଲେକେ ପବିତ୍ର ଆତ୍ମାତିଙ୍ଗ୍ ପକ୍ତାନାନ୍ ଇଞ୍ଜି ୱେଚ୍ଚି ମାନ୍ଞ୍ଚାନ୍, ଟିକ୍ ହେଲେକେ ପବିତ୍ର ଆତ୍ମାତିଙ୍ଗ୍ ପକ୍ତାତାନ୍।ନଙ୍ଗୟ ଏପେଙ୍ଗ୍ ଇମ୍ଣି ବିଷୟ ହିଡ଼୍ନାଦେରା ଆରେ ୱେନାଦେରା ହେ ୱିଜୁ ପବିତ୍ର ଆତ୍ମା ଗଟାଇ କିତ୍ତାନ୍ନା।”
“ଇ ଯୀଶୁଙ୍ଗ୍ ଏପେଙ୍ଗ୍ କୃଶକାଟ୍ତାକେ ମାର୍ନେ ଅସ୍ତାଦେର୍ନା।ମାତର୍ ସତ୍ ପୁନାଟ୍ ଯେ ଈଶ୍ୱର ଯୀଶୁଙ୍ଗ୍ ରିକାର୍ ମାପୃ ଆରେ ଖ୍ରୀଷ୍ଟ କିତାନ୍ନା।”
ମାନାୟାର୍ ପିତର୍ ବେଣ୍ ୱେଚାର୍ ଆରେ ହେୱାନ୍ ୱେଚ୍ଚି ବେଣ୍ କାଜିଙ୍ଗ୍ ବେସି ବିଚା ଆତାତ୍।ଲାଗିଙ୍ଗ୍ ହେୱାର୍ ପିତର ଆରେ ଜେକନି ଚେଲାରିଙ୍ଗ୍ ୱେନ୍ବାତାର୍, “ଟଣ୍ଡାର୍ କାଦେର୍, ଆସେଙ୍ଗ୍ ଇନାକା କିନାସ୍?”
ପିତର ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ୱିଜାକାଦେର୍ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ଡୁବନ୍ ଆଡ ଇନେସ୍କି ଈଶ୍ୱର ମି ପାପ୍ କେମା କିଦ୍ନାନ୍।ତାପାଚେ ହେୱାନ୍ ପବିତ୍ର ଆତ୍ମାନି ଦାନ୍ ହିଦ୍ନାନ୍।”
ପାକାପାକି ୩୦୦୦ ମାନାୟାର୍, ପିତର ୱେଚ୍ଚି ବେଣ୍ ପାର୍ତିକିଜି ଯୀଶୁ ଚେଲା ଆତାର୍। ହେୱାର୍ ପାର୍ତିକିଜି ଯିରୁଶାଲାମ ସହର୍ତାକେ ମାନି ମଣ୍ଡ୍ଲିନି ର ବାଗ୍ ଲେକେ ଆତାର୍।
ଚେଲାହିର୍ ଚିମ୍ରାଆଜି ପାର୍ତୁମ୍ ଚେଲାହିର୍ ହିକ୍ଷା ୱେଞ୍ଜେଙ୍ଗ୍ ଲାଗାତାର୍, ରବେ ଦିନ୍ କାଟିକିତାର୍, ରବେ ଚିଚାର୍, ଆରେ ରବେ ପାର୍ତାନା କିତାର୍।ହେୱାର୍ ରବେ ଈଶ୍ୱରତିଙ୍ଗ୍ ଗୌରବ କିଦେଙ୍ଗ୍ ୱାରି କିତାର୍ ଆରେ ହେୱାରିଙ୍ଗ୍ ଇନା-ଇନାକା ମାଚାତ୍ ହେଦାଙ୍ଗ୍ ଜାର୍-ଜାର୍ ବିତ୍ରେ ବାଟା କିଦେଙ୍ଗ୍ ଲାଗାତାର୍।ୱିଜାକାର୍ ହାର୍ଦି କାମାୟ୍ କିଜି ମାଚାର୍।ୱିଜୁଦିନ୍ ଆଦିକ୍ତାଙ୍ଗ୍ ଆଦିକ୍ ମାନାୟାର୍ ପାର୍ତିକିଜି ମାଚାର୍।
ବାଇବଲ୍ନି ର କାତା: ପ୍ରେରିତ ୨
Free to use, adapt, and share under an open license (CC BY-SA 4.0).