44. ୪୪. ପିତର ଆରେ ଯୋହନ ରକାନ୍ ବିକ୍ୟା ଏନ୍ନାକାନିଙ୍ଗ୍ ହାର୍ କିତାର୍
ଦିନେକ୍ ପିତର ଆରେ ଯୋହନ ମନ୍ଦିର୍ତାକେ ହାଲ୍ଜି ମାଚାର୍।ହେୱାର୍ ଏଚେପାଦ୍ନା ମନ୍ଦିର୍ ଦୁୱାର୍ତାକେ ଇକାତାର୍, ହେୱାର୍ ର ଚଟା ମାନାୟ୍ ଭିକ୍ଷା ଏନ୍ନାକା ହୁଡ଼୍ତାର୍।
ପିତର ଚଟା ମାନାୟ୍ତିଙ୍ଗ୍ ହୁଡ଼୍ଜି ୱେଚ୍ଚାନ୍, “ହିଦ୍ନି କାଜିଙ୍ଗ୍ ନାଙ୍ଗେଙ୍ଗ୍ ଡାବୁଙ୍ଗ୍ ହିଲୁକ୍।ମାତର୍ ଆନେଙ୍ଗ୍ ଇନାକା ଇଚା କିନାଙ୍ଗା ହେଦାଙ୍ଗ୍ ଆନେଙ୍ଗ୍ ହିଦ୍ନାଙ୍ଗା ନାଜରିତିୟ ଯୀଶୁ ତର୍ଦାଙ୍ଗ୍ ନିଙ୍ଗ୍ଜି ତାଙ୍ଗା।”
ସାଙ୍ଗେ-ସାଙ୍ଗେ ଈଶ୍ୱର ହେ ଚଟା ମାନାୟ୍ତିଙ୍ଗ୍ ହାର୍ କିତାନ୍। ଆରେ ହେୱାନ୍ ଚାରିବେଣ୍ତାଙ୍ଗ୍ ଗୁମ୍ଜି-ଗୁମ୍ଜି ତାଙ୍ଗ୍ତାନ୍।ମନ୍ଦିର୍ ପିଣ୍ଡାତାକେ ମାନି ମାନାୟାର୍ ଚାନିଆ ଆତାର୍।
ଇମ୍ଣି ମାନାୟ୍ ଚଟାତାଙ୍ଗ୍ ହାର୍ ଆଜି ମାଚାନ୍ ହେୱାନିଙ୍ଗ୍ ହୁଡ଼୍ଦେଙ୍ଗ୍ ମାନାୟ୍ ମାନ୍ଦାଆଜି ୱାତାର୍। ପିତର ହେୱାରିଙ୍ଗ୍ ୱେଚ୍ଚାନ୍, “ଇୱାନ୍ ହାର୍ ଆତିଲେ ଏପେଙ୍ଗ୍ ଇନାକିଦେଙ୍ଗ୍ ଚାନିଆ ଆନାଦେରା? ମା ଶାକ୍ତି କି ହାର୍ତାଙ୍ଗ୍ ଆପେଙ୍ଗ୍ ହେ ମାନାୟ୍ତିଙ୍ଗ୍ ହାର୍ କିୱାତାପ୍ନା।ମାତର୍ ଇଦାଙ୍ଗ୍ ଯୀଶୁ ଶକ୍ତି ଆରେ ଯୀଶୁ ହିତ୍ତି ପାର୍ତି ହେଦାଙ୍ଗ୍ ହେୱାନିଙ୍ଗ୍ ହାର୍ କିତାତ୍।“
“ଏପେଙ୍ଗ୍ ନେ ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ରୋମିୟ ସର୍କାର୍ତିଙ୍ଗ୍ ୱେଚ୍ଚି ମାଚାଦେର୍। ଏପେଙ୍ଗ୍ ଜିବୁନ୍ ମାନି ମାଷ୍ଟେର୍ତିଙ୍ଗ୍ ମାର୍ନେ ଅସ୍ତାଦେର୍, ମାତର୍ ଈଶ୍ୱର ହେୱାନିଙ୍ଗ୍ ହାଃତିତାଙ୍ଗ୍ ଜିବୁନ୍କିଜି ନିକ୍ତାନ୍ନା। ଏପେଙ୍ଗ୍ ଇନା-ଇନାକା କିନାଦେରା ହେଦାଙ୍ଗ୍ ଯଦି ବୁଜାଆୱାଦାଙ୍ଗ୍ ମାଚାଦେର୍, ଆତିସ୍ପା ଖ୍ରୀଷ୍ଟ ଦୁକ୍କଷ୍ଟ ପାୟାଆଜି ହାଃନାନ୍ ଇ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ୱେଚ୍ଚି କାତାତିଙ୍ଗ୍ ପୁରା କିନି କାଜିଙ୍ଗ୍ ଈଶ୍ୱର ମି କାମାୟ୍ତିଙ୍ଗ୍ ବ୍ୟବହାର୍ କିତାନ୍।ଲାଗିଙ୍ଗ୍ ନଙ୍ଗୟ୍ ଏତୁ କିୟାଟ୍ ଆରେ ଈଶ୍ୱର ଲାଗାୟ୍ ଲେଉଟା ଆଡୁ ଇନେସ୍କି ମି ପାପ୍ କେମା କିଦ୍ନାନ୍।”
ପିତର ଆରେ ଯୋହନ ଇନାକା ୱେଚ୍ଚି ମାଚାର୍ ହେଦାଙ୍ଗ୍ ୱେନ୍ଞ୍ଜି ମନ୍ଦିର୍ନି ନେତାର୍ ଟେନ୍ସନ୍ ଆଜି ମାଚାର୍।ଲାଗିଙ୍ଗ୍ ହେୱାର୍ ହେୱାରିଙ୍ଗ୍ ଗାଚ୍ଚି ଜଇଲ୍ ଇଞ୍ଜ ବନ୍ଦି କିତାର୍।ମାତର୍ କେତେକ୍ ହେନି ମାନାୟ୍ ପିତର ୱେଚ୍ଚି କାତାତିଙ୍ଗ୍ ପାର୍ତି କିତାର୍, ଆରେ ଯୀଶୁଙ୍ଗ୍ ପାର୍ତିକିନି ମାନାୟ୍ର୍ ସଂଖ୍ୟା ୫୦୦୦ ତାକେ ଇକାତାତ୍।
ତାଆର୍କାତ୍ ନାଞ୍ଜିଙ୍ଗ୍ ଯିହୁଦି ନେତାର୍ ପିତର ଆରେ ଯୋହନତିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରି ଆରେ ଜେକନି ଦରମ୍ ଗୁରୁର୍ ଲାଗାୟ୍ ତାସିୱାତାର୍।ହେୱାର୍ ପିତର ଆରେ ଯୋହନତିଙ୍ଗ୍ ୱେନ୍ବାତାର୍, “ଇମ୍ଣି ଶାକ୍ତିତାଙ୍ଗ୍ ଏପେଙ୍ଗ୍ ଇ ଚଟା ମାନାୟ୍ତିଙ୍ଗ୍ ହାର୍ କିତାଦେର୍?”
ପିତର ହେୱାରିଙ୍ଗ୍ ୱେଚ୍ଚାନ୍, “ଇୱାନ୍ ଯୀଶୁ ଖ୍ରୀଷ୍ଟ ଶାକ୍ତିତାଙ୍ଗ୍ ହାର୍ଆଜି ନିଲ୍ତାନ୍ନା। ଏପେଙ୍ଗ୍ ଯୀଶୁଙ୍ଗ୍ କୃଶକାଟ୍ତାକେ ମାର୍ନେ ଅସ୍ତାଦେର୍, ମାତର୍ ଈଶ୍ୱର ହେୱାନିଙ୍ଗ୍ ଆରେରଗ ଜିବୁନ୍ କିତାନ୍ନା। ଏପେଙ୍ଗ୍ ହେୱାନିଙ୍ଗ୍ ମାନି କିୱାତାଦେର୍ନା, ମାତର୍ ଉଦାର୍ ପାୟାଆନି କାଜିଙ୍ଗ୍ ଯୀଶୁ ଶାକ୍ତିତିଙ୍ଗ୍ ପିସ୍ତି ଆରେ ଇନା ଉପାୟ୍ ହିଲେତ୍।”
ପିତର ଆରେ ଯୋହନ ବେସି ସାହାସ୍ ହୁଦାଙ୍ଗ୍ ବେଣ୍ ୱେଚ୍ନାକା ହୁଡ଼୍ଜି ନେତାର୍ ଚାନିଆ ଆତାର୍, “ଇନେସ୍କି ହେୱାର୍ ହୁଡ଼୍ତାର୍ ଯେ ଇୱାର୍ ସାଦାସିଦା ମାନାୟ୍ ହେୱାର୍ ଅସିକିତ୍ ମାଚାର୍।ମାତର୍ ପାଚେ ହେୱାର୍ ପୁଚାର୍ ଯେ ଇୱାର୍ ଯୀଶୁ ହୁଦାଙ୍ଗ୍ ମାଚାର୍।” ହେୱାର୍ ପିତର ଆରେ ଯୋହନତିଙ୍ଗ୍ ଦମ୍କାୟ୍ କିତି ପାଚେ ପିସ୍ତି ମାଚାର୍।
ବାଇବଲ୍ନି ର କାତା: ପିତର ୩: ୧- ୪: ୨୨
Free to use, adapt, and share under an open license (CC BY-SA 4.0).