45. ୪୫. ସ୍ତିଫାନ ଆରେ ଫିଲିପ
ୱିଜୁତାଙ୍ଗ୍ ଆଗେ ମଣ୍ଡ୍ଲିନି ନେତାର୍ ବିତ୍ରେତାଙ୍ଗ୍ ସ୍ତିଫାନ ତର୍ଦାକାନ୍ ରକାନ୍ ମାନାୟ୍ ମାଚାନ୍।ହେୱାନ୍ ଜଣାସୁଣା ମାନାୟ୍ ମାଚାନ୍ ଆରେ ହେୱାନ୍ ୱିଜୁ ପବିତ୍ର ଆତ୍ମା ଆରେ ବୁଦିତାଙ୍ଗ୍ ପୁରାଆଜି ମାଚାନ୍, ସ୍ତିଫାନ କେତେକ୍ ଚାନିଆଆନି କାମାୟ୍ କିତାନ୍ ଆରେ ଆଦିକାର୍ ହୁଦାଙ୍ଗ୍ ବିଚାର୍ କିତାନ୍, ଇନେସ୍ ମାନାୟାର୍ ଯୀଶୁତାକେ ପାର୍ତି କିନାର୍।
ରଦିନ୍ ଏଚେପାଦ୍ନା ସ୍ତିଫାନ ଯୀଶୁ ବିଷୟରେ ହିକ୍ଷାହିଜି ମାଚାନ୍, ହେପାଦ୍ନା ଯୀଶୁତାକେ ପାର୍ତିକିୱି ମାନାୟ୍ କେତ୍ଜାଣ୍ ଯିହୁଦିର୍ ସ୍ତିଫାନ ହୁଦାଙ୍ଗ୍ ଜୁକ୍ତି କିଦେଙ୍ଗ୍ ଲାଗାତାର୍।ହେୱାର୍ ଆଦିକ୍ ରିସା ଆଜି ମାଚାର୍ ଆରେ ସ୍ତିଫାନ ବିଷୟରେ ଦରମ୍ ଗୁରୁରିଙ୍ଗ୍ ମିଚ୍ ୱେଚ୍ଚାର୍। ହେୱାର୍ ୱେଚ୍ଚାର୍, “ଆପେଙ୍ଗ୍ ହେୱାନିଙ୍ଗ୍ ମୋଶା ଆରେ ଈଶ୍ୱର ବିରଦ୍ତାକେ ବେଣ୍ ୱେଚ୍ନାକା ଆପେଙ୍ଗ୍ ୱେଚାପ୍ନା।” ଲାଗିଙ୍ଗ୍ ଦରମ୍ ନେତାର୍ ସ୍ତିଫାନତିଙ୍ଗ୍ ଗାଚ୍ଚାର୍ ଆରେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଆରେ ଯିହୁଦିର୍ ନେତା ଲାଗାୟ୍ ହେୱାନିଙ୍ଗ୍ ତାସିୱାତାର୍ ଇମେତାକେ ସ୍ତିଫାନ ବିରଦ୍ତାକେ ଆଦିକ୍ ମିଚ୍ ସାକି ହିନାକାର୍ ମାଚାର୍।
ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ସ୍ତିଫାନତିଙ୍ଗ୍ ୱେନ୍ବାତାନ୍, “ଇ ମାନାୟାର୍ ନି ବିରଦ୍ତାକେ ୱେଚ୍ନାକା ୱିଜୁ ସତ୍ କି?” ପ୍ରଦାନ୍ ମୁଡ଼୍ଦି ପୁଜାରିଙ୍ଗ୍ ଉତର୍ ହିନି କାଜିଙ୍ଗ୍ ଆଗେ ଈଶ୍ୱର କିଜିମାଚି ୱିଜୁ କାତାତିଙ୍ଗ୍ ୱେଚ୍ଚାନ୍। ଈଶ୍ୱରଅବ୍ରାହାମତିଙ୍ଗ୍ କୁକ୍ନି ସମୟ୍ତାଙ୍ଗ୍ ଯୀଶୁ ପୁର୍ତିତାକେ ୱାଜିମାନି ପାତେକ୍, ଈଶ୍ୱର ଇସ୍ରାଏଲ ମାନାୟାର୍ତାକେ ବେସି ଚାନିଆ କାମାୟ୍ କିଜି ମାଚାନ୍। ମାତର୍ ଇସ୍ରାଏଲନି ମାନାୟାର୍ ୱିଜୁଦିନ୍ ମାନି କିୱାଦାଙ୍ଗ୍ ମାଚାର୍। ସ୍ତିପାନ ୱେଚ୍ଚାନ୍, “ଏପେଙ୍ଗ୍ ମାନ୍ ଗାର୍ବିୟା ଆରେ ଈଶ୍ୱରତିଙ୍ଗ୍ ବିରଦ୍ କିନାକାଦେର୍। ମା ଆକଦାଦିର୍ ୱିଜୁଦିନ୍ ଈଶ୍ୱରତିଙ୍ଗ୍ ବିରଦ୍ କିଜି ତା ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାରିଙ୍ଗ୍ ମାର୍ନେ ଅସ୍ତି ମାଚାର୍, ହେଲେକେ ଏପେଙ୍ଗ୍ ପା ୱିଜୁଦିନ୍ ପବିତ୍ର ଆତ୍ମାତିଙ୍ଗ୍ ମାନି କିଉଦେରା।ମାତର୍ ହେୱାର୍ କିତି ବୁଲ୍ତାଙ୍ଗ୍ ଏପେଙ୍ଗ୍ ବେସି ବୁଲ୍ କିତାଦେର୍ନା! ଏପେଙ୍ଗ୍ ଖ୍ରୀଷ୍ଟଙ୍ଗ୍ ମାର୍ନେ ଅସ୍ତାଦେର୍ନା।”
ଏଚପାଦ୍ନା ଦରମ୍ ନେତାର୍ ଇଦାଙ୍ଗ୍ ୱେଚାର୍, ହେୱାର୍ ବେସି ରିସାଆଜି ମାଚାର୍ ଯେ ହେୱାର୍ ହେୱାର୍ କିତୁଲିକାଙ୍ଗ୍ ତିଗି ଆଜି ଗାଜାକାଟ୍ତାଙ୍ଗ୍ ଚେରା ଆତାର୍।ହେୱାର୍ ସ୍ତିଫାନତିଙ୍ଗ୍ ସହର୍ ବାର୍ତ ଜେଲ୍ଜି ଅତାର୍ ଆରେ ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ କାଲ୍କୁ ହୁଦାଙ୍ଗ୍ ଇଡ଼୍ତାର୍।
ସ୍ତିଫାନ ହାଃନିହିଙ୍ଗ୍ ଗାଜାକାଟ୍କିଜି ଚେରା ଆତାନ୍ ଆରେ ୱେଚ୍ଚାନ୍, “ଏ ଯୀଶୁ, ନା ଆତ୍ମାତିଙ୍ଗ୍ ଆହା।” ତାପାଚେ ହେୱାନ୍ ମେଣ୍ଡାକୁନ୍ଦିକିଜି ଆରେରଗ ଗାଜାକାଟ୍ କିଜି ୱେଚ୍ଚାନ୍, “ଏ ମାପୃ, ଇ ପାପ୍ ହେୱାର୍ ବିରଦ୍ତାକେ ଗାଣା କିମା।ତାପାଚେ ହେୱାନ୍ ହାଃତାନ୍।”
ସ୍ତାଫାନତିଙ୍ଗ୍ ମାନାୟାର୍ ମାର୍ନେ ଅହ୍ନିହିଙ୍ଗ୍ ସାଉଲ ତର୍ଦାକାନ୍ ରକାନ୍ ମାନାୟ୍ ମାଚାନ୍।ହେୱାନ୍ ପା ମାନାୟାର୍ ହୁଦାଙ୍ଗ୍ ମାହାଆଜି ଆରେ ହେ ମାନାୟାର୍ ଜପି ଉସ୍ପିନି କଟ୍ ଆସ୍ତି ମାଚାନ୍। ହେ ଦିନ୍, ଯିରୁଶାଲାମ ସହର୍ତାକେ ଯୀଶୁତାକେ ପାର୍ତିକିନି ମାନାୟାରିଙ୍ଗ୍ ବେସି ଦୁକ୍କଷ୍ଟ ମାନାୟାର୍ ହିତାର୍। ଲାଗିଙ୍ଗ୍ ପାର୍ତିକିନାକାର୍ ବାରବିନି ବାହାତାକେ ହନ୍ଚି ହାଚାର୍।ହେୱାର୍ ଦୁକ୍କଷ୍ଟ ପାୟାଆଜି ମାଚିସ୍ ପା ପାର୍ତି କିନାକାର୍ ଇମ୍ଣି ନିପଣ୍ ହାଲ୍ଜି ମାଚାର୍ ହେବେ ଯୀଶୁ ବିଷୟରେ ଶୁଣାୟ୍ କିଦେଙ୍ଗ୍ ଲାଗାତାର୍।
ଯିରୁଶାଲାମ ସହର୍ତାଙ୍ଗ୍ ଦୁକ୍କଷ୍ଟ ପାୟାଆଜି ହନ୍ଚି ମାଚି ପାର୍ତିକିନାକାର୍ ବିତ୍ରେତାଙ୍ଗ୍ ଫିଲିପ ତର୍ଦାକାନ୍ ରକାନ୍ ଯୀଶୁ ଚେଲାହି ମାଚାନ୍।ହେୱାନ୍ ଶମରୀୟତାକେ ହାଲ୍ଜି ଯୀଶୁ ବିଷୟରେ ଶୁଣାୟ୍ କିତାନ୍ ଆରେ କେତେକ୍ ମାନାୟ୍ ହେବେ ଉଦାର୍ ପାୟାଆତାର୍।ତାଆର୍କାତ୍ ନାଞ୍ଜିଙ୍ଗ୍ ଈଶ୍ୱରତି ରକାନ୍ ଦୁତ୍ ଫିଲିପ ଲାଗାୟ୍ ୱାଜି ଟାଙ୍ଗ୍ରାବାହା ନିପ୍ଣ୍ ମାନି ହାଜି ନିପଣ୍ଆଜି ହାନି କାଜିଙ୍ଗ୍ ୱେଚ୍ଚାନ୍।ହେୱାନ୍ ଏଚେପାଦ୍ନା ହେ ହାଜ୍ଦିଙ୍ଗ୍ ହାଲ୍ଜି ମାଚାନ୍, ଫିଲିପ ହୁଡ଼୍ତାନ୍ ଯେ ଇଥିଓପିଆ ରାଜା ପରିବାର୍ନି ରକାନ୍ ଗାଜା ପାଦ୍ ପାୟାଆତାକାନ୍ ତା ହାଜ୍ଦିଙ୍ଗ୍ ରଥତାକେ ଦୁମ୍ଜି ୱାନାନା।ହେୱାନ୍ ଲାଗାୟ୍ ହାଲ୍ଜି ତା ହୁଦାଙ୍ଗ୍ ବେଣ୍କିଦେଙ୍ଗ୍ ପବିତ୍ର ଆତ୍ମା ଫିଲିପତିଙ୍ଗ୍ ୱେଚ୍ଚାତ୍।
ଫିଲିପ ଏଚେପାଦ୍ନା ରଥ ଲାଗାୟ୍ ଆତାନ୍, ହେ ଇଥିଓପିଆ ମାନାୟ୍ ଯିଶାଇୟ ଭବିଷ୍ୟତବକ୍ତା ବହିତାଙ୍ଗ୍ ପଡ଼ି କିନାକା ୱେଚାନ୍। ହେୱାନ୍ ପଡ଼ିକିଜି ମାଚାନ୍, “ହେୱାର୍ ମେଣ୍ଢା ଲେକେ ହେୱାନିଙ୍ଗ୍ ଅହ୍ନି କାଜିଙ୍ଗ୍ ଅତାର୍, ଆରେ ଚିମ୍ରାଆତି ମେଣ୍ଢା ଲେକେ ହେୱାନ୍ ଜାର୍ ମୁମ୍ ଜେୱାତାନ୍। ହେୱାର୍ ହେୱାନିଙ୍ଗ୍ କେତ୍ତାର୍ ଆରେ ହେୱାନିଙ୍ଗ୍ ମାନି କିୱାତାର୍।ଆରେହେୱାର୍ ହେୱାନ୍ତାଙ୍ଗ୍ ତା ଜିବୁନ୍ ଅତାର୍।”
ଫିଲିପ ହେ ଇଥିଓପିଆ ମାନାୟ୍ତିଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇମ୍ଣାକା ପଡ଼ିକିନାୟା ହେଦାଙ୍ଗ୍ ଇନାକା ବୁଜାଆନାୟା?” ହେ ଇଥିଓପିଆ ମାନାୟ୍ ୱେଚ୍ଚାନ୍, “ଆକାୟ୍ ଇନେର୍ ନାଙ୍ଗେଙ୍ଗ୍ ବୁଜାଇ କିଦ୍ୱି ପାତେକ୍ ଆନେଙ୍ଗ୍ ବୁଜାଆଦେଙ୍ଗ୍ ଆଡୁଙ୍ଗ୍। ଦୟାକିଜି ୱାଜି ଆରେ ନା ଲାଗାୟ୍ କୁଚା।ଯିଶାଇୟ ଇନାକା ଜାର୍ ବିଷୟରେ କି ଆରେ ଇନେର୍ ବିଷୟରେ ଇଦାଙ୍ଗ୍ ଲେକିକିତାନ୍ନା? ଫିଲିପ ହେୱାନିଙ୍ଗ୍ ବୁଜାଇ କିଜି ୱେଚ୍ଚାନ୍, ଯିଶାଇୟ ଯୀଶୁ ବିଷୟରେ ଇଦାଙ୍ଗ୍ ଲେକିକିତାନ୍ନା।”
ଯୀଶୁ ବିଷୟରେ ମାନି ହାର୍ଦିକାବୁର୍ ୱେଚ୍ନି କାଜିଙ୍ଗ୍ ଫିଲିପ ଜେକନି ସାସ୍ତର୍ ପା ବୁଜାଇ କିତାନ୍।ଏଚେପାଦ୍ନା ଫିଲିପ ଆରେ ଇଥିଓପିଆ ହାଲ୍ଜି ମାଚାର୍, ହେୱାର୍ ର ନାଗୁଡ଼୍ ଲାଗାୟ୍ ୱାତାର୍।
ଇଥିଓପିଆ ମାନାୟ୍ ୱେଚ୍ଚାନ୍, “ହୁଡ଼ା! ଇବେ ଇଚୁଡ଼ିଙ୍ଗ୍ ଏଜୁଙ୍ଗ୍ ମାନିକ୍! ଆନେଙ୍ଗ୍ ଡୁବନ୍ ଅଦେଙ୍ଗ୍ ଆଡ୍ନାଙ୍ଗ୍ କି?” ଆରେ ତା ରଥ ଚାଲାଇ କିନାକାନିଙ୍ଗ୍ ରଥ ଟେବାଇ କିଦେଙ୍ଗ୍ ୱେଚ୍ଚାନ୍। ଲାଗିଙ୍ଗ୍ ହେୱାର୍ ନାଗୁଡ଼୍ତାକେ ବିତ୍ରେ ହାଚାର୍, ଆରେ ଫିଲିପ ହେ ଇଥିଓପିଆଙ୍ଗ୍ ଡୁବନ୍ ହିତାନ୍।
ହେୱାର୍ ଏଜୁଙ୍ଗ୍ ତାଙ୍ଗ୍ ନିଙ୍ଗ୍ଜି ୱାତି ପାଚେ, ପବିତ୍ର ଆତ୍ମା ଫିଲିପତିଙ୍ଗ୍ ଜେକନି ର ବାହାତାକେ ଅସାହାଚାତ୍ ଇମେତାକେ ହେୱାନ୍ ଯୀଶୁ ବିଷୟରେ ମାନାୟାରିଙ୍ଗ୍ ୱିଜୁଦିନ୍ ୱେଚ୍ଚେଙ୍ଗ୍ ଲାଗାତାନ୍।
ଇଥିଓପିଆ ତା ଇଲ୍ ନିପଣ୍ ହାଚାନ୍, ହେୱାନ୍ ୱାରି ଆତାନ୍ ଯେ ହେୱାନ୍ ଯୀଶୁଙ୍ଗ୍ ପୁଚାନ୍।
ବାଇବଲ୍ନି ର କାତା: ପ୍ରେରିତ ୬: ୮- ୮: ୫; ୮: ୨୬- ୪୦: ୪୬
Free to use, adapt, and share under an open license (CC BY-SA 4.0).