46. ୪୬. ସ୍ତିପାନତିଙ୍ଗ୍ ମାର୍ନେ ଅସ୍ତି ମାନାୟାର୍ ହେନ୍ଦ୍ରାକାଙ୍ଗ୍ କାସିମାନି ଜୁବା ହିମ୍ଣା ଆନାନା ସାଉଲ
ଇୱାନ୍ ଯୀଶୁତାକେ ପାର୍ତି କିୱାତାନ୍, ଲାଗିଙ୍ଗ୍ ପାର୍ତିକିନାକାରିଙ୍ଗ୍ ହେୱାନ୍ ଦୁକ୍କଷ୍ଟ ହିଜି ମାଚାନ୍। ହେୱାନ୍ ଯିରୁଶାଲାମ ସହର୍ତାକେ ମାନି ପାର୍ତି କିନାକାର୍ ଇଞ୍ଜ ହଣ୍ଜି ୱିଜୁ ଆଣ୍ଡ୍ରା ଆରେ କଗ୍ଲେକାଙ୍ଗ୍ ଗାଚ୍ଚି-ଗାଚ୍ଚି ତାହିୱାଜି ମାଚାନ୍ ଆରେ ଜଇଲ୍ ଇଞ୍ଜ ବନ୍ଦିକିଜି ମାଚାନ୍। ଦମେସକତାକେ ମାନି ଖ୍ରୀଷ୍ଟାନାରିଙ୍ଗ୍ ଇନେସ୍ ଶାଉଲ ଆସ୍ତି ଯିରୁଶାଲାମ ସହର୍ତାକେ ତାସିୱାନି କାଜିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରି ହେୱାନିଙ୍ଗ୍ ଆଦେସ୍ ହିଜି ମାଚାନ୍। ଶାଉଲ ଏଚେପାଦ୍ନା ଦମେସକ ହାଜ୍ଦିଙ୍ଗ୍ ହାଲ୍ଜି ମାଚାନ୍, ବାଦାଡ଼୍ତାଙ୍ଗ୍ ର ବେସି ଅଜଡ଼୍ ତା ଚାରିବେଣ୍ତାଙ୍ଗ୍ ଆତାତ୍ ଆରେ ହେୱାନ୍ ମେନ୍ଦିତାକେ ଗୁର୍ତାନ୍।
ଇନେର୍ ରକାନ୍ ଇଦାଙ୍ଗ୍ ୱେଚ୍ନାକା ଶାଉଲ ୱେଚ୍ଚାନ୍, “ଶାଉଲ! ଶାଉଲ! ଏନେଙ୍ଗ୍ ଇନାକିଦେଙ୍ଗ୍ ନାଙ୍ଗେଙ୍ଗ୍ ଦୁକ୍କଷ୍ଟ ହିଦ୍ନାୟା?” ଶାଉଲ ୱେନ୍ବାତାନ୍, “ମାପୃ, ଏନେଙ୍ଗ୍ ଇନେର୍?” ଯୀଶୁ ୱେଚ୍ଚାନ୍, “ଆନେଙ୍ଗ୍ ଯୀଶୁ। ଏନେଙ୍ଗ୍ ନାଙ୍ଗେଙ୍ଗ୍ ଦୁକ୍କଷ୍ଟ ହିଦ୍ନାୟା।ଶାଉଲ ଏଚେପାଦ୍ନା ନିଙ୍ଗ୍ତାନ୍, ହେୱାନ୍ ଅଲପ୍ ପା ହୁଡ଼୍ଦେଙ୍ଗ୍ ଆଡ୍ୱାତାନ୍।”
ତା ସାଙ୍ଗହିର୍ ହେୱାନିଙ୍ଗ୍ କେଇଦ ଆସ୍ତି ଦମେସକ ସହର୍ତାକେ ଅସାହାଚାର୍। ଶାଉଲ ତିନ୍ଦିନ୍ ପାତେକ୍ ଇନାକା ତିନ୍ୱାତାନ୍ କି ଉଣ୍ୱାତାନ୍। ହନନିୟ ତର୍ଦାକାନ୍ ରକାନ୍ ଚେଲାହି ଦମେସକ ସହର୍ତାକେ ମାଚାନ୍।
ଈଶ୍ୱର ହେୱାନିଙ୍ଗ୍ ୱେଚ୍ଚାନ୍, “ଶାଉଲ ମାନି ଇଞ୍ଜ ହାଲା। ତା ଜପି କେଇ ଇଡ଼୍ଜି ପାର୍ତାନା କିୟା ଇନେସ୍କି ହେୱାନ୍ ହୁଡ଼୍ଦେଙ୍ଗ୍ ଆଡ୍ନାନ୍।” ମାତର୍ ହନନିୟ ୱେଚ୍ଚାନ୍, “ମାପୃ, ଇୱାନ୍ ଇନେସ୍ ପାର୍ତିକିନାକାରିଙ୍ଗ୍ ଦୁକ୍କଷ୍ଟ କିତାନ୍ନା ହେଦାଙ୍ଗ୍ ଆନେଙ୍ଗ୍ ୱେଚାଙ୍ଗ୍ନା।” ଈଶ୍ୱର ହେୱାନିଙ୍ଗ୍ ୱେଚ୍ଚାନ୍, “ହାଲା! ଯିହୁଦି ଆରେ ଜେକନି ମାନାୟ୍ ଦଳ୍ ଲାଗାୟ୍ ନା ତର୍ ୱେଚ୍ନି କାଜିଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ବାଚି କିତାଙ୍ଗ୍ନା। ହେୱାନ୍ ନା ତର୍ କାଜିଙ୍ଗ୍ ବେସି ଦୁକ୍କଷ୍ଟ ପାୟାଆନାନ୍। ଲାଗିଙ୍ଗ୍ ହନନୀୟ ଶାଉଲ ମାନି ଇଞ୍ଜ ହାଚାନ୍, ତା ଜପି ତା କେଇ ଇଡ଼୍ଜି ପାର୍ତାନା କିତାନ୍ ଆରେ ୱେଚ୍ଚାନ୍, “ଏନେଙ୍ଗ୍ ଇବେ ୱାନିହିଙ୍ଗ୍ ଇମ୍ଣି ଯୀଶୁ ନିଙ୍ଗେଙ୍ଗ୍ ଚଞ୍ଜି ଆତ୍ତାନ୍ନା, ହେୱାନ୍ ନାଙ୍ଗେଙ୍ଗ୍ ନି ଲାଗାୟ୍ ପକ୍ତାତାନ୍ନା ଇନେସ୍କି ଏନେଙ୍ଗ୍ ହୁଡ଼୍ଦେଙ୍ଗ୍ ଆଡ୍ନାୟ୍ ଆରେ ପବିତ୍ର ଆତ୍ମାତାଙ୍ଗ୍ ପୁରା ଆନାୟ୍।”
ଶାଉଲ ସାଙ୍ଗେ-ସାଙ୍ଗେ ହୁଡ଼୍ଦେଙ୍ଗ୍ ଆଡ଼୍ତାନ୍, “ହନନୀୟ ହେୱାନିଙ୍ଗ୍ ଡୁବନ୍ ହିତାନ୍। ତାପାଚେ ଶାଉଲ ଇଚ୍କେ କାଦି ଚିଚାନ୍ ଆରେ ଶାକ୍ତି ପାୟାଆତାନ୍।” ହେଦାପ୍ରେ ଶାଉଲ ଦମେସକ ସହର୍ତାକେ ମାନି ଯିହୁଦିର୍ ଲାଗାୟ୍ ଇଦାଙ୍ଗ୍ ଶୁଣାୟ୍ କିଦେଙ୍ଗ୍ ଆରମ୍ କିତାନ୍ ଯୀଶୁ ନେ ଈଶ୍ୱର ମେହି।
ଇମ୍ଣି ମାନାୟ୍ ପାର୍ତିକିନାକାରିଙ୍ଗ୍ ନଷ୍ଟ କିନି କାଜିଙ୍ଗ୍ ଉପାୟ୍ କିଜି ମାଚାନ୍ ଆରେ ହେୱାନ୍ ନଙ୍ଗୟ୍ ଯୀଶୁତାକେ ପାର୍ତି କିନାନ୍ ହେ ବିଷୟରେ ଯିହୁଦିର୍ ଚାନିଆ ଆତାର୍। ଶାଉଲ ଯିହୁଦିର୍ ହୁଦାଙ୍ଗ୍ ଜୁକ୍ତିକିଜି ଚଚ୍ଚାନ୍, “ଯୀଶୁ ନେ ଖ୍ରୀଷ୍ଟ।” କେତ୍ଦିନ୍ ହାଚି ପାଚେ, ଶାଉଲତିଙ୍ଗ୍ ମାର୍ନେ ଅହ୍ନି କାଜିଙ୍ଗ୍ ଯିହୁଦିର୍ ଉପାୟ୍ କିତାର୍।
ହେୱାର୍ ହେୱାନିଙ୍ଗ୍ ମାର୍ନେ ଅହ୍ନି କାଜିଙ୍ଗ୍ ଦେସ୍ନି ଦୁୱାର୍ତାକେ କାତେଙ୍ଗ୍ ମାନାୟାରିଙ୍ଗ୍ ପକ୍ତାର୍। ମାତର୍ ଶାଉଲ ହେ ଉପାୟ୍ କିତି ବିଷୟରେ ୱେଚାନ୍, ଆରେ ହେବେତାଙ୍ଗ୍ ହୁଗ୍ଜି ହାନି କାଜିଙ୍ଗ୍ ତା ସାଙ୍ଗହିର୍ ସାଇଜ କିତାର୍। ରଦିନ୍ ନାଣା ହେୱାର୍ ର ଟପାତାକେ ହେୱାନିଙ୍ଗ୍ ବାଉଣ୍ଡେରି ଜପିତାଙ୍ଗ୍ ତାରେନ୍ ଜୁତ୍ତାର୍। ଶାଉଲ ଦମେସକ ସହର୍ତାଙ୍ଗ୍ ଡ଼ୁଗ୍ଜି ହାଚି ପାଚେ, ହେୱାନ୍ ଯୀଶୁ ବିଷୟରେ ଶୁଣାୟ୍ କିଜି ବୁଲାଆତାନ୍। ଶାଉଲ ଚେଲାହିର୍ ହୁଦାଙ୍ଗ୍ ଗିଟାଆନି କାଜିଙ୍ଗ୍ ଯିରୁଶାମ ସହର୍ତାକେ ହାଚାନ୍, ମାତର୍ ହେୱାର୍ ହେୱାନିଙ୍ଗ୍ ପାଣ୍ଡ୍ରାଆଜି ମାଚାର୍।
ତାପାଚେ ବର୍ଣ୍ଣବା ତର୍ଦାକାନ୍ ରକାନ୍ ପାର୍ତିକିନି ଚେଲାହିର୍ ଲାଗାୟ୍ ଶାଉଲତିଙ୍ଗ୍ ଅସାହାଚାନ୍ ଆରେ ହେୱାରିଙ୍ଗ୍ ୱେଚ୍ଚାନ୍ ଯେ ଇୱାନ୍ ଇନେସ୍ ଦମେସକ ସହର୍ତାକେ ସାହାସ୍ ହୁଦାଙ୍ଗ୍ ଈଶ୍ୱର କାତା ଶୁଣାୟ୍ କିଜି ମାଚାନ୍। ତାପାଚେ ଚେଲାହିର୍ ଶାଉଲତିଙ୍ଗ୍ କୁକ୍ତାର୍। ଇମ୍ଣି ପାର୍ତିକିନାକାର୍ ଦୁକ୍କଷ୍ଟ କାଜିଙ୍ଗ୍ ଯିରୁଶାଲାମ ସହର୍ ପିସ୍ତି ହାଲ୍ଜି ମାଚାର୍, ହେୱାର୍ ଆନ୍ତିୟକିଆ ସହର୍ ପାତେକ୍ ହାଲ୍ଜି ଯୀଶୁ ବଷୟରେ ଶୁଣାୟ୍ କିଦେଙ୍ଗ୍ ଲାଗାତାର୍।
ଆନ୍ତିୟକିଆ ସହର୍ତାକେ ମାନି କେତେକ୍ ମାନାୟ୍ ଯିହୁଦି ହିଲ୍ୱାତାର୍, ମାତର୍ ପାର୍ତୁମ୍ ହଟ୍ କାଜିଙ୍ଗ୍ ହେୱାର୍ ବିତ୍ରେତାଙ୍ଗ୍ କେତେକ୍ ମାନାୟାର୍ ପାର୍ତିକିତାର୍। ବର୍ଣ୍ଣବା ଆରେ ଶାଉଲ ହେବେ ମାନି ପୁନି ପାର୍ତିକିନାକାରିଙ୍ଗ୍ ଯୀଶୁ ବିଷୟରେ ଆଦିକ୍ ଶିକ୍ଷା ହିନି କାଜିଙ୍ଗ୍ ଆରେ ମଣ୍ଡ୍ଲିତିଙ୍ଗ୍ ବାଡ଼୍କାସ୍ କିନି କାଜିଙ୍ଗ୍ ହାଚାର୍। ଆନ୍ତିୟକିଆ ସହର୍ନି ମଣ୍ଡ୍ଲିତାକେ ମାନି ପାର୍ତିକିନାକାରିଙ୍ଗ୍ ପାର୍ତୁମ୍ ଖ୍ରୀଷ୍ଟାନ୍ ଇଞ୍ଜି ୱେଚ୍ଚାର୍। ଦିନେକ୍ ଆନ୍ତିୟକିଆ ମଣ୍ଡ୍ଲିତାକେ ମାନି ଖ୍ରୀଷ୍ଟାନାର୍ ଉପାସ୍ ଆରେ ପାର୍ତାନା କିନିହିଙ୍ଗ୍ ପବିତ୍ର ଆତ୍ମା ହେୱାରିଙ୍ଗ୍ ୱେଚ୍ଚାତ୍, ବର୍ଣ୍ଣବା ଆରେ ଶାଉଲତିଙ୍ଗ୍ ଇମ୍ଣି କାମାୟ୍ କାଜିଙ୍ଗ୍ ଆନେଙ୍ଗ୍ କୁକ୍ତାଙ୍ଗ୍ନା। ହେଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ ନା କାଜିଙ୍ଗ୍ ଜେକ କିୟାଟ୍।
ଲାଗିଙ୍ଗ୍ ଆନ୍ତିୟକିଆ ସହର୍ନି ମଣ୍ଡ୍ଲିନି ମାନାୟାର୍ ବର୍ଣ୍ଣବା ଆରେ ଶାଉଲ କାଜିଙ୍ଗ୍ ପାର୍ତାନା କିଜି ହେୱାର୍ ଜପି କେଇ ଇଡ଼୍ତାର୍। ତାପାଚେ ହେୱାର୍ କେତେକ୍ ବାହାତାକେ ଯୀଶୁ ବିଷୟରେ ହାର୍ଦିକାବୁର୍ ଶୁଣାୟ୍ କିନି କାଜିଙ୍ଗ୍ ହେୱାରିଙ୍ଗ୍ ପକ୍ତାର୍। “ବର୍ଣ୍ଣବା ଆରେ ଶାଉଲ ବାରବିନି ମାନାୟ୍ ଦଳ୍ତିଙ୍ଗ୍ ହିକ୍ଷା ହିଦେଙ୍ଗ୍ ଲାଗାତାର୍“ ଆରେ କେତେକ୍ ମାନାୟାର୍ ଯୀଶୁତାକେ ପାର୍ତିକିଦେଙ୍ଗ୍ ଲାଗାତାର୍।
ବାଇବଲ୍ନି ର କାତା: ପ୍ରେରିତ ୮: ୩; ୯: ୧- ୩୧; ୧୧: ୧୯- ୨୬; ୧୩: ୧- ୩୪୭
Free to use, adapt, and share under an open license (CC BY-SA 4.0).