23. यीशु ज़ु जन्म

युसुफ मिनदागं इच़ा धर्मी मीरांग मरियमो शागुन शुचे इन्जि तोई। अपेल दोई थज़ि कि मरियम खोग्टांग तो दोबि पता तोई कि दि दोऊ काटु मशु। पर दोई मरियमबि बदनाम लज़िम मतरे, दोऊ थल्ज़ि दोई दोऊ टोख्टे कृपा लज़िमि ए दोबि चुप्पे तलाक रन्जिमि सोचेक्ति। पर दिबे तुई कि दोई ध्यांह लोतो, इच़ा स्वर्गदूते दोऊ मांङरिंग आन्जे दोरांग गप्पा लरि।

दु स्वर्गदूते कुड़ि, “हे युसुफ, मरियमबि केनो मेच़ा ले हापिरिंग थबेऊ। दोऊ अन्दरेग आंऊ कटु तो दु इच़ा पवित्र आत्माऊ धुन्ना शु। दोई इच़ा यो जेपि लोतो। दोऊ मिन यीशु केऊ (दोऊ अर्थ दि शोतो, ‘यहोवा बचाच़ाड़’), छेईकुचे दोई मीतिंग दोतु पापो धुन्ना बचापतो।”

दांङ युसुफे मरियमरांग व्याह लरि ए दोबि एनो मेच़ा ले च़ुंखा लेन्ज़ा हाति, पर दोऊ कटु जेतचि दु दोरांग साथे फेटे मशु।

अपेल मरियमो लिक्पिमि ध्याड़ा च़म्बे तोई, दांङ दोई ए युसुफे बैतलहम इबिमि इच़ा लामे सफर लत्तोकु। दोकुतिंग दोरतिग इबिमिए तोई छेईकुचे रोमी अधिकारीज़ि इस्राएलांग बांगज़ाड़ बत्ते मितिंग मिक्च़िम तरे। दोच़ि जुन्जतेर कि बत्ते मीरे दोर इन्जांग आंरतिग दोतु पूर्वजरे बांगज़तेर। राजा दाऊद बैतलहमांग जेकते, आई दु मरियमे युसुफ जुल्लो पूर्वज तोई।

मरियमे युसुफ बैतलहम इलिकु, पर दोर डेल्ल क चढ़े दोकुतिंग बांगज़िरिंग उई छल्ले ठाढ़ि मतोई। दि दु ए ठाढ़ि तोई आंर मरियमे एनो कटुबी जेपि लत्ते। दोई दोबि चरनीऊ टोख्टे फेटे लरि छेईकुचे दोर दोतु थल्ज़ि छल्ले बिस्तर मतोई। दोकुई दोऊ मिन यीशु केरिकु।

दु रात, कच्चो रीरिंग रेई पोहालरेच़ि त्रेंईतु थाच रुन्ड्रि लज़ि लेकि तोईरे, अचानके इच़ा यब-यब स्वर्गदूत दोतु टोखटे प्रकट शुई, दांङ दोरे बैए इलिरे। दु स्वर्गदूते कुत्तो कि, “बेऊईं थाईं, छेई कुचे ग्यु कचरिंग केतु थल्ज़ि रूठे उजाब तो। तोग्ग दाउदो नग्गर बैतलहमांग केतु थल्ज़ि मुक्ति रन्जाड़ जेका, दु ए मसीह ए प्रभु शु!”

इन्जे दु काटुबि पेड़ुईं, दांङ केच़ि दोबि खाम्मज़ु बिचांग जिल्सी ए चारनिऊ टोखटे फेटे खोक्पोईं। धोपेल ए, सर्ग स्वर्गदूतरांग बिंङे इलि। दोच़ि परमेश्वरो अराधना लज़ि लेकि तोईरे। दोच़ि कुड़िरे, “बत्ते महिमा स्वर्गरिंग बांगसी परमेश्वरबि खोक्सी जुस। धरतीरिंग दु मीतु बिचांग शान्ति शुबि जूस आच़ि दोऊ चिन्द लज़ा!”

दांङ स्वर्गदूतरे अच़ा इलिरे। त्रेईं रवाक्च़ाड़रे ल एनतु त्रैईंतिंग केट्रा दु कटुबी खान्ड्रि इलिरे। युरने दोरे दु ठाड़िरिंग पिड़िरे आंर यीशू तोई दांङ दोच़ि दोबि चरनीरिंग फेटे खोक्तिरे, छना कि दु स्वर्गदूते कुत्ते। दोरे मास्स राजी तोईरे। दांङ दु पोहालरे यच़ा दोर अच़ा इलिरे आंर दोतु त्रेईंरे तोईरे। दोच़ि चीए तांङतेर ए रेड्रेतेरे दु बत्तेतु थल्ज़ि दोच़ि परमेश्वरो अराधना लज़ि लेकि तोईरे।

पूर्वरिंग ओईतारे इच़ा देशरिंग मिना गांङमिरे तोईरे। दोचि करज़ेतु पढ़ाई लसि तरिरे ए दोरे मास्स बुद्धिमान ल तोईरे। दोच़ि इच़ा नोखे कर सर्गरिंग तांङरिरे। दोच़ि कुड़िरे कि दिऊ मतलब शु कि यहूदीरेतु इच़ा खारकोई राजाऊ जन्म शुचा। दोऊ थल्ज़ि दोच़ि दु काटुबी खन्ड्रिम थल्ज़ि एनतु देशरिंगज़ि यात्रा लेईमि फैसला लेईरे। इच़ा लामे यात्राओ थल, दोरे बैतलहम अतिरे दांङ दु घरबार खोक्तिरे आंर यीशु ए दोऊ या बाकु बांगज़तेकु।

अपेल दि गांग्मिच़ि यीशूबी एनो या रांग साथे तांङरिरे दोच़ि एनतु पुश्तु बले बांगज़ा अराधना लरिरे। दोच़ि यीशूबि कीमती तोहफा रेईंरे। दांङ दोरे चुंखा यच़ा इलिरे।