10. दस महामारी

परमेश्वर न मूसा अखिन हारून ला चेताय देइस की फिरौन हठीला होय जाए। जब येव फिरौन को जवर गया तब उन कहिन, “इस्राइल को परमेश्वर येव कसे की, ‘मोरो लोखहीन ला जान दे!” पर फिरौन न उनकी नहीं आयकिस अखिन इस्राएलिहिन ला खुलो होए के जान देन को बजाए वन उनला अखिन जादा मेहनत करन लाइक मजबूर करिस।

फिरौन वन लोखहीन ला जान देन लाइक लगातार मना कर रहीसे,येकोलाइक परमेश्वर न मिस्र पर दस भंयकर महामारी ला धाड़िस। यन महामारी को कारन, परमेश्वर न फिरौन ला देखाइस की ऊ फिरौन अखिन मिस्र का देवी-देवताइन लक जादा शक्तिशाली से।

परमेश्वर न नील नदी ला खून मा बदल देइस, पर फिरौन न आब भी इस्राएलिहिन ला जान नहीं देइस।

परमेश्वर न पुरो मिस्र मा मेंढक धाड़िस। फिरौन न मेंढकहिन ला दूर करन लाइक मूसा सीन आग्र करिस। पर पूरा मेंढक को मर जान को बाद मा, फिरौन न आपरो मन ला कठ्ठर कर लेइस अखिन इस्राएलिहिन ला मिस्र लक जान नहीं देइस।

येकोलाइक परमेश्वर न कूटकीहिन की महामारी धाड़िस। ओको बाद मा वन डांसो को महामारी ला धाड़िस। फिरौन न मूसा अखिन हारून ला बुलाइस अखिन उनको सीन कइस की अगर वय वन महामारी ला रोक देएती त इस्राएलि मिस्र ला छोड़ सारी जाय सिकसेत। जब मूसा न प्रार्थना करिस त परमेश्वर न मिस्र पर लक डांसो ला हटाय देइस। पर फिरौन न आपरो मन ला कठ्ठर कर लेइस अखिन वन लोखहीन ला खुला होय के जान नहीं देइस।

येको पयले, परमेश्वर न मिस्रीइन को पूरा पालतू जनवर इनला बीमार होसारी मर जान देइस। पर फिरौन को मन कठ्ठर भय गएव होतो अखिन वनइस्राएलिइन ला जान नहीं देइस।

तब परमेश्वर न मूसा सीन फिरौन को समूर हवा मा राख फेंकन लाइक कइस। जब वन असो करिस त मिस्र को लोखहीन को मास परा दुखदायक फोड़ा निकलया,पर इस्राएलिइन ला काई नहीं भएव। परमेश्वर न फिरौन को मन ला कठ्ठर कर देइस, अखिन फिरौन न इस्राएलिइन ला खुलो होकर जान नहीं देइस।

येको बाद मा, परमेश्वर न इस्तो पाडिस अखिन मिस्र को जादा फसल ला नुकसान कर देइस अखिन ज़ेव कोई बाहारा निकलेव ओला मार डाकिस। फिरौन न मूसा अखिन हारून ला बुलाइस अखिन उनको सीन कइस, “मीन पाप करिसेव। तुमि लोक जाय सिकसेव।” त मूसा न प्रार्थना करिस की, अखिन बादर लक इस्तों पड्नो बंद भय गएव।

पर फिरौन न अखिन पाप करीस अखिन आपरो मन ला कठ्ठर कर लेइस। वन इस्राएलिइन ला खुलो होय के जान नहीं देइस।

अधिक परमेश्वर न मिस्र पर टिड्डीइन को झुंड ला आवन देइस। येन टिड्डीइन न उन पूर्ण अनाज ला खाय लेइन जोला ओलाइन लक नाश नहीं करी होतीस।

मंग परमेश्वर न इंधारों कर देइस ऊ तीन दिवस वरी रहेव। येव एतरो इंधारों होतो की मिस्री लोक आपरो घरइन मा लक निकल नहीं सिकया। पर जहाँ इस्राएलि लोक रवत होता वाहा ऊजाड़ो होतो।

येन नौ महामारी को बाद भी, फिरौन न इस्राएलिइन ला खुलो होकर जान देनला मना कर देइस। जोकि फिरौन न नहीं आयकी होतीस येकोलाइक परमेश्वर न एक आखरी महामारी धाड्न की सोचिस। यव फिरौन को मन ला बदल देए।